Gɔ̃mèjèje be Xoma 8
8
1Eye Mawu ɖo ŋùku Nɔà ku ègbemèlã kudo àxomèlã gbàkudo èlã klìviwo kpata, kèwo lè e gbɔ lè àɖakàhũa mèa ji, eye Mawu na àya pò ɖo ànyigbã ji eye èsìawo jè e mè. 2Ànyigbã mè be èsìwo nu sò, nènea ke ye jiŋùkusi cã nu tu yeŋu. Èsìjàja cã le ye ɖokoe ɖo jiŋùkusi (èjia tɔtè jàja). 3Eye èsì gbɛ̀lua tɔ miɔ̃-miɔ̃ lè ye ŋutɔ ɖokoe si. Èsìa le jè e mè xɔ̀ ŋùkèkè èkà ètɔ̃ takpo ci èwo (150). 4eye lè wètri adrɛ̃gɔ̃ a mè, lè yebe ŋùkèkè woeadrɛ̃a gbèa, àɖakàhũa yì li ɖo Àràratè be ètoa ji. 5Èsì gbɛ̀lua le ɖiɖi kpɔ̀tɔ̀ kaka va ɖo wètri èwogɔ̃a ji; lè wètri ŋua be ŋùkèkè cucugbã, ètowo be àɖɔ̀mèwo ze.
6Eŋuã lè ŋùkèkè èkà yomè a, Nɔà hũ àɖakàhũ kè e kpàa be flɛsɛ̀. 7E ɖè àkpàfiɔ̃ to eye e ɖèasi lè e ŋuti, be zrò le yì le gbɔ̀ va kaka va ɖo gàkèmè èsìawo la na èmɔ̃ ànyigbã pupuia. 8Kpòa, e ɖè àsi lè peplelu ŋuti ne bèa kpɔ be èsìa ɖiɖi keŋu-keŋu lè ànyigbã be ŋùmè mà a. 9Vɔ̀a, peplelua mu kpɔ àfi kè e la jè ɖo ò; e trɔ va Nɔà gbɔ lè àɖakàhũa be èmɔ̃ nu, ɖo èsì lè ànyigbã kpata ji. Nɔà drɛ̃ àsi ɖoɖa eye e le è do àɖakàhũa mè. 10Nɔà gbà nɔ̀tè ŋùkèkè adrɛ̃ eye e gbà ɖè àsi lè peplelua ŋuti be zrò jo yì. 11Wètrɔgbɔa, peplelua trɔ gbɔ̀ va Nɔà gbɔ eye kpɔɖa àmìti be àmàkpa mumu lè ènu na ɛ̀! Nène a Nɔà nya be èsìa ɖè kpɔ̀tɔ̀ ŋutɔ lè ànyigbã ji. 12Nɔà gbà nɔ̀tè ŋùkèkè adrɛ̃ ke eye e gbà ɖè àsi lè peplelua ŋuti be gbà zrò jo yì, eye mu gbà trɔ va e gbɔ ɖe ò.
13Lè èpè èkà woeàtɔ̃ àgìgà mè, lè wètri cucugbã be ŋùkèkè cucugbã gbèa, èsìa na èmɔ̃ ànyigbã pupuia ze. Nɔà fo àɖakàhũa be èta mè jo eye e kpɔ be ànyigbã be ŋùmè pu. 14Wètri èvègɔ̃a mè, lè ŋùkèkè èwì vɔ adrɛ̃ a gbèa, ànyigbã pu keŋu-keŋu.
15Mawu gblɔ̃ na Nɔà be: 16“To lè àɖakàhũa mè, èwò, èsrɔ̃ wò, èvi wòwo ku woabe èsrɔ̃wo. 17Èlã kèwo kpata nɔ̀ ku wòa, ènu ɖekpekpe kè ɖo ŋutilã sìgbè xèviwo, àxomèlãwo, ègbemèlãwo nène kudo ènu ɖekpekpe kè gbe le hùã lè ànyigbã a, ɖè wo to bɔ̀ ɖo ɖokoe wò ŋuti ne woa hùã lè ànyigbã, ne woa jì ɖo ji, ne woa ɖɔ ànyigbã ji.” 18Nɔà to, eye èviawo, èsrɔ̃a ku èviawo be èsrɔ̃wo bɔ̀ ɖo e ŋuti. 19Èlãwo kpata, èlã klìviwo kpata xèviwo kpata, ku ènu ɖekpekpe kè gbe le hùã lè ànyigbã jiawo kpata to lè àɖakàhũa mè lè woabe nɔ̀nɔmè mè.
Ènuwunyàwo
20Nɔà ɖo vɔsakpe ɖèka na Tɔhonɔ̀. E sɔ lè èlã kɔ̀kɔ ɖekpekpe ku xèvi kɔ̀kɔ ɖekpekpe sɔ wɔ̀ vɔsa lè vɔsakpea ji na Tɔhonɔ̀. 21Tɔhonɔ̀ gbɔ̃ huɛ̃huɛ̃ gbigblia, e gblɔ̃ lè ye ɖokoe mè be: “Gbèɖe-gbèɖe, nyè mu la gbà sɛ̃kpɛ̃ na ànyigbã ɖo àgbètɔ ŋuti ɖe ò. Nyàwo, àgbètɔ be èjì yìnà èvuɛ̃ gbɔ so kaka yebe ɖèkajɛ mè, vɔ̀a gbèɖe nyè mu la gbà crɔ̃ ènu àgbèagbèwo sìgbè àlekè mù wɔ̀ ɛ̀a nène ò.
22Kaka kè ànyigbã lèa,
ènu dodowo ku ènu yàyawo,
fàfa ku zòzo, dɔ̃ŋùkusu be hùenu ku èji be hùenu,
ŋùkèkè ku èzã, wo nu ma va yì gbèɖe ò.”
လက်ရှိရွေးချယ်ထားမှု
Gɔ̃mèjèje be Xoma 8: GEN
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Mina Bible © Bible Society of Togo, 2014.