Luki 16
16
Nafulu makantala keuyareŋɛ
1Lun do, Isa ka a fɔ a la talibenu ye, a ko: «Nafulu tige do le tota ɲɔ, nafulu makantala be a bolo. Anu ka nafulu makantala siɲɛ nafulu tige ma, ka a fɔla a be a harigenu kasarala. 2A ka a kele a ka a fɔ a ye, a ko: ‹N bata kuma do mɔɛ i la ko tɔ. Wo be kama le? I ka fenfen ma n na nafule la, na a bɛ dantɛgɛ n ɲɛ. I te nɔ mala n na nafulu makantala la bitugun!› 3Wo butɔ, nafulu makantala ka a fɔ a yɛtɛ ma, a ko: ‹N si fen ma kɔtɛ? N tige si nafulu makanta koe bɔɔ n bolo. Sɛnbɛ bele n na, n ni sɛnɛ wɔtɔ, n si malu tarile tugun mala. 4Awa, n bata hakkile sɔtɔ, n be min mala, alako n tini bɔɔ nafulu makanta tɔ wagate min tɔ, mɔgɛnu ni n nabɛn anu la boŋɛnu tɔ.› 5Wo butɔ, a ka a tige la dɔntɔla bɛ kele dɔndɔ dɔndɔ. Min fɔlɛ nata, a ka wo maɲininka: ‹N tige la dɔntɛ jelu le be i la?› 6A ko: ‹Fifa ɲa kɛmɛ tule.› A ka a fɔ a ye, a ko: ‹I la dɔntɔ kaide le ka, i ni sigi teriya la, i ni bi loolu sɛbɛ.› 7A ka doe tugun maɲininka, a ko: ‹Ile go, dɔntɛ jelu be i la?› Wo ko: ‹Bɛkke kɛmɛ sugu kole.› A ka a fɔ wo tugun ye, a ko: ‹I la dɔntɔ kaide le ka, i ni bisagin sɛbɛ.› 8Nafulu tige ka a la nafulu makantala telenbale matɔgɔ bayi a ka keuya ma. Minnu hajue be dunuya la ko tun ma, wondelen be keuyaren, anu ka ɲɔgɔn bita ɲa lɔn koola! Anu be keuyaren Ala la mɔgɛnu ko minnu bele dibe tɔ.» 9Isa mɛn ko: «Awa, nde tugun, n ni a fɔ wo ye: ka dunuya nafule tota wo bolo, min si nɔ mɔgɛ lasamala telenbaliya la, wo ni a lawali ko ɲinma ma koe la mɔgɛnu ye kanunteya la, wolo mu nafule la ko tini ban, Ala si wo labɛn saŋɛ tɔ abada. 10Ka mɔgɔ min telenta ko dɔgɔmaŋɛnu tɔ, a si telen ko banbanu tugun tɔ. Ka mɔgɔ min ma telen ko dɔgɔmaŋɛnu tɔ, a te telen ko banbanu tugun tɔ. 11Awa, dunuya nafule min si nɔ mɔgɛ lasamala telenbaliya la, ka wo ma telen wo tɔ, Ala si harige yati yati taaku wo la ba? 12Ala be dunuya koenu minnu taakuren wo la ka wo ma telen wonu tɔ, a si wo la kɛɛ yati don wo bolo ba saŋɛ tɔ, min si ma wo yɛtɛ tɛŋɛ la yati? 13Jon yo te nɔ walila kuntigi fila bolo wagati dɔndɔ. Ka wo ma, a si dɔndɔ kɔn a ni dɔndɛ kanu; ka wo ma, a si dɔndɔ la kuma bita le a ni dɔndɛ tɛŋɛ boloka. Wo butɔ, wo te nɔ nafule nun Ala batula wagati dɔndɔ.»
14Farisinu be wo kumanu bɛ mɔɛla anu be Isa mayola, bayi anu be miilaren nafule ma koola. 15A ka a fɔ anu ye, a ko: «Wo be wo yɛtɛ maren mɔgɛnu ɲala telenbaganu la, kɔnɔ min be wo sondoŋɛ tɔ, Ala ka wo bɛ lɔn. Wo ni a lɔn, min tɔnɛ kolo mɔgɛ ye, wo mu tana le la Ala ye.
16Taureta Musa anun nabiyonmɛ doenu wagate tota han annabi Yaya nata. Bɔɔla Yaya nata, kibaru ɲinma bata lake mɔgɛnu ma ka a fɔla Ala la mansabaya bata ke. Mɔgɛnu bɛ be katala anu ni don a tɔ. 17Saŋɛ nun duge si ban de feu, kɔnɔ Taureta Musa te ban hali kuma sigira dɔndɔ la abada.
18Mɔgɔ min yo ka a la muse lasaagi a ka musu do futu, wo bata jeena ma. Mɔgɔ min yo ka musu jigan min na kaye ka a lasaagi, wo tugun bata jeena ma.#16:18 I ma bɛn i ni i la muse lasaagi, a ma jeena ma. Ka i ka a lasaagi a ma jeena ma, ile bata jeena ma.»
Nafulu tige nun Lasari la ko
19Wo kɔma Isa ka taale sa mɔgɛnu ye, a ko: «Nafulu tige do le tota ɲɔ. Tɛmuɛ bɛ, doroki banba ɲinma sɔn bɛlɛŋɛ be lajigiren a ma. Lun go lun a be murade sɔla ka a diyanankoe ma. 20Fugare do tugun be ɲɔ, min tɔgɔ Lasari#16:20 Lasari tɔgɛ be a fɔren: Ala le mu n dɛmanná la.. Tɛlɛ fogireŋɛ be a bale dula bɛ ma. A be labolokaren nafulu tige la bonda tɔ. 21Dɔmɔ tɔɛnu minnu be boela ka bɔɔ nafulu tige la teebile kunma, a sɔgɔ si a bita a ni balu wondelen na. Wulenu ɲan tota nala anu ni a la tɛlɛ fogireŋɛnu manɛwu.
22Lun do, wo fugare fagata. Malekanu ka a jigan anu ka a doni Iburahima kɛnna. Wo kɔma, nafulu tige tugun fagata, anu ka a mandi. 23Nafulu tige tota ɲagankata tɔ jahannama, a ka a ɲa lawuli, a ka Iburahima yen kan yanfama tɔ, a ka Lasari tugun yen sigiren a kɛnna. 24Wo butɔ, nafulu tige ka Iburahima kele a kulɛ mayɛlɛreŋɛ la, a ko: ‹N baaba Iburahima, i ni kinikini n ma. Yandi, i ni Lasari lasanba n ma a ni a bolo solin suŋɛ lajigi je tɔ, a ni na n nɛŋɛ lakima. Ɲagankata be n ma ta tɔ yan koola.› 25Iburahima ka a jaabi, a ko: ‹N na deŋɛ, i mira koola. I la dunuya takunte sɔnɔyata le i bolo a ɲinma la, wo ka a taran Lasari kan be tɔɔrɔren koola. Kɔnɔ bi, a juse be kimaren yan, ile kan be ɲagankata tɔ. 26Min be saren wo kunma, dinka belebele be mɔle nun wole tɛma, alako mɔgɔ yo kana bɔɔ yan hali a be diren a ni taga ɲɔ, ka wo ma ka bɔɔ ɲɔ ka na yan.› 27Nafulu tige ka a jaabi, a ko: ‹N baaba, wo butɔ n bata i táran, i ni Lasari kii n baaba la fɔgɛ tɔ, 28bayi n baaba dɔndɔ den kayireŋɛ mɔgɔ loolu be ɲɔ. I ni diɲa Lasari ni taga anu lasii, alako ande tugun kana na kɛ ɲagankata dula tɔ yan.› 29Iburahima ka nafulu tige jaabi, a ko: ‹Taureta Musa anun nabiyonmɛ doenu la kitabuenu be anu bolo. Anu ka anu tolomasɔ wonu la, anu ni a bita.› 30Nafulu tige mɛn ko: ‹Ade baaba Iburahima! Kɔnɔ ka do bɔɔta fagabaganu tɛma, a ni taga ke anu ma, anu si tuubɛ le.› 31Kɔnɔ Iburahima ka a fɔ a ye: ‹Ka anu ma annabi Musa nun nabiyonmɛ doenu kulɛ mɔɛ anu ni a bita, hali do wulita ka bɔɔ fagabaganu tɛma, anu te laa wo la kuma la.› »
လက်ရှိရွေးချယ်ထားမှု
Luki 16: MOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ