YESAYA 35
35
Daḷan inta mokosaḷamat
1Padang gurun bo butá noingkag in moḷungangadon,
bungang mita in komintan momungai kon rawang kayuon.
2Padang gurun in kobiagandon in yagi-yagi,
bo mopodondong in dondong mita mosanang.
Kogaganea in naonda bo Buḷud in Libanon,
koḷoḷumbánea in naonda bo Ḷopá in Karmel bo Saron.
Dá bayongan in intau in mokoontongbí kon kawasa i Tuhan,
bo kamuliaan i Allah naton.
3 #
Ibr. 12:12
Koropot in ḻima inta moyangkó, koroton in duḷud inta mourot.
4Poguman kon i monia inta mointok in gina,
“Korigon in ginamu, dika moondok,
ki Allahmu in mamangoi mohukum kon musung,
Sia in mamangoi sin moposaḷamat kon i monimu.”
5 #
Mat. 11:5; Luk. 7:22 Kon dodai intua intau bilog in mokoontongdon,
bo intau bongoḷ in mokodongogdon.
6Intau ḻempeng ḷumanduk magí-mako naonda bo rusa,
intau bobó morogiow moḷunganga.
Sin bokaká moitoput nongkon padang gurun,
ongkag moiḻig kon rawang kayuon.
7Bungaion inta mopatú in mobaḻí tabang,
butá inta mobota-botak, pomukáan in bokaká.
Tampat inta dungkuḷ pinogutunan in ungkú in kayuon,
in kobiagandon in utó bo bakung.
8Kon tua in oyúondon in daḷan moḷoben,
“Daḷan mokosaḷamat” in tangoinea.
Intau binaradosa in diábí moitaḻib kon tua,
Intau bodok in diábí mopoḷaḻe kon intau inta tumaḻib kon tua.#35:8: Kamungkinan moḷoben mangaḻenea intau bodok … mongin tua.
9Kon tampat tatua in diábí in singa,
andeka mahaḷuk moraat ibanea.
Intau mita inta pinosaḷamat i Tuhan
in mayá mongintua.
10Intau mita inta pinoḷuat i Tuhan in mobuibí;
mosia in tumuot kon kotá in Yerusalem takin giow,
pogot monia in moḷumbá popisí in ḷunganga in gina inta mononoi.
Mosia in moḷunganga in gina bo morame;
robonoḷ in gina bo amui moinggamádon komintan.
လက်ရှိရွေးချယ်ထားမှု
YESAYA 35: INOMOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Alkitab Singog In Mongondow Masa In Tanaa © Indonesian Bible Society, 2016.