MATHAIIN 4
4
Isua Anthemna
(Mk 1.12-13; Lk 4.1-13)
1Hanke Isua Diabolin ansinna ranga philchara aruai. #Heb 2.18; 4.15 2Hava han ni sommanli sun zan ava ngoia nukhona ancham zei. 3Hava han ansinpu ha a koma honga a hong ti, “Pathian Naipasal na ni ten, hi lung ngai hi vaipol chang ro ti ro.”
4Tenchu aman a masanga anziaka om, “Min vaipol le rong dam mak ten, ‘Pathian mur ata chong asuak tak ha hava han dam inti.’ ” #Dan 8.3 5Hanke Diabolin khopui anthianga a tuanga Biakin chung sipa a manding, 6“Pathian Naipasal na ni ten antom ro, ‘Anziak a om a vanpalai ngai na sika chong pe inti akut le na madom unti na ke lung le ande no ni,’ ” ati pe. #Sam 91.11-12
7Isuan ati pe anziak a om ret, “Na Puma Pathian mansin no ro” #Dan 6.16
8Hanuk Diabolin achan mual ansang sabak khata a tuanga ramual ram pumpui le ei lianna ngai a manmu. 9Hatuka ati pe, “Anboklaka nana mok ten sova dora so na pe ka ti.”
10Hanke Isuan, “Se ro Soitan asik chu anziaka a om, ‘Na Pathian na Puma rongke nei biak rang,’ ” ati. #Dan 6.13
11Hanke Diabolin amaka ase. Hatuka enta vanpalai ngai a honga a dorbo adom pe u.
Isua Sin ei Phutna
(Mk 1.14-15; Lk 4.14-15)
12Hanuk Johon ha lungina ankhum ariata Galilia ase. #Mt 14.3; Mk 6.17; Lk 3.19-20 13Hatuka Nazaret a maka tipuilian kola Zebulun le Naptali biala Kapernauma asena ava om. 14Isai Dearin ei ril hiva chong ei chuk,
15“Zebulun ram le Naptali ram #Isa 9.1-2
tipuilian lama Jordon rala
Jentail ngai omna Galili ram!
16Azing kara ansut nam ha ra-ang
amu u zei thina ram ralina
ansut ha achung u na ra-ang asuak zei.”
17Haten pei Isuan chong ril ei va phut, “Malung makhir u ro asik chu vanram anai zei!” ei ti. #Mt 3.2
Ngasur Manli Isuan Apai
(Mk 1.16-20; Lk 5.1-11)
18Voikhat chu Galili tindil tang kola achei tira ei mu parual anni Simon Pitor ha a parual Andria le tindila len ei deng u asik chu nga sur ei ni u. 19Hangai rang ha, “Ka nuk hong zi u ro, mi sura na sin u ka ti,” ati pe. 20Hatuka halen han a len amaka anuk ei zi u.
21Hatuka havan ata a matona ase na ei va mu parual anni Zebedi a naipasal Jakob le a parual Johon a pa u Zebedi abila rakuanga len ei deng u hangai ha ei kui. 22Hatuka havan len han rakuang le apa u ei maka anuk ei zi u.
Isua Manchuna, Chongrilna le Mandamna
(Lk 6.17-19)
23Hava suale Isuan Galili dora ava cheia anchunna in kipa mi a manchuna Pathian ram thang ahui rui arila hatuka mi natna tin le rikhua tin a mandam. #Mt 9.35; Mk 1.39 24Hatuka ama thang mi mura Suria ram dora abit hanuk rikho tina rikhua tong ana, kachai ei o le rirangol, azeng adon ngai dora a kom a hong tuang u na amani ha alei mandam. 25Hatuka Galili, Dikapoli, Jerusalem, Judai le Jordon ral ata mi tampan anu nuk ei zi u.
လက်ရှိရွေးချယ်ထားမှု
MATHAIIN 4: RANGBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.