တောလည်ရာကျမ်း 9

ဒုတိယအကြိမ်ကျင်းပသောပသခါပွဲတော်

1အီဂျစ်ပြည်မှထွက်လာပြီးနောက် ဒုတိယနှစ်၊ ပထမလ၌ သိနာတောကန္တာရတွင် ထာဝရဘုရားက မောရှေအား 2“အစ္စရေးအမျိုးသားတို့သည် သတ်မှတ်ထားသောအချိန်၌ ပသခါပွဲတော်ကိုကျင်းပရမည်။ 3သင်တို့သည် သတ်မှတ်ထားသောအချိန်ဖြစ်သည့် ဤလ တစ်ဆယ့်လေးရက်နေ့ နေဝင်ချိန်၌ ပြဋ္ဌာန်းချက်၊ စီရင်ထုံးဖွဲ့ချက်ရှိသမျှနှင့်အညီ ထိုပွဲတော်ကို ကျင်းပရမည်”ဟု မိန့်တော်မူ၏။ 4ထို့ကြောင့် မောရှေသည် အစ္စရေးအမျိုးသားတို့အား ပသခါပွဲတော်ကျင်းပရန် ဆင့်ဆိုလေ၏။ 5အစ္စရေးအမျိုးသားတို့သည် မောရှေအား ထာဝရဘုရားမိန့်မှာတော်မူသမျှအတိုင်း ပထမလ၊ တစ်ဆယ့်လေးရက်နေ့ နေဝင်ချိန်တွင် သိနာတောကန္တာရ၌ ပသခါပွဲတော်ကို ကျင်းပပြုလုပ်ကြ၏။

6သို့သော် ထိုနေ့၌ လူအချို့တို့သည် လူသေအလောင်းကြောင့် မစင်ကြယ်သည်ဖြစ်၍ ပသခါပွဲတော်ကို ကျင်းပခွင့်မရကြ။ ထို့ကြောင့် ထိုနေ့၌ သူတို့သည် မောရှေနှင့်အာရုန်ထံသို့လာ၍ 7“အကျွန်ုပ်တို့သည် လူသေအလောင်းကြောင့် မစင်မကြယ်ဖြစ်ခဲ့ပါ၏။ သတ်မှတ်ထားသောအချိန်၌ အစ္စရေးအမျိုးသားတို့နှင့်အတူ ထာဝရဘုရားထံ ပူဇော်သက္ကာကို ပူဇော်ခွင့်မရသည်မှာ အဘယ်ကြောင့်နည်း”ဟု မောရှေအား မေးလျှောက်ကြ၏။

8မောရှေကလည်း “စောင့်ဦးလော့။ သင်တို့အမှုနှင့်ပတ်သက်၍ ထာဝရဘုရားမည်သို့မိန့်တော်မူမည်ကို ငါနားထောင်ဦးမည်”ဟု သူတို့အား ပြန်ပြော၏။

9ထာဝရဘုရားက မောရှေအား

10“အစ္စရေးအမျိုးသားတို့အား ဆင့်ဆိုလော့။ သင်တို့ဖြစ်စေ၊ သင်တို့၏မျိုးဆက်ဖြစ်စေ တစ်စုံတစ်ယောက်သည် လူသေအလောင်းကြောင့် မစင်မကြယ်ဖြစ်နေလျှင်လည်းကောင်း၊ ခရီးလွန်နေလျှင်လည်းကောင်း ထာဝရဘုရားအဖို့ ပသခါပွဲတော်ကို ကျင်းပခွင့်ရှိ၏။ 11သူတို့သည် ထိုပွဲတော်ကို ဒုတိယလ၊ တစ်ဆယ့်လေးရက်နေ့ နေဝင်ချိန်တွင် ကျင်းပရမည်။ သိုးသငယ်အသားကို တဆေးမဲ့မုန့်၊ ခါးသောဟင်းရွက်တို့နှင့် စားရမည်။ 12အသားကို နံနက်တိုင်အောင် မကြွင်းကျန်စေရ။ အရိုးကိုလည်း မချိုးရ။#ယော 19:36။ ပသခါပွဲတော်၏ပြဋ္ဌာန်းချက်ရှိသမျှနှင့်အညီ ထိုပွဲတော်ကို ကျင်းပရမည်။

13သို့သော် တစ်စုံတစ်ယောက်သည် စင်ကြယ်ခြင်းရှိလျက်၊ ခရီးလည်းမလွန်ဘဲလျက် ပသခါပွဲတော်ကို မကျင်းပလျှင် သူသည် မိမိလူမျိုးမှ ပယ်ဖျက်ခြင်းခံရမည်။ သတ်မှတ်ထားသောအချိန်၌ ထာဝရဘုရားအား ပူဇော်သက္ကာကို မပူဇော်သောကြောင့် သူသည် ကိုယ့်အပြစ်ကိုယ်ခံရမည်။

14သင်တို့တွင်တည်းခိုနေထိုင်သောတိုင်းတစ်ပါးသားသည် ထာဝရဘုရားအဖို့ ပသခါပွဲတော်ကို ကျင်းပလိုလျှင် ပသခါပွဲတော်ဆိုင်ရာပြဋ္ဌာန်းချက်၊ စီရင်ထုံးဖွဲ့ချက်များနှင့်အညီ ကျင်းပရမည်။ တိုင်းတစ်ပါးသားအတွက်ဖြစ်စေ၊ အမျိုးသားချင်း#9:14 တိုက်ရိုက်ပြန်ဆိုလျှင် “ပြည်သား”။အတွက်ဖြစ်စေ ပြဋ္ဌာန်းချက်သည် တစ်မျိုးတည်း ဖြစ်ရမည်”ဟု မိန့်တော်မူ၏။

မိုးတိမ်ဖြင့်လမ်းပြပို့ဆောင်ခြင်း

15ကိန်းဝပ်တော်မူရာတဲတော်ကိုတည်သောနေ့၌ မိုးတိမ်သည် ကိန်းဝပ်တော်မူရာတဲတော်ဖြစ်သော သက်သေခံချက်တဲတော်ကို ဖုံးလွှမ်းလေ၏။ ထိုမိုးတိမ်သည် နေဝင်ချိန်မှ နံနက်တိုင်အောင် ကိန်းဝပ်တော်မူရာတဲတော်အပေါ်၌ မီးသဏ္ဌာန်ကဲ့သို့ တည်နေ၏။ 16ထိုသို့ မိုးတိမ်သည် ကိန်းဝပ်တော်မူရာဌာနကို အစဉ်မပြတ်ဖုံးလွှမ်းလျက်၊ ညအချိန်တွင် မီးသဏ္ဌာန်ကဲ့သို့ဖြစ်လျက် နေ၏။ 17မိုးတိမ်သည် တဲတော်အပေါ်မှ ကွာသည့်အခါ အစ္စရေးအမျိုးသားတို့ ခရီးပြုကြ၏။ မိုးတိမ်ရပ်တန့်သည့်နေရာတွင် အစ္စရေးအမျိုးသားတို့ စခန်းချကြ၏။ 18အစ္စရေးအမျိုးသားတို့သည် ထာဝရဘုရား၏အမိန့်တော်အတိုင်း ခရီးပြုကြ၏၊ ထာဝရဘုရား၏အမိန့်တော်အတိုင်း စခန်းချကြ၏။ ကိန်းဝပ်တော်မူရာတဲတော်အပေါ်၌ မိုးတိမ်တည်နေသမျှကာလပတ်လုံး သူတို့ စခန်းချကြ၏။

19မိုးတိမ်သည် ကိန်းဝပ်တော်မူရာတဲတော်အပေါ်၌ ရက်ပေါင်းများစွာတည်နေလျှင်လည်း အစ္စရေးအမျိုးသားတို့သည် ခရီးမပြုဘဲ ထာဝရဘုရား၏ညွှန်ကြားချက်ကို စောင့်လျက်နေကြ၏။ 20မိုးတိမ်သည် ကိန်းဝပ်တော်မူရာတဲတော်အပေါ်၌ ရက်အနည်းငယ်သာ တည်နေသောအခါလည်းရှိ၏။ သူတို့သည် ထာဝရဘုရား၏အမိန့်တော်အတိုင်း စခန်းချကြ၏။ ထာဝရဘုရား၏အမိန့်တော်အတိုင်း ခရီးပြုကြ၏။ 21မိုးတိမ်သည် နေဝင်ချိန်မှ နံနက်အထိ တည်နေသောအခါလည်း ရှိ၏။ နံနက်အချိန် မိုးတိမ်ကွာလျှင် သူတို့ ခရီးပြုကြ၏။ နေ့ဖြစ်စေ၊ ညဖြစ်စေ မိုးတိမ်ကွာသည့်အခါတိုင်း သူတို့ ခရီးပြုကြ၏။ 22ကိန်းဝပ်တော်မူရာတဲတော်အပေါ်၌ မိုးတိမ်သည် နှစ်ရက်ဖြစ်စေ၊ တစ်လဖြစ်စေ၊ တစ်နှစ်ဖြစ်စေ တည်နေသောအခါလည်း ရှိ၏။ ထိုအခါ အစ္စရေးအမျိုးသားတို့သည် ခရီးမပြုဘဲ စခန်းချကြ၏။ မိုးတိမ်ကွာသောအခါမှ ခရီးပြုကြ၏။ 23ထာဝရဘုရား၏အမိန့်တော်အတိုင်း သူတို့ စခန်းချကြ၏၊ ထာဝရဘုရား၏အမိန့်တော်အတိုင်း သူတို့ ခရီးပြုကြ၏။ မောရှေမှတစ်ဆင့် ထာဝရဘုရားမိန့်တော်မူသည့်အတိုင်း သူတို့သည် ထာဝရဘုရား၏ညွှန်ကြားချက်ကို စောင့်လျက်နေကြ၏။

လက်ရှိရွေးချယ်ထားမှု

တောလည်ရာကျမ်း 9: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

MYANMAR STANDARD BIBLE©

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။