RAPHA HIQWA LAK 18
18
Abraham Ma Ase Mikuqha Nguta Kiqkham Kuqto
1 Tatiwe ka Abraham rai Mamre asii pero hiq ba maq riihumkito. Abraham ka apaiq tombutiip kilamchong na ngaraü riito. Kriibala ka ranaiq shethung shekham rashekii tsihea bala riito. 2Apaiq raq lam nü na liito raüta maiq wetsam ka kiijaq chap raq raq chhito. Kiimaq apaiq raq tsangshiq ma manto tiichhi atheaphi ka hiq na tiithanli bumto. 3Raüta apaiq raq akha nguto, “Shiilangwetiim lei, mangchan lanta namshiq ka ijam na düwa hü maq naq leawan rongkiq. Ngi ka namtsam shiili miitu arjaq khekham. 4Namtsam hokphi hechang kham lamkuq wapha. Namtsam ka ara pechong tong na heashi niitiitsak ngali rong liishaq. 5Ngi raq namtsam miitu wakhiimkaq ma phaqsea phanshi lam wapha. Namtsam wanhiq khum na han tiihong ma. Namtsam ka ajaq ijam lam maq dong wan lan arka ngi ma kiim jonghea. Kra ningkhan namtsam ka heashi shiikumpan pha.”
Kiijiishe tsangshiq raq treto, “Kechu jonghea; klolaq. Naishiq riimin taotiikai.”
6Kiimaq Abraham ka taülaü khiq tombutiip mong na juto. Raüta Sara ma akha nguto, “Kotsi, ümjaq wa ahea pinthum bunwong thong kriiwa wongwin ka lam laüta winsii lumlaq.” 7Raütiishe apaiq ka nyamse rümchang khok kiina juto. Raüta minsaüse arese phintsaq tsaq hea, angam phaq ma asumwiq nintata hea kra lam wan raüta ajaqshi se weshi ma kuqto. Kriiwe riimin jaqlo thit kra ngam ka tiije lumto. 8Raütiishe apaiq raq krim wiijam, dut wiijam, kiimaq ngam kra lamho raüta, wanwetiim kiima lam kuq hoto. Kra pechongji na apaiq raq tsangtsam ma ajaq maq tsoq kuto. Kiimaq tsangshiq raq phaqsiqto.
9Kiijiishe tsangshiq raq apaiq ma waito, “Ümjamti nyung Sara ha ümbano?”
“Apaiq ka tombutiip mong na,” nguta apaiq raq treto.
10Tsangtsam phong wa weshi raq nguto, “Ümchaü armaq jipi lütiikaü jai na, Ngi ka mijangki kang. Kiimaq ümjamti nyung Sara raq ase maiqwe se ashi mihum.”
Sara ka apaiq jai na, tombutiip kilamchong maq kra riibom ka tairea riito. 11Abraham nai Sara ka tsangnai wiita kiikaiq pinthum she riito. Kiimaq Sara ka jechakre kheasam kiimin atsaq kai wishe riito. 12Kra ningkhan Sara ka apaiq nai apaiq kli naito. Raüta akha nguto, “Ümchaü ngi ka wikaü kiikaiqshe kiimaq ihü ihan min wiita ariimkai kunshe. Riita ijamtiwe rai ka mihai nga lot ha shea? Kiimaq kriithaq niimin, ijamtiwe kiimin tikii she.”
13Kiijiishe Tatiwe raq Abraham ma waito, “Sara ka jamlai nguto naitla. Kiimaq, ‘Ngi ka wikaü nyung she riilata, ngohea dea ise ka mihum lot ha shea?’ nguta jaram wa ngutla. 14Tatiwe raq lot mang chang phan ka asi shea? Ngi ngutiikang ara phan han, ümchaü armaq jipi lütiikaü silata Ngi ka ana mijangkiha. Kiimaq Sara raq ase maiqwe se ashi mihum.”
15Sara ka ahaisitsi ma, apaiq ka atiidam riikito. Raüta, “Ngi ka nai mang,” nguta tiidamkito.
“Ja riiwa naimaü, nailaü ihata,” nguta apaiq raq treto.
Abraham Raq Sodom Miitu Tiipaiqneato
16Raütiishe kra maiqwetiim ka tiido wanto. Raüta kriiba maq tsangshiq raq Sodom chela kiina hiq na liili chang hiq ba kiina wawanto. Kiimaq Abraham ka tsangshiq ka lam na thükai nguta tsangshiq rai wawan damto. 17Kiijiishe Tatiwe raq apaiq nai apaiq ka akha tiingoto, “Ngi raq jamlai klo chang wa sitlaq kriika Abraham ma dampaü mang. 18Apaiq saüse phan thun ka maiq mung jonghea ashi kiimaq maiq pahea ahong ala mung ashi miishe mija wan. Kiimaq apaiq lümaq Ngi raq maiq phan thun tlotli mishmanha. 19Ngi raq apaiq ka tsea wan kang she. Kriika apaiq raq asetiim nai asaütiim ka apaiq wokhong maq, Ngi raq akuqha aming thun kra lang laü raüta kiimaq riikhaqli nai tingting jaq sham raüta siwan miitu tsea wan kang. Tsangshiq raq kra klo raüla, Ngi raq apaiq ma kiq kham kuq kang kra kunli miklo kuqha.”
20Kiijiishe Tatiwe raq Abraham ma nguto, “Sodom nai Gommora chela ma kha thun ka tsinhea nyantlo asi. Kiimaq tsangshiq ngarai ka henghea she. 21Ngi ka kilata kra kha thun nyantlaq taitiikang ka ngohea dea shea arot wa kra liikai ratlo.”
22Raütiishe kra wenai ka wawanto. Raüta Sodom chela nü na kihoto. Shatmaq Tatiwe ka Abraham rai li khingto. 23Abraham ka Tatiwe phana tiisotto. Raüta akha waito, “Riita ümniiraq maiqsangti ka ashutti rai ngohea shaqshaq dea shea miqchup mijiipbaiq haü? 24Bom shiiton kra chela na maiqsangti maiq roq biingi asi nguraü jiiha, ümniiraq chelati ka miqchup mitiithenbaiq haü shea? Maiq roq biingi kra tiiwongke miitu chela ka tiihang maü shea mirhaü? 25Riikhaqli miika, ümniiraq maiqsangti ka ashutti rai ka tsat baiq maü mirhaü. Kriika ümkhiiriitii jiimin klolot maü! Ümniiraq kiikhiika klolot maü. Kra ümniiraq klo haü jiika, maiqsangti kiimin ashutti rai khoshi na mo tiiho ma mikhat wa. Arka ümkhiiriitii jiimin riimak. Mangjong hiq tlot li kha photiwe riika tingting maq phoke chang li.”
26 Tatiwe raq treto, “Ngi raq Sodom chela na maiqsangti maiq roqbiingi hum hala, tsangshiq tiiwongke miitu chelati tlotli ka mitiihangha.”
27Abraham raq jangshi ri hali nguto, “Ngi raq haimang maq ümniima bomruq bomrai kha na ngi mra ka diikuqlaq, Tatiwe lei. Ngi ka miiman maiqse lam lamli. Ngi raq ümman na bomrai ka thek mang. 28Shatmaq, jursap kiijaq maiqsangti ka roqbiingi rii na roqblai li ngu i. Riita ümniiraq kra chelati ka tlotli maiq webiingi atsap se ningkhan mitiithenbaiq haüshea?”
Tatiwe raq treto, “Ngi raq maiqsangti roqblai ri biingi humhala, kra chela ka tiithen baiq mang mirha.”
29Abraham raq jangshi ri hali ngu nongto, “Jursap kiijiika roqblai li misi ngu i.”
Apaiq raq treto, “Ngi raq tiithenbaiq mang, kiijaq roqblai asi ngu raü ka.”
30Abraham raq nguto, “Mangchan laüta naqkhiqkiq, Tatiwe lei, ngi riika jangshi ri bom nong chang rakito. Riita kiijiika roqtsamli ngu raüha?”
Apaiq raq nguto, “Ngi raq roqtsam humha jiila, klo mang mirha.”
31Abraham raq nguto, “Tatiwe lei, mangchan laüta ngi raq hai mang maq ümniirai bomrai tiikang kha na. I mra ka adü riikuq laq. Bom shiiton roqnai li miraq ngu i?”
Apaiq raq nguto, “Ngi raq roqnai hum hala, chela ka tiithen baiq mang mirha.”
32Abraham raq nguto, “Tatiwe lei, mangchan laüta naqkhiq kiq dea. Ngi raq jangshi lamlam se li she bom nong pha. Riita roqshi lamlam seli ngu raü ha?”
Apaiq raq nguto, “Ngi raq kiijaq maiq roqshi humha jiila, chela ka tiithen baiq mang mirha.” 33Apaiq ka Abraham rai riibom lot raüta. Tatiwe ka awashe riiwanto. Kiimaq Abraham min ajam niishe jang wanto.
လက်ရှိရွေးချယ်ထားမှု
RAPHA HIQWA LAK 18: TANGSBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.