Luki 9
9
Isa la a la talibenu kii koe
1Wo kɔma, Isa ka a la talibi mɔgɔ tan nun fila madɛn. A ka sɛnbɛ nun yamɔre don anu bolo, alako anu ni jinna koroŋɛnu bɔɔ mɔgɛnu kɔma, anu ni bandibaganu lakendeya. 2A ka anu kii alako anu ni taga Ala la mansabaya kibare lake mɔgɛnu ma, anu ni bandibaganu tugun nakendeya. 3A ka a fɔ anu ye: «Wo kana fenfen jigan biyasi fanda la: tungare yo, bɔnfɛ yo, dɔmɛ yo, nafule yo, hali doroki filaɲɔgɛ wo kana a jigan. 4Wo tini yigiya boŋɛ min tɔ, wo ni to ɲɔ han wo be bɔɔla wo saa tɔ wagate min tɔ. 5Ka anu ma sɔn wo yigiyala saa min tɔ, wo bɔɔ ɲɔ, wo ni ɲɔ banbaŋɛ bɔɔ wo kɛŋɛ tɔ, wo si ma seedeɲɔgɔya la ɲɔ mɔgɛnu ye.»
6Talibenu bɔɔta ɲɔ anu tagamanta, anu keta saa lanmanu tɔ. Anu ka kibaru ɲinma lake, anu mɛn ka bandibaganu lakendeya dula bɛ tɔ.
Herodu kɔntɔfili koe
7Herodu, Galile dugu mansa to ka a mɔɛ min bɛ be tanbiren Isa la ko tɔ, wo ka a kɔntɔfili koola, bayi mɔgɛnu donu be a fɔla aa Yaya le be wuliren fagabaganu tɛma, 8donu tugun ko annabi Eliya le bata na, donu ko nabiyonmɛ fɔlɛnu wonu dɔndɔ le bata wuli. 9Herodu ko: «Nde ka Yaya kuŋɛ kuntu! Kɔnɔ hali ɲɔmɔ le mu kɛ tigi kan na, n be min na koenu mɔɛren ka?» Wo butɔ, Herodu katata Isa yen koe la.
Dɔmɛ dii koe jama ma
10Isa la kiilanu la saagireŋɛ, anu ka dantɛgɛ sa a ye: anu ka koe min bɛ ma, anu ka wo bɛ fɔ a ye. Wo la bandeŋɛ, a ka anu jigan anu bɔɔta anu katima anu tagata Betisayida saa sɔngɔ. 11Kɔnɔ mɔgɛnu ka a la tagamaŋɛ mɔɛ, anu ka a jokki. Isa ka anu lasɛnɛ. A be Ala la mansabaya la ko fɔla anu ye. Minnu hajue be kendeya ma, a tota wonu lakendeyala. 12Lagansara kima fɛ, Isa la talibi tan nun fila ka anu madon a la. Anu ka a fɔ a ye, anu ko: «Jama boloka alako anu ni taga saanu nun daakanu tɔ minnu be mɔ lamilinden, yigiya nun dɔmɔ ɲinidula, bayi wo mɔ be janfue le butɔ.» 13Kɔnɔ a ka anu jaabi, a ko: «Wole le yati be dɔmɛ diila anu ma.» Anu ka a fɔ, anu ko: «Dɛgɛ wundu loolu nun yɛgɛ fila le pɛ be mɔ bolo yan. Fɔ mɔ ni taga dɔmɛ san kɛ mɔgɛ bɛ ye.» 14Wo ka a taran, jama si kayi mɔgɔ wulu loolu ɲɔgɔn bɔɔ.
Isa ka a fɔ a la talibenu ye, a ko: «Wo mɔgɛnu sigi kurun kurun na, ka mɔgɔ bi loolu ɲɔgɔn nasigi kandula dɔndɔ.» 15Talibenu ka a ma ɲɔgɔnna le, anu ka anu bɛ lasigi. 16Wo la bandeŋɛ, Isa ka wo dɛgɛ wundu loole nun yɛgɛ fila jigan. A ka a ɲa sɔ saŋɛ la, a ka tantue lataga Ala ma. A ka dɛgɛ nun yɛgɛ makuntukuntu a ka anu don talibenu bolo, alako anu ni anu mafatan jama ma. 17Mɔgɛnu ka dɔmɔre ma han anu bɛ fata. Talibenu ka saga tan nun fila lafa dɔmɔ makunturen tɔɛnu la.
Piyɛri kuma ɲa Isa la ko tɔ
18Lun do, Isa dɔrɔn be Ala mataraŋɛ tɔ, a be sɔngɔ, a la talibenu be a kɛnna. A ka anu maɲininka, a ko: «Mɔgɛnu be n mɔlɔnden ɲɔmɔ le la?» 19Anu ka a jaabi, anu ko: «Donu ko, i mu Yaya malasuwɛla le la, donu ko, i mu annabi Eliya le la, donu tugun ko, nabiyonmɛ fɔlɛ do le be wuliren.» 20A mɛn ka anu maɲininka, a ko: «Wole go? Wo be n mɔlɔnden ɲɔmɔ le la?» Piyɛri ka a jaabi, a ko: «Ala la mɔgɔ masubɛreŋɛ le mu ile la.» 21Wo butɔ, Isa ka anu yamɔri a bɛlɛma la, anu kana wo fɔ mɔgɔ yo ye. 22A mɛn ka a fɔ, a ko: «A fɛrɛ bele, fɔ nde Adamadeŋɛ ni ɲagankata han. Kayibanu anun sarika lakela kuntigenu anun sariya karamɔgɛnu si n aɲɛ le, han ka naa n faga. Kɔnɔ n na faga tele saba luŋɛ, n si wuli le.»
23A ka a fɔ jama tugun ye, a ko: «Ka mɔgɛ min be diren tola n kɔma, a ka diɲa a yɛtɛ la ko ma, a ni sɔn ɲagankata bɛ la, a ni n jokki lun go lun, hali a mata faga la, lɔgɔ bangalandeŋɛ tɔ. 24Awa, mɔgɛ min be diren a yɛtɛ nɛ lakisila dunuya, wo tigi si fo kise la sinan, kɔnɔ mɔgɛ min si sɔn faga la nde la ko la, wo tigi si kisi le sinan. 25Hali mɔgɛ ka dunuya harige bɛ sɔtɔ, ka a bata fo kise la anun wo harige bɛ sinan, wo tɔnɛ mu fen na? 26Min bata malu nde nun n na kuma la, nde Adamadeŋɛ tugun te wo tige talɔn, n tini be tanala lun min na n na nɔɔra nun n Baaba nun maleka saniyandeŋɛnu la nɔɔra fɛ. 27N ni a fɔ wo ye, tɔɲa le mu: donu be wo tɛma yan, minnu te faga nɛmunɛmu, fɔ anu tini Ala la mansabaya yen.»
Isa la nɔɔra
28Kɛ kumanu la tanbireŋɛ lɔgɔkun dɔndɔ ɲɔgɔn, Isa ka Piyɛri nun Yaya jigan anun Yaguba, a yɛlɛta anu fɛ kɔnkɛ kunma Ala matarandula. 29Isa to be Ala mataraŋɛ tɔ, a ɲakɔtɔ kɛɲa masarata, a la doroke beeyaata fɔ a tota malanna a ɲinma la. 30Kisanna, a nun kayi fila tota kumala ɲɔ, minnu be tabɛnden annabi Musa nun annabi Eliya ma. 31Wonu la yendeŋɛ nɔɔra tɔ, anu be Isa faga koe fɔla, a be naala kiilaya min nakamalila Darisalamu. 32Wo ka a taran, Piyɛri nun a kafuɲɔgɛnu be kinnɔgɔla a ɲinma la. Anu la kunɛndeŋɛ, anu ka Isa nɔɔrareŋɛ yen, anun wo kayi fila anu be sɔren a kɛnna. 33Wonu be bɔɔ koe tɔ Isa kunma wagate min tɔ, Piyɛri ka a fɔ a ye: «N Marige, mɔ la to koe yan a kaɲin mɔ ye. Mɔ ni leele saba sɔ: dɔndɔ i tɛŋɛ, dɔndɔ annabi Musa tɛŋɛ, dɔndɔ annabi Eliya tugun tɛŋɛ.» Kɔnɔ Piyɛri be kumala tun, a be min fɔla a ma a lɔn. 34A be kumala wagate min tɔ, luuture jigita a niiniŋɛ butinta anu bɛ kunma. Luuture dusuta Musa nun Eliya kunma wagate min tɔ, talibenu kilanta. 35Wo tɛmuɛ le kumari kulɛ do bɔɔta luuture tɔ, a ko: «N na den kayireŋɛ le mu kɛ la, n be kɛlɛ masubɛren. Wo be wo tolomasɔla ale le la.» 36Kumari kulɛ la bandeŋɛ, talibenu ma hali mɔgɔ dɔndɔ yen, fɔ Isa dɔrɔn pɛ. Anu bɛ ka anu mɔdɛ wo koe ma, anu ka min yen, anu ma fenfen fɔ wo lanuma hali mɔgɔ dɔndɔ ye.
Jinnatɔɛ lakendeya koe
37Wo lun tabantaka, Isa nun a la wo talibi saba to jigita kabɔɔ kɔnkɛ tɔ, jama banba nata a labɛndula. 38Awa, kaye do be wo jama tɛma, a ka a kulɛ banba labɔɔ, a ko: «Karamɔgɔ, n be i madiyala i ni kinikini n na den kayireŋɛ ma. A dɔrɔn pɛ le be n bolo. 39Jinna be kɛnɛ a tɔɔrɔla. Ka a wulita a la, a ni a lakulɛ, a mɛn ni a labala a koroŋɛ la fɔ kanpa ni to bɔɔla a da tɔ. A ni a ɲagankata a ɲinma la, karahan a ni a boloka. 40N ka i la talibenu madiya anu ni jinna koroŋɛ bɔɔ deŋɛ kɔma, kɔnɔ anu ma nɔ.»
41Isa ka a jaabi, a ko: «Wole bɔnsɔ koroŋɛ, wo te dɛnkɛnɛya mukku. N si to wo fɛ han wagati miniman, n ni wo la koe lamuɲu? I la deŋɛ nati yan.» 42Deŋɛ be a madonna wagate min tɔ Isa la, jinna ka a laboe duge tɔ, a ka a labala a koroŋɛ la. Isa ka jinna koroŋɛ yamɔri a bɛlɛma la, a ka deŋɛ lakendeya. A ka a jigan, a ka a don a baaba bolo. 43Wo ka mɔgɛnu bɛ makaabɛ han, anu ko: «Alatala kolo.»
Isa faga ɲa la ko
Anu bɛ to be kaabɛla Isa la maare bɛ ma, a ka a fɔ a la talibenu ye, a ko: 44«Wo ni wo tolomasɔ n na kɛ kumanu la koola: a fɛrɛ bele fɔ nde Adamadeŋɛ si naa to mɔgɛnu sagoe tɔ.» 45Kɔnɔ talibenu ma wo kuma kɔtɔ fahamu, bayi a kɔtɔ be dogonden de anu la, alako anu kana a lɔn ki min na. Anu mɛn kilanta a maɲininkala wo kuma kɔtɔ la.
Mɔgɔ fisamante
46Wo tɛmuɛ, kuma masara donta talibenu tɛma, a lɔn koe la min mu mɔgɔ fisamante la anu tɛma. 47Isa ka anu la mira koe lɔn. Wo butɔ, a ka dendeŋɛ do jigan a ka a sɔ a kɛnna, 48a ka a fɔ talibenu ye, a ko: «Ka mɔgɛ min ka kɛ dendeŋɛ biliya n tɔgɛ la, wo tigi bata nde le yɛtɛ biliya. Min be n biliyala, a bata n kiila biliya. Min dɔgɔ wo bɛ tɛma wolo mu mɔgɔ banba la.»
49Isa la talibenu tɔ, min tɔgɔ Yaya, wo ka a jaabi, a ko: «N marige, mɔ bata kaye do yen, min be jinna koroŋɛnu beela i tɔgɛ la. Mɔ bata a ladan, bayi a bele sɔren i kɔma iko mɔle.» 50Isa ka a fɔ a ye, a ko: «Wo kana a ladan wo la. Mɔgɔ min te wo jaguya, wo mu wo dɛmanna le la.»
Samari saa do la sɔnbaliya Isa la ko ma
51Isa bɔɔ tɛmuɛ to bata sutuya dunuya, a ka a jusu bɛlɛya koola, a ni a kun sɔ Darisalamu ye. 52A ka a la kiilanu donu lasanba a ɲatɔ. Wonu tagata don Samari saa do tɔ, alako anu ni yigiya dula ɲini a ye. 53Kɔnɔ ɲɔ mɔgɛnu ma sɔn a yigiyala, bayi a be a kun sɔren Darisalamu le ye. 54A la talibi fila, Yaya nun Yaguba to ka wo koe yen, anu ko: «Marige, i si sɔn ba, mɔ ni ta yamɔri, a ni jigi kabɔɔ saŋɛ tɔ, a ni anu bintan?» 55Isa ka a ɲamatelen anu ma, a ka kuma dumɛndeŋɛ fɔ anu ma. 56Wo butɔ, anu ka kila tabita, anu tagata saa do tɔ.
Sɔ koe Isa kɔma
57Anu be tagala kila la wagate min tɔ kaye do ka a fɔ Isa ye, a ko: «I be tagala kan do kan n si i jokki.» 58Isa ka a fɔ a ye, a ko: «Dinka be bakulenu bolo, boŋɛ be kondeŋɛnu tugun bolo, kɔnɔ dula yo bele nde Adamadeŋɛ ye, n si nɔ n kuŋɛ sala ka min na.» 59Isa ka a fɔ kaye do tugun ye, a ko: «N jokki.» A ka a jaabi, a ko: «N marige, diɲa n ɲɛ n ni taga betunna, han n tini n baaba fure mandi.» 60Isa ka a fɔ a ye, a ko: «Mɔgɔ fagareŋɛnu le bɛnta anu ni anu la mɔgɛnu furenu mandi. Ile ká taga Ala la mansabaya kibare ɲinma lake mɔgɛnu ma.» 61Do tugun ka a fɔ Isa ye, a ko: «N marige, n si i jokki, kɔnɔ yandi diɲa n ɲɛ n ni taga saara n na denbayanu la betunna.» 62Isa ka a jaabi, a ko: «Mɔgɔ min ka kere jigan, a ka sɛnɛ wale fɔlɔ, a ni to a kɔma tafɛlɛla, wo te nɔ fenfen na Ala la mansabaya butɔ.»
လက်ရှိရွေးချယ်ထားမှု
Luki 9: MOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ