RAPHA HIQWA LAK 29
29
Jakob Ka Laban Jam Na Saüto
1Jakob raq apaiq wanhiq khum ka shedong mung nü na wawan ruqli wawanto. 2Kiimaq tiidongchhaq miili apaiq ka wak ram na khappong ashi kriijaq saü wato. Kra khappong tro niika sku kong kongtsam jong ri abumsea chhi wanto. Kra nyamse kong ma kham ka kra khappong wa khu raüta tiinyangtlo. Kra khappong pangchang ka longpen kaü ajongwiq ashi maq pangtlo. 3Riita ümtiikiiwa nyamse kong phong ka adam na kiijaq saüki raüla, sku rümtibi raq longkaü ka ado riibaiqtlo. Raüta nyamse kong kiima kham ka khu raüta tiinyangtlo. Kra lot raüla kra longkaü maq khappong ka pangbaiq nongtlo.
4Jakob raq sku rümtibi kiima waito, “Phunobi lei, namshiq ka ümriibati wa?”
“Naishiq ka Haran hiqti,” nguta tsangshiq raq treto.
5Kiimaq apaiq raq tsangshiq ma waito, “Riita namshiq raq Nahor se Laban ka asap han shea?”
“Naishiq raq asap-hai,” nguta tsangshiq raq treto.
6“Riita apaiq ka ahea shea?” nguta apaiq raq waito.
“Apaiq ka ahea,” nguta tsangshiq raq treto. “Liimaüta ase jechakse Rechel ka awe nyamse kong sheaho raüta arjaq saütlo kata.”
7Kiimaq Jakob raq nguto, “Riita ümchaü ka rashe alu wiqli ahata. Kiimaq nyamse kong ka jam na tsuq wan akhing cho mihong shaqli. Riita namshiq raq nyamse kong ma kham ka tiinyang lanta nyiim tiiphaqki nong man jawa?”
8Tsangshiq raq treto, “Nyamse kong ka kunli ajaq riichom hümaq kiimaq kra longkaü ka dobaiq hümiika, naishiq raq nyamse kong ma kham ka tiinyanglot mai.”
9Kiimaq Jakob ka tsangshiq rai riibom raitlaq liipan niili, Rechel ka anyamse kong krai saükito. 10Riita Jakob raq Rechel ka ahu Laban nyamse kong kra tsuqho raüta saüki kiita, apaiq ka khappong kiina kito. Raüta longkaü ka lin baiqto. Raüta sku kong ma kham ka khu raüta tiinyangto. 11Kra lot raütiishe apaiq raq Rechel theaphi na mangchan tiichhi shupto. Raütiishe apaiq ka achochisi tsi ma aho she riihoto. 12Raüta apaiq raq apaiq ma, “Ngi ka ümwe ma tanyang seno, Rebeka se,” nguta chongto.
Kiijiishe kriinyung ka awe ma chong wa jam na tlat chhat juto. 13Kiimaq apaiq riimin adiiqwe Jakob tsütsa kra tai raüta, apaiq ka tlat chhat apaiq rai riihumkai juto. Raüta akhuk maq pomsaq riito. Raüta atheaphi na shupto. Raüta apaiq ka jam niishe shea wanto. Kiimaq Jakob raq Laban ma phanrap lea wantiiwa bom thun ka wiita chongto. 14Kiijiishe Laban raq nguto, “Tengto, ümniika itiijai ihan ngam dea kata.” Kiimaq Jakob ka kiijaq jipi lüshi tingkhit sito.
Jakob Raq Laban Ka Rechel Nai Lea Miitu Shiikumpanto
15Laban raq Jakob ma nguto, “Ümniika ngi ma tanyangseno nguta ngi ma phe maq jaq ka jamkho misham kuqhaü. Riita ümjaq maq ka ümchuwa mijaü haü?” 16Laban setiim ka jechakse nai ka anai asi. Anyinyung mang ka Lea. Kiimaq ano nyung mang ka Rechel. 17Lea makpo wiinai ka atsom wiq. Shatmaq Rechel sham ka asap wiq kiimaq shamhea wiq.
18Jakob riika Rechel ka lungwiitlo. Kra ningkhan apaiq raq nguto, “Ümniiraq ngi ma Rechel ka kuq haüla, ümniima wiimiishi jaq misham kuq kang.”
19Laban raq treto, “Ngi raq apaiq ka maiq ahinti ma kenam miika, ümniimiidea mikuqha. Ahea, ümniika arjaq ngi rai li silaq.” 20Kiimaq Jakob raq Rechel lap miitu Laban ma wiimiishi jaqsham kuqto. Kiimaq kra rahiq jipi lea wantaq thun kriika, apaiq miika ranaiq naitsam ikhli riito. Jamkhano ngukla apaiq raq Rechel ka lungwiitlo.
21Kiijiishe Jakob raq Laban ma nguto, “Akhing ka hongto she. Ngi raq ümse ka lampha.” 22Krai mren Laban raq maiqlam poi kloto. Raüta maiq thun ka wiitarü tiiheato. 23Shatmaq kra rawa, Rechel tiiwake rii na apaiq raq Lea ka Jakob ma tiiwato. Kiimaq Jakob ka apaiq rai haingato. 24(Kiimaq Laban raq adise jechak se Jilpa ka ase Lea ma jaqshise miitu kuqto.) 25Jakob riika anap ranap niishetiq kriika Lea khana nguta sapto. Kiimaq apaiq ka Laban phana wato. Raüta nguto, “Riita ümniiraq ngi ma ara jamlai wa klo laü? Ngi riika Rechel lam miitu jaq shamkuq kang. Ümniiraq ngi ka jaram wa laorat laü?”
26Kiijiishe Laban raq treto, “Arjaq naishiq thunglai ka anyi-nyung sishat na ano-nyung ka maiq ma tiiwa mai. 27Maiqlam poi liipanshi poi klo tiikai kra mikun liishaq na. Raüla ngi raq ümniima Rechel ka mitiiwa kang, kiitiina ümniiraq ngi ma wiimiishi hali ja shamke nong chang miraq.”
28Kiimaq Jakob riimin ahea nguta bom ka rito. Kiimaq maiq lampoi klo liipanshi kra thumto she angu na, Laban raq ase Rechel ka Jakob ma tiiwato. 29(Kiimaq Laban raq adise jechakse Bilha ka ase Rechel jaqshise miitu kuqto.) 30Kiimaq Jakob ka Rechel rai min haingato. Kiimaq apaiq raq Rechel ka Lea nam ma achan lin lungwiito. Kiimaq apaiq raq Laban ma wiimiishi hali jaq ka shamkuq nongto.
Jakob Setiim
31Riita Tatiwe raq Jakob riika Lea ka Rechel nam ma atsap lin lungwiitlo nguta chhito. Kriikha na Tatiwe raq Lea ka wiikhang wiira nyung ma tiijato. Shatmaq Rechel ka sehüli riishat shat riito. 32Kiimaq Lea ka wiihan she riito. Raüta ase maiqwe se chiito. Apaiq raq nguto, “Tatiwe raq ngi chamchao ka chhito. Ümchaü ka iwese raq ngi ka milungwii she.” Kra ningkhan apaiq raq no ka Reuben nguta mangto. 33Kiimaq apaiq ka wiihan she hali riito. Raüta ase ashi maiq wese hali hum nongto. Raüta apaiq raq nguto, “Tatiwe raq ngi ma ise arti armin kuq nongto. Jamkhano ngukla apaiq raq ngi ka ijamtiwe raq lungwii mak riitlo nguta taito.” Kra ningkhan apaiq raq no ka Simeon nguta mangto. 34Kiimaq thongshi ri hali apaiq ka wiihan she riito. Raüta ase maiqwe se ashi hali hum nongto. Apaiq raq nguto, “Ümchaü kla itawe ka ngi rai tiinap shat li she miraq. Jamkhano ngukla ngi raq apaiq ma asetiim wetsam she humkuq kang.” Kra ningkhan apaiq raq no ka Lewi nguta mangto. 35Kiimahali apaiq ka wiihan she hali riito. Raüta ase ka maiqwe se hali chiito. Kiimaq apaiq raq nguto, “Ümchaü lak ka ngi raq Tatiwe mitiitsamha.” Krai mren, apaiq raq no ka Juda nguta mangto. Kra jaimiishe apaiq raq no ka hum nong mak she tsaqkito.
လက်ရှိရွေးချယ်ထားမှု
RAPHA HIQWA LAK 29: TANGSBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.