O KEJADIAN 22
22
Ma Jou Madutu wihipareta o Abraham hupaya wihihuba o Ishak
1 #
Ibr. 11:17-19
O öraha muruono naga ipahaika ma Jou Madutu wataili o Abraham ai setia. Ma Jou Madutu wïahoko, ”Abraham!” Daha o Abraham wibaluhu, ”Ya, Jou.”
2 #
2Taw. 3:1
Ma Jou Madutu wïtemo, ”Noiki o Moria matonakika de o Ishak, aningohaka womatö tengo-tengoka, duru nihöhohininga. Genangoka, moi ol̄oku aha Tonihi dumutu ngonaika, nihihuba ani ngohaka Ngohino hokä o huhuba itötuhu-tuhuku.”
3Yarehino mawange o ngoru-ngorumino, o Abraham wabela-belaka o gota mangale o huhuba itötuhu-tuhuku deʼ wohidiliko o gota gënanga o keledai mal̄okuoka. Ünanga womäjobo deʼ o Ishak deʼ o gilaongo yahinoto yoiki ma Jou Madutu wahi ngahu-ngahuoka mangïika. 4O wange hangeoka o Abraham wamake o ngï gënanga maguruti-kahi. 5Daha ünanga wätemo ai gilaongo yahinotoika gënanga, ”Ngini nigogogere nenangoka de o keledai nënanga. Ngohi deʼ ahi ngohaka aha mioiki dokengika hupaya miwihuba ma Jou, damä ngomi mimakilioro nginino.”
6O Abraham wakelenga o huhuba ituhu-tuhuku gënanga magota o Ishak ai belekauku hoʼ de ünanga mahirete woao o gakana deʼ o uku mangaboho o gota ihi hora-hora. Maöraha önanga imadagi ima tuo-tuono, 7o Ishak woleha, ”Ama!”
O Abraham wohaluhu, ”Naga okia, ahingohaka?”
O Ishak woleha, ”Ngone haoka o uku deʼ o gota, mä kiaka ma duba mangohaka mangale idadi o huhuba ituhu-tuhuku gënanga?”
8O Abraham wohaluhu, ”Ma Jou Madutu mahirete aha wasadia o duba mangohaka gënanga.” Daha yahinotö yotagi gila-gila.
9 #
Yak. 2:21
Maöraha önanga yadonoka o ngï ma Jou Madutu waheto-hetongoka o Abrahamika, ünanga wohigoko moi o huhuba mangï deʼ magota wodatatoro wohidodiai mal̄okuoka. Daha wïliko aingohaka deʼ wi iduiha o huhuba mangïoka, o gota gënanga mal̄okuoka.
10Iböto de gënanga, wal̄ë ai gakana womau witoma aingohaka. 11Mä ma Jou Ai malaekat o dihangoka deʼ iwi böaka unangika, ”Abraham, Abraham!”
O Abraham wohaluhu, ”Ya Jou!”
12”Una nihangihara o ngohaka gënanga ekola nidodoaikanaga ünanga,” ma Jou wotemo de mangekomo o malaekat gënanga. ”O öraha nënanga Ngohi tohi öriki ngona nohihoromati deʼ nohihi gihene Ngohino, karana ngona nolukua nohidöaka aningohaka woma-tengo-tengoka gënanga Ngohino.”
13Daha o Abraham wotailako ikilolitino deʼ wamake o dutu moi o duba manauru matataduku yapaki-pakitino de o momo. O Abraham wal̄ë o duba gënanga daha wohihuba ma Jouika hokä o huhuba itö tuhu-tuhuku aingohaka ai dururu. 14O Abraham wohiromanga o ngï gënanga ”Ma Jou wasadia yopoparalu”. Deʼ hiädono o öraha nënangaö ma o nyawa kaya hetongohi, ”Ai l̄oku mal̄okuoka ma Jou wasadia yopoparalu”.
15Mamoioli o dihangoka de ma Jou Ai malaekat mopoaka o Abrahamika, 16#Ibr. 6:13-14 ”Ma Jou wotemo: Ngohi tokoboto de ahi romanga mahirete, karana ngona nadiaioka o hali nënanga deʼ konolukua mangale nohidöaka aningohaka womatö tengo-tengoka gënanga Ngohino, 17#Ibr. 11:12 Ngohi aha tonihi barakati ngona de maboboloi deʼ tadiai ani difauku manga ngöe hokä o murumu o dihangoka deʼ manga ngöe hokä o dowongi o gahi madatekino. Aningohaka de ani danongo aha yahohihanga toönanga manga haturu. 18#Kis. 3:25 Mata-mata o berera de o hoana manyawa aha yogahoko Ngohino hupaya Ngohi tahibarakati önanga hokä sarakia Tahibarakatioka ani difauku – karana ngona nohimotekoka Ahi pareta.” 19Iböto de gënanga o Abraham womakilioro ai gilaongo yahinotoika, daha önanga imakinïki yoiki o Bersyebaika de o Abraham wogogere wotatapu dokengoka.
O Nahor aidifauku
20O Abraham de ai riakoka ai romanga o Nahor. Idödadadi o Moria mal̄okuoka gënanga ipahaika, o Abraham woihene o ngo Milka, o Nahor ngoihekata de ami ngohakoka yatufange o nauru enagënanga: 21o Us, woria-riaka; o Bus ai dodoto; o Kemuel, maduruino wodadi o Aram ai ama; 22o Kesed, o Hazo, o Pildas, o Yidlaf, deʼ o Betuel, 23maduruino wodadi o ngo Ribka ami ama. Genanga ongofaka yatufange mahingohaka Milka mangale Nahor o Abraham ai dodoto. 24O Nahor de ngoihekata paliara ami romanga o ngo Reuma deʼ ngoihekata paliara gënanga mahi ngohaka o Tebah, o Gaham, o Tahas deʼ o Maakha.
လက်ရှိရွေးချယ်ထားမှု
O KEJADIAN 22: TLB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ