Luka 9
9
1Ko aosolonganya bakili’anande jo l’ate, ko amafa mpamba ko la lifoka eneyali bademona bahatu, ko lacina baiky’ato nkangi. 2Ko amatoma lacin’eho basekodya bosimo bona lifoka lina Yakomba, ko baiky’ato nkangi. 3Ko amasumola, ate, Botatolake iyema lacin’ena bokit’onino, efan’onganza, efana ntombe, efana mampa, efan’osolo; botaatake bekoto’efe’efe; 4ko en’otumba bon’etaketaka bonatu’ino, bomboyala nkwaho, ko bemwa lakina nko meho. 5Ko nk’en’oka bato bafakotamb’ino, eneng’in’ouma en’onyang’oho botitola lofucifuci en’akak’anino yoka ndembi eneyal’iyo. 6Koko baocoa, ko baotianya benyanga, baosekodya bosimo bon’olotsi, ko baiky’ato en’ili behetu.
7Ko Elode, vice-gouverneur, aoka baoyi bahatu banilamaka, ko aokandakanda bike, lacin’oka bato’amoi baila, Mbo Yoane amoletwa en’ewedi; 8ko bamoi, Mbo Eliya amenya; ko bakina, Mbo bosumoli’omoi on’alale amenya lakina. 9Ko Elode aila, ate, Mosila likesa Yoane bote; koko boto’one onok’emi baoyi’ane ande nai? Ko aofon’etelo oyeena.
10Ko bakili, enek’iy’outaka, baosumola Yesu baoyi banak’iy’okambaka. Koko amatamba, ko baocoa nk’iyo kei en’edye emoi en’onyanga bona Betesaida. 11Koko eneki bato bik’ike oeyaka yoi liho, bamokila nkwaho; ko amasangela nko l’olotsi, ko amalokwela baoyi bana lifoka lina Yakomba, ko aikya iy’anayaaki la nkangi. 12Ko eneki likolo omatsaka liyela, ba-jo l’afe baoya, iy’ate, Tongola bato’aho bik’ike, lacin’eho bacu en’engili l’en’iluku binoli, baate etamelo ko la toma tona ndaka; lacin’oka toyali nko mane ena sengelenge. 13Ko amasumola, ate, Inoamene baf’iyo toma tona ndaka. Iy’ate, Iso toyali la mampa itano ko la nse ife kei, umola nko tocoa osombela bato’ane bahatu toma. 14Lacin’oka bayaaki mpame yoka nkoto itano. Aosumola bakili’anande, ate, Basumole bakisase en’eloi, boloi l’oloi bato yoka ntuk’itano. 15Ko baila yok’oho, ko bamakitsa en’ase. 16Ko aotamba mampa ih’itano ko la nse ih’ife, aolenda ena loola, aosakela toma toho bosako, ko aokesa toho, ko aofa bakili lacina balekedya bato’aho bik’ike. 17Ko baola toma, ko iyatu baokinda liota; ko baambola bitate binicikalaki batungu jo l’afe.
18Koko eneki’nd’oondaka ena lokuko, bakili’anande bayaaki l’ende; ko amaufola, ate, Bato bantang’emi nai?
19Ko baokutola, iy’ate, Yoane Bini; koko bamoi, Mbo Eliya; koko bakina, Mbo bosumoli’omoi on’alale amenya lakina. 20Ko amasumola, ate, Nd’inoamene, bontang’emi nai? Ko Petelo aokutola, ate, Onde Masiya mene ona Yakomba. 21Koko amafekya, amasimba, batasumolake boto’omoko yoi line; 22ate, Akoli eneyali Bon’on’oto aene bino l’aoyi’ike, ko bingambe la nkanga ina toome la batengi ban’ekanda bangotembol’ende, bangoyak’ende; ko angetwa en’ina bon’esaso. 23Ko aosumola bato bahatu, ate, Yomb’oto alanga ankil’emi, tumb’ende ayofim’endamene, ko aambole ekulusu enande bina l’ina, ko ankile. 24Lacin’oka boto on’etaketaka onolanga lacina amonya liiko lonande, angungya loho; koko boto on’etaketaka onungya liiko lonande lacin’enami, angosungya loho. 25Nk’en’oka boto akitanya lituka lina loko lohalotu, ohonde ayoungy’endamene, ayehy’endamene, nkita enat’ende eka nai? 26Lacina onongonjok’emi l’aoyi’anami nsoi, Bon’on’oto angok’ende nsoi, enengi’nd’oya la bokoka bonandamene ko la boho bon’afango ko la boho bona bikima bin’oeka. 27Koko lako sumol’ino solosolo, bamoi bayali banemali mendo banafayene bewedi tu, yengoko baena lifoka lina Yakomba.
28Koko yoka bekolo mwambi ena mbusa ena bitendelo bine, aotamba Petelo la Yoane la Yakobo, ko aanda ena lingonji oyonda meho. 29Ko enem’end’oonda, bokotua bon’elongi enande bohalingwa bokotu’okina, ko bisenda binande bioyalama telele, nko kalikali. 30Ko lenda, bato’afe baesola l’ende, nko Mose l’Eliya; 31iyo baenya la bokoka, ko baotenda lacin’ena bewedi benengi’nd’ow’olo ena Yelusalema. 32Petelo l’iy’anayaaki l’ende baowa l’ilo, koko enek’iy’oetwaka, baena bokoka bonande, ko l’ato’afe banemali l’ende. 33Koko enek’iyo l’ende okambwanaka, Petelo aosumola Yesu, ate, Nkolo, bolotsi eneyal’iso toyali mane; tofake balombe basaso: limoko line, limoko lina Mose, ko limoko lin’Eliya. Lacin’oka ateya yoi linaliki’nd’otendaka. 34Nk’enem’end’otenda baoyi’ako, lilo yoya ko limakunda, ko baoka losomo enek’iy’otuaka ena lilo. 35Ko lofoso lookana ena lilo, ate, One nko Bon’onami ona nganji; bolofak’ende. 36Ko eneki lofoso osilaka, Yesu aenya nk’ende kei. Ho iyo baoyala nko mwi, ko batasumola boto’omoko en’ina beho yoi limoko linalik’iy’oenaka.
37Koko en’ina bona loi, enek’iy’okitaka ena lingonji, bik’ike bon’ato baukana l’ende. 38Ko lenda, boto’omoi on’ato’aho bik’ike aololua, ate, Bolaki, lakoonda, oyolende bon’onami ona mpame, lacin’ende ayali bon’onami ona likinda; 39koko lenda, lifoi yotua eneyal’ende, ko kaimo ende afoma nko befwi; ko lifoi limokilimodya la nkele, lacina aile yoka bafulo en’onyua, ko lifoi lifocike isanga, yengoko limookya efafo bike, 40Ko emi loondaka bakili’ane lacina bafodya liho, koko iyo batinya. 41Yesu aokutola, ate, En’eotwelo ene ena bocilingitano enefan’imeedyo, nongoyala l’ino bolingolingo’oya? nkoledy’ino bolingolingo’oya? Yaka l’on’one mendo. 42Nk’eneyay’ende, lifoi limosokodya la nkele, ko limokilimodya l’efafo mene. Koko Yesu aofela lifoi lina nsefo lofeli, ko aikya bonome’ona mpame, ko amuutodya eneyali bafango. 43Ko bato bahatu baofefa la mpamba ena nkolo mene ena Yakomba.
Koko enek’iy’ofefaka l’aoyi’ane banaki Yesu okambaka, aosumola bakili’anande, 44ate, Botoyaka baoyi’ane en’atoi’anino; lacin’oka Bon’on’oto angolekyama en’akasa ban’ato. 45Koko iyo batanonganya ncina en’etendelo ene, eho eofisama eneyal’iyo, lacina batongofokol’eho; ko batufol’ende ncina en’etendelo ene, lacin’oka baangaki.
46Koko baomatsa yatana ntango, noka, onosokoyala yok’iyome iniyo nai? 47Koko eneki Yesu ofokolaka bekaokando ben’etem’eniyo, aotamb’onome, ko ameemadya nk’ena mbolimboli l’endamene, 48ko amasumola, ate, Onosangela bonome’one ena lina linami, aosangel’emi; ko ononsangel’emi, asangel’ende onontomaki; lacin’oka, ende onofana lokumo tu eneyal’ino, angoyala on’okolo.
49Ko Yoane amokutwela, ate, Nkolo, tenaki boto onofodyaki bademona ena lina line, ko tomolosimba, lacina enefamban’ende l’iso. 50Koko Yesu amosumola, ate, Tofekyake; lacin’oka boto onofatofeky’iso ayali nko l’iso.
51Koko eneki bekolo oolamaka likoka lacina ailedyama ena loola, aeledya elongi enande ena Yelusalema lacina acu meho nko la ndokodya. 52Ko aotoma bikima en’oso bon’elongi enande; ko baocoa, baotua en’onyang’omoi bana baise Samalia oyokoedy’ende meho. 53Ko batosangela, lacin’oka elongi enande eyaaki nk’eyoka angocoa Yelusalema. 54Ko eneki bakili’anande Yakobo la Yoane oenaka yoi liho, baila, iy’ate, Nkolo, olanga nde telele nkoi ikite ena loola, ko ikady’iyo nko kali, yok’onoki Eliya oilaka? 55Koko aohelengwa, amafela, (ate, Ino bofeya bokotua bon’olimo’onino, lacin’oka Bon’on’oto ataya oyehy’ato: amoya oyaikya). 56Ko aocoa bonyang’okina.
57Koko enem’iy’ocoa ena mboka, boto’omoi amosumola, ate, Nongokokil’e bili bon’etaketaka bonaco’e. 58Yesu amosumola, ate, Bembanga beyali la bekole beniyo, ko mpulu ina liko iyali la baocu; ohonde Bon’on’oto afan’edye enamby’ende bote’onande. 59Ko aosumol’okina, ate, Onkile. Koko ende, Mbo Nkolo, ompe etelo ncu okunja bafango’onami en’oso. 60Koko Yesu amosumola, ate, Bato ban’ewedi bakunjake ban’ewedi baniyoamene; koko e, coaka oyosekodya bosimo bona lifoka lina Yakomba. 61Ko okina aila, ate, Nkolo, nongokokila, ohonde en’oso ompe etelo ncu osesa iy’anayali en’otumb’onami. 62Koko Yesu amosumola, ate, Efan’oto onila likasa linande ena efeko ena ncima ko ait’olenda ena mbusa asokokolana la lifoka lina Yakomba.
လက်ရှိရွေးချယ်ထားမှု
Luka 9: BBY62
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bokanda Bona Yakomba Bon’ototo © Alliance Biblique de la R. D. Congo, 1962