Luka 19
19
Yesu mu nzo ya Zakai
1Ye Yesu kotaka ye lutaka mu Yeliko.
2Bakala vandaka kuna, nkumbu ya yandi Zakai; yandi vandaka nkuluntu ya bafutisi, ye nkwa mvwama.
3Yandi sosaka kumona Yesu, bonso yandi ikele, kansi yandi lenda kumona yandi ve, sambu na kibuka ye sambu na yandi vandaka ntela nkufi.
4Yandi kwendaka ntinu nantwala, ye mataka va nti ya sikomole, sambu na kutala yandi, kadi Yesu zolaka kuluta na nzila yina.
5Bu Yesu kumaka ku sika yina, yandi sendulaka meso, ye tubaka kwa yandi, Zakai, kulumuka nswalu, kadi kilumbu yai mono fwiti kuvanda mu nzo ya nge.
6Yandi kulumukaka nswalu ye bakaka yandi na yangalala.
7Bu bau monaka mambu yai, bau yonso baminaka, kutuba: Yandi kwendaka kuvanda mu nzo ya nkwa masumu.
8Zakai telemaka, ye tubaka kwa Mfumu: Tala, Mfumu, mono pesa kwa bansukami ndambu ya nkati ya bima ya mono, kana mono imene kubaka bima ya muntu yankaka mu luvunu, mono tavutula yandi yau mbala iya. Luk. 3:13
9Yesu tubaka kwa yandi: Bubu mpulusu imene kwiza ku nzo yai, sambu na yandi mpe ikele mwana ya Abalahami.
10Kadi Mwana ya muntu imene kwiza kusosa ye kuvulusa bau ya vilaka.
Kingana ya talanta
11Bu bau kuwaka mambu yina, yandi tubaka kingana, kadi yandi vandaka mfinama ku Yelusalemi, ye sambu na bau banzaka, kimfumu ya Nzambi tamonika ntangu yina. Mat. 25:14; Bis. 1:16
12Buna yandi tubaka: Muntu ya luzitu kwendaka ku ntoto ntama sambu na kubaka kimfumu, ye kuvutuka diaka.
13Yandi bingaka bampika ya yandi kumi, ye pesaka bau talanta kumi, yandi tubaka kwa bau: Beno tambula na yo mubungu ti mono kwiza.
14Kansi bantu ya nsi ya yandi vandaka na yandi kimbeni, bau fidisaka nsamu kulanda yandi, kutuba: Beto zola ve muntu yai kuvanda ntinu ya beto.
15Yo vandaka, bu yandi imene kuvutuka, ye imene kubaka kimfumu, yandi bingaka bampika, ya yandi pesaka mbongo, na yandi lenda kuzaba ndandu ya bau bakaka na mubungu.
16Buna ya ntete kwizaka, kutuba: Mfumu, talanta ya nge imene kubaka talanta kumi yankaka.
17Yandi tubaka kwa yandi: Mbote, nge ikele mpika mbote; sambu na nge vandaka kwikama mu bima fioti, nge tayala bambanza kumi.
18Ya zole kwizaka, kutuba: Mfumu, talanta ya nge imene kubaka talanta tanu yankaka.
19Yandi tubaka kwa yandi mpe: Nge tayala bambanza tanu.
20Yankaka kwizaka, kutuba: Mfumu, tala, talanta ya nge yai, ya mono lundaka mu kitambala.
21Kadi mono titaka nge, sambu na nge ikele muntu makasi, ye ikele kubaka ya nge tulaka ve, ye buka ya nge kunaka ve.
22Yandi tuba kwa yandi: Sambu na mambu ya basika na munoko ya nge, mono tafundisa nge, nge mpika mbi. Nge zabaka, mono ikele muntu makasi, ye mono baka ya mono tulaka ve, ye buka, ya mono kunaka ve.
23Sambu na nki nge pesaka ve mbongo ya mono mu maboko ya bantu ya nzo ya mbongo, mpilayai bu mono kwiza, mono zolaka kubaka yau ye yankaka va zulu ?
24Yandi tubaka kwa bau ya telema mfinama kwa yandi: Beno botula talanta ye pesa yo kwa yandi ya ikele na talanta kumi.
25Bau tubaka kwa yandi: Mfumu, talanta kumi ikele na yandi.
26Mono ikele kutuba kwa beno: Konso muntu ya ikele na bima, tapeswa yankaka, ye konso muntu ya ikele na bima ve, tabotolwa mpe yina ya ikele na yandi.
27Kansi bambeni yai ya mono ya zolaka ve mono kuvanda ntinu ya bau, twala bau awa, kufwa bau nantwala na mono.
Yesu kota mu Yelusalemi
28Bu yandi tubaka mpilayai, yandi kwendaka nantwala kutomboka ku Yelusalemi. Mat. 21:1; Mal. 11:1; Yoa. 12:12
29Yo vandaka, bu yandi kwizaka mfinama ku Betefange, ye Betania, ku mongo ya bingwa Olive, yandi fidisaka banlonguki ya yandi zole,
30yandi tubaka: Kwenda kukota mu mabwala ya ikele nantwala na beno, bu beno kota muna, beno tamona mwana ya mpunda ya kangwa, ya muntu imene kuvanda va yandi ve; beno kangula yandi, twala yandi.
31Kana muntu yuvula beno: Sambu na nki beno ikele kukangula yandi ? Buna beno tuba kwa yandi: Mfumu ikele na yandi nsatu.
32Bau ya fidiswa kwendaka ye monaka bonso yandi tubaka kwa bau.
33Bu bau kangulaka mwana mpunda, bamfumu ya yandi tubaka kwa bau: Sambu na nki beno ikele kukangula mwana mpunda ?
34Bau tubaka: Mfumu ikele na yandi nsatu.
35Bau twalaka yandi kwa Yesu, bau tulaka mvwatu ya bau va mwana mpunda, ye tulaka Yesu va yandi.
36Bu yandi kwendaka, bau yalumunaka mvwatu ya bau mu nzila.
37Bu bau kumaka mfinama ku kulumuka ya mongo ya Olive, kibuka yamvimba ya banlonguki yantikaka kuyangalala ye kusika Nzambi, mu ndinga ngolo sambu na bisalu yonso ya ngolo ya bau monaka.
38Bau tubaka: Nkwa lusakumunu ikele Ntinu ya kwiza mu nkumbu ya Mfumu! Yenge mu zulu ye nkembo mu zulu ya zulu! Nk. 118:25
39Bafalisi yankaka mu kibuka tubaka kwa yandi: Nlongi, semba banlonguki ya nge.
40Yandi vutulaka, kutuba: Mono tuba kwa beno: Kana bau vanda napi matadi yai taboka nswalu.
Yesu dila Yelusalemi
41Bu yandi kwizaka mfinama, yandi monaka mbanza, ye dilaka yo, kutuba:
42Kana nge zabaka, nge kibeni, mu kilumbu ya nge yai, mambu ya ikele sambu na yenge ya nge; kansi ntangu yai yo swekwa na meso ya nge.
43Kadi kilumbu takwiza va nge, bambeni ya nge tatula nge lupangu, ye tazunga nge, ye talunda nge ndambu yonso;
44bau talosa nge va ntoto ye bana ya ikele mu nge; ye bau tabika ditadi va ditadi yankaka mu nge ve; sambu na nge zabaka ve ntangu ya mambu mbote ya kwiza kwa nge. 1 Nt. 9:7; Mika 3:12; Luk. 21:6
Yesu sukula tempelo
45Yandi kotaka mu tempelo, ye yantikaka kubasisa bateki, Mat. 21:13; Mal. 11:15
46yandi tubaka kwa bau: yo sonama: Nzo ya mono tavanda nzo ya lombilu, kansi beno imene kukitula yo sika ya bantani. Yes. 56:7; Yel. 7:11
47Yandi longaka mu tempelo kilumbu na kilumbu. Kansi bambuta banganga ye bansoniki ye bantu nene sosaka kufwa yandi; Mal. 11:18; Yoa. 7:19; 8:37
48kansi bau monaka mambu ve ya bau fwiti kusala, kadi bantu yonso landaka ye kuwaka mambu ya yandi.
လက်ရှိရွေးချယ်ထားမှု
Luka 19: NTK50
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Nouveau Testament en Kikwango © BAliiance Biblique de la RD Congo, 1950.