Yaya 4
4
Samari kaa muse la ko
1-3Farisinu ka a mɔɛ Isa be talibenu sɔtɔla, a ni anu lasuwɛ je tɔ tanbi Yaya la. Kɔnɔ Isa ɲan yɛtɛ bele malasuwɛ mala je tɔ, fɔ a la talibenu le be a mala. Awa, Isa la wo kuma mɔɛreŋɛ, a bɔɔta Juda duge tɔ, a saagita Galile duge tɔ.
4Wo biyase butɔ, a fɛrɛ bele fɔ a ni Samari duge takuntu. 5Awa, a keta Samari saa do ma, ka min tɔgɔ Sikari. Yaguba ka duge min dii a la den Yusufu ma nun, a be wolo kɛnna. 6Yaguba la kɔlɔŋɛ tugun be ɲɔ le. Awa, Isa korireŋɛ biyasi tagamaŋɛ la, a ka a majigi wo kɔlɔŋɛ kɛnna. Fayida wo ka a taran tele be kunna tun.
7Wo butɔ, muse do nata ji soridula, ɲɔ kaa le mu a la. Isa ka a fɔ a ye: «N kɔ je, n ni a min.» 8Wo ka a taran, a la talibenu bata taga saa butɔ dɔmɔ sandula. 9Ale Samari kaa muse ka a fɔ a ye, a ko: «Ile Yahude kaye, nde Samari muse, i be n táranna ji minnɛŋɛ la fenna?» A ka wo fɔ le, bayi Yahudenu haju yo bele Samari kaanu ma. 10Isa ka a jaabi, a ko a ma: «Nde min be a fɔla i ye, n kɔ je n ni a min, ka i ka n lɔn nun, nde min mu Ala la kɔɔre la, ile le be nde táranna nun, wo butɔ, n si ile kɔ je la nun, min mu malakisi je la.» 11Muse ka a fɔ a ye, a ko: «N tige, ji sorifen bele i bolo, kɔlɔŋɛ mɛn luggɛta. I si naa wo malakisi je bɔɔ mina le? 12Mɔ benba Yaguba ka kɛ kɔlɔŋɛ dii mɔ ma. Ale yɛtɛ nun a la deŋɛnu ka a je min de, anun a la kolofeŋɛnu. Ile fisa le wo ko ba?» 13Isa ka a jaabi, a ko a ma: «Min yo ka kɛ kɔlɔn tɔ je min, ji sɔgɛ mɛn si wo tigi bita le tugun. 14Kɔnɔ ka nde ka je dii mɔgɛ min ma, ka a ka a min, ji sɔgɔ te a bita bitugun. N be je min diila a ma, wo je si ma le a juse tɔ tenge la, a ni siya han a ni tanbi a tɔ, a ni abada kise dii a ma.» 15Muse ka a fɔ a ye, a ko: «N tige, n kɔ wo je la, alako ji sɔgɔ kana n bita, n kana na yan bitugun ji soridula.» 16Isa ka a fɔ a ye: «Taga i la kaye kele, wo ni na.» 17Muse ka a jaabi, a ko a ma: «Kayi bele n bolo.» Isa ka a fɔ a ye: «I bata tɔɲa fɔ, a fɔ koe la kayi bele i bolo. 18Bayi i dun nun kayi loolu bata to ɲɔgɔn na. I be min tugun bolo kɔtɛ, i la kayi beeren ma wo tugun na. I bata tɔɲa fɔ wo tɔ.» 19Muse ka a fɔ a ye: «N tige, n bata a yen, nabiyonmɛ le mu ile la. 20Mɔle benbanu ka Ala batu kɛ kɔnkɛ le kunma. Wole Yahudenu kan be a fɔla, a fɛrɛ bele fɔ mɔgɛ ni Ala batu Darisalamu le.» 21Isa ka a fɔ a ye: «N nɛɛnɛ, i ni laa n na kuma la: wagati do si naa ke le, mɔgɛnu te Baaba Ala batu kɛ kɔnkɛ tɔ, hali Darisalamu. 22Wole Samari kaanu, wo be min batula, wo ma wo lɔn. Mɔle Yahudenu be min batula, mɔ ka wo lɔn, bayi malakise be fatanden Yahudenu le la. 23Kɔnɔ, wagati do si naa ke, a ɲan bata ke: batulanu yati te Baaba Ala batu tɔɲa la kan do kan fɔ anu sondomɛ butɔ. Bayi Baaba Ala be wo ɲɔgɔn batulanu le ɲinila. 24Ala mu Hakkili saniyandeŋɛ le la. A fɛrɛ bele fɔ a batulanu ni a batu tɔɲa la anu sondomɛ tɔ.» 25Muse ka a fɔ a ye: «N ka a lɔn Al-Masihu be nala, anu be min ma Ala la mɔgɔ masubɛreŋɛ. Ale tini na wagate min tɔ, a si naa koe bɛ ɲamakaran mɔ ye.» 26Isa ka a fɔ a ye, a ko: «Nde min be kumala i ye ka, nde le mu wo la.»
27A la talibenu la na tabɛnta wolo ma. Anu to ka Isa nun muse taran kumala, wo mata anu ye da bala le la. Hali wolo mu, mɔgɔ yo ma sɔtɔ anu tɔ, min si a ɲininka a be diren fen min ye, ka wo ma a be kumala ale muse la fen min na. 28Wo butɔ, muse ka a la ji sori lɔndɛ to ɲɔ, a saagita saa tɔ, a naata a fɔ ɲɔ mɔgɛnu ye, a ko: 29«Wo na kaye do fɛlɛ ba! N ka koe min bɛ ma, a bata a bɛ fɔ n ɲɛ. Kɔnɔ hali Ala la mɔgɔ masubɛreŋɛ ma wo la ba?» 30Wo butɔ, a bɛ bɔɔta saa tɔ tagala Isa dula.
31Wo ka a taran, wo wagate butɔ Isa la talibenu be a madiyala, anu ko: «Karamɔgɔ, dɔmɔre ma!» 32A ka a fɔ anu ye: «Kɔnɔ dɔmɛ be nde bolo, wole ma min lɔn.» 33Wo butɔ, talibenu tota a fɔla ɲɔgɔn ye: «Mɔgɔ do bata dɔmɛ nati a ye ba?» 34Isa ka a fɔ anu ye: «N na balue mu n Kiila sagoe ma koe le la, a la wale lakamali koe la. 35Wo bele a fɔla le ba, kari naani be toren sɛnɛ tɛgɛ ɲaama? N ni tɔɲa fɔ wo ye, wo ɲa lawuli wo ni sɛnɛnu fɛlɛ, anu bata mɔ, anu tɛgɛ tɛmuɛ bata ke. 36Min be sɛnɛ tɛgɛla, wo ɲan be a sɔŋɛ sɔtɔla, a mɛn be wo tɔnɛ madɛnna le alako mɔgɔ donu ni abada kise sɔtɔ. Wolo mu, sɛnɛ foyila nun a tɛgɛla bɛ be sɛɛwala. 37Wo butɔ, kɛ taale mu tɔɲa le la, a fɔ koe la: ‹Do si sɛnɛ foyi le, do gbɛtɛ ni a tɛgɛ.› 38Nde tugun ka wo sɔ sɛnɛ tɛgɛ koe la, wo ma tɔɔrɔ min na. Doenu ka wale min ma, wole be anu la tɔɔrɛ tɔnɛ sɔtɔla.»
39Samari duge, wo saa tɔ, mɔgɔ siyama dɛnkɛnɛyata Isa ma, muse la seedeɲɔgɔya la ko sabu la, a to ka a fɔ, aa a ka koe min bɛ ma, Isa bata wo bɛ fɔ a ye. 40Awa, Samari kaanu to tagata ke Isa ma, anu tota a madiyala a ni to anu fɛ. Wo butɔ, a ka tele fila ma ɲɔ. 41Mɔgɔ siyama mɛn sata doenu kunma anu dɛnkɛnɛyata Isa la kuma la ko sabu la. 42Wonu ka a fɔ ale muse ye: «Mɔ ma dɛnkɛnɛya i la kuma le la de! Mɔle yɛtɛ bata a la kuma mɔɛ, mɔ ka a lɔn dunuya malakisilá yati mu ale le la.»
Walila kuntige la deŋɛ lakendeya koe
43Wo tele fila tanbi kɔma, Isa bɔɔta Samari duge tɔ, a mɛn ka a la kila jokki tagala Galile duge tɔ. 44A yɛtɛ yati ka a fɔ le, a ko aa nabiyonmɛ te biliya sɔtɔ a la saa tɔ. 45A keta Galile wagate min tɔ, ɲɔ kaanu ka a labɛn a ɲinma la. Bayi ande tugun tagata le nun sale tɔ Darisalamu: a ka koe min bɛ ma sale tɔ, anu ka wo bɛ yen de. 46Wo butɔ, Isa tasaagita Kaana saa tɔ, Galile duge tɔ, a ka je ma beere la ka min na nun.
Wo ka a taran, mansa banba la walilá kuntige do be, a la den kayireŋɛ be bandiren Kapɛrinamu saa tɔ. 47A to ka a mɔɛ ko Isa bata na Galile duge tɔ ka bɔɔ Juda duge tɔ, a tagata a taran, a naata a madiya alako a ni taga a la den kayireŋɛ lakendeya Kapɛrinamu saa tɔ, bayi a be faga koe tɔ. 48Wo butɔ, Isa ka a fɔ a ye, a ko: «Ka wo ma tɔnkumanu nun kabanakoenu yen wo te dɛnkɛnɛya feu!» 49Mansa banba la walilá kuntige ka a fɔ, a ko: «N tige, yandi taga yannun n na denden lanma ni faga!» 50Isa ka a fɔ kuntige ye, a ko: «Saagi i bata, i la den kayireŋɛ bata kisi.» Wo kaye laata Isa la kuma la, a ka kila bita a tasaagita. 51A be kila tɔ wagate min tɔ a be jigila, a la joŋɛnu nata a labɛndula, anu ka a fɔ a ye aa a la dendeŋɛ bata kisi faga ma! 52Wo butɔ, a ka anu maɲininka a la deŋɛ fɔlɔta kendeyala wagate min tɔ. Anu ka a jaabi, anu ko: «Kunun tele latanbireŋɛ kunna la, kima ka a boloka.» 53Deŋɛ baaba ka hakkile sɔtɔ ko wo wagate yati le mu nun Isa ka a fɔ a ye aa a la den kayireŋɛ bata kisi. Wo kɔma, ale nun a la denbaya bɛ dɛnkɛnɛyata Isa ma. 54Isa la nareŋɛ Galile duge tɔ kabɔɔ Juda duge tɔ, a ka kɛ-lɛ ma a la kabanako filaɲɔgɛ la.
လက်ရှိရွေးချယ်ထားမှု
Yaya 4: MOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ