YOHANES ḶOUNA IN SINGOG

ḶOUNA IN SINGOG

Kon bonu in Habar Mopia inta pinoyaput i Yohanes naa, ki Yesus inouman saḷaku Pirman i Allah inta mononoi, inta ain nobaḻí intau bo inta ain nogutun kon sigad naton. Ná inta ain pinoguman kon bonu in buk tanaa, kon Habar Mopia tanaa in pinais takin makusud sinbá bayongan intau inta mobaca kon Habar Mopia tatua in mopirisayadon kon ki Yesusbí tua in Datu Mopoposaḷamat inta pinodandi i Allah. Sia in ki Adí i Allah tontaní. Bo bá kotaauan doman monia kon tongábí aka mopirisaya kon i-Nia dá mosia in mokouḻí kon kobiagan (20:31).

Naonda in ḷouna in singog inta noguman kon Pirman i Allah inta mononoi tatua in ki Yesusbí tua, dá pinomangkoian in buk tanaa aindon inouman in bayongan yagi-yagi inta mokoherang inta pinomia i Yesus. Soaḷ mita inta mokoherang tatua in moponiatabí kon ki Yesusbí tua in Datu Mopoposaḷamat inta pinodandi i Allah, Sia in ki Adí i Allah. Naonda ouman mita tatua inta mokoherang, dinuduian in yoyosingogan i Yesus takin intau mita. Nongkon yoyosingogan tatua notarangdon onu inta pinotaau in inta mokoherang mita tatua. Kon tonsilai tanaa pinoguman kon oyúon in intau mopirisaya kon i Yesus bo mobaḻí dumodudui-Nea, táe oyúon doman in intau in moḷawang kon i-Nia bo doí mopirisaya. Pasaḷ 13-17 noginsilang kon soaḷ naonda in kododagin i Yesus takin murí-Nea mita kon doḷom wakutu in domokondon Sia, bo soaḷ naonda in Sia noposadia poḷat noginrigon kon gina monia doḷom tua. Kon pasaḷ mita inta tumi, pinais doman kinotarang in soaḷ ki Yesus dinomok bo sinidang, soaḷ naonda in Sia pinopopakú kon kayu pinoyotaḻempang, minatoi bo nobiag bui, bo nokipogontong kon murí-Nea mita naonda in nobiagdon bui.

Ouman soaḷ bobay inta kinokadapatan yogot nokituaḻing (8:1-11) pinais kon bonu in tanda kurung moḷoben, sin oyúon kon naska mita ibanea bo kon terjemahan mita tungkuḷ intua diábí pinais in ouman tatua, tongá aka kon naska mita ibanea mako pinaisbí monia intua kon tampat mita ibanea.

Kon bonu in buk i Yohanes tanaa, totok in pinoḷontúnea kon tua in soaḷbí oogoi, tatuata in kobiagan mopia bo mononoi inta inogoi i Allah pinongin i Yesus Kristus. Oogoi tatua ain pinangkoi kon dunia bo korasaan in intau mita inta ain notarima kon i Yesus saḷaku daḷan mayá kon i Allah, bo saḷaku inta noponiata kon i Allah, bo saḷaku doman mobobogoi in kobiagan. Cara i Yohanes naa in koontonganbí kon pogogaidnea inta umuran momaké in toḻigid inta ginamánea kon bayongan inta mobaḻímai pomuḷoi mako. Tuata in pakéonnea moponiata kon onu inta moitutui podudui in pirisaya, umpamanea: Tubig, roti, bayag, gombala bo dombanea, pangkoi in anggur bo bungainea.

Tombonu

Tompouna 1:1-18

Ki Yohanes Mobobaptis bo intau mita inta muna-munamai Nobaḻí Murí i Yesus 1:19-51

Pinogaidan i Yesus kon yua-yuak in intau mobayong 2:1–12:50

Singgai mita pangabisan kon Yerusalem bo kon diugmai in Yerusalem 13:1–19:42

Kinobiagan bui i Yesus bo pinoki pogontongan-Nea 20:1-31

Simpod: Pinoki pogontongan bui i Yesus kon Galilea 21:1-25

လက်ရှိရွေးချယ်ထားမှု

YOHANES ḶOUNA IN SINGOG: INOMOG

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Alkitab Singog In Mongondow Masa In Tanaa အကြောင်းကို ပို၍ သင်ယူပါ။

YOHANES ḶOUNA IN SINGOG