Luka 5
5
Erisoha yeriswekera ryamahere
1Omugulu esyondeko syabya sikamuhatatania bati bowe eKinywa kyoMungu, abya imene oko mukokoro wengetsi yeGenezareti. 2Mwalangira amatu abiri okona musike we ngetsi; nikwa abasohi ibamabilwa mugo ibakalanda ebisohi byabo. 3Eriingira omo buguma boko mato, bwabya bwa Simoni, mwamubulya ati akunebo hake erilwa oko musike. Neryo mwikala mwakangirirya iniane omo bwato. 4Abere abibuga mwabwira Simoni ati, Mugende ahari omutobero mutogeraye ebisohi byenyu musohe. 5Simoni mwamusubirya ati, Mukama, tusibire omo kiro kyosi tukakola kutsibu sitweta banaki! Nikwa okwibuga ryawe nganditogeryabyomo. 6Babere babikola batya, mobabana mahera mangi; nebisohi mobyasonda eritwika, 7mobakoherya abalikyabo omo bundi bwato bati base bawatikayebo. Mobasa mobusulya amato abiri, kyaleka iniasonda eritobera. 8Nikwa Simoni Petero abere alangira ekyo, iniagwa oko malwi wa Yesu mwamubwira ati, Ulwe kwingye Mukama, kusangwa indi mundu mubi. 9Kusangwa abya aswekire, nabosi ababya haguma naye, busana nerihamba amahere ago basoha; 10na Yakobo na Yoane, abagala ba Zebedayo, abasangira na Simoni nabo moba sweka. Yesu mwabuga na Simoni ati, Sigubahe; eritsuka lino wasyasoha abandu. 11Neryo babere babileta amato oko mukokoro, mobasiga ebyosi mobamukwama.
Omuhaga
12Nomugulu abya oko muyi muguma, mohahika omundu inialwere ebihaga bingi; abere alola oko Yesu mwalambama ahisi oko busu buwe mwamugonga-gonga ati, Mukama, wa mabya wanzire, wangatoka erinyerya. 13Neryo mwakakya okuboko, mwamutulako ati, Nyanzire; were. Neryo-neryo ebihaga mobyamulwako. 14Neryo mwamutegeka ati siabwire mundu; nikwa ugende uyikanganaye oko muhereri, ubane obuhere busana neriera ryawe, ngoko Musa ategeka, bubye kiminyisyo ukubo. 15Nikwa kwilaba aho engulu eyo moya tsungana busana naye; nesyondeko nene mosyahindana eri mowa nerilamibwa kwesyondwala syabo. 16Nikwa iye mwayigabula kubo mwaya omo mbwarara mwasaba.
Oyo gumire
17Omo kiro kiguma kyoko biro ebyo, akakangirirya, habya abaFarisayo nabakangirirya bebihano babya bikere hakuhi, abalwa omo buri muyi wa Galilaya na Yudea na Yerusalema; namaka woMukama abya haguma naye erilamyabo. 18Neryo lebaya, abalume mobaleta omundu oko ngingo oyu wabya abasire, mobasonda-sonda erimwingirya nerimuhira emuliro wuwe; 19nikwa eribula enzira yerimwingirya, busana ne ndeko, mobasamba oko lutwe mobamwandagalya haguma nengingo yiwe omukati kebituba mobamuhira embere sya Yesu. 20Naye abere alola okwikirirya ryabo mwabuga ati, We mundu, ebibi byawe byamabuyirwa kuwe. 21Abasaki naba Farisayo mobatsuka eribulabulania bati, Oyu nindi oyu katsuma kwehi? Nindi angatoka eribuyira ebibi ate Mungu iyowene kwehi? 22Yesu abere abiminya eribulya ryabo mwasubiryabo mwabuga ati, Mukabulanaya omo mitima yenyu busana naki kwehi? 23Ekyolo ni kyahi, eribuga nyiti, Ebibi byawe bya mabuyirwa kuwe, kutse eribuga nyiti, Hangana uyigendere kwehi? 24Nikwa mutoke eriminya kwo Mugala womundu awite hamuli omo kihugo eribuyira ebibi—mwabwira omundu oyu basire ati, Ngabuga nawe nyiti, Hangana, wimaye engingo yawe ugende emwawe. 25Neryo-neryo mwahangana embere syabo, mwaheka engingo abya agotsereko, mwaya omuwe, akapipa Mungu, 26nabosi mobasweka kutsibu, mobapipa Mungu mobusula nerisweka ryeryubaha bati, Twamalangira emyatsi yogundi musindo.
Akabirikira Lawi
27Enyuma webi mwahuluka, mwalangira omusolesya, oyu kahulawa mo Lawi, inianikere aho bakasolera; mwamubwira ati, Unyikwame. 28Naye mwasigania ebyosi, mwahangana mwamukwama. 29Na Lawi mwamutsumbira erirya inene omo nyumba yiwe; habya endeko nene ya basolesya nabandi ababya begemere haguma nabo okwirya. 30Kandi abaFarisayo nabasaki babo ibakanegulira abiga buwe, bati, Busana naki mukarira neripulya haguma nabasolesya na bakola nabi kwehi? 31Yesu mwasubiryabo ati, Abakalire sibari nobwaga bwomu saki, nikwa abalwere. 32Mondasa eribirikira abatunganene, nikwa abakolanabi babinduke.
Eritsira
33Nabo mobabuga naye bati, Abiga baYoane bakatsira ngendo nyingi, neriyira erisaba, nabiga babaFarisayo batya, nikwa abawe bakarya neripulya. 34Yesu mwabuga nabo ati, Mwangatoka eritsirisya abageni beriherukania omugulu iba womuheruki ane nabo kwehi? 35Nikwa ebiro bikandisyasa, omugulu iba womuheruki asyalusihwa kubo oko biro ebyo basyatsira erirya. 36Kandi mwabwirabo omusyo ati, Sihari mundu akatula ekitomeko kyolukimba luhyaluhya nerihirakyo oko lukimba lwakera; amakola atya iniakatula oluhyaluhya, nekihande kyoluhyaluhya sikyendisyaringirirana nolwakera. 37Kandi sihari mundu oyu kuturira ebinyu bihyabihya omo ngobi yakera yebinyu; amakola atya, ebinyu bihyabihya bikatula engobi ibyutika, nesyongobi isyahera. 38Nikwa ebinyu bihyabihya bitolere erihirwa omo ngobi nyihyanyihya yebinyu. 39Kandi sihari mundu amabipulya ebinyu byakera akaswasonda ebihyabihya; kusangwa akabuga ati, Ebyakera byobyuwene.
လက်ရှိရွေးချယ်ထားမှု
Luka 5: NTN62
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Le Nouveau Testament et les Psaumes en Ndandi © British and Foreign Bible Society, 1962.