Luka 17
17
Yesu longa sambu na mvidisilu ya masumu
1Yandi tubaka kwa banlonguki ya yandi: Basakuba lenda kwiza; kansi ndola kwa yandi ya ikele kupesa yo! Mat. 18:6; Mal. 9:42
2Luta mbote kwa yandi kana ditadi ya nikuna fufu kangwa va laka ya yandi, ye yandi loswa mu mbu, kana yandi tesisa mosi ya fioti ya bayai sakuba.
3Dikeba. Kana mpangi ya nge sala masumu kwa nge, semba yandi; kana yandi pindula mabanza, vidisila yandi yau. 5 Mose 19:17
4Kana yandi sala masumu kwa nge mbala nsambwadi mu kilumbu mosi, kansi yandi pindula mbala nsambwadi kwa nge ye tuba: Mono imene kupindula mabanza, buna nge tavidisila yandi yo. Yesu tuba ngolo ya lukwikilu
5Bantumwa tubaka kwa yandi; Mfumu, tula lukwikilu ya beto kwiza nene.
6Mfumu tubaka: Kana beno ikele na lukwikilu bonso nkeni ya mutade, beno lenda kutuba kwa nti yai ya sikomole: Vuzuka na mianzi ye loswa mu mbu; yo talemvuka beno. Mal. 11:23
Kingana ya kisalu
7Nani na beno ya ikele na mpika ya ikele kutima ntoto keti kukeba mameme, tatuba kwa yandi, bu yandi katuka na dilanga: Kwiza nswalu, vanda na meza ?
8Kadi yandi tatuba kwa yandi ve: Yidika sambu na mono kudia, kanga luketo ye sadila mono, ti mono manisa kudia ye kunwa, buna nge takudia ye kunwa ?
9Yandi tavutula matondo kwa mpika, sambu na yandi salaka yina ya yandi tubaka na yandi ?
10Mpilamosi beno mpe, bu beno imene kusala mambu yonso ya tubwaka kwa beno, beno tuba: Beto ikele bampika ya konda mfunu; beto kusala kisalu ya beto fwiti kusala kaka.
Yandi belula bankwa bwazi kumi
11Yo vandaka, bu bau kwendaka ku Yelusalemi, yandi kibeni lutaka nakati ya Samalia ye Ngalili.
12Bu yandi kotaka mu bwala mosi, babakala kumi ya vandaka na bwazi kutanaka na yandi, ye telemaka ntama.
13Bau bokaka mu ndinga ngolo kutuba: Yesu, Mfumu, kuwila beto nkenda.
14Bu yandi monaka bau, yandi tubaka kwa bau: Beno kwenda kudisonga kwa banganga. Yo vandaka, bau kwendaka ye bau vediswaka. Luk. 5:14
15Mosi kaka ya bau, bu yandi monaka, yandi imene kubeluka, vutukaka ye mu ndinga nene kembilaka Nzambi.
16Yandi kubwaka va luse na makulu ya Yesu, ye vutulaka matondo kwa yandi. Yandi vandaka muSamalia.
17Yesu vutulaka, kutuba: Kumi imene kubeluka ve ? Uvwa ikele wapi ?
18Mosi monika ve kuvutuka kupesa mkembo kwa Nzambi, kansi nzenza yai kaka ?
19Yandi tubaka kwa yandi: Telema, kwenda, lukwikilu ya nge imene kuvulusa nge.
Yesu tendula kiuvu ya bafalisi
20Bu yandi yuvulwa kwa bafalisi ntangu ya kimfumu ya Nzambi takwiza, yandi vutulaka kwa bau, kutuba: Kimfumu ya Nzambi ikele kwiza ve na kumonika.
21Bau tatuba mpe ve: Tala, awa keti kuna, kadi tala, kimfumu ya Nzambi ikele nankati na beno.
Yandi tuba sambu na vutuka ya yandi ya zole
22Yandi tubaka kwa banlonguki ya yandi: Bilumbu takwiza, bu beno tatula luzolo kumona kilumbu mosi kaka ya Mwana ya muntu, kansi beno tamona yo ve.
23Bau tatuba kwa beno: Tala kuna, tala awa; beno kwenda ve, ye landa ve. Mal. 13:21; Luk. 21:8
24Bonso nzazi ikele kukienzula tuka ndambu mosi na nsi ya zulu, ti na ndambu yankaka na nsi ya zulu, buna Mwana ya muntu tavanda mpilayai mu kilumbu ya yandi.
25Kansi ntete yandi fwiti kumona mpasi mingi ye kubuya na bantu ya mbandu yai. Luk. 9:22; 18:31; 24:7, 26
26Bonso yo vandaka mu bilumbu ya Noa, yo tavanda mpilayai mpe mu bilumbu ya Mwana ya muntu. Mat. 24:37; 1 Pet. 3:20
27Bau kudiaka, bau kunwaka, bau kwelaka, bau kwediswaka, ti na kilumbu ya Noa kotaka mu nzaza, ye nkuka ya masa kwizaka, ye kufwaka bau yonso. 1 Mose 6:2; 7:7
28Bonso yo vandaka mu bilumbu ya Loti; bau kudiaka, bau kunwaka, bau sumbaka, bau tekaka, bau kunaka, bau tungaka; 1 Mose 19:14
29kansi mu kilumbu yina ya Loti basikaka na Sodoma, tiya ye solofo nokaka tuka zulu ye kufwaka bau yonso. Yud. 7
30Buna yo tavanda mpilayai mu kilumbu ya Mwana ya muntu tazaikiswa.
31Kilumbu yina yandi ya ikele va nludi ya nzo, ye bima ya yandi ikele mu nzo, yandi takulumuka ve kubaka yau; ye mpilamosi, yandi ya ikele mu dilanga tavutuka ve. Mal. 13:16
32Beno bambuka nkento ya Loti.
33Konso muntu ya sosa kuvulusa moyo ya yandi, tavidisa yo, konso muntu ya vidisa yo, tavulusa yo. Luk. 9:24; Yoa. 12:25
34Mono tuba kwa beno: Mpilayina mu mpimpa yina babakala zole tavanda va fulu ya kulala, mosi tabakwa, yankaka tabikwa.
35Bankento zole tavanda kunika fufu sikamosi, mosi tabakwa, yankaka tabikwa. Mat. 24:41
36Babakala zole tavanda mu dilanga, mosi tabakwa, yankaka tabikwa.
37Bau vutulaka kutuba kwa yandi: Mfumu, wapi sika ? Yandi tubaka kwa bau: Sika ya ikele nitu ya kufwa, kuna ikele kutakana bambemba.
လက်ရှိရွေးချယ်ထားမှု
Luka 17: NTK50
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Nouveau Testament en Kikwango © BAliiance Biblique de la RD Congo, 1950.