Matayo 10
10
1KOKO aoleta bakimi’akande jom l’afe, ko aolaka mpamba ele bademona ba linyamo wae baoza bako, ko baiky’anto nkangi ya bilenge biuma la tongoi ta bilenge biuma.
2Baina ba bikima jom la bife wete Owa joso Simona, otangema Petelo la Andelo okosangi l’ende nd’ooci; Yakobo la Yoane bana ba Zebedayo; 3Filipo ko la Balutolomayo; Toma ko la Matayo, botakanyi owa mpuci; Yakobo bona owa Alafayo, ko la Tadayo; 4Simona Zelote, ko la Yudasa owa Keliota ondoangelaki. 5Yesu aotoma bant’ane jom l’afe, aolalaka, akela,
Talokendake nda mboka ya Bafaya, ko talomotswake nd’onanga wa Ba-Samalia; 6lolo lokend’ele mpate ya botonga wa Yisalaele icwei. 7Ko acw’inyo, losangaka nsango, lokela, Likulaka ja loola jotutama. 8Loiky’anto bandoka nkangi, loetola bawei, loiky’anto b’aeka, loza bademona; inyo lambaki l’oya, lokaya l’oya. 9Talotombake wolo la francs la kongo nda totontombe tokinyo. 10Nko ntombe ea lokendo, nk’enkot’efe, nko bikoto, nk’onkando; ele bosali eji la toma tokande. 11Nd’ese la nd’onanga bomotsw’inyo, lasa bonto ondeji; ko loyal’eko elaka nko lolimana. 12Ko andotsw’inyo nd’ilombe, luola banto bal’eko. 13Ayaka ilombe eji, kela kuci ekinyo eyal’eko; lolo nga ifeji, kela kuci ekinyo eut’el’inyo. 14Ayaka bonto afamb’inyo, ko afokoza baoyi’akinyo, a iny’oiman’ilombe iko nkina bonang’oko, lotitola biucu bele nd’akaka’akinyo. 15Nsosolo, nsangel’inyo, umbelo ea bonang’oko ifolekola umbelo ea ese ea Sodomo la Amola nda mbile e’etenelo e’akambo.
16Bala, ntom’inyo nga mpate nd’etei ea nkoi: nd’ewela eko loyaleme la wanya ngole njwa, ko loyaleme la linsimi ngole bimbenga. 17Lolo lofonga loal’anto; el’iyo bifoleky’inyo nda nteke ea bilimo, ko bifokund’inyo la lojiji nda basunagoga; 18koko lifotombama nda joso ja gouverneurs la bakulaka ba rois nd’eloko ea lina likami, nga lotaza el’iyo l’ele Bafaya. 19Lolonde a iy’oleky’inyo, talokakaanake nd’ewela ea elenge e iny’otefela, ko la baoyi ba iny’otefela: ele baoyi ba iny’otefela bifokaem’el’inyo nda heure eko. 20Af’iny’otefela, lolonde Bolimo w’Ise ekinyo atefela nd’etema’ekinyo. 21Bonto ifolekya bona owa nyango ekande owa jende nd’iwa, ko ise ifolekya bona’okande; ko bana bifangela baise l’anyango’akiyo wae baom’iyo. 22Ko inyo lifinama jino l’ant’auma nd’eloko ea lina likami; lolo oso ociniana loncinji elaka nko nsukela ifoika. 23Lolo a iy’onyokol’inyo nd’onang’one, lolote nd’onang’omo; nsosolo, emi nsangel’inyo, nko lotafosiza locuwana benanga bia Yisalaele, Bona ow’onto ifoya.
24Bokimi ntalekolaka bolaki’okande, ko bokwala ntalekolaka nkolo ekande. 25Joi jokoka wete bokimi ayale eleng’ele bolaki’okande, ko bokwala ayale eleng’ele nkolo ekande. Ayaka batangaki bomong’ilombe Balazebuba, bifolekola lotang’iy’ale nd’oloi’okande o ngoko. 26Nd’ewela eko, talaangake mbaanga; nko joi likuki lifaokukw’olo: ko nko joi lindisama lifean’olo. 27Baoyi ba em’osangel’inyo nda wilima, losanga nda fole; ko baoyi bandok’inyo nda litoi, losangaka nd’aliko ba nsamba ya tolombe. 28Ko taloangak’iy’aoma jonge, lolo bafoomeya bolimo: lolonde loang’ende ofiteya bolimo ko la jonge nda Ngena. 29Ndeke ife ifotekyame nde la likota limoko? Nko loleke lomoko lokwa nd’amoci Ise ekinyo afea; 30lolonde babwo bale nd’etsa’ekinyo bauma baandema. 31Nd’ewela eko, taloangake: inyo lolekola ndeke iuke la wiko. 32Nd’ewela eko, os’onjimez’emi nda joso j’anto, njifimez’ende nda joso ja Fafa ekami ole nda loola. 33Lolo os’ontandol’emi nda joso j’anto, njifotandol’ende nda joso ja Fafa ekami ole nda loola.
34Talokanelake wae njaki otoma kuci nd’okili: nciyaki otoma kuci nd’okili, lolond’ifaka. 35Eki’mi oyaka wae ndenole bona l’ise, ko la bona ow’omoto la nyango ekande, ko la waji ow’ona la nyango e’ome: 36ko bonto ifotana baini’akande nd’ilongo ikande mongo. 37Ondok’ise la nyango eefe endekol’eefe enjok’ende emi, afeji l’emi: ko ondoka bona owa jende nkina bona ow’omoto eefe endekol’eefe enjok’ende emi, afeji l’emi. 38Ko ende ofambole ekulusu ekande, ko afonkime, afeji l’emi. 39Otana loiko lokande, ifocweya loko; ko ocweya loiko lokande nd’eloko ekami, ifotana loko.
40Os’oamb’inyo aonjamb’emi; ko os’onjamb’emi aolamb’ende ontomaki. 41Os’oamb’oteli nda lina ja boteli ifamba ndako ea boteli; ko os’oamba bonto owa liongi nda lina ja bonto owa liongi ifamba ndako ea bonto owa liongi. 42Koko os’okaya omo owa bana’ane ba tosisi nk’ekala kika e’asi ba ncici ba mamela nda lina ja bokimi, nsosolo, nsangel’inyo, ende afaosamba ndako ekae nye.
လက်ရှိရွေးချယ်ထားမှု
Matayo 10: NTMN58
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bonkanda Wa Nzakomba W’aeyoko © Aliiance Biblique de la RD Congo, 1958.