Matayo 16
16
1Ko Bafalusi la Basadoke baoya eneyali Yesu lacina baomeke, ko bamoufola lacina aatume ndembi ena loola. 2Ko amakutwela, ate, La likolo ino bila, Mbo loi bongoyala nko sengelele lacin’oka loola loyali yoka ngola. 3Ko l’okulu in’ate, Bon’in’one mbula engolwa, lacin’oka loola loyali ficifici yok’akila. Ino beya lifokola elongi ena loola; koko bofafokolisa ndembi ina bisike. 4Bato ban’eotwelo ene en’owe l’en’akele bayakembe ndembi; koko ndembi efafamaki eneyal’iyo, yengoko ndembi ena Yona kei. Koko amacika, ko aocoa.
5Eneki bakili olekaka en’ili’ol’ei, baolofela litola mampa. 6Yesu amasumola, ate, Bolendaka, ko boongya lilota nyango ena mampa ena Bafalusi la Basadoke. 7Bakili baosumolana, iy’ate, Lacin’oka totaya la mampa. 8Eneki Yesu ofokolaka baoyi’aho, amasumola, ate, In’anayali l’imeedyo nk’isisali kei, boyatendane lacina enetay’ino la mampa lanai? 9Botanonganya nde, ko bofakanedya nde mampa ih’itano iniki bato nkoto itano olaka? ko la botuya bona batungu bana bitate binik’in’oambolaka? 10Ko bofakanedya nde mampa iho nsambo iniki bato nkoto inei olaka, ko la botuya bona tofondo tonatok’in’oambolaka? 11Ncina eka nai enefanongany’ino noka emi ntatenda l’ino lacin’ena mampa? Boongya lilota nyango ena mampa ena Bafalusi la Basadoke. 12Nkwaho baononganya ende atasumol’iyo balote nyango ena mampa mene: balote nko lilako lina Bafalusi la Basadoke.
13Eneki Yesu oyaka en’onyanga bona Kaisalia ena Filipo, aufola bakili’anande, ate, Bato bantang’emi, Bon’on’oto, nai? 14Ko iyo, Mbo, bamoi baila, iy’ate Onde Yoane Bini; bamoi Eliya; bamoi Yelemaya, yomb’omoi ona basumoli. 15Ko amaufola, ate, Iy’inoamene: bontang’emi nai? 16Simona Petelo amokutwela, ate, Oyali Masiya, Bon’ona Yakomba eneyaike. 17Yesu amolokwela, ate, E Simona, bon’ona Yona, osakelama bosako; lacin’oka bonufo la bakila batakotum’e yoi line: onokotumaki liho nko Bafango’onami onoyali ena loola. 18Koko lakosumol’e, oyali Petelo; ko nongofaka ekelesia enami ena lufe line; ko nkombo ina Adese ifakoiyaki eho. 19Nongokofa nsete ina lifoka lina loola; ko yoi lin’etaketaka linatungy’e ena loko lingotungama ena loola; ko yoi lin’etaketaka linatungol’e ena loko lingotungwa ena loola. 20Nkwaho aofekya bakili’anande, batasumolake boto’omoko oka ende ayali Masiya.
21En’esik’eho Yesu aomatsa lituma bakili’anande ate angocoa ena Yelusalema oyen’ino la baoyi bike eneyali bingambe la nkanga ina toome ko l’atengi ban’ekanda, ko angoyakama, ko en’ina bon’esaso angetwa en’ewedi. 22Petelo amotamba, ko aomatsa lifela Yesu, ate, Ef’oho, Nkolo; yoi line lifilamaki eneyal’e. 23Koko aohelengwa, ko aosumola Petelo, ate, Eta ena mbus’enami, Satana; ond’ekumbelo eneyal’emi, lacin’oka ofakanele baoyi bana Yakomba: okanela nko baoyi ban’ato. 24Nkwaho Yesu aosumola bakili’anande, ate, Yombo boto alanga ankile, akoli eneyal’ende ayofim’endamene, ko aambole ekulusu enande, ko ankile. 25Lacina boto l’oto onolanga amonya liiko lonande, angungya loho; koko boto l’oto onungya liiko lonande lacin’enami angosungya loho. 26Yomb’oto atamba lituka lina loko lohalotu, koko ayoungy’endamene, nkita en’at’ende eka nai? Boto aenganya liiko lonande la nai? 27Lacina Bon’on’oto angoya la bikima binande ena bokoka bon’afango’onande; ko en’esik’eho angolukola boto l’oto l’oluko bonokoli l’ikambw’inande. 28Solosolo, lakosumol’ino, bamoi’aniyo banemali mendo bafenaki bewedi yengoko baena Bon’on’oto aoya ena lifoka linande.
လက်ရှိရွေးချယ်ထားမှု
Matayo 16: BBY62
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bokanda Bona Yakomba Bon’ototo © Alliance Biblique de la R. D. Congo, 1962