Lucas 12
12
Ema Jesús wa'i máwara'a apimira'avina
(Mt 10.26-27)
1Taka'e, te jena sácheana'i, títekaparakanapaichucha ena kamurikeneana achaneana. Tiyututukawanapa, tupiajirikakanapa. Ema Jesús natiwapa maechejika ena maimitureana maichawaka: “Échapawa taye'e eta lewadura eta tasisijisira'i eta masa. Takuti'ichu eta tapareasira'i eta apimirairana'i ena fariséuana. 2Taicha tajina tiyumurukawaima'i, eta naeñaureana, tamutuyare'i téchakareya, tájinaware tépakuchaima'i jákani nayumurureana, tamutuyare'i téchakareya. 3Taicha tamutu jákani ekayemakene'i eti te timapikukene, tamutu tikaecherayare te tijara'i, tási'a etapa eta eñaureana'i, tási'a etapa eta ekayemakene'i te eye'e pusentu, tamutu tisamakareyare te petiana.
Naja'apuka makaini tipikakarepana
(Mt 10.28-31)
4“Étipa eti némunakasareana, numetaka'e: Wa'i ekupika nákani nakapakapuka eta iáke'e, takarichusera náituruekene'ayare. 5Numetaka'ewa, makarichu ema Viya epikayare, taicha makarichu ema técha'i eta ítaresirana. Jé'eware, ema marata'a'i makamitiekene'a eta iáchanewana taye'e eta táiñe'ikene yuku, Jé'eware ema epikayare.
6“¿Eta te vijarareka eta sinku'i káyurechicha vijakapayare'i eta tawacha? Eti ímijachapapuka wa'i tasiwacha'ini eta, téñamakareana'isera me Viya, ema téchawaka'i eta táitaresirana'i. 7Evetijipa eti, éñamakarepana'i me Viya. Ema técha'e'iware tamutu eta ítaresirana. Eta taka'e, wa'i ekueñamawa eti, taicha tétavikawa'i eta emunawa'i eti maye'e. Ema, máimati'i eta tatupa eta echutimakana.
Vímereuchawayare'i eta vé'isira ema Jesús
(Mt 10.32-33; 12.32; 10.19-20)
8“Numetaka'e puiti, nuti Manerejirunu'i ema Viya: Namutu ena tímereuchawana'i eta náe'isiranu'i te namira'u ena achaneana, nuti apanaware nímereuchaya eta nuchanerairawaka'i ena te namira'u ena ángeleana maye'eana'i ema Tata; 9nákanisera wa'i náwara'a'ini náimereuchawa'ini eta náe'isiranu'i, nuti apanawa nímereuchaya eta wa'i nuchaneranaina'ini ena te namira'u ena ángeleana maye'eana'i ema Viya.
10“Ema Viya maemetavikaya eta maviurewana'i maye'e ema Machicha ema Ajaira, te'esera mákaini kaeka'i'i ema Machanewa Viya.
11“Te'esera te nama'epa eti te peti náurujisirarewa ena juriyuanana, te namira'u ena juéseana enapa ena akenukana. Wa'i ekueñamawa eta échejiuchirawayare, ekatiuchirawayare, 12Ema Machanewa Viya tímituka'eyare eta táuriwaya eta ekayemayare te jena sache ekayasesere'inapa.
Wa'i táurika ta'apasamurecha'avi eta víma'akeneana
13Matiari'i ema achane te namuri ena kamurikeneana achaneana. Máechejikapa ema Jesús:
–Maestro, pímikatakanu, pimetaka ema nuparape máijarakanu eta nuye'e parte eta nímaekeneruyare eta máima'akeneni ema tikachichanuini.
14Ema Jesús majikapapa:
–Wa'i nútina nécha, eta máima'akeneanaini ema tikachicha'eni.
15Éneichu máichawakaware:
–Échapawaware eti, machu émuna'irikawa, ejamurara'i taye'e eta tíma'akareana. Taicha eta tíma'akareana te juka apake'e, wa'i étaina tikaitareka'eyare, wa'i táeñamakare'ini.
16Taka'e, máimikutiarachinaware: “Matiari'i ema achane riku, tiúrina eta máewaru. 17Taka'e, ema riku mapanerechapa: ‘¿Taja'a nichaya? Ánike'epa eta juka néwaru, tájinapa núnasi'a.’ 18Tasi'a maka'epa: ‘Nechapa eta nicharakawaya, tiúripanapuka nuvetata'a eta núnawara'i nujanejuecha. Ichapepanainapa nicha eta táitsiwaya. Tiúripanainapa, apaesa táirijika tamutu eta néchatijiru étapa eta apamuriana nukaye'ekeneana. 19Tási'a, nuka'enapa: Jé'eware puiti tétávikawapa eta núriwayare. Tájinapa níchirawaima'i. Tarata'akene juka añuanayare, nukanarakawaya nuti, tamutu sache tiúriya eta nunisira, neraya. Ichape eta núrisamurewaya.’ 20Tási'asera ema Viya máichapa: ‘Tétávikawa eta pisunsuwa piti. Puiti jena yati pépenaya, eta piúnaruana'i ¿naja'apapuka tisapi'aya?’ 21Ene naka'e ena achaneana tikurujirikana eta náima'akeneana naye'echirawaichu. Te'esera te mamira'u ema Viya ena paureana'i.”
Ema Viya majaneakawaka ena machichanaveana
(Mt 6.25-34)
22Te taekenepa, ema Jesús máichawakapa ena máimitureana: “Eta juka nicha'e: Wa'i ekukaeñamarakawa eta enikakenerepi étapa eta emuiri'arapi puiti juka sacheana. 23Wa'i étaina eta vitaresira tiuripana taye'e eta viniripi, étapa eta viake'e tiuripana taye'e eta vimuiri'arapi. 24Epanerecha eta káyureana tiararaikana te anuke'e: wa'iware táewaka'ini, táechatijirika'ipukaini, táunaka'ipukaini eta tanikakeneyare. Émasera ema Tata Vikaiyakene máechapajirika'i, máijarasira'i eta tanikakenerepiana. ¡Evetijipa eti, iápajupanawa'i eta éñamakaréwa'i taye'e eta káyureana! 25Tayanapanepuka eta ekaeñamarakawa'ini, ¿nájina narata'aima'i nakarataka eta naitaresira etanaina'ipukaini ura? 26Wa'i étijiwaima'i íturukawa ekajurukawa'ini, wá'iware táurika'ini ekaeñamarakawa'ini taye'e eta júkana.
27“Epanerecha eta tajurusira'i eta flúreana, wa'i takaeñamarakawa'ini takaematane'ini, táijurureka'ipukaini eta tamuiri'ana. Nájina nákuti eta takamuiri'aira eta táurinawa, émaipa ema Salomón tamutu eta makaye'ekeneana, wa'isera márata'a'ini makutinasi'ini eta taurinawa eta. 28Apanasika ema Viya máijaraka'i eta táurinawa'i eta flúreana, ánipichu'ineni eta táitaresira'i. ¡Evetijipa eti eta máechapajirisira'e'i, máijarasira'eyare'i eta emuiri'arapi eti achaneana, wa'ineni ákasiñawa'ini! 29Eta taka'e, wa'i ekupanererereka eta enikakenerepiana, étaipa te échuriakapuka eta une érayare. 30Taicha tamutu eta júkana taiparakana nakamunukeneana taimipanerereka ena achaneana máimatira'ana ema Viya, etisera échaipa'i imatipa'i eta matiari'ira'i ema Ekaiyakene te anuma, máimati'i ema tamutu eta ekamunukeneana'i. 31Etisera, tatiwayare esenikayare ema Viya, taicha akenuka'i ema te anuma, ítauchayare tamutu eta mawara'akeneana'i, ema tíjaraka'eyare tamutu eta juka ekamunukeneana.
Eta vima'akene te anuma
(Mt 6.19-21)
32“Wa'i ekupika, eti nuchichanaveana; tayanapane wa'i kamuri'ena, eti máichu'akeneana'i ema Ekaiyakene'i. Eta taka'e, tétavikawa'i eta mawapinairawa'i eta majakapira'e'i. 33Íjararekayare eta íma'akeneana, íjarakayare nákani tikamunuwana'i. Máima'ainepa ema Viya, tíjaraka'eyare eta táitsiwayare ánaki te anuma, máitawakakainapa eta ekaima'akeneraya. Wá'iware táeñamawakare, taicha nájinapa tiámeyecha'ema'i, tajinaware kachusirina. 34Te tavi'a'i eta íma'akeneana eti, éneichuware ánaki tavi'ayarewa eta pisamure.
Yátupina eta vikuneuchirawaina
35Eti, yátupina eta ekuchapiranuya eta nuchaviraya. Etsekawaya tamutu sácheana, 36“Ákuti'i nákani achaneana músuana titsekawana'i te tapaja, navejiekenéraya ema nákenu eta machaviraipa'i mási'aira'i maye'e ema arayena. Te máe'a'amekapa eta tapaja, enewaneyarepa ena navejiekene'ayare'i. 37Tétavikawasera eta náurikakarewa'i ena músuana, eta machimapira'i ema nákenu eta nakuchapira'i, wa'i náimakaekene'a'ini. Nutupiruwa numetaka'e: Yátupinasarepa eta máurisamurewayare ema nákenu, makaejakawakainapa te mamesara, máenikawakainapa. 38Tiurisamurekareya, makaini mamusura makuchapiraya ema makenu, tayanapane tajarara'ipapuka. 39Tási'a échayare eti eta juka: mákaini achane tikapena eta peti maecha'ini, taja'apuka urayare eta yati máitekapirayare ema tiamera'i, tikuneuchawaipa'ini ema, wáipasare nakuameyecha'ini. 40Eti ekuneuchawayare, taicha wa'i écha'ini tájamu'uyarepuka eta machavirayare ema machicha ema achane.”
Ena músuana tiúriana. Ena músuana máurira'ana
(Mt 24.45-51)
41Ema Pedro mayaserekapa:
–Tata, píka'e'i eta juka pímikutiarachakene'i, ¿viye'eyarechupuka viti, vimutupuka viti vé'ikaviana'i?
42Maka'epa ema Tata Viákenu: “¿Makañári'ipuka ema nákenururi ena musuana máetaviucha'i eta mauriwa, tisuapajira'iware, ema makenu matuparaka'i ena tiavi'ana'i te mapena eta máijarasiraya eta nanikakene tamutu sacheana? 43Tétavikawa eta máurikakarewaya ema maka tikatupara'a'i, te tamutu'i máitaucha'i jákani machimapirana ema mákenu. 44Yatupi numetaka'e, eta tamutuira'i tiuri eta machimapira'i, matuparakainapa ema téchayare'i tamutu eta máima'akeneana. 45Té'esera, wá'ipuka tiuri eta mapanereruana ema mákani makajurure, máimijachaichucha tiyereyare'i eta máitekapirayare'i ema mákenu, táka'e, tepanawapapuka mae'awaka ena apamuriana makajururana, énapa ena wanarakana'i, máichapapuka eta tinikakare, térapa, tikawa'apa, 46jena sache waipa manekapauchawa'ini te títekapapa ema mákenu. Machimarakapa ema maeja'aru eta mamapachichijisira'i eta máima'akeneana. Eta taka'e, ema mákenu makawanairipinapa náestakayare muraka nakutiyare ena apimirana eta nakatajiwaira, taicha eta mamasuapajiraiwa'i.
47Takutikene mákani musu, te máecha'i eta mawara'akeneana'i ema mákenu, tási'a wa'i máitaucha'i eta mawana'iana'i ema, murakayare'i eta makaikuñairayare. 48Mákanisera musu, te wa'i máecha'i eta takayemakeneana, tási'a téjekapawapa ema, apaesayaréchu eta máikuñayare. Nákani najachapapana, eneichuware chapemuripanaya eta nayasea'ana, nákaini nasuapakenepana'i, murakapanaya eta nayasea'ana.
Nakatianakainapa ena té'ikanaya ema Jesús
(Mt 10.34-36)
49“Nuti, eta nítesira'i, tímikutijirikawa'ini nuyustapana'ini eta yuku te juka apake'e, ¡taja'apuka eta nuwarairaina'ini eta tamuruipaini! 50Yátupiyare eta nukatajiwairayare, naicha ena tikatianakanuana. Eti apanawa, tikatianaka'eanayare. 51¿Esuapapuka eti eta juka timitekanu'i namayarepa'i eta iuriwayare tejuka apake'e? Numetaka'e wá'isera ene taka'e, tikatianaka'eanayare. Táichaveneya eta é'isiranu'i. 52Te jakani peti kapenana'i sinkuana ena achaneana, mapanana ena té'ikanuanaya, tási'a apinana ena tikatianakanuanaya. Té'esera apinana'ipuka ena té'ikanuana'i, mapanana ena tikatianakanuana'i. 53Mákani achane, sukani esena, te natiari'i ena nachichanaveana, nachinenapuka suimasepuka, nakatichayare'i ena tikachichana'i táichaveneyare'i eta náe'isiranu'i ena.”
Ena achaneana timasuapana'i eta máimeruana ema Viya
(Mt 16.1-4; Mc 8.11-13)
54Ema Jesús máichawakapa ena achaneana: “Te íma'a timapikurume, émeteakaipa tikiwayare. Ene taka'e'i. 55Te tékatikawa te wana, émeteakaipa wáipaware tikiwaima'i. Eneware taka'e'i. 56¡Apimirana! Taicha eti imatiekene'a'i eta taichararakawa'i eta anuma, ¿ímijachawa'i wa'i ituka'ini ímatiekene'a'ini eta taikutiara eta jukana sacheana?
Viuriwaina naye'e ena tikatianaka'aviana
(Mt 5.25-26)
57“¿Tája'a takayema wa'i áwara'a'ini é'ika eta juka yátupikeneana? 58Te matiari'ipuka mákani achane metauchavi'i. Tatuparaka'i tatiwaya máetupirikanumaya eta mayaseasirayare eta majapanuiraya, mapurare wicha'a namavi'ini me juez. Taicha ema juez mawanekainapa ema pulicia maeratakavi te nakaeratairare. 59Numetakavi, wa'i piuchukawanema'i ánaki, tiamainukawa te pitawachachapa tamutu eta pinteve'i.”
လက်ရှိရွေးချယ်ထားမှု
Lucas 12: IGB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Nuevo Testamento Ignaciano © Sociedad Bíblica Boliviana, 2004.