Mattayo 13
13
Gissigala siida wea histeayda
(Mark 4:1-9; Luk 8:4-8)
1Eaweettida gwaritteawa Yeesu ghoaha ak gawa goobideada aba ghuutta basooda. 2Gabassa geat emeetuw, ak geey bwak ea gwading'da maleambooda; ak goobideada nea ghaminaada emeeda aba ghuutta basooda. 3Gwarukusa buuneeda ng'asheega saang'a nea gagalla geat nea gwayeeshsha, “Ghayi gawa sih histeada. 4Damani histeawean gwanda gea abitpissa jeennaweeda, ghwahidu dariidakka ak ghwaak. 5Suurja goobitpissa badahuukka harearatka, heeda manda sigeeda saang'a, deagheatta gwardu iiduw ea manda sigeeda ang'ng'waay hawunga, 6iiduw nea gwadagu daknooda ghoaseal beasta daknooda; ak ghwasis aba gideaba manda hawunga. 7Suuk goobitpissa jeeda halaghweenga, rudu halaghweenga ghaminghis. 8Suuk goobitpissa heeda mida sigeeda miyaas, gwardu ak gwaji akkalealla bughala, gwaji niirja laadam, gwaji niirja diktam ea damanamughuush. 9Siida mideawa iidiga, ea dayiing'shi.”
Gissibaysiina galloodeaba geat bea ng'asheega
(Mark 4:10-12; Luk 8:9-10)
10Ghapka headaannyi Giinealanga ak gwayeeshsha, “Ghwasaan andagibalooli saawa nea gigalli geat ng'asheega?” 11Ghwasha nea gwayeeshsha saawa, “Agooga sugooneegwa nalooda makcheameeda sugoochcheandumeeda humng'eeda, nea saawa ea miyeattaw. 12Aba gideaba siida wassean mideawa gil gajeeheassa ea ghwanaawda, nea siitta mandeawana giliin, eara giitta mideawean gajearreat. 13Nii gideabaysiini gibaloolda nyaawa nea geagalli geat ng'asheegeani, aba gideaba saawa iyang'wearda ea mwadaaha, ghoaleaydiit ak amwayiinya nea mwanala. 14Aba heannyaawa gwasa ng'asheanda rugu sibaneeda siyi Isaaya nea gwayi:
‘Iing'da gajayiinya, ak ea mwajanala,
ging'weerdeayda gajoang'ng'wearda, ak ea mwajadaaha.
15Aba gideaba guroruunatkeaba fiisu nidurmaniidi,
nea iidiga nyaawa ea mayiingshi muuchchi,
ak ea niiluulan gheanyanga nyaawa,
adaghwadaah aba gheanyanga nyaawa,
ak ghwayiiy aba iidiga nyaawa,
ak gwajeeng'u aba guroruunatka nyaawa,
ak gwayamsean geat ak ghaahaapchi.’
16Ghoang'wani agooga aba gideaba gheanyangeagwa ghoang'wearda nea iidigeagwa gwayiing'shi. 17Aba huumwa geayeeshshineegwa sibanga saang'a ea fuga doobiiweadi ghayi gagaseadayi deakteaba ng'asheesu ghamneawa oadayiin, ak ea mwadaaha, nea ghwayiiy ng'asheesu ghamneawa oayinyiin ak ea mwayiinya.
Yeesu gwargu ganeega gala siida wea histeayda
(Mark 4:13-20; Luk 8:11-15)
18“Asi agooga oalleaydiit gideagali siida wea histeayda. 19Siida wassean iiy ng'asheanda sugoochcheandumeeda ak ea mwanala, ghwahidu giitta muyiin ak ghoasealda gidida sihisa guroroadaannyiin. 20Nea dea sihisa jeeda harearatkean ea siitta iiy ng'asheandideaniin gil ama deagheatta ghoang'ng'waay nea gang'weela. 21Amaduw ea mandeawana hawunga aba jeadaannyi iissa ghoang'ng'waay ng'asheandida gilinuwaas, ama hidu sawanadeeda ghana gapnu ghabasta appadaydeaba ng'asheenji gabay ghoabeada. 22Nea dea abissa jeeda geediga halaghweenga, ea siitta iiy ng'asheanda amaduw aba geawunda gheang'da barureega badayda ng'eanyiida, ghaminighis ak ea mudugwaji haghweega. 23Nea dea sihisa heeda sigeeda miyasiin ea siitta iiy ng'asheandideaniin ak gwajeeng'uuni; nii dea jih haghweega, gwaji akkalealla bughala, akwaji nii laadam, akwaji nii diktam ea damanamughuush.”
Gissigala morookka
24Gwarukuta gichcha galeega nea gwayeeshsha, “Sugoochcheandumeeda humng'eeda gawuurji siida weah gwahista histeanga miyaas aba jeeda madamnyeandannyi. 25Iiduw nea nilil buuneeda, ghwahidu weajoochcheanda ak gwahisa morookka dang'adiga ngano ak ghang'eat gawa. 26Rudu nngano nea ghamwanmwan nea gwaji geadaah gaguuyi sea moorookka. 27Gaweay soomjooga ak gwayeeshsha siitta bea madamnyeandean, ‘Ea Siida mureeda, mwaghannyi ghayi gihisti mmbeeyooda miyaas aba jeeda madamnyandang'u? Amaduw gwarinna yeenu moorookka?’ 28Gwayeeshsha niny, ‘Nii gwasin weajoochcheanda.’ Ghoanyaash soomjooga nea gwayeeshsha niny, ‘Gigasayi eweaya eammughuusha?’ 29Gwayeeshsha, ‘Manda; iyoammughuushchi morookka gajiiduw ghoaloachchi eara nngano. 30Anung'waada gwaheettu sean ea ghwahitta damanda lajiitta; damandida gaydayeeshsha fukka jea ghwalajiin, oshsheeda oammughuusha morookka ak ghoarachchi gharmuchcheekka ak geaghwarda, nea nngano goowweamsi gijigoodeanyu.’”
Gissigala ghajilleanda haradaali
(Mark 4:30-32; Luk 13:18-19)
31Gwarukta gichcha galeega nea gwayeesha, “Sugoochcheandumeeda humng'eeda gawuurji sea ghajiileandageetta suguura haradaali ghayi geanu siida akwahisa jeeda madamnyandaannyi; 32gabiissa amwanang'eawa ghajilga sean amaduw nea gwardu gwaheedu ak geadaah nea niiw geetta haw, ghwahidu dariidakka ak gwadeeksa ghoorajeega nyaawa damealgaaschi.”
Gissigala gidamwattaw
(Luk 13:20-21)
33Gwarukusa saawa gichcha galeega, “Sugoochcheandumeeda humng'eeda geegala sea hamiiraayda geanu gatmooda, ak googuuyi sea dearangspa gweeraji samwagu ak geeyi bwak ea ghaghuut geaw sean.”
Yeesu gagadiyeatta galeega
(Mark 4:33-34)
34Suh seaniin goobaloola Yeesu emeetuw aba galeega nea moang'ng'wa gwarukuta ng'ashaan nea manda gidagala. 35Abeeda ghoaw huumwa ng'asheanda ghayi rugu sibaneeda nea gwayi:
“Gaydajaat ghuutteanyu aba galeega,
gaydargu gea funyaat ghang'eada deasubwada sindeetta ng'eanyiida.”
Yeesu gwargu ganeega gala morookka
36Iiduw gwaheelli emeetuw ak gawa ghoah. Gamaseaw Giinealangaaschi ak gwayeeshsha “Goona ganeega ng'asheanda gwachchi igali geat sea morookka madamnyeandean.” 37Gwayeeshsha, “Siida hista histeanga miyaas Balleanda Siida; 38madamnyeandida ea ng'eanyiida gil, histeanga miyas balloojiga sugoochcheandumeeda; nea morookkiga ea balloojigeaba diitta muyiini. 39Nea weajoochcheandida histean ea meang'nyeandeenda, nea lajitta ea mudeanooda ng'eanyiida, nea fuga lach ea malaykajeega. 40Asi gitta simmugurriida morookka ak geang'uda beastean, ea gichchea gawuurji mudeanooda ng'eanyiida. 41Balleanda Siida gaygoojeagu malaykajeagaaschi, ak ghoawaam aba jeeda sugoochcheandumeadaannyi haleanjeessean eadu ringeeda ea fuga sean sina ng'asheega munyas. 42Ak geehisa jeeda duwayda beasta; ak gooyyeawda fuga nyaawa aba hoowa nea goowiiri geeshatka aba sawanadeeda. 43Abeeda geadoobiiweadi gayghoameang'daayda Aseetta aba jeeda sugoochcheandumeeda Bwaabwa nyaawa. Siida mideawa iidiga ea dayiinya.
Galeega lappiyeeda funyaat
44“Gichcha sugoochcheandumeeda humng'eeda gawuurji gheaseeda funyaat aba jeeda madamnyeanda, ama daa siida ghafuy; aba ng'weeloadaannyi gawa ak ghwashaayda haleanjeedaannyi sean mideawa ak ghwasha madamnyeandida.
Galeega booshcheanda haw sheayeat
45“Gichcha sugoochcheandumeeda humng'eeda gawuurji sea siida sheahiida haleanjeeda gasa boshcheanda miy, 46geeyi bwak ama daa boshchanjagi mideawa sheayeeda haw, gawa ak ghwashaayda haleanjeedaannyi sean ak ghwasha.
Galeega gheareedanga
47“Gichcha sugoochcheandumeeda humng'eeda gawuurji sea gheareedanga siippuutta jeeda basooda, ak ghoang'ng'waay heeluutka sean bea ghweayeega; 48geeyi bwak ama nyiit, goongiiru buuneeda ea ghwahidu ghuutta basooda ak ghaghwal ghweayeega miyaas ak ghwayiin jeesinga dabiitta nyaawa nea gea munyas gwahista. 49Nii gichchea gawuurji gil eaweetta muudeanooda ng'eanyiida aba gideaba eaweettida gayghwahidu malaykajeega ak gooheelli fuga munyas ea gea doobiiweadi, 50ak gwahisa fuga munyas jeeda duwayda beasta; abeeda gaygwanda buuneeda nea giwiirda geeshatka.”
Meanang'oochcheandumeeda eesh ea dea waas
51“Heappi nojeeng'u ng'asheesu seaniin?” Ghwalamda Saawa ak gwayeeshsha, “Eah.” 52Ng'atta gwayeeshsha saawa, “Asi gilinyoo ea ng'oorshoochcheanda gil was giinealaneeda sugoochcheandumeeda humng'eeda, gawuurji sea siida mideawa gheeda geanu aba jeeda gheaseadaannyi haleanjeeda eashish ea gea woosi.”
Yeesu geaheawa aba Nasareetti
(Mark 6:1-6; Luk 4:16-30)
53Iiduw nea ghoahiit Yeesu galeegiga ghang'eat gawa, 54gawa ng'eang'da nyaawa hitta hoowa goonealshi aba jeeda ghooriida nyaawa siinnealshachcheewa, ak goonealshi ea ghahamng'eanyi buuneeda nea gwayi, “Siisi ghwanyasa yeenu weaghumeeni ea ng'asheesu deamdeameadiin? 55Neada siisi ea mii balleandeaba siitta sina behajeegeani? Neada ghaamwat ea megureewana Mariya? Nea oorjooga ghaamwat ea mii Yakkobo gil ea Yoseefu ea Simon ea Yuudahi? 56Ama eara haweega ghaamwat sean ea meendeawanani aba hiji? Abeeda ghwanyasa yeenu siisi ng'asheesu seaniin?” 57Deagheatta geenyareesi aba ng'asheagaaschi. Hean gwayeeshsha Yeesu saawa, “Sibaneeda majaghanyi ea meattawa mureeda, geaghus ea meattawa aba ng'eanyidaannyi ea gheannyaawa.” 58Ea mudugwasissa hoowa deamdeamang'su saang'a aba gideaba mandeawana masaweega.
လက်ရှိရွေးချယ်ထားမှု
Mattayo 13: DTGANT09
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Datooga New Testament © Bible Society of Tanzania, 2009.