MATEUS 11
11
Soruhan Yohanes Popondus
(Luk. 7:18-35)
1Uliorih Yesus nonga potunjuk-potunjuk ahkan koduo balas murid-Oh, Io nohtah unuk rih. Io tulak majar tutang monyiar pohtoh tahkan Pohotala ang lowu-lowu ijo doni ang anan.
2Yohanes Popondus ijo rahat hukum ang sipir ngonih tohou gawin Kristus. Turus io nyuhu pira-pira muridoh tulak nokuh Yesus ahkan ngisok, 3“Amairih ulun ijo ahkan lombut numbun bowot Pohotala, ata'ai harusrih ihkai ngindoi ulun bohkon?”
4Yesus mutah, “Buliih nokuh Yohanes tutang mborihta ahkai, inon ijo ihkam ngonih tutang nohto'. 5#Yes. 35:5-6, 61:1 Ulun bobulen tou nohto, ulun bolomu tou nyalan, ulun bobelang ijo ngoli pios; ulun borengen dahpot ngonih; ulun ijo mahtoi hoduli bolum; tutang Kabar Hinut tahkan Pohotala tonyiar ahkan ulun-ulun ijo porosbolum. 6Kosanangsolamat ahkan ulun ijo eam aro sokehtaoh nulak Ahku!”
7Uliorih soruhan-soruhan Yohanes rih tulak buli. Yesus nopara mander ahkan ulun aro tohou Yohanes, hioi-Oh, “Ihkam tulak nokuh padang bolambah ahkan nohto inon? Bahtang poring ijo tonahpi bahiu? 8Ihkam tulak ahkan nohto inon? Ihcobehti ijo hopokajan pioskah? Ulun-ulun ijo hopokajan kodorih mohcon ang istana! 9Jadi ombai ihkam tulak nokuh padang bolambah? Ahkan nohto ihcobehti nabirih? Tu'u, malah labih hajo umba ihcobehti nabi. 10#Mal. 3:1 Tului Yohanes orihrih ijo titun ang ayat Surat Borasih tuh,
‘Jituh soruhan-Ku, hion Pohotala,
Ahku nyuhu io labih houn, tahkan umba Ihko,
mangat io nandang jalan ahkan-Mu.’
11Ingatrih! Ang kolunon tuh eam aro ulun ijo labih hajo tahkan umba Yohanes Popondus. Oluka kodorih ulun ijo pongokoikoh ang louk ukup ain Pohotala, labih hajo umba Yohanes. 12#Luk. 16:16 Tahkan Yohanes monyiar borihtaoh johcok ang uhuntuh, ukup ain Pohotala tongolawan bain ulun-ulun ijo bousaha nguwasaoh hapan kokaras. 13Johcok polombut Yohanes, paring hukum Museh tutang ajaran nabi-nabi, monujum tohou hal-hal ijo ahkan nyolung. 14#Mal. 4:5; Mat. 17:10-13; Mrk. 9:11-13 Tutang amat ihkam kani porocaya, Yohanes orih Elia, ijo polombutoh lomoi tonujum. 15Amat anai tolinga pios io ngonih!
16Umba inon Ahku harus nindung ulun-ulun jaman tuh? Iro kolou anak-inyam ijo tuot ang pasar. 'Cokopulou, hotota'ah umba ijo bohkon, 17‘Ihkai newah lagu kojorih ahkan'kam, tahpi ihkam eam kani nasai! Ihkai monyanyi lagu koporosahtoi, tutang ihkam eam kani nangih!’ 18Yohanes lombut – io puasa tutang eam ngorih anggur; tutang ulun-ulun ngohawot io, ‘Io sonalung sehtan!’ 19Huntuh Anak Ulun lombut – Io kuman tutang ngorih; turus ulun-ulun ngohawot io, ‘Nohto ulun tuh! Bokora, pombosou, hojolahan umba ponagih pajak, tutang hojolahan umba ulun bodusa.’ Oluka kodorih, kopihtar Pohotala gihtan tahkan bua gawiouoh.”
Lowu-lowu ijo eam porocaya
(Luk. 10:13-15)
20Turus Yesus nopara nosalan lowu-lowu ang umoh Io paling aro nguan tandahelan. Bain ulun-ulun ang lowu-lowu orih eam kani hubah tahkan dusa-dusan'ndo. 21#Yes. 23:1-18; Yeh. 26:1–28:26; Yl. 3:4-8; Am. 1:9-10; Sak. 9:2-4 “Colahka ihko Korazim! Tutang colahka ka'a ihko Betsaida! Jahkaoh karon-tandahelan ijo konuan aang tohun'kam, tonguan ka'a ang Tirus tutang Sidon, musti ulun-ulun ang anan jadi tahi hubah tahkan dusa-dusan'ndo, tutang hapan pokahjan koporosahtoi hawui ngina korawu ang ngosan kuhung'ndo. 22Ingatrih, ang Ondou Kiamat, ulun-ulun Tirus tutang Sidon ahkan labih jeleng konapun Pohotala, tahkan ihkam! 23#Yes. 14:13-15; Gen. 19:24-28 Tutang ihko Kapernaum! Kuwoh ihko ahkan tongahtang johcok nokuh soruga? Eam! Malah ihko ahkan dian nokuh norahka! Tului jahkaoh karon-tandahelan ijo konuan ang tohun-tohun'kam rih, jari konuan ang Sodom, Sodom rih magun anai nyiring uhuntuh! 24#Mat. 10:15; Luk. 10:12 Ingatrih! Ang Ondou Kiamat ulun Sodom ahkan labih jion tonapun Pohotala tahkan umba ihkam!”
Lombut nokuh Ahku
(Luk. 10:21-22)
25Ang ohkot rih Yesus bodo'a, “Amai, Tuhan ijo ngowasa langit tutang tana! Ahku ngohawot torimakasih umba Ihko, tului paringoh orih ihko ngulimoh tahkan ulun-ulun, ijo pitar tutang bosokula, tahpi ihko ngorinahoh ahkan ulun-ulun ijo eam sokula. 26Orihlah ijo ngojorih ahtoi Amai.”
27 #
Yoh. 3:35, 1:18, 10:15 Turus Yesus nuhtui, “Ko-paring ang'co, jadi tononyorah Amai ahkak-Ku. Eam aro ihcobehti ka kosono Anak, bohkon umba Amai. Eam aro ka'a ijo ngosono Amai bohkon umba Anak, tutang ulun-ulun ahkan iai Anak rih mongosono Amai.
28Lombut nokuh Ahku ihkam paring ijo bo'o, tutang nanyam bahatoh puat, Ahku ahkan nonga komangat ahkan'kam. 29#Yer. 6:16 Numbun poretah-Ku tutang bajar tahkan Ahku, tului Ahku tuh bolomu lembai tutang randah ahtoi, mahka ihkam ahkan nginyam komangat. 30Tului poretah-poretah-Ku monyanang ahkan'kam tutang puat ijo Ahku muatoh ngosan ihkam, mohian.”
လက်ရှိရွေးချယ်ထားမှု
MATEUS 11: OTD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ LAI 1997 Indonesian Bible Society (Lembaga Alkitab Indonesia)