Pewaliana 7
7
Duniaꞌ noliuꞌ uwai
1Katoꞌo mohawaꞌmo Pueꞌ Ala pe hi Nohoꞌ, “Mekahimoko pe lali duanga tiꞌo, ingkei hantino, alaꞌ ingkomo to Kuꞌokiꞌ maniuꞌ i hinarongKu ka lumbuna toaꞌ to tuwuꞌ hinewowoꞌena. 2Ka lekiꞌna pinatuwuꞌ to wadi niꞌoka, hangangaa iroa pitu mpasa, laki hante lunarona, angkana ka pinatuwuꞌ to hawaꞌi wadi niꞌoka hampasalu. 3Hei iroa woꞌo ka tinti-tinti i raoha pitu mpasa, bangkoilo hante towoweꞌe, hingkeꞌna noterewahi muleꞌre i duniaꞌ. 4Alaꞌ pitu ando tene, Aku hingkiꞌ mampopengkohouꞌA ura pe womboꞌ duniaꞌ iba mpuluꞌ ando iba mpuluꞌ mini komoruene, hei Aku hingkiꞌ mopahi ka womboꞌ duniaꞌ lekiꞌna hinangkana to uwaꞌ, to Kupopewali tiꞌo.” 5Katoꞌo hi Nohoꞌ motuntunimo mpuꞌu lekiꞌna to Nohowoꞌikiꞌi Pueꞌ Ala pe io.
6I tempona uwai molobuꞌi duniaꞌ, tinuwuꞌna hi Nohoꞌ 600 ntoꞌa. 7Mekahimo hi Nohoꞌ pe lali duanga moꞌawa-awa hante anaꞌnahi hei hantambina, hei hantambina anaꞌnahi alaꞌ uwai liuꞌ tiꞌo. 8Mepongka ka pinatuwuꞌ to wadi niꞌoka hei to hawaꞌi wadi niꞌoka, ka tinti-tinti hei hinangkana to mendae i womboꞌ duniaꞌ, 9mehupaꞌmo hampasa-hampasa moduuꞌ hi Nohoꞌ i lali duanga tiꞌo, laki hante lunaro, hintotoꞌ hibali to nohowoꞌikiꞌi Pueꞌ Ala pe hi Nohoꞌ. 10Ikopitu andonamo mpuꞌu hupaꞌmo uwai liuꞌ mobuhoꞌi duniaꞌ.
11I tempona hi Nohoꞌ moꞌumuruꞌ 600 ntoꞌa, i wula to kadua, i ando to kohampuluꞌ pitu, wula tiꞌo, i ando tiꞌomola lintubuꞌ hinangkana mata uwai to monono hei woloꞌ-woloꞌ i laniꞌ moweaꞌ, 12hei mengkohoumo ura ngkodeꞌ i duniaꞌ iba mpuluꞌ ando iba mpuluꞌ wini komoruene. 13I ando tiꞌo woꞌo, mekahimo hi Nohoꞌ hante hantambina pe lali duanga moꞌawa hante anaꞌna iomo, hi Sem hi Ham hante hi Apeꞌ, hante hantambi-hantambira. 14Hei hinangkana pinatuwuꞌ to moꞌilo, to mononara, to mendae hei hinangkana tinti, 15ka lekiꞌna to tuwuꞌ mehupaꞌmo hampasa-hampasa mekahi i duangana hi Nohoꞌ. 16Hei to mekahi tiꞌo iomo laki hante lunaro ka hinangkana pinatuwuꞌ, hitontoꞌ hante to nohowoꞌikiꞌi Pueꞌ Ala pe hi Nohoꞌ. Katoꞌo Pueꞌ Ala mowiti wambaꞌ duanga tiꞌo i tunduna hi Nohoꞌ.
17Iba mpuluꞌ ando komoruene, uwai liuꞌ tiꞌo mobuhoꞌi duniaꞌ. Uwai tiꞌo mehendeꞌ hei mohini duanga tiꞌo, horiana mekononangko i womboꞌ duniaꞌ. 18Uwai tiꞌo kotetambaimbaiha hei makaja mpuꞌu kopehendeꞌ-hendeꞌa i womboꞌ duniaꞌ, mekononangko mpuꞌu duanga tiꞌo i womboꞌ uwai. 19Hei uwai tiꞌo monono kotetambaiane moholuꞌi duniaꞌ, hei notutuꞌi hinangkana biri to dingkaoꞌ i luaꞌna laniꞌ. 20Uwai tiꞌo mehendeꞌ wute podongkeꞌ pitu meteꞌ molewua loloꞌ-loloꞌna biri. 21Katoꞌo mahimo mpuꞌu mampopihana to tuwuꞌ, to mengkaduiꞌ i duniaꞌ, tinti-tinti, pinatuwuꞌ to manondoꞌ hei pinatuwuꞌ to moꞌilo hante hinangkana pinatuwuꞌ to mendae, to mengkaduiꞌ i duniaꞌ, hei lekiꞌna manusiaꞌ. 22Mahimo hinangkana to meꞌinohaꞌ to tuwuꞌ i lerina. 23Watoꞌomola konopahine Pueꞌ Ala hinangkana to uwaꞌ, hinangkana to i womboꞌ duniaꞌ, moromiꞌ manusiaꞌ ba rewua hei pinatuwuꞌ to mendae hante tinti-tinti i raoha, horiana lekiꞌna tiꞌo nopahi ka womboꞌ duniaꞌ, hi Nohoꞌ romo to tuwuꞌ hei lekiꞌna to moꞌawa-awa hante io i lali duanga tiꞌo. 24Hei uwai tiꞌo mobuhoꞌi duniaꞌ 150 ando komoruena.
လက်ရှိရွေးချယ်ထားမှု
Pewaliana 7: LAILJE
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
2017 Indonesian Bible Society (Lembaga Alkitab Indonesia)