LIPOH 13
13
Abram ko Lot Nyüh Zacho
1Abram-nü Ijip lanü Negev lang anitpü ko akuthsi apüm hipü tuwücho ko Lot abi yola wücho. 2Abram akang kuthsi, hon ko taripi la dee alirü kangcho. 3Hütsüpü abinü Negev pehjüpü Bethel lang müdüm müdümla lii wücho. Abinü akhulang shükuh thsaba Bethel e Ai nyüh kahla müdüm tsü ro chihcho 4ko abinü hütsüla bholu khüdu külüpcho ko abinü Abüdongba mübücho.
5Lot-sü san, miza ko misü ko abi kukhi ko kulirüti licho. 6Anyüh kanglungrü drongra licho ko arüh lamungchah kükyo mülichonü anyüh müjang linung mütsacho. 7Ko Abram e Lot nyüh kanglungrü nyahrü yübütacho. Hütsütade yingcheh Kanan-rü ko Periz-rü hütsüla licho.
8Achotsü Abram-nü Lot-te yocho, “Ihjü mahkhang Ihjü kanglungrü nyahrü kahla müyübütabae, tunüo Ihjü jünirüe. 9Hütsüeko Ihjü zanung. Nühnü mürucho alih throchehng. Nüh khüulang wüng, ko Ih akhüulang wünung.”
10Lot-nü dhingmükangcho ko Jordan ngah apüm, Zoar lang wübalang tsü Abüdongba Tbü mahkhang Ijip ngah kyo kih thangchi li ngucho. (Hi Abüdongba-nü Sodom ko Gomora müchangjüde.)#Lip 2.10 11Hütsüta Lot-nü Jordan ngah apüm throcho ko nyüchüro lahpi shemüsu tsicho. Hütsüta anyüh tsü zacho. 12Abram Kanan lih la licho, ko Lot angah yangditi yola licho ko Sodom amünyeh abinü shükuh thsacho. 13Sodom la nyitsarütinü amükhyu ko Abüdongba nyüm amünyi arangcheh nguchicho.
Abram Hebron lang Shehmüicho
14Lot tsiko khanglang, Abüdongba-nü Abram te yocho, “Nüh yabala tsünü apümlang mükangmüla dhing. 15#R. Ngu 7.5Nühnü nguba lih hi apüm nüh ko nü shümtsurü khyang jünung ko hütsü lede nü yo thsanung. 16Ihnü nü majüh alih lihpi roh-i kangsohnung; ko nyüh khüdunü alih lihpi khidhingchehkhang, nü majühsü khidhingchehnung. 17Ade, wüng ko Ihnü nü khyang jüba lih tsü jücho dhing.” 18Achotsü Abram-nü ashükuh lohmüinü wü Hebron la Mamre yo langsing arangcheh shündhün licho, ko hütsüla abinü Abüdongba khyang bholu khüdu külüpcho.
လက်ရှိရွေးချယ်ထားမှု
LIPOH 13: SANGBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.