O YOHANIS 13
13
O Yesus waihoro manga l̄ou iwinöninïki
1O wange moiohi Paskah ma Wange ma Amoko, o Yesus wohiöriki maöraha yadonoka Unanga wamal̄a o dunia nënanga de wolio Ai Amaika. Unanga wahininga hagala o nyawa yodadi Toünanga madutu o duniaka, deʼ Unanga tatapu wahininga önanga hiädono mabahaika.
2O Yesus deʼ iwinöninïki magogiria yol̄omo o hutu-hutu mangol̄omo. O Ibilihi ihingohamikaka madibanga itotorou aihininga magoronaka o Yudas o Simon Iskariot aingohaka, mangale wihibodito o Yesus. 3O Yesus wohiöriki o Ama wihilapahioka mata-mata o kuaha Unangika. Unanga wohiorikö, Unanga woböa ma Jou Madutuino deʼ aha wolio ma Jou Madutuika. 4Hababu gënanga Unanga womaoko, Ai juba waiki, deʼ wohiliko o handoko Ai goronaino. 5Iböto gënanga Unanga woguhe o akere o bokolo moi magoronauku, dahao womuläenge waihoro manga l̄ou iwinöninïki deʼ wohitoraha de o handoko wohiliko-likoino Ai goronaino. 6Unanga womahiädono o Simon Petrusika, de wotemo, ”Jou, yakunu Jou tongohi ahi l̄ou de naihoro?”
7O Yesus wohaluhu, ”Oraha nënanga nomangaratiua okia Ngohi tadiai nënanga, mä ahao ngona nomangarati.”
8”Uha, Jou,” wotemo o Petrus o Yesusika, ”Hakali-kali uha Jou, naihoro tongohi ahil̄ou!”
Mä o Yesus wohaluhu, ”Nako Ngohi toni ihorua, ngona koiwa ani dodohanga dede Ngohi.”
9O Simon Petrus wato, ”Nako hokogënanga, Jou, uha duga-duga katongohi ahil̄ou mä tongohi ahigiama deʼ ahihaekö!”
10”O nyawa imaohikoka, yotebinoka mata-mata,” o Yesus witemo o Petrusika. ”Unanga ngaro uha womatebinoli; sawaliua ail̄ou. Ngini nënanga nitebinoka, mä mata-mataua.” (11O Yesus wohiorikoka o nagona aha iwihibodito. Gënanga mangale Unanga wotemo, ”Ngini nënanga nitebinoka, mä mata-mataua.”)
12 #
Luk. 22:27
O Yesus wäihoro önanga manga l̄ou iböto, Unanga womahi noakali Ai juba deʼ wogogerokali. Daha Unanga watemo onangika, ”Nimangarati ngini okia aha ipahaino Ngohi todiaioka nginika? 13Ngini nihiahoko Ngohi o Guru deʼ o Jou. Deʼ igoungu hokogënanga. 14Nako Ngohi hokä nia Jou deʼ nia Guru taihoro nial̄ou, nginiö kiani nimakihoro nial̄ou. 15Ngohi tohidöaka o dulada nënanga nginika, hupaya nginiö niadiai okia Ngohi tadiaioka nginika. 16#Mat. 10:24; Luk. 6:40; Yoh. 15:20 Igoungu itiai Ahi demo nënanga: womatëngo o gilaongo iholoiua wolamoko de aituanga, deʼ womatëngo o huhuloko iholoiua de iwihohulo-huloko. 17Nako ngini nihiörikoka mata-mata nënanga, niutumu ngini nako niadiai.
18 #
Mzm. 41:10
Okia totemo nënanga, igoungua inidäene ngini mata-mata. Ngohi tohiöriki o nagona honanga Ngohi tairikoka. Mä okia itulihoko Ma Jou Ai Demo ma Buku magoronaka, kiani idadi, enagënanga ’O nyawa yol̄omo dede Ngohi, aha ihilawani Ngohi.’ 19O hali gënanga tohiadonoka nginika örahanënanga, koidadiuahi ma, hupaya nako o hali gënanga damä imadadi, ngini aha ningaku Ngohila Unanga ihihetongo, NGOHI NAGA. 20#Mat. 10:40; Mark. 9:37; Luk. 9:48, 10:16 Igoungu itiai Ahi demo nënanga: O nagona yatarima o nyawa Ngohi tahulo-huloko, önanga ihitarima Ngohi. Deʼ o nagona ihitarima Ngohi, iwitarima Unanga wohihulo-huloko Ngohi.”
O Yesus wohidemoka iwihibodito Ai diri
(Mat. 26:20-25; Mark. 14:17-21; Luk. 22:21-23)
21O Yesus wotemo iböto hokogënanga, Unanga duru iwitora. Daha Unanga wotemo, ”Igoungu itiai Ahi demo nënanga: O nyawa womatëngo niahidogoronaka ngini aha wohihibodito Ngohi.”
22Iwinöninïki kaimakupulono moi de moi de duru yohëranga, karana ihiorikua Ai dungutu o nagonaika. 23Winöninïki wihohininga o Yesus yogogere imadatekuku de o Yesus. 24O Simon Petrus wikul̄abete unangika, hupaya ünanga woleha o Yesusika o nagonaika madungutu.
25Winöninïki gënanga womahitigi o Yesusika, deʼ woleha, ”O nagona ünanga, Jou?”
26O Yesus wohaluhu, ”O nyawa Ngohi tihidöaka o roti, Ngohi tatonoka o udo-udomo magoronauku, geünanga manyawa.” O Yesus wal̄ë o roti o luiti moi, watono o udo-udomo magoronauku; daha wihidöaka o Yudasika o Simon Iskariot aingohaka. 27De madataitoka o Yudas wodahongo o roti gënanga iböto, o Ibilihi iwohama aihininga magoronaika. Daha o Yesus witemo unangika, ”Nadiai itaiti okia nomau nadiai.” 28O nyawa moiuaö onangino yogogeruku yol̄omo genangoka imangarati yadodoa o Yesus witemo hokogënanga o Yudasika. 29Utunaga yatobote o Yesus wihuloko o Yudas woija okianaga iparalu mangale o rame gënanga, ekola wahidöaka o tiwi mahuhutulu o huha manyawaika – hababu o Yudas naga wasö to önanga manga tiwi mabuku.
30O Yudas wodahongo iböto o roti gënanga, ünanga gila-gila wohupu. O wange yohutuoka.
O pareta mahungi
31O Yudas woikoka, o Yesus watemo, ”Orahanënanga o Nyawa manga Ngohaka iwihimulia, deʼ ma Jou Madutu iwihimulia mangale Unanga. 32Nako ma Jou Madutu iwihimulia mangale Unanga, Unangö aha iwihimulia ma Jou Madutu mangale Ai diri mahirete. Iholoi idogo ma Jou Madutu aha wi himulia de madataitoka. 33#Yoh. 7:34 Ahi ngoha-ngohaka, Ngohi aha totedekanokaua Togogerohi dede ngini. Ngini aha nihilingiri Ngohi, mä hokä Ngohi totemoka o Yahudioka yakokuahaika, hoko genangoli Ngohi totemo nginika; o ngï Ngohi to oi-oikika, ngini niakunua niädono. 34#Yoh. 15:12, 17; 1Yoh. 3:23; 2Yoh. 5 O pareta mahungi Ngohi tinihidöaka nginika: Nima tekehininga moi de moi. Hokä Ngohi tini hininga ngini, hokä genangö, ngini kiani nimatekehininga. 35Nako ngini nima teke hininga o nyawa mata-mata aha ininäko ngini, nihinöninïki Ngohi.”
Wohidodemoka o Petrus aha wihipongono o Yesus
(Mat. 26:31-35; Mark. 14:27-31; Luk. 22:31-34)
36”Jou, Jou nomau kiaika noiki?” o Simon Petrus wileha o Yesusika. O Yesus wohaluhu, ”Kiaika Ngohi toiki, ngona nakunua nohinïki örahanënanga. Maduruino ngona aha nohi nïki Ngohi.”
37O Petrus wolehaokali, ”Jou, yadodoa ngohi takunua toninïki Jou örahanënanga?” ”Ngohi toigo tohonenge mangale Ngona Jou!”
38O Yesus wibaluhu, ”Igoungu ngona noigo nohonenge mangale Ngohi? Nohiöriki, o kuru-kuru ihorenuahi, ngona mahange i böto notemo, ngona nohinäkoua Ngohi!”
လက်ရှိရွေးချယ်ထားမှု
O YOHANIS 13: TLB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ