Lûk 24

Yesò yu̧u̧me

(Mat 28:1-10; Mk 16:1-8; Jn 20:1-10)

1È me wu a ntɔtetsɔ̌Ꞌ ane àlia mbì ane nkàb, bèzi bu e ghà àtsəasì yu, nè èghɨbə bɔ taŋkè enɨ ghǎ eyɔꞋɔ àpfəꞋta Yesò la. 2Ngà me ye bɔ pà èti lu bɔ li nɨŋ nkàba ètsəê èsî lu la. 3Ale, bɔ tɔɔ nyi a èbèm, ka bɔ̀ ka tsi ndzè àpfəꞋta Yesò Lefɨ̀Ꞌ. 4Bɔ tɨ̧ɨ̧ abot ànəê à tsè àwɔb ane àghɨa a ghɨ̀ la, bòt ko babe e bê saꞋ a ngèt yɔb, nkwà̧aã ndìte ko tèa nkàꞋtâ mbɨ̀Ꞌɨ̀ àtaãnyèm la. 5Kèbɔɔ ke baãaã awɔb, bɔ baala a si. Bèŋût e biite awɔb nê, “Ghǎ ghɨ̂ ka bɨ kɨꞋɨ̀ me kɨ wòt tà wû yû̧ la ayɔɔ bèmpfəà? [ 6Tà ntsě adzìꞋ yaa.] Tà yu̧u̧mè. Bɨ̀ ku̧u̧te ànəa tà li shu abua yɨ̧ àfɨꞋa bɨ tò ba e li mbele a Galìlî la, 7nê, bɔ li mbɔ̌ ndɨ bɔ̀ɔ zì Waã Wòt a tèkitebu bòt kàbɔ̀ŋ, bɔɔ wu̧u̧te atò a mbɨ̧̀ mbasa, ka naa me wu ane èlibȩ betat taa yu̧u̧me la.”

8Bèzi bu e ku̧u̧te mèngà̧ maa, 9mbɔ̂ ndɔꞋɔ àtsəasì və, ngà shuê mènəè ngaa abua bɔkatè Yesò bu bɔ tsiꞋi ntsɔ̀b wemɔ̀Ꞌ la, nè àbəèꞋ ako yu bàgème. 10Bèzi mbɔŋ li ngu Màlià Màdàlin, bɔ̂ Jòanà, nè Màlià nyɨ̌ Jimsì, ndɔ̀Ꞌ nè, bèzi ko bu bɔ̂ tò ba la, bɔ ghà shuê ànəê yaa abua bɔntu̧ Yesò la. 11Ka bɔntu̧ bu e mɨ̀ɨ̀tè nê wu mèyȩ̀ȩ̀tè, ntù̧u̧ ebɨ̧ɨ̧ne ànəa bɔ shu la. 12Pità bê ndɔ̀Ꞌ a si ndùùlà ngà àtsəasì yu, ndȩ̀ me ye ndzè wuê ndàꞋà ndǐ tu bɔ̀ le nɨŋ ndèbte àpfəꞋta Yesò la. Mbɨ̀Ꞌɨ̀ tàa nga àpfəè la, ànəa a ghɨ̀ la a taꞋa tsě atò.

Bɔkatè Yesò ko e ye atò a èlu̧ Emayùs

(Mk 16:12-13)

13Wuê kwàꞋ ane àlia mbɔŋ, bɔkatè Yesò ko babe, e lɔ̀Ꞌ me ghǎ àpfəè ako bɔ̀ɔ ntɔ̀ nê wu Emayùs la. Elɔ̀Ꞌɔ a Jèlusalèm eghǎ abot wu mbɔ̀ŋè lèghȩ̀ȩ̀nè bèawa babe. 14Bɔɔ ngȩ̀ȩ̀nà ale, mùà mènəè ane èghɨ e tsè la. 15Mbɨ̀Ꞌɨ̀ bɔ̀ɔ mùà ngà la, Yesò zìambɔŋ ghȩ̀ȩ̀nè tè nkɔꞋ a ngèt yɔb, bɔ̂ tò ba e me ghȩ̀ȩ̀na ngà. 16Bɔ ye atò ale, ka àghɨa ko a vəèəèlè àghɨ ayɔb, bɔ̀ ka ko wòt è wû wùà la.

17Yesò bììte awɔb nê, “Bɨ̀ ghȩ̀ȩ̀nà ndàꞋà ka ànəê à?”

Bɔ ntsanè màꞋà tèsȩtsə ane yɔb. 18Wòt kǒ ane yɔb bɔ̀ɔ ntɔ atò nê Klìopà la biite a Yesò nê, “À wu ndàꞋ wòt ane bòt baa bàgème a Jèlusalèm kà zə ànəa a ghɨ̀ ane èli baa e tsè la à?”

19Yesò mè mbììte nê, “Ka ànəê à?”

Bɔ bɨ̀ɨ̀lè nê, “Ànəa a ghɨ̀ ane Yesò wu, tà wu wòt Nazàlet la. Tà lè wu ndàꞋàtɔŋ Mbɔ̧ɔ̧mà, mbɔ̂ bɔbȩ e li nɨa tò mbɨ̀Ꞌɨ̀ wòt tàa ngɨ̀à mènəè kà ye fɨ̀Ꞌ ane èghɨ ègème tàa shuà mè ngɨ̀à la. 20Bètǎt bèntsìà mèpɨ̧̀ Mbɔ̧ɔ̧mà ba, nè bɔɔjuŋ ba, aà lɔ̀Ꞌ ŋǎ atò abua bòt kàbɔ̀ŋ nê bɔ̀ bùŋe atò. Bɔ wu̧u̧te atò a mbɨ̧̀ mbasa. 21Ka bàambɔŋ baa wua mɨ̀ɨ̀tà nê, wu tòà Mbɔ̧ɔ̧mà tsa nê tà kɨꞋɨ nchùꞋù ètsə bòt Izəèlȩê la. Laane waa wu èli betat mbɨ̀Ꞌɨ̀ ènəê baa e ghɨ̀ la. #24:21 Bèjuê e li ngua mbùꞋà ane àlia ànəê a saꞋa la ka mpà̧à̧ èlibȩ bɔb. 22È ndem ntsě wuê ndàꞋ àyaa, bèzi ko ayɔɔ ya e meè ndòòte wuê mèntɨ̧ɨ̧ ma. Bɔɔ bu nga àtsəasì yu, 23bɔ̀ kà ye àpfəꞋte atò yu, bɔ kua akwèn nkɨ̀Ꞌɨ̂ shu abua ya nê, bɔ ye àtsə, bɔntu̧ Mbɔ̧ɔ̧mà e shu abua yɔb nê, Yesò yu̧u̧mè. 24ÀbəèꞋ àko ane ya a ghà àtsəasì yu me ye è wu nkûŋ mbɨ̀Ꞌɨ̀ bèzi bu e shu la, ka è me wu a Yesò, bɔ̀ ka ye atò.”

25ÀfɨꞋa mbɔŋ Yesò shuê abua yɔb nê, “Ye bòt èyì tentem ko, bɨ taꞋa wua nkua èlɔŋ a màmbɨ̧ɨ̧na mènəè bèndàꞋàtɔŋ Mbɔ̧ɔ̧mà e li shuê la. 26Tè bɨ bakà ko laꞋ nê Fɔ̧̀ wu Mbɔ̧ɔ̧mà li ndzɔꞋ etsàà la, li mbɔ̌ ndɨ tàa ye ngoꞋ ka bɔ tseke a ègwet àtɨ̧ Kèfɔ̧̀ Mbɔ̧ɔ̧mà la à?” 27Yesò ghɨ̀ ale, ngàꞋte mènəè mu bɔ̀ le shɨ a èbem àkata Mbɔ̧ɔ̧mà ane zi la, è shu awɔb, e buꞋa ane àghɨa Musì lè shɨ la, eghǎ dzəâ ane ayea bèndàꞋàtɔŋ Mbɔ̧ɔ̧mà bàgème e li shuê la.

28Bɔ kɨꞋɨ tê me dzəâ àpfəè yu bɔ wua ngà la, Yesò ghɨ̀ mbɨ̀Ꞌɨ̀ tà tsèa tsě ngà nè mbì. 29Bɔ shu̧u̧te atò nê, tà ka tsi ngà nè mbì, nê tà ghɨa bɔ̂ tò ba è li nkàà nê àfɨ̀Ꞌ a ghà te nyèm ntsiꞋa fèna fene. Ale, Yesò ghà bɔ̂ tò ba aa li.

30Bɔ lɔ̀Ꞌ tê bɔ̀ tseke a si Yesò nɨ a bled ŋà mènkɔ̀ŋke abua Mbɔ̧ɔ̧mà, mbɔ̂ mbòꞋtê ŋa abua yɔb, 31àghɨ ayɔb a ghaꞋtè, bɔ lȩ atò. AfɨꞋa mbɔŋ tà bê nyɔ̂, bɔ̀ ka tsi ndze atò. 32Bɔkatè bu e tsiꞋi me làꞋa a kètsìà wɔb shuà nê, “Tà ghɨ̂ me yààte èngǎ̧ Mbɔ̧ɔ̧mà alu̧ shua wa ale bɨ̀ ka ye ndɨ mèntɨ̧ɨ̧ ma è kȩa la à?”

33Bɔ ghɨ̀ ale, nkȩ a si kwàꞋ àfɨꞋa mbɔŋ ngwènè a Jèlusalèm, nkwène ane bɔkatè Yesò bu bɔ tsiꞋi èghem ntsɔ̀b wemɔ̀Ꞌ la, bɔ bu̧u̧te àdzìꞋ yeamɔꞋ bɔ̂ beko la. 34È bu babe la e nyî, bɔ shuê abua yɔb nê, “KwàꞋ ane nkûŋ, Yesò Lefɨ̀Ꞌ yu̧u̧mè, tà saꞋa a mbì Simùn” 35Bɔ̀ɔ mbɔŋ mɨ̧̂ e shu awɔb àghɨa a yaã ngɨ alu̧ la, mè shu ndɨ bɔ yaã ndȩ a Yesò afɨꞋa tà boꞋte a bled wu la.

Yesò saꞋa a mbì bɔkatè bi

(Mat 28:16-20; Mk 16:14-18; Jn 20:19-23; Àf 1:6-8)

36Bɔ̀ bela ndàꞋà, Yesò zìambɔŋ bê saꞋa a kètsìà wɔb, shu abua yɔb nê “Àlàŋkè à wu ne nɨ̧̀.”

37Tà làꞋ ale, ènyit yɔb e bentè, bɔ taꞋa bɔa ntsiꞋa mɨ̀ɨ̀ta nê, bɔ ye àlɨ̀ŋka mpfəà. 38Tà bììte awɔb nê, “Bɨ̀ bɔa ghà à? Bɨ̀ màka gha a mèntɨ̧ɨ̧ mɨ̧ à? 39Bɨ̀ lɨ̀ŋkè tèkitebu taã nè èka bɔ̧, ndzè na wu mmɔ̌ la. Bɨ̀ baãaãte am ndze. Àlɨ̀ŋkè à bakà bɔ nyaãte ènyit, à ka bɔ èkwȩ mbɨ̀Ꞌɨ̀ mâ bɔ la.”

40[Tà shuê ale, nyɨ̀Ꞌte awɔb èbu bi nè èka bi.] 41Ale a bê ntsè àwɔb, mèngùꞋte lu̧u̧ a mèntɨ̧ɨ̧ mɔb, tè bɔ tsiꞋa mbɨ̧̀ɨ̧̀na ànəa tà shua la kekaŋ. Tà bììte awɔb nê, “Bɨ bɔ àghɨa ko àdzìꞋ yaa betsiꞋa wòt jɨ la à?” 42Bɔ ŋa àtem asəâ bɔ laã la abua tò, 43tà nɨŋ ntɨ̧ɨ̧ a mbì lɔb nkwet.

44ÀfɨꞋa mbɔŋ tà shu abua yɔb nê, “Eyaa wu mènəè mu e ndi ngua shuà wɨ̧ àfɨꞋa e ndi mbèle ba nɨ̧̀ ba la, nê, àghɨ àgème bɔ shɨ ane yaã a èbem àkatè mbɨ̧te Musì, nè mènəè bèndàꞋàtɔŋ Mbɔ̧ɔ̧mà, nè è mu a èbem Àkata Mèkù̧ la, a bɔ ndɨ àa te la.”

45Tà ghɨ̀ ale, ngàꞋte ètsə bɔb ngɨ̀ bɔ ko ànəa èngǎ̧ Mbɔ̧ɔ̧mà e shuà la. 46Mbɔ̂ shuê abua yɔb nê, “Eyaa àghɨa bɔ shɨ la, nê, Fɔ̧̀ wu Mbɔ̧ɔ̧mà li ndzɔꞋ etsàà la è bɔ ndɨ tàa ye ngoꞋ ebɔ epfə, ka naa me wu ane èlibȩ betat taa yu̧u̧me la. 47Mè nê, bòt e bɔ̂ ndɨ bɔ̀ɔ bùꞋu a Jèlusalèm e tsɔ̀te abua bòt èlaꞋ ègème, ane èlen tò, nê bòt è kubte mènəè kàbɔ̀ŋ mɔb, mbɨ̀Ꞌɨ̀ Mbɔ̧ɔ̧mà naa waꞋa bèkàbɔ̀ŋ bɔb la. 48Bɨ wu bòt bɔ ye mè nko èghɨ bàa la. 49Mmɔ̌ mbɔŋ, maa tsaa èlaamè wu Tǎt am li nkàꞋ àwɨ̧ la. Ka bɨ̀ tseke a Jèlusàlem tè ndɨ bɨ̀a bɔ mètàŋ mu è chu a ègwet la.”

Yesò kɔꞋ ngà a ègwet

(Mk 16:19-20; Àf 1:9-11)

50Yesò ghɨ̀ ale, nɨ̀ àwɔb ndzə a èbem àpfəèà nɨ̧ yu, ngà tè ngu a Betanì, ndɔ̀kè èbu bi fà̧à̧te awɔb. 51Mbɨ̀Ꞌɨ̀ tàa fà̧à̧te awɔb la, tà bê ŋèꞋe avi a si me kɔꞋɔ nga ègwet. 52Bɔkatè tò bu e tɨ̧ɨ̧ abot me wùꞋte atò, tè ndɔ̀Ꞌ nkua akwèn ngwènè a Jèlusalèm, nè mèngùꞋte è lu̧u̧ a mèntɨ̧ɨ̧ mɔb la. 53Bɔ ghà ale me tseka nga a èbem lob nɨ̧ Mbɔ̧ɔ̧mà àfɨ̀Ꞌ àgème ngùꞋtè atò.

လက်ရှိရွေးချယ်ထားမှု

Lûk 24: mnf

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Mundani အကြောင်းကို ပို၍ သင်ယူပါ။

Lûk 24

Lûk 24
မှ လူကြိုက်နှစ်သက်သော ကျမ်းပိုဒ်များ။

သမ္မာကျမ်းစာ:

Mundani

ဗားရှင်း: Mundani - mnf

Lûk 24

Lûk 24

Lûk 24မှ လူကြိုက်နှစ်သက်သော ကျမ်းပိုဒ်များ။

သမ္မာကျမ်းစာ:

Mundani

ဗားရှင်း: Mundani - mnf

Lûk 24

Lûk 24
မှ လူကြိုက်နှစ်သက်သော ကျမ်းပိုဒ်များ။