LIPOH 27
27
Isak-nü Jakob Müwajücho
1Adelü Isak ashirü kang anahnü müngu kangpehcho. Abinü atsurü aziba Esau dsiro abi te yocho, “Itso!”
Esau-nü lalingcho, “Ih hila lile!”
2Isak-nü yocho, “Ih adelü shiko ko khode sünungnang mümüdhe. 3Nü singthsalu ko tbüdeng bieng ko rangmülang wü I khyang shuh kyaseh hilung. 4Ko Ihnü tsunyüba tsuyongnung küdang hirung. Ihnü hütsü tsupü Ih müsüde achangkathsa nüh müwajünung.”
5Hütsüta Isak-nü Esau te yo yade, Rebeka-nü nyi yacho. Achotsü khode Esau tsü shuh iinung wücho, 6abükyünü Jakob te yocho, “Ade tsatsa nüunü Esau te, 7‘wünü I khyang rangmü shuh kyüseh hilung tüpm. Ihnü hütsü tsupü, Ih müsüde Abüdongba jingte nüh müwajünung’ pü Ihnü yuchi yoko.” 8Hütsüeko, “Itso, ade Ihnü tu yoro hütsü nguching. 9San mülung yang wüng ko aza anyünyeh anyüh hirung ko nüunü tsunyüba tsuyongnung Ihnü rungnümjünung. 10Nühnü nüu khyang hütsü hiwü tüpm, ko abi müsüe-denü abi amüwa nü khyang jünung.”
11Ta Jakob-nü atpa te yocho, “Dhing, Imung Esau afüla anbüh chile, ta Ifü ananaepü nühnü müdhele. 12Kümüdeo uwa-nü I chah thapünung ko Ihnü abi kihyochücho rangchehnung; hütsüta amüwa mahpü Ipu chah chokehchola uthring hironung.”
13Atpanü yocho, “Itso, chokehchola tsü I chah kürosohng; yah Ihnü tu yoro nguching; wüng ko miza tsü hirung.” 14Achotsü abinü wünü hiro abükyü khyang jücho, ko abükyünü aunü tsunyüba tsuyongnung rungnümjücho. 15Hütsüpü abükyünü kuh la yohpücho Esau jengki atsauba hiro Jakob khyang khyüsohcho. 16Ko apükyang ko ahong la miza küp tsü khümsohcho. 17Hütsüpü abinü tsunyüba tsuyongnung ko abükyünü külüpcho hümdhse abi khyang jücho.
18Hütsüpü Jakob-nü au yanglang wücho ko yocho, “Uwa!”
Abinü lalingcho, “Ih hila lile. Itsu nyüh yola nüh khüibao?”
19Jakob-nü lalingcho, “Ih nü tsudhre aziba Esau lile; nühnü yocho roh-i Ihnü nguchiko. Yanglilüm shemüsu püm ko Ihnü hilungcho shuh hi tsung ko I khyang nü amüwa jüng.”
20Isak-nü yocho, “Itso, hitoi züzah khüta ngucho?”
Jakob-nü lalingcho, “Abüdongba nü Tsingrang-nü ngusohchoe.”
21Isak-nü Jakob te yocho, “Ihnü nüh yuje Esau a mahnang müdhenung nü chah thahpünung Ih amünyethsa rung.” 22Achotsü Jakob-nü au shündhün wücho ko aunü abi chah müzudhingpü yocho, “Nü sahkohlü Jakob yuva kyole, ta bipümlü Esau bipüm roh-ie.” 23Abinü Jakob-epü mürangchehcho, tunüo Esau bipüm roh-i anbüh kehcho. Isak-nü abi müwajünung thsacho 24ta thali tsingdhingcho, “Nüh yuje Esau mah-o?”
Abinü lalingcho, “Ho!”
25Achotsü Isak-nü yocho, “I khyang shuh tsü hirung. Ihnü hütsü tsupü nü khyang I amüwa jonung.” Jakob-nü hütsü hirojücho, ko abinü ayongnungsü yongkha hirojücho. 26Hütsüpü aunü abi te yocho, “Itso, I shündhün rung ko I chah müthsüpm.” 27#Ibr 11.20Achotsü abinü au chah müthsüpnung rode, Isak-nü abi jengki xümcho, ko abinü abi müwajü yocho, “I tsudhre axümlichi hi Abüdongba-nü müwajüba alih axümlichi kyole. 28Ninglangnü yingdhsa jüsohng ko nü lih asu kangsohng! Abinü nü khyang tsang ko yongkha thangchi jüsohng! 29#Lip 12.3Yuchotinü nüh dikehsohng ko müyurünü nü jingte mükhukehsohng. Nüh hung apüm michah nüh yangthsasohng, ko nütpa chahnü trahchochotinü nü jingte mükhukehsohng. Sürünü nüh chokehcholaro, arüh chokehchola küdung ko nüh müwajürü amüwa lisohng.”
Esau-nü Isak te Amüwa Chingcho
30Isak-nü Jakob müwajüpü Jakob tsiyeng amung Esau shuh iilangnü lungcho. 31Abinüsü tsuyongnung atsauba tsü rungnümpü au yanglang hiwücho. Abinü yocho, “Uwa, yanglilüm suro pümpü Ihnü hilungcho shuh hi tsung ko I khyang nü amüwa jüng.”
32Isak-nü tsingdhingcho, “Nüh süo?”
Abinü lalingcho, “Ih nü tsurü aziba Esau lile.”
33Hütsükolü Isak tsü khütang dhridhrinü yocho, “Khang, I khyang kanglungrü kyüseh rungnüm hirojüba tsü süo? Ihnü hütsü nü bete du tsü tsuko. Ihnü achangkathsa I amüwa jüko, ko hütsü lede abi yo thsanung.” 34Esau-nü hi yuchide, abi khütang wahnü tra yocho, “I khyangsü nü amüwa tsü jüng, Uwa!” 35Isak-nü lalingcho, “Nüninü ro Ih kihyochüko. Abinü nü amüwa hitsiko.”
36Esau-nü yocho, “Hinü anyüpiu abinü Ih kihyochüre. Nyemüyangnung mühle, anengnü Jakob-e. Abinü Ih aukhuba thsiking khyüko, ko chünye I amüwa khyüre. I khyang nü amüwa tu münyingjü ang?”
37 #
Lip 25.29-34
Isak-nü lalingcho, “Ihnü nü michah abi abüdongrü kangpehsohko, ko ajünirü atümung abi dikehrü kangsohko. Ihnü abi khyang tsang ko yongkha jüko. Itso, adelü Ihnü nü khyang tu mükülüpchehjü.”
38 #
Ibr 12.17
Esau-nü mütozah au te kihchicho: “Uwa, nü amüwa khüdu du mah-o? Ih mii müwajüng.” Abinü tramüsucho.
39 #
Ibr 11.20
Hütsüde Isak-nü abi te yocho,
“Nü nengdang ninglangnü yingdhsa mülongnung.
Nü nengdang alihsu mühle.
40 #
Lip 36.8; 2 Yang 8.20 Nü nohshengnü akang linung.
Ko nühnü nüni dikehnung.
Ta nühnü abi nyüm shemüsude,
abi khehlanü nüh tsichehnung.”
41Esau-nü Jakob thrünyicho, tunüo aunü abi amüwa Jakob khyang jücho. Abinü lümcho, “Uwa meshünung becho chii role, hütsüko du Ihnü Jakob kyüsehnung.”
42Ta khode Rebeka-nü Esau lümchung tsü müdhecho, abükyünü Jakob dsiro yocho, “Nyieng, nü mung Esau-nü nüh kyüsehnung arah külüple. 43Itso, ade Iyu nyieng. Haran lang Imung Laban yanglang wüng, 44ko nü mung zichüroba tsü müshinümde ko nühnü abi te nguchicho tsü nbüchü müpehde, azachah abi yola lieng. 45Ko Ihnü nüh nüli ronung khürü müthehnung. Tuepü nühjüding nyümong khüdunü changnung?”
Isak-nü Laban Yanglang Jakob Müthehcho
46Hütsüpü Rebeka-nü Isak te yocho, “Esau nitpürü yangpilarü hiri te lichonü Ih müthohle. Jakob-nüsü hiri Hit-larü khürü khyükhang, Ih sopehcho atsau thsanung.”
လက်ရှိရွေးချယ်ထားမှု
LIPOH 27: SANGBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.