THILSIEMBUL 12
12
Abram Sapna
1Chun, Lalpa’n Abram kawm achun, “Na khuo leh na inkuonpihte leh na pa in apat in pawt inla, gam ka hun etsakna ding lam achun chieh ah:#Nas 7.2-3; Heb 11.8 2tichun nam lopi takin hun siem ing ka ting, chun, hun vangsak ing ka; na min sulopi’ng ka ting, chun, nang vangsakna hung hi’n la: 3Nang hun vangsakte chuh vangsak ing ka ting, hansie hun lawh ta chuh hansie lawh ing ka: chun, nang achun lei a nam cheng hi vangsak in um in au,” a ti a.#Gal 3.8
4Chun, Abram chuh kum sawmsagih leh nga a hih in, Lalpa’n a kawma a gen guol khan Haran apat chun a pawt ta a; Lot inle a zui a. 5Chun, Abram chun a zi Sarai leh a suohpihpa chapa Lot leh, a sum neih chengcheng tawh, Haran khuo a a suok neihteu chuh a pui a; Kanaan gama chieh dingin a kipan dawk tau hi; Kanaan gam chuh a tun phet u chun. 6Abram chun zie gam chengcheng chuh a tawh viel a, Sekem muna Moreh a gangpi thing tieng chun a chieh zel a. Zielai chun Kanaan mite chuh zie gam achun a cheng nalai u a. 7Lalpa chuh Abram kawmah a kilak a, “Zie gam hi na suon te kawmah pie’ng ka,” a ti a: tichun zie tak achun a kawma kilak Lalpa a ding chun maichâm a siem tai.#Nas 7.5; Gal 3.16 8Chun, zie nung chun simlam a Bethel suohlam pang achun a kichawn a, thanglam panga Bethel leh suohlam panga Ai kikal achun puon-In a zak a. Zie tak achun maichâm a siem a, Pathien a sam ta a. 9Abram chuh simlam a Negev zuonin a kichawn zel ta a.
Abram Aigupta ah a Chieh
10Chun, Kanaan gam achun kiel a kie ta a: zie gama kiel chuh a huoisiet bêk ziekin Abram chuh Aigupta gama chawmkhat cheng dingin a chieh suk ta a. 11Chun, hiti hi ahi a, Aigupta gam a lut ding kuon u chun, a zi Sarai kawm achun, Ngaitie, numei melhawih tak na hi tih ka hêi; 12Aigupta mite’n a hun muh tieng u leh, “Ziehi a zi ahi hi,” tiu intin, chun, kei hi ei that untin, nang vang chuh hun hinghawih in au. 13Nang vanga bit taka ka um a, nang zâla ka hin theihna dingin “A suohpihnu ka hi; lungsiet takin ti zel ah aw” a ti a.#Tsb 20.2; 26.7 14Chun, hiti hi ahi a, Abram chuh Aigupta gama a lut phetin Aigupta mite chun numei chuh a muu a; melhawih a sa mah mah u a. 15Chun, Pharaoh milien te’n le a muu a, Pharaoh kawmah a phatzie a gen u a; tichun numei chuh Pharaoh In ah a puilut u a. 16Chun, amah chun Sarai ziek chun Abram chuh pha tak in a bawl a: tichun belamte, bâwngchalte, sabiltungchalte, suoknu leh suokpa te sabiltung nute, sangawngsaute a neih lawh ta a.
17Chun, Lalpa’n Abram zi Sarai ziek chun Pharaoh leh a inkuonpihte chuh natna hi lauh-um takin a gawt ta a. 18Ziephet chun, Pharaoh chun Abram a sama, “Ka chunga na thilhih hi bangti dân ahi? Bang dinga na zi ahih nei hilh loh a? 19Bang dinga ‘Ka suohpihnu ahi,’ na tih a? Zieziekchun apuo zi a ka na neih hiel tâk chuh: awle, en in, na zi hih, kipuih inla, chiehmang kêi ah,” a ti a. 20Tichun, Pharaoh chun a chungchâng thu achun mite kawmah thu a pie a, tichun amah chuh a zi leh a neih chengcheng tawh a sawldawk tau hi.
လက်ရှိရွေးချယ်ထားမှု
THILSIEMBUL 12: GANGBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.