YOSUA 9
9
Intau mita in Gibeon nonguboḷ kon i Yosua
1Habar kinountungan in Israel noihabardon magí-mako noidapot kon bayongan in datu inta kon dotá in toyopan kon Ongkag in Yordan – kon buḷud, kon sipangkoion in buḷud, bo kon rata inta kinoouput in pintad in Dagat Toyuak nodapot in kinoyoyayú in Buḷud in Libanon kon dotá in Utuan; tuata in datu mita in Het, Amori, Kanaan, Peris, Hewi, bo Yebus. 2Bayongan in datu tatua nopakat bo moyodugang sin momarang kon i Yosua bo umat in Israel.
3Táe intau mita in Gibeon inta nongkon bangusa in Hewi ain nokodongog kon onu inta pinomia i Yosua kon Yerikho bo Ai. 4Bo mosia in noyopakatdon kon monguboḷ kon i Yosua takin aid mopobaba kon keledai monia in: karong mita inta ain nokoyongan, bo botutu mita in anggur inta nongokesekdon inta pinomia nongkon kuḻit. Bo inta mobaḻí tongkaaḷ monia, mosia in nosadiadon kon roti inta ain noingkag bo inuḷampungdon. 5Mosia nomakédon in pakeang inta ain nongoberak bo nogi sapatu inta ain nokoyongan bo dinuḷa-duḷampongmai. 6Natua in kaadaan monia bo minayá nokipodungkuḷ kon i Yosua kon pinononḷoḷaigan kon Gilgal bo noguman kon inia bo kon intau mita in Israel, “Kami in namangoi nongkon butá inta moyayú sin momia kon dodandian takin i Tuang mita.”
7 #
Iḷn. 23:32, 34:12; Ul. 7:2 Táe intau mita in Israel noguman, “Onubí in mangaḻenea kami momia kon dodandian takin i monimu? Degá bo moiko nion in tongábí nogutun kon nodiugmai mita kon naa!”
8Mosia noguman, “Kami in moibogbí in mogaid kon onuka in parentaan i Tuang.”
“Ki ine in moiko? Bo nongkon onda?” Tua in ḷoḻibó i Yosua kon i monia.
9Mosia notubag, “Kami naa in namangoi nongkon butá inta totuu moyayú, Tuang, sin dinongogdon nami in soaḷ ki Tuhan Allah inta sinumba nai Tuang. Dinongogdon nami in bayongan inta pinomia-Nea kon Mesir, 10#Pin. 21:21-35 bo onu inta pinomia-Nea kon i datu in intau in Amori doyowa kon dotá in pomukaan kon Yordan, inta ki Sihon datu in Hesybon bo ki Og datu in Basan inta nogutun kon Asytarot. 11Itoi mita bo bayongan in intau kon butá nami nopotabá kon inami nosadia kon tongkaaḷ sin mamangoi in naa mokipodungkuḷ kon i Tuang mita, bo moguman kon kami naa in ata mita kon i Tuang mita. Tuamai, kami in mopoigum in totabi kon i Tuang mita bo moibogpa kaasí momia kon dodandian takin inami. 12Tungkuḷaika i Tuang mita indoiai, roti tongkaaḷ nami naa. Kon tungkuḷ in kami namangoi, roti tatua in noanaipa. Táe tanaa, indoiaika! Noingkagdon bo inuḷampung domandon. 13Bo botutu mita in anggur nami naa in nobagupabí kon dodai in binonuan nami; táe tanaa, indoiaika! Ain noberak. Pakeang bo sapatu nami in nogoguyaat domandon kon binayáan inta moyayú naa.”
14Dá intau mita in Israel notarimadon kon topiḻik in kaanon in intau mita in Gibeon tatua, bo diádon iḻibó monia kon i Tuhan intua. 15Ki Yosua nomia kon dodandian yoyobayatan takin intau mita in Gibeon tatua, bo nodandidon kon i monia kon diábí moḻimod kon i monia. Itoi mita in umat Israel nongibot doman kon mogintompodbí kon dodandian tatua.
16-17Táe noniata magí, kon singgai nogintoḷu naonda in dodandian tatua pinomia, intau in Israel nodapotdon in kotá in Gibeon, Kepira, Beerot bo Kiryat-Yearim kon butá in intau mita tatua. Dá bain tua bo kinotaauan kon tampat pinogutunan monia tua in diábí noyayú nongkon Gilgal. 18Táe intau in Israel diábí motaau in moḻimod kon i monia, sin itoi mita in Israel ain nongibot kon i monia pinodoyon kon tangoi i Tuhan Allah in Israel. Bayongan umat in Israel nongunsingog kon soaḷ tatua kon itoi mita monia. 19Táe itoi mita tatua notubag, “Onu in motaau aidan! Kami ain nodandi kon i monia takin nongibot pinodoyon kon tangoi i Tuhan Allah in Israel. Tanaa in kita diábí motaau mopoaid in moraat kon i monia. 20Kita in diábí motaau moḻimod kon i monia sin kita ain nodandi; bo aka kita ḻimimpat kon dandi tatua dá hukumon i Allah in kita. 21Dá, pomayádon mako in kobiagan monia, táe baḻíondon naton in mosia mononiai kon kayu bo mononangkob naton komintan.” Tuata in guman in itoi mita in Israel.
22Bo intau mita in Gibeon tatua inoiní namangoi in tayowon i Yosua. Ki Yosua noḻibó, “Nongonu sin moiko in nonguboḷbí kon inami bo noguman kon butá monimu in totuu moyayú, bokaka tongábí kon naa? 23Popisí in moiko ain nomia kon natua, ki Allah in mohukum kon i monimu. Bangusamu in umuranbí mobaḻí ata, mononiai kon kayu bo mononangkob kon tubig pakéon kon Baḷoi i Allahku.”
24Mosia notubag, “Pinomia nami in natua sin dinongogdon nami kon ki Tuhan Allah inta sinumba i Tuang tua ain nopotabá kon i Musa, mogogundoi-Nea tua, nobogoidon kon i Tuang in bayongan butá tanaa bo moḻimod kon bayongan in intau inta nogutun kon butá tanaa kon dodai in tai Tuang mogamádon kon butá tatua. Kami in moondokdon totok aka ḻimodon in kami, tuamai pinomia nami in tanaa mita. 25Tanaa kami in kon bonudon in kawasa i Tuang. Pomiadon kon inami onu inta koibog i Tuang popoaid.” 26Dá naa in inaidan i Yosua: Iḷukadanneabí in intau mita tatua bo diábí inogoinea in intau mita in Israel moḻimod kon i monia. 27Táe mosia tua in binaḻí ata – mononiai kon kayu bo mononangkob kon tubig pakéon in intau in Israel bo pakéon kon mezbah i Tuhan. Nodapotpabí in tanaa mosia umuranpabí nogaid kon oaidan tatua kon tampat inta piniḻí i Tuhan nobaḻí tampat pooibadaan kon i-Nia.
လက်ရှိရွေးချယ်ထားမှု
YOSUA 9: INOMOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Alkitab Singog In Mongondow Masa In Tanaa © Indonesian Bible Society, 2016.