Lucas 9
9
Jaꞌ Yet Jix Ẍejontoj Lacawan Scuywom Jesús
(Mateo 10:5-15; Marcos 6:7-13)
1Jaꞌ yet junel, jix yawte oc joyan ebꞌ lacawan scuywom scꞌatan Jesús. Jix akꞌle yip ebꞌ. Catuꞌ jix akꞌle pax yopiso ebꞌ iꞌo can el pena espíritu yin ánima, cꞌal yakꞌon can waꞌxoj scꞌul ebꞌ ánima yaꞌey. 2Jix ẍejontoj ebꞌ, yu ecꞌ yalon can el ebꞌ tzet utbꞌil chi yun yoc Dios Yaawiloj ebꞌ ánima, cꞌal ecꞌ yakꞌle can waꞌxoj scꞌul ebꞌ yaꞌey yu ebꞌ. 3Jaꞌ yet cꞌamto chi too ebꞌ, catuꞌ jix yalon tet ebꞌ jaxca tiꞌ:
—Manche je yiꞌ niꞌoj yet je bꞌe. Manche je yiꞌ je kꞌojoch, je pa, je loꞌbꞌe, ma je tumin, cꞌal je pichil asan junjun eyoc je yu tiꞌ che yiꞌtoj. 4Yal cꞌal tzet nail bꞌey chex apni, jacꞌal tituꞌ che yakꞌ je posada masantaꞌcꞌal chex too bꞌey junojxa lugar. 5Ta ey mac cꞌam chex chaꞌoni, chex el yul sconobꞌ ebꞌ tuꞌ. Che tzic can el spojojal je yajan yu je txꞌoxon eloj tol cꞌamxa je yalon je yet yin ebꞌ, catuꞌ chex toi, ẍi Jesús tet ebꞌ.
6Jix lawi tuꞌ xin, catuꞌ jix too ebꞌ. Jix ecꞌ ebꞌ bꞌey junjun aldea. Jix yal can el watxꞌ kꞌane yet colbꞌanile ebꞌ. Jix waꞌxi pax can scꞌul ebꞌ yaꞌey bꞌey junjun lugar yu ebꞌ.
Jix Qꞌueya Scꞌul Naj Herodes Yu Jesús
(Mateo 14:1-12; Marcos 6:14-29)
7Jaꞌ naj Herodes, naj yaaw bꞌey Galilea, jix yabꞌ skꞌumal naj tzettaj yetal jix el yunen Jesús. Tucꞌal chi qꞌueya scꞌul naj, yutol ey ebꞌ jix alon jaxca tiꞌ: “Jaꞌ jun tuꞌ chi el yunen wan tzetyetal tuꞌ, jaꞌ naj Juan, jix pitzcꞌu a naj xol ebꞌ camnaj,” ẍi ebꞌ. 8Ey pax ebꞌ chi aloni: “Jaꞌ naj Elías chi jul xꞌox ecꞌ sbꞌa,” ẍi ebꞌ. Ey pax wanxa chi aloni tol jaꞌ junojxa ebꞌ ẍejabꞌ Dios yet peyxa jix pitzcꞌu aoj catuꞌ jix jul xꞌox ecꞌ sbꞌa. 9Jix yalon naj Herodes tuꞌ jaxca tiꞌ:
—Jal jin jain tiꞌ, jix wakꞌ orden, catuꞌ jix iꞌle el sjolom naj Juan tuꞌ. Yuxan, ¿mac mi txequel jun caw chi yalel ebꞌ tuꞌ? ẍi naj. Caw chi yoche naj Herodes tuꞌ chi yil Jesús yetoj sat.
Jaꞌ Ebꞌ Joebꞌ Mil Winaj Jix Akꞌle Low Yu Jesús
(Mateo 14:13-21; Marcos 6:30-44; Juan 6:1-14)
10Jaꞌ yet jix jul ebꞌ ẍejabꞌ Jesús yin ẍejbꞌanil tuꞌ, jix cꞌoli yalon ebꞌ tet, tzettaj cꞌal jix el yunen junjun ebꞌ. Catuꞌ jix iꞌletoj ebꞌ yu Jesús. Jix apni ebꞌ xꞌojli yetoj Jesús bꞌey jun lugar scawilal conobꞌ Betsaida. 11Jix yabꞌ cꞌal ebꞌ ánima tol chi too ebꞌ tituꞌ. Yuxan, tzajan stoo ebꞌ yintaj Jesús. Jix chaꞌle apnoj ebꞌ yu Jesús bꞌey jix apni tuꞌ, catuꞌ jix yalon xol ebꞌ tuꞌ tzet oj yun yeloc ebꞌ chi oc Dios Yaawiloj. Jix yakꞌon pax can waꞌxoj scꞌul ebꞌ yaꞌey.
12Jaꞌ yet lalanxa yeycꞌu, jix apni ebꞌ lacawan scuywom scꞌatan Jesús. Jix yalon ebꞌ tet Jesús jaxca tiꞌ:
—Tejan watxꞌ ta cha chejtoj ebꞌ ánima tiꞌ bꞌey wan aldea yetoj bꞌey wan lugar cu cawilal tiꞌ, yet watxꞌ chi sman slow sbꞌa ebꞌ, catuꞌ chi wey ebꞌ tituꞌ. Yutol jaꞌ bꞌey ey jon ecꞌ tiꞌ, cusiltaj txꞌotxꞌ, ẍi ebꞌ tet Jesús.
13Jix yalon Jesús tet ebꞌ jaxca tiꞌ:
—Akꞌwej low ebꞌ jaex tiꞌ, ẍi Jesús tet ebꞌ.
—Asan chꞌan joebꞌ cu pan iꞌbꞌil yetoj cacꞌon cu pescado jon. ¿Tumi chi too cu man yet ebꞌ ánima tiꞌ jon? ẍi ebꞌ tet Jesús.
14Ey mi joebꞌoj mil sbꞌisil ebꞌ winaj eyecꞌ tituꞌ. Jix yalon Jesús tet ebꞌ scuywom tuꞌ jaxca tiꞌ:
—Alwej tet ebꞌ, ey ojabꞌ chotan ebꞌ yin bꞌulquiltajil. Cincuentataj ojabꞌ sbꞌisil junjun bꞌulan, ẍi Jesús tet ebꞌ.
15Jaxca tuꞌ jix yute ebꞌ. Jaꞌ yet jix ey chotan masanil ebꞌ ánima tuꞌ, 16jix yiꞌon a joebꞌ ixim pan tuꞌ Naj Jesús, cꞌal cacꞌon noꞌ pescado tuꞌ. Jix a tꞌanan satcan, catuꞌ jix yalon yu diosalil tet Dios yu, catuꞌ jix spoꞌon eyoj. Catuꞌ jix yakꞌon tet ebꞌ scuywom tuꞌ yet chi spoꞌon ecꞌ ebꞌ xol ánima tuꞌ. 17Jix low masanil ebꞌ, caw jix sno scꞌul masanil ebꞌ. Jaꞌ yet jix lawi slow ebꞌ, lacawebꞌ to xuc jix no can el yu sobrail loꞌbꞌe.
Jix Yal Naj Pedro, Tol Jaꞌ Jesús, Cristo* Toni
(Mateo 16:13-19; Marcos 8:27-29)
18Jaꞌ junel, eecꞌ Jesús txaloj xꞌojli yetoj ebꞌ scuywom. Jix skꞌanlen tet ebꞌ jaxca tiꞌ:
—¿Mac jin txequel yal ebꞌ ánima che yabꞌe? ẍi Jesús tet ebꞌ.
19—Ey ebꞌ chi aloni tol jaꞌ naj Juan Bautista jaach, yal ebꞌ. Ey pax ebꞌ chi aloni tol jaꞌ naj Elías jaach, yal ebꞌ. Ey ebꞌ xin, tol jaꞌ junojxa ebꞌ ẍejabꞌ Dios yet peyxa, jix pitzcꞌu a xol ebꞌ camom, ẍi ebꞌ, ẍi ebꞌ cuywom tuꞌ tet Jesús.
20Jal jaex pax oj, ¿mac jin txequel je yaloni? ẍi Jesús tet ebꞌ.
Jix takꞌwi naj Pedro tet Jesús jaxca tiꞌ:
—Jaach tiꞌ, cu Cristoal* jaach, Akꞌbꞌil ja Wopiso yu Dios, ẍi naj Pedro tet Jesús.
Jix Yaltej Jesús Yu Scamichal
(Mateo 16:20-28; Marcos 8:30—9:1)
21Jix cam yalon Jesús tet ebꞌ, tol cꞌam junoj mactxequel bꞌey chi yal ebꞌ jun jix yal Pedro tuꞌ. 22Jix yalon pax tet ebꞌ jaxca tiꞌ:
—Jain tiꞌ, Akꞌbꞌil Wopiso yu Dios xol ebꞌ ket animail an, caxcꞌal yel jun tuꞌ, sowalil oj wil pax syaꞌilal. Oj jin intajnele can el yu ebꞌ ichamtaj winaj ey yopiso, cꞌal yu ebꞌ yakꞌomal xaambꞌal tet Dios yetoj yu ebꞌ cuywam yin sley Moisés. Oj jin yakꞌ cam ebꞌ an, jaxa yin yoxial, oj jin pitzcꞌu pax aoj, ẍi Jesús tet ebꞌ.
23Catuꞌ jix yalon tet masanil ebꞌ jaxca tiꞌ:
—Ta ey mactxequel chi yoche chi ecꞌ cꞌal cuywoj wintaj an, sowalil manxa ojabꞌ yetoj sbꞌa xꞌojli. Yabꞌ ojabꞌ syaꞌil ebꞌ jin yaꞌiloj jain tiꞌ junjun cꞌu, jaxca tol chi locbꞌale a ebꞌ yin culus. Ta bꞌejan scꞌul ebꞌ jaxca tuꞌ, ecꞌ ojabꞌ ebꞌ cuywoj wintaj an. 24Yutol jaꞌ ebꞌ cꞌam chi yoche chi cam bꞌey yul yibꞌankꞌinal tiꞌ, chi sbꞌejel ebꞌ jun kꞌinale tol ey cꞌal yin tobꞌalkꞌinal. Jal pax ebꞌ bꞌejan scꞌul scam jin yaꞌiloj an xin, jaꞌton ebꞌ tuꞌ oj chaꞌon kꞌinale tol ey cꞌal yin tobꞌalkꞌinal. 25Kꞌinaloj ta chi kakꞌ ganar kiꞌon masanil tzet ey yul yibꞌankꞌinal tiꞌ, ta cꞌam pax scolbꞌanil cu pixan, tucꞌaltaꞌ oj cu tojcan bꞌey syaꞌtajilal yin junelne, chi yal tuꞌ. ¿Tzet wal cu ganar jaxca tuꞌ xin? 26Ta ey mac chi qꞌuixwi a jin yaꞌiloj an, cꞌal yu jin kꞌane an, oj jin qꞌuixwoj pax walon el ebꞌ an, jain Akꞌbꞌil Wopiso xol ebꞌ ket animail tiꞌ an, yet oj jin jul wakꞌon Yaawil. Jaꞌ yet tuꞌ oj jin jul yetoj yipalil jin Mam an, cꞌal yetoj yipalil ebꞌ ángel. 27Caw yel chi wal ey jex, ey wan jex titiꞌ, cꞌamto chex cami catuꞌ oj je yiloni, tol eyoc Dios yin Yaawiloj, ẍi Jesús tet ebꞌ.
Jix Qꞌuexmo Yili Jesús
(Mateo 17:1-8; Marcos 9:2-8)
28Jujubꞌixi mi yal Jesús wan tuꞌ, jix too txaloj bꞌey jun wonan. Jix yiꞌontoj Pedro yetoj Jacobo cꞌal Juan yetoj. 29Jaꞌ yet lalan xali tuꞌ, jix qꞌuexmo yili Jesús, txꞌojxa jix yun yili sat. Jaꞌ spichil, caw saj jix yun yili, tuxa cꞌal chi tzejeji. 30Eyman jix xꞌoxa sbꞌa cawan winaj, jaꞌton naj Moisés yetoj naj Elías. 31Ey jun miman tzejejial jix majchen ey ebꞌ. Jix kꞌanabꞌ ebꞌ yetoj Jesús yu tzet oj yun scam Naj bꞌey Jerusalén. 32Jaꞌ naj Pedro yetoj ebꞌ yet cuywomal, caxcꞌal caw chi yal weyan sat ebꞌ, jix yil cꞌal pax stzejejial Jesús ebꞌ. Jix yilon pax ebꞌ cawan winaj eyecꞌ yetoj Naj tuꞌ. 33Jaꞌ yet lalanxa yel ebꞌ cawan tuꞌ scꞌatan Jesús, jix yalon Pedro tet Jesús tuꞌ jaxca tiꞌ: “Jaach Cuywam, caw watxꞌ ket, yutol ey jon ecꞌ titiꞌ. Tejan watxꞌ chi cu waꞌne oxebꞌoj pat, junoj ja wet, junoj yet Moisés, yetoj junoj yet Elías,” ẍi Pedro tet Jesús.
Man yotaj oj tzet lalan yaloni. 34Lalanto skꞌanabꞌ Pedro tuꞌ, jix ey jotna jun asun yibꞌan ebꞌ. Caw jix xiwa ebꞌ scuywom Jesús tuꞌ xol asun. 35Jix lawi tuꞌ xin, catuꞌ ey junoj mac jix kꞌanabꞌ eytej xol jun asun tuꞌ, jix yalon jaxca tiꞌ:
—Jaꞌton jun jin Cꞌaal tiꞌ, sicꞌbꞌil el wu an. Abꞌ tzet chi yal Naj, ẍi.
36Jix lawi cꞌal yabꞌen jun tuꞌ, catuꞌ jix yilontej ebꞌ tol xꞌojli xa Jesús eyecꞌoj. Jaꞌ ebꞌ cuywom tuꞌ, cꞌam junoj mac bꞌey jix yal ebꞌ tzet jix yil ebꞌ tuꞌ.
Jun Unin Jix Elcan Pena Espíritu Yin Yu Jesús
(Mateo 17:14-21; Marcos 9:14-29)
37Jaꞌ yet junxa cꞌual, yet jix eytej ebꞌ bꞌey jun wonan tuꞌ, ecꞌal ánima jix apni scꞌatan Jesús. 38Jaꞌ xol ánima tuꞌ, ey jun winaj jix a yaw yin ipal tet Naj jaxca tiꞌ:
—Mamin, chin oc tean ja win, cꞌam mi cha wil jun jin cꞌaal jin kꞌan an, yutol asan chꞌan jun qꞌuetxan jin cꞌaal tiꞌ. 39Eyxa tiempo scꞌoli yetnele yu jun pena espíritu eyoc yin. Chi swekꞌel yaw, chi tit num sat. Chi el som stiꞌ yu. Caw chi etnele yu sicꞌlebꞌil. Cꞌam chi jajle el yu. 40Jix wakꞌle walon tet ebꞌ ja cuywom, tol chi yiꞌel jun pena espíritu tiꞌ ebꞌ yin naj, ma pax skeꞌ yu ebꞌ, ẍi naj tet Jesús.
41Jix yalon Jesús tuꞌ tet ebꞌ jaxca tiꞌ:
—Jaex tiꞌ, caw cꞌam che yaoc je cꞌul yin Dios, caw caw je naꞌbꞌal. Ilaꞌla eyxa tiempo cꞌal weecꞌ je yetoj. ¿Bꞌakꞌin oj naꞌcha el je yu xin? ¿Jayel taꞌ xam el chin awtele ecꞌ je yu? Catuꞌ jix yalon tet naj: “Asiꞌ, iꞌtej naj ja cꞌaal tuꞌ ey jin an,” ẍi Jesús tet naj.
42Jaꞌ yet jix apni jun unin tuꞌ, jix kꞌojle ey sat txꞌotxꞌ yu jun pena espíritu tuꞌ. Caw jow jix yun stit syaꞌilal naj tuꞌ. Jaxa Naj Jesús, jix tzuwa yin jun pena espíritu tuꞌ, jix waꞌxi can scꞌul naj unin tuꞌ, catuꞌ jix akꞌle can naj tet smam yu Jesús. 43Masanil ebꞌ ánima tituꞌ, jix qꞌueya scꞌul ebꞌ yiloni tol caw miman yipal Dios.
Chi Yaltej Jesús Yu Scamichal Junelxa
(Mateo 17:22-23; Marcos 9:30-32)
Jaꞌ yet jix qꞌueya scꞌul ebꞌ ánima tuꞌ yiloni tzet jix el yunen Jesús tuꞌ, jix yalon Naj tet ebꞌ scuywom tuꞌ jaxca tiꞌ:
44—Chi cam wal je yabꞌen sicꞌlebꞌil tzet oj wal ey jex. Manche qꞌueytoj yul je cꞌul. Yutol caxcꞌal Akꞌbꞌil Wopiso yu Dios xol ebꞌ ket animail an, oj jin ale oc yul skꞌabꞌ wan winaj, ẍi tet ebꞌ.
45Jaꞌ ebꞌ scuywom tuꞌ, ma naꞌcha el yu ebꞌ, tzet jix yal tet ebꞌ tuꞌ yutol ma akꞌle naꞌcha el yu ebꞌ. Jix xiw ebꞌ skꞌanlen pax tet Jesús tzet chi yal yeloc apnoj.
¿Mac Junoj Yel Miman Yeloc Apnoj?
(Mateo 18:1-5; Marcos 9:33-37)
46Jix cꞌoli steelen sbꞌa ebꞌ cuywom tuꞌ yu junoj mactxequel yel miman yeloc apnoj xol ebꞌ, yutol junjun cꞌal ebꞌ, chi snaꞌ ebꞌ tol jaꞌ ebꞌ yel miman yeloc apnoj xol yet cuywomal. 47Yotaj cꞌal Jesús, tzet lalan snaꞌon ebꞌ. Yuxan jix yiꞌontej jun unin scꞌatan. 48Jix yalon tet ebꞌ scuywom tuꞌ jaxca tiꞌ:
—Yal cꞌal mac chi chaꞌon junoj unin jaxca jun unin tiꞌ, yutol wet an, jaxca tol jain chin ẍaꞌ ebꞌ an. Man asanne oj jin chin ẍaꞌ ebꞌ an. Chi ẍaꞌ pax ebꞌ jun mactxequel jix jin chejontej an. Jaꞌ mac yel xacꞌal chi yiꞌey sbꞌa je xol, jaꞌton jun tuꞌ yel xacꞌal miman yeloc apnoj, ẍi Jesús tet ebꞌ.
Jaꞌ Mac Man Acꞌul Oj Oc Kin, Jaꞌ Ketoj Eyocoj
(Marcos 9:38-40)
49Jix yalon naj Juan tet Jesús jaxca tiꞌ:
—Jaach Cuywam, ey jun winaj jix kil jon. Lalan yiꞌon el pena espíritu yin ánima yu ja wipal. Jix cu tenoc tucan jon yutol man junne oj chi ecꞌ ketoj, ẍi Juan tet Jesús.
50Jix yalon Jesús tuꞌ jaxca tiꞌ:
—Cꞌam ojabꞌ che tenoc tucan naj, yutol jaꞌ ebꞌ man acꞌul oj oc kin, jaꞌ ketoj eyoc ebꞌ, ẍi Jesús tet ebꞌ.
Tenbꞌil Oc Tucan Jacobo Yetoj Juan Yu Jesús
51Jaꞌ yet tuxa chi apni stiempoal spaxa Jesús bꞌey satcan, jix tecꞌbꞌa sbꞌa stoo bꞌey Jerusalén. 52Ey wan ebꞌ ẍejabꞌ jix bꞌabꞌi ẍejtoj. Jix apni ebꞌ bꞌey jun aldea yul yet Samaria, yutol chi yoche ebꞌ chi swaꞌne sposada yet chi apni, yuxan jix bꞌabꞌitoj ebꞌ. 53Jal ebꞌ a Samaria tuꞌ, ma akꞌle sposada yu ebꞌ, yutol yotaj ebꞌ tol lalan stoo naj bꞌey Jerusalén. 54Jaꞌ ebꞌ cawan scuywom tuꞌ, jaꞌton Jacobo yetoj Juan, jaꞌ yet jix yilon ebꞌ jaxca tuꞌ, jix yalon ebꞌ tet Jesús:
—Jaach Cuywam, ¿chim yal ja cꞌul chi cu kꞌantej kꞌakꞌ bꞌey satcan yibꞌan ebꞌ, catuꞌ chi lawi el ebꞌ? /Queytuꞌ jix yun naj Elías yet peyxa,/ ẍi ebꞌ tet Jesús.
55Jix oc tꞌanan Jesús yin ebꞌ. Jix tenchanele ebꞌ yu Jesús. /Jix yalon jaxca tiꞌ:
—Jaex tiꞌ, cꞌam chi naꞌcha el je yu tzet naꞌbꞌaleal che kꞌanbꞌalne yet che yalon jaxca tuꞌ. 56Jaꞌ Jain Akꞌbꞌil Wopiso yu Dios xol ebꞌ ket animail tiꞌ an, man yu oj wakꞌon lawoj el ánima an, yuxan jix jin jul an, yu jin colon el ebꞌ an, ẍi Jesús tet ebꞌ./ Catuꞌ jix too ebꞌ bꞌey junxa aldea.
Ebꞌ Chi Yoche Chi Oc Scuywomoj Jesús
(Mateo 8:19-22)
57Jaꞌ yet lalan stoo ebꞌ yul bꞌe, ey jun winaj jix alon tet Jesús jaxca tiꞌ:
—Mamin, yal cꞌal bꞌey oj jaach toj, oj jin toj ja wetoj an, ẍi naj tet Jesús.
58Jix yalon Jesús tet naj jaxca tiꞌ:
—Jaꞌ noꞌ waax, ey snachꞌen noꞌ, cꞌal noꞌ tzꞌiquin, ey sweyubꞌ noꞌ. Jal jin jain tiꞌ, caxcꞌal Akꞌbꞌil Wopiso yu Dios xol ebꞌ ket animail an, cꞌam niꞌoj jin na bꞌey chin weyi, ẍi Jesús tet naj.
59Catuꞌ jix yalon tet junxa jaxca tiꞌ:
—Ecꞌan cꞌal cuywoj wintaj an, ẍi Jesús tet.
Jix takꞌwi naj tet Jesús jaxca tiꞌ:
—Mamin, akꞌ niꞌojxa jin permiso an, chi woche chin mujcantoj jin mam an, ẍi naj tet Jesús.
60—Jaꞌ ebꞌ camnaj to el yul sat Dios, jaꞌ ebꞌ chi skeꞌ smujon can ebꞌ yet camnajil tuꞌ. Jal jaach, jaach tiꞌ, asiꞌ alel tzet utbꞌil yeoc Dios yin Yaawilal, ẍi Jesús tet naj.
61Ey junxa naj jix alon tet Jesús jaxca tiꞌ:
—Jaach Cuywam, chi woche chin ecꞌ cꞌal cuywoj ja wintaj an, asan xin, chi woche cha wakꞌ jin permiso an, chin too wal to jin bꞌa tet ebꞌ ey bꞌey jin na yin sbꞌabꞌelal an, catuꞌ oj jin toj ja wetoj an, ẍi naj tet Jesús.
62Jix yalon pax Jesús tet naj jaxca tiꞌ:
—Kꞌinaloj ta ey junoj winaj chi mulna yetoj wacax tinaniꞌ, chi oc mitxꞌan yin smitxꞌbꞌanil chꞌen kꞌubꞌal txꞌotxꞌ tokꞌbꞌil oc yu noꞌ, ta chi too pax tꞌanan naj yintaj. Ta ey mac queytuꞌ yakꞌon snaꞌbꞌal, cꞌam niꞌoj yopiso ebꞌ yin yoc ẍejabꞌoj Dios, ẍi Jesús.
လက္ရွိေရြးခ်ယ္ထားမွု
Lucas 9: knj
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.