MATEUS 9
9
Yesus ngopios ihcobehti bolomu
(Mrk. 2:1-12; Luk. 5:17-26)
1Yesus jahkat nokuh luwang alut, turus mitah danou, buli nokuh lowu-humai-Oh. 2Ang anan ulun ngomin nokuh Io, ihcobehti bolomu ijo kaling ang kahcangoh. Ohkot Yesus nohto eam inon kohajon koharap ulun-ulun rih. Io nuhtui umba ulun bolomu rih, “Tabah iou anak-Ku! Dusa-dusan'mu ius tongapun.”
3Pira-pira guru-agama ijo anai ang anan nuhtui aang ahtoi, “Ulun tuh mohina Pohotala!”
4Yesus kota'an tiruk'ndo, nyolung Io nuhtui, “Ombai tiruk'kam koja'at orih? 5Umoh ijo labih hinut, ngohawot, ‘Dusan'mu ius tongapun’, ata'ai nuhtui, ‘tombok tutang nyalan’? 6Tahpi huntuh Ahku ahkan ngorinah ahkan'kam, ijo ang ngosan tana tuh Anak Ulun bokowasa ahkan ngapun dusa.” Turus Yesus nuhtui umba ulun bolomu rih, “Kuat ngohtun kahcang'mu tutang buli!”
7Ulun bolomu rih ka kuat, tutang buli nokuh lohpouoh. 8Ohkot ulun-ulun nohto ang nyolung rih, iro mihkoh tutang monara Pohotala, kotului Pohotala ius nonga kowasa ijo kodorih hajo ahkan kolunon.
Yesus na'ah Mateus
(Mrk. 2:13-17; Luk. 5:27-32)
9Pongohuli Yesus nohtah unuk rih. Pondehan nyalan, Io nohto ihcobehti ponagih pajak bogare Mateus, rahat tuot ang kantor pajakoh. Yesus nuhtui umba io, “Olai, umba Ahku!”
Mahka Mateus tombok tutang ngahasu Yesus.
10 #
Luk. 15:1-2
Kotihka Yesus rahat kuman ang lohpou Mateus, lombut aro ponagih pajak, tutang ulun-ulun ijo tongohu eam pios, bain ulun aro, umba kuman hombo-homboh Yesus tutang murid-murid-Oh. 11Tohko ulun-ulun Parisi ijo nohto hal orih. Turus iro ngisok umba murid-murid Yesus, “Ombai sababoh guru'kam kuman hombo-homboh umba ponagih pajak tutang ulun-ulun eam pios?”
12Yesus ngonih kisok'ndo turus mutah, “Ulun ijo borigas eam perulu dokter, tihkas ulun ijo ngarot iou. 13#Mat. 12:7; Hos. 6:6 Solidik iou inon rimai ayat Surat Borasih tuh, ‘Ahku nohuang kasihsayang tutang eam porahpah ohcin’. Kotului Ahku lombut eam ahkan na'ah ulun ijo ngohu aropoh ius pios, molekan ulun ijo ngohu aropoh hina.”
Kisok tohou puasa
(Mrk. 2:18-22; Luk. 5:33-39)
14Uliorih murid-murid Yohanes Popondus lombut nokuh Yesus. Turus iro ngisok, “Ombai ihkai tutang ulun-ulun Parisi puasa, tahpi murid-murid Amai eam?”
15Yesus mutah, “Koloukuwoh tiruk'kam? Tou karon pakin ang pesta kawin poros ahtoi'ndo amat pongaten bahkas magun anai hihcoumba iro? Tatu eam! Tahpi ahkan johcok ohkot ponganten bahkas rih tonomin tahkan iro. Ohkot rih punan iro puasa.
16Eam aro ulun ijo nupang hatiu ijo jari usang, umba ihco benang ijo magun bohua. Kotului benang tupang rih ahkan ngorunyut tutang morutat hatiu rih, nyiring kojoriaioh rutat hatin ijo labih kohajoioh. 17Kodorih ka'a eam aro ulun ijo nyuang anggur bohua, aang tolehkunguhpak ijo usang. Tului tolehkung rih ahkan borutat tutang rusak, turus angguroh botuhak. Anggur ijo bohua harus tonyuang ang tolehkunguhpak ijo bohua ka'a, mangat koduo-duooh tohtap tahan.”
Anak okon lohpou sombayang – tutang ulunbawi ijo nokawet jubah Yesus
(Mrk. 5:21-43; Luk. 8:40-56)
18Pondehan Yesus bopander umba murid-murid Yohanes Popondus lombut ihcobehti okon lohpou sombayang. Io suhkuntu'ut ang husuk Yesus hawui homauh, “Anak aik'ku ijo bawi, punai iou palus. Tahpi sudikah lombut ahkan nambitoh mangat ia bolum huli.”
19Yesus kuat tutang homboh murid-murid-Oh tulak umba ulun rih.
20-21Ang beteng jalan, anai ihcobehti bawi ijo jadi duo balas toun kotahiu poros tongondaha ijo lombut ngondoni Yesus tahkan hila lihkut. Tului io niruk, “Asar ahku nokawet jubah-Oh ih, ahku musti pios.” Turus io nokawet lain jubah Yesus.
22Uhunrih, Yesus ngulos tutang nohto bawi orih turus nuhtui umba io, “Tanggar ahtoi'mu anak-Ku! Tului ihko porocaya umba Ahku, ihko pios!” Ang ohkot orih ka'a ulunbawi rih pios.
23Pongohino Yesus johcok ang lohpou okon lohpou sombayang rih. Kotihka Io nohto pomain-pomain musik kindoiotu tutang aro ulun ijo paham boho, 24Io nuhtui umba iro, “Soluka ihkam paring! Anak tuh eam palus tahpi io tuh tihkas tiruh iou.”
Iro paringoh ngotao Yesus. 25Uli ulun-ulun rih soluka, Yesus nyolong nokuh tahkun anak rih tutang nambit longoioh. Turus kuat anakbawi rih. 26Kabar rih tosiar'kanhopus tana rih.
Yesus ngopios duo behti bobulen
27Yesus tulak tahkan anan tutang ang beteng jalan anai duo behti bobulen ngahasu Io. Iro ngoriak, “Anak Dawid, masi ihkai!”
28Kotihka Yesus nyolong nokuh lohpou, koduo behti bobulen rih lombut nokuh Io. Yesus ngisok umba iro, “Inon ihkam porocaya ijo Ahku dahpot ngopios ihkam?”
“Porocaya Amai!” hion'ndo.
29Turus Yesus ninjok mahtan iro hawoi nuhtui, “Tului ihkam porocaya, nyolung, inon ijo ihkam harapoh.” 30Mahka iro tou nohto. Yesus pingat iro honong karas, mangat ara monyiar borihta hal orih ahkan iai ka'a.
31Tahpi iro tulak nyiar borihta tohou Yesus nokuh hopus tana orih.
Yesus ngopios ulun bisu
32Ohkot koduo ulun rih tulak, tohko ihcobehti bisu ijo konowasa bain roh ja'at omin ulun nokuh Yesus. 33Yesus muhko roh ja'at rih tutang ang uhun orih rih ka'a ulun rih tou bopander hino. Ulun aro rih helan tutang nuhtui, “Jaha pu'u ihkai nohto kojadian sama koloutuh ang Israel!”
34 #
Mat. 10:25, 12:24; Mrk. 3:22; Luk. 11:15 Tahpi ulun-ulun Parisi nuhtui, “Kopala roh-roh ja'at ijo nonga Ahkai kobasa ahkan muhko roh-roh ja'at rih.”
Yesus ngasi nohto ulun aro
35 #
Mat. 4:23; Mrk. 1:39; Luk. 4:44 Kodorih Yesus tulak hokodiling, tahkan ihco lowu ahkan lowu ijo bohkon tutang tahkan ihco dukuh nokuh dukuh ijo bohkon. Io mongajar ang lohpou-lohpou sombayang, tutang momborihta Kabar Hinut tohou koloukuwoh Pohotala moretah kolou Lahca. Io ngopios ulun-ulun ijo ngarot kokaro mahcam ponyahkit tutang cahcat behtiu. 36#Nom. 27:17; 1Lahc. 22:17; 2Kron. 18:16; Yeh. 34:5; Sak. 10:2; Mrk. 6:34 Ohkot Yesus nohto ulun aro rih, Io masi umba iro, tului iro torongong tutang eam anai koba'asoh, kolou tobiri ijo eam aro sokahtikoh. 37#Luk. 10:2 Turus Yesus nuhtui umba murid-murid-Oh, “Aangkonohtomoh aro tahpi ulun pongohtomoh tihkas honjiot. 38Tului rih nyawot umba tepun umo rih mangat ngirim ulun pongohtom ahkan ngohtom hasil umoioh.”
လက်ရှိရွေးချယ်ထားမှု
MATEUS 9: OTD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ LAI 1997 Indonesian Bible Society (Lembaga Alkitab Indonesia)