Matayo 20
20
1Lacina lifoka lina loola liyali yoka bosamb’onoyali boto’omoi, mene’otumba onofolaki l’okulu oyelela basali lacina basale ena lisala linande lina bekoli bena vina. 2Ko eneki’nd’oimedyaka lacina afe basali bina l’ina denier emoko, amatoma ena lisala linande lina bekoli bena vina. 3Ko yok’en’esike ena neuf heures aofola, ko aena bato’amoi bayemale en’edye en’esombe, efan’osala; 4ko amasumola, ate, Ino nkoho, bocoaka ena lisala, ko nongokof’ino mpuci inakolana. 5Ko baocoa. Ko lakina aofola en’esike ena midi, l’ena trois heures, ko aila yok’osamb’oho. 6Ko yok’esike ena cinq heures aofola lakina, ko aosungya bato’amoi baemali; ko amalokwela, ate, Ino bomemala mendo bina tu, efan’osala, lacina nai? 7Iy’ate, Efana nko l’oto onoteelela en’osala. Amasumola, Mbo, ino nkoho bocoaka ena lisala lin’ekoli bena vina. 8Eneki likolo oyelaka, nyangetuke ena lisala aosumola kapita enande, ate, Elela basali, ko oafute mpuci iniyo; matsa l’oloi bona mbusa yengoko osimba l’iy’an’oso. 9Ko enek’iy’anelelamaki ena cinq heures oyaka, baotamba boto l’oto denier emoko. 10Koko eneki basali ban’oso oyaka, baokanel’oka bangemba mpuci inileki. Koko iyo nkoho baemba boto l’oto nko denier emoko. 11Koko enek’iy’otambaka boto’omoko denier emoko yok’oho, baoningelaningela mene’otumba, 12Mbo bato’ane bana mbusa baosalaka heure nk’emoko kei, koko iso tosalaka bina tu, toyene bino l’ane mene; ko omotokody’iso l’iyo nko kocu. 13Koko aokutwel’omoi’oniyo, ate, Mango, ntakilel’e bowe; otimedya nde lacina otamba denier emoko? 14Ambola eho ene, ko ombocoa; lalanga njofe boto’one ona mbusa yoka bosamb’onakof’emi. 15Mpile nde bokotua bonalang’emamene la toma tonamamene? Liso line liyali nde bowe lacin’oka emi njali bolotsi?
16Lacin’eho, ban’otungu bangoyala en’oso, ko ban’oso bangoyala ena mbusa. 17Enema Yesu ocu ena Yelusalema, aotola bakili jo l’afe ena lokuko, ko amasumola eneyacu iyo ena mboka, ate, 18Lenda, toyacu ena Yelusalema; ko Bon’on’oto angolekyama eneyali nkanga ina toome ko l’eneyali batengi ban’ekanda. Ko iyo bangakol’ende likambo lin’ewedi lacina awu; 19ko bangolekya eneyali Befenda lacina baosisedya, ko baofome lofomi, ko lacina baande en’ekulusu; ko en’ina bon’esaso angetwa en’ewedi.
20Koko nyango ena ban’ana Zebedayo bana mpame aoya la ban’anande, amoosamela, ko amoufola yoi. 21Ko Yesu amoufola, ate, Na lang’e? Ende ate, Ila ban’ane banami bafe bakisase, omoi en’ili bona likasa line y’ome ko okina en’ili bona likasa line y’ooli ena lifoka line. 22Koko Yesu aokutola, ate, Ino bofeya yoi linufol’ino. Ino bomelisa nde nkofo enengi m’omela? Ko binamisa nde l’inamelo eninam’emi? Iy’ate, Tinya nde. 23Ko amasumola, ate, Bongomela nkofo enami, solosolo; ko bonginama l’inamelo en’inam’emi; ohonde ekisel’ase en’ili bona likasa linami y’ome l’en’ili bona likasa linami y’ooli ef’enami lacina njofe boto: eho engofama eneyal’iyo banaki Bafango’onami okoedyak’eho. 24Eneki bakili’amoi jo ookaka baoyi’ane, baok’owe lacin’eniyo’afe. 25Ko Yesu amaelela eneyal’ende, ko aila, ate, Ino bey’oka bafoka bana Befenda baotumanya bato’aniyo; ko banaleki la lifoka bamatomeela ntomo. 26Koko eneyal’ino efayalamaki yok’oho; koko onongolanga ayale en’oso’onino, akoli eneyal’ende ayalame bosali’onino; 27ko onongolanga ayale boto’on’oso eneyal’ino, ayalamake boombo’onino; 28yoka bosamb’onoyali Bon’on’oto: ataya lacina bato baosaele: ayaki oyosaela bato, ko lacina alekya liiko lonande mbiko lacin’ena bato bike.
29Eneki’nd’ocikaka Yeliko, bik’ike bon’ato bamokila. 30Ko lenda, bato’afe banodyak’aiso baokisase en’okenge bona mboka; ko enek’iy’ookak’oka Yesu ayete, baololomwa, Mbo Nkolo, bon’ona Dawidi, otookamel’isei. 31Ko bamoi ban’ato bike bamafekya lacina bambya lofoso, ohonde baokusalilolua ndolua mene. Nkolo, bon’ona Dawidi otookamel’isei. 32Yesu aemala, ko amaelela, ate, Yoi linalang’ino nkilel’ino lika nai? 33Bamosumola, Mbo Nkolo, tolanga baiso’aniso balifwa. 34Ko Yesu amaokamel’isei, ko aosuka baiso’aniyo la likasa. Isasanga baena, ko bamokila.
လက်ရှိရွေးချယ်ထားမှု
Matayo 20: BBY62
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bokanda Bona Yakomba Bon’ototo © Alliance Biblique de la R. D. Congo, 1962