O MARKUS 14
14
O hidailako madorou o Yesusika
(Mat. 26:1-5; Luk. 22:1-2; Yoh. 11:45-53)
1 #
Kel. 12:1-27
O wange hinotohi o Paskah ma Wange deʼ o Roti i Ragi-ragi Ua ma Rameanga. O imam-imam manga häeke deʼ o agama maguru-guru manga gogiria yolingiri o ngëkomo laʼ mangale iwi tagoko o Yesus kaya pongono, deʼ malenga Unanga iwi toma. 2”Mä uha ngone hadiai gënanga o rameanga ma orahoka,” önanga yato, ”hababu done ipuda o huru-hara.”
O Yesus iwï gopöa o minya mabounu ma hëmo-hëmoro o Betania mabereraka
(Mat. 26:6-13; Yoh. 12:1-8)
3 #
Luk. 7:37-38
Maöraha o Yesus naga o Betania ma kapongoka, o Simon mahira iwi pado-pado ai tauoka, o ngoheka momatëngo moböa o Yesusika. Münanga moao o böto gahumu moi madol̄a o minya mabounu mahëmo-hëmoro ihali-hali, o ngutuku mabounu mahëmo-hëmoro de yadiai. maöraha o Yesus wogogeruku wol̄omo magogiria, o ngoheka gënanga mapooteke o boto gënanga deʼ mauhe o minya mabounu mahëmo-hëmoro gënanga o Yesus ai häekuku. 4Yamuruono naga, genangokadau yongamo deʼ ima koketemo, ”Okia mafaidä o minya mabounu mahëmo-hëmoro gënanga ihi gogule? 5O minya gënanga yakunu ihukunu deʼ maija iholoi de o ratuhu hange o tiwi haäka, deʼ matiwi yahi döaka o nyawa yomö mihikinika!” De önanga i mi ngamo ma ngohekaika gënanga.
6Mä o Yesus wätëmo, ”Nimi mal̄aika münanga! Yadodoa ho ngini nimihihuha münanga? Münanga modiai okia naga moi maoa-oa, deʼ o higiriri Ngohino. 7#Ul. 15:11 O nyawa mihikini salalu naga nia hidogoronaka. Oraha higeto-getongo nako ngini nimau, ngini yakunu nia riwo önanga. Mä Ngohi salalua dede ngini. 8O ngoheka nënanga modiaioka okia yakunu muna modiai. Münanga mohï böbötoka Ngohi de o minya mabounu mahëmo-hëmoro ihi lungunu ngarokö ma orahowahi. 9Ningaku! O dunia magilolitino, okiaka dika o Abari ma Oa ma Jou Madutuino ihi ngahu, o ngoheka nënanga ami manarama aha i hi ade-adeoli hokä o hohininga munangika.”
O Yudas womahi moteke o Yesus iwi tagoko
(Mat. 26:14-16; Luk. 22:3-6)
10Daha o Yudas Iskariot, iwinö ninïki o Yesus yangimoi de yahinoto manga dodiawo, woiki o imam-imam manga häekika, de madungutu o Yesus wihilapahi onangika. 11Onanga duru yosanangi yoihene o doabutu gënanga, deʼ yojaji aha o tiwi iwihidöaka o Yudasika. Deʼ o Yudasö womuläenge wolingiri o öraha ma rorahai laʼ mangale wihininga dorou o Yesus.
O Yesus waol̄omo o Paskah mainomo deʼ iwinö ninïki
(Mat. 26:17-25; Luk. 22:7-14, 21-23; Yoh. 13:21-30)
12O wange madodihiraka o Roti i Ragi-ragi Ua ma Rameangoka – maöraha o nyawa yatöaka o Paskah maduba – iwinö ninïki o Yesus yoleha Unangika, ”Kiaka Bapa nomau ngomi mihi diai o Paskah mainomo mangale ngona Bapa?”
13Deʼ o Yesus wähuloko onangino yahinoto, ”Nioiki o kotaika, dokengoka aha ngini nimaka mäke de o nauru womatëngo woao o rube gahumu moi madol̄a o akere. Niwi nïki ünanga, 14o tauika kiaka ünanga wöngohama deʼ nia hëtongo o tau madutuika gënanga, ’Ma Bapa Guru woleha, kiaka ma ngï Unanga deʼ iwinö ninïki aha yol̄omo o Paskah mainomo.’ 15O nyawa gënanga aha wohi matoko nginika moi o ngï ma amo-amoko daku i l̄oku-l̄okuil̄e. O ngï gënanga ihi diaioka, mameja de mahomoahi iböbötoka. Nihidiai mata-mata dokengoka mangale ngone.”
16Daha yahinoto iwinö ninïki o Yesus gënanga yoiki o kotaika. Dokengoka önanga yamäke mata-mata itiai hokä o Yesus waheto-hetongoka. Daha onangö yasadia o Paskah ma inomo.
17Yohutuku, o Yesus de yangimoi de yahinoto iwinö ninïki yoböa. 18#Mzm. 41:10 Deʼ onanga yogogeruku yol̄omo magogiriaka, o Yesus wätemo, ”Ni ihene: womatëngo nia hidogoronaka, kiaka o öraha nënanga wol̄omo dede Ngohi, aha wohihi lapahi Ngohi o nyawa madorouika.”
19Yoihene gënanga, iwinö ninïki o Yesus manga hininga duru idadi ihuha. Ho ima tëngo-tëngo yomuläenge yoleha o Yesusika, ”Marai ngohinoua Bapa ani dungutu?”
20O Yesus wohaluhu, ”Unanga ganga womatëngo ini ngimoi de hinoto nia hidogoronaka nënanga, kiaka wol̄omo o dodai moi dede Ngohi. 21Igoungu o Nyawa manga Ngohaka aha wohonenge hokä i tulihi Ma Jou Ai Demo ma Buku magoronaka. Mä hokokia manga bodito o nyawa iwihi lolapahi o nyawa ma dorouika, o Nyawa manga Ngohaka gënanga! I holoi yaoa o nyawa ge ünanga, nako ünanga komaiwa woma kil̄au o duniaino!”
Ma Jou wohi tita o ngol̄omo de o ngokere i tebi-tebini madoomu
(Mat. 26:26-30; Luk. 22:14-20; 1Kor. 11:23-25)
22Maöraha önanga manga go giriaka yol̄omo, o Yesus wal̄ë o roti deʼ womä niata wosukur ma Jou Madutuika. Ipaha Unanga wabëla-bëlaka o roti gënanga de Ai giama, daha wahi döaka iwinö ninïkika de wotemo, ”Nia l̄ë deʼ nia ol̄omo, nënanga Ahi röehe.”
23Iböto de gënanga Unanga wa l̄ë gahumu moi o angguru magalahi. Unanga womä niata wosukur ma Jou Madutuika, daha wahi döaka o galahi gënanga iwinö ninïkika. Ipaha önanga mata-mata yaokere o angguru gënanga. 24#Kel. 24:8; Yer. 31:31-34 Iböto gënanga o Yesus wotemo, ”Nënanga Ahi awunu kiaka ihigoungu ma Jou Madutu ai jaji, o awunu ikokopoaka laʼ mangale o nyawa manga ngöe. 25Ningaku: Ngohi aha tokerokaua o angguru nënanga, hiädono maöraha Ngohi tokere o angguru mahungi dede ngini Ahi Ama ai Dunia ma Hungioka.”
26I paha önanga ihinyanyi o puji manyanyi moi. Deʼ i böto gënanga önanga yoiki o Zaitun ma Doporonika.
Wohi dodemoka o Petrus aha wihi pongono o Yesus
(Mat. 26:31-35; Luk. 22:31-34; Yoh. 13:36-38)
27 #
Za. 13:7
I paha o Yesus wätemo onangika, ”Ngini mata-mata aha nipiringana nihi mal̄aika Ngohi. Hababu Ma Jou Ai Demo ma Buku magoronaka itulihi, ’Ma Jou Madutu aha wïtoma magogöana, deʼ ai duba de matikaka aha i kerewoto.’ 28#Mat. 28:16 Mä ipahaika Ngohi i hihi momikokali, Ngohi aha toiki tini kikiraika ngini o Galileaika.”
29”Kowali,” o Petrus wato, ”mal̄a laʼ önanga mata-mata ini mal̄aika Bapa, ngohi hakali-kali kowali.”
30”No hohininga,” o Yesus wato, ö hutu nënanga dika, o kuru-kuru i horenowahi mahinoto, ngona nohi gali mahange nohihi pongono Ngohi.”
31O Petrus wohaluhu wagoungu, ”Mal̄a la ngohi kokiani tohonenge dede Ngona Bapa, hakali-kali ngohi aha totemoua ngohi toni nakoua Bapa!”
Deʼ iwinö ninïki mahomoa hoko genangoli, yotemo.
O Yesus womä niata o Getsemanioka
(Mat. 26:36-46; Luk. 22:39-46)
32Onanga yadono o ngï moi maromanga o Getsemani, deʼ o Yesus wätemo Iwinö ninïkika, ”Nigogeruku nenangoka Ngohi tohi jai-jai toiki tomä niata.”
33Daha o Yesus wahi garo o Petrus, o Yakobus, deʼ o Yohanis yoiki imako moteke dede Unanga. Unanga imuläenge wamäo ai hininga ihuha deʼ wobaliha. 34”Ahi hininga duru kahä huha,” o Yesus wätemo onangika, ”tamäo hokä to mäu to honenge dika. Ni gögogere nenangoka deʼ nimä göana!”
35O Yesus woiki iholoi i kurutika mahuhutulu daha watilabukuku de womahi tudukuku o tonakuku deʼ womä niata. Ai hubayanga magoronaka Unanga wogahoko nako yakunu Unanga ngarouha wamäo o huha de o hangihara gënanga. 36Una wotemo, ”Ama, ya Ama,” ökia naga moiö de koiwa naga nakunua nadiai Ama. Nagoraka Ngohioka o huha de o hangihara nënanga. Duga-duga uha imoteke Ahi mau duga-duga Ani mau Ama.”
37Iböto de gënanga o Yesus woma kilioro deʼ wämäkeino iwinö ninïki imä iduoka. Unanga wïtemo o Petrusika, ”Simon, ngona kano mä idu? Duga-duga o jam moi dika, ngona nakunua nomä göa-göana?” 38Daha o Yesus wätemo onangika, ”Nimä göa-göana, deʼ nihubayanga hupaya ngini nia ohanua o cocoba. I goungu nia womaha imau yadiai o diai, mä ngini niakunua karana o nyawa nanga biaha gënanga yabole.”
39Mamoioli o Yesus woiki womä niata de wahetongo ma betongo ima tero. 40I böto gënanga Unanga woma kilioroli iwinö ninïkika deʼ wämäkeino önanga, kai maidu okahi, karana önanga kiriaholi yakioko. De önanga yanäkoua okia kokiani önanga yotemo o Yesusika.
41Maöraha o Yesus woma kilioro onangika wohigali mahangeoka, Unanga wätemo, ”Kani maidu okahi ngini deʼ nimahi batongo? Yaoaka! Yadonoka maöraha o Nyawa manga Ngohaka iwi hilapahi o nyawa böbaradoha manga giama ma hoatika. 42Nimomiki, niaino ngone hoiki. Nia lega! O nyawa wohihi lolapahi o nyawa ma dorouika woböaka!”
O Yesus iwitagoko
(Mat. 26:47-56; Luk. 22:47-53; Yoh. 18:3-12)
43O Yesus kawo temo-temohi, o Yudas woböa, yangimoi de yahinoto iwinöninïki manga dodiawo gënanga. Imako moteke dede Unanga yoböaö o nyawa manga ngöe, imä gao o oworo deʼ o boboha. Onanga o imam-imam manga häeke, o agama maguru-guru deʼ o Yahudioka manga tutuda yähuloko. 44O Yudas ai hininga i totorou gënanga wohi tantuoka moi o nonako onangika. ”O nyawa ngohi tï ame,” wätemo onangika, ”ge Unanga manyawa. Unanga niwi tagoko deʼ Unanga niwi ao de mago göana nihi dodiai duru.”
45Maöraha o Yudas waino, ünanga gila-gila woiki o Yesusika deʼ wotemo, ”Bapa Guru!” i paha ünanga wïame o Yesus. 46Daha o nyawa yaino-ino de o Yudas gënanga iwi tagoko o Yesus deʼ iwi liko de o rante. 47Mä genangoka naga womatëngo watauru ai oworo deʼ wihi oto ma imam womomulia ai gilaongika hiädono ai ngauku ipagele. 48Daha o Yesus wä temo onangika, ”Boteka Ngohi nënanga o nyawa madorou, hiädono ngini niaino de niao o oworo deʼ o boboha laʼ nihi tagoko Ngohi? 49#Luk. 19:47, 21:37 O wange higetongo Ngohi todotoko ma Jou ai Tauoka nia himangoka, deʼ ngini nihi tagokua Ngohi. Mä igoungu hoko gënanga iböto kokiani, hupaya idadi okia i tulihoka Ma Jou Ai Demo ma Buku magoronaka.”
50Mata-mata iwinö ninïki yopiringana iwi mal̄aika o Yesus.
51Womatëngo o goduru, kaduga-duga wapäke o ngöere ai röehe wohi hawoino, wïnïki o Yesus. O nyawa yomau iwi tagoko, 52mä unanga wahuputu ai ngöere gënanga, daha wopiringana kai hekonoka.
O Yesus o Agama ma Juru Hakimi ma himangoka
(Mat. 26:57-68; Luk. 22:54-55, 63-71; Yoh. 18:13-14, 19-24)
53O Yesus iwiao ma imam womomulia aitauika. Dokengoka mata-mata o imam manga häeke, o Yahudioka manga tutuda, deʼ o agama maguru imatoomu magogiria. 54O Petrus kama gögurutoka de winïki o Yesus, hiädono wowohama ma imam womomulia ai löaika. Dokengoka ünanga wogogeruku womarauku womahi tigi-tigika o ukuika, imaka ganuino de yogöa-göana. 55O imam-imam manga häeke deʼ mata-mata o Agama ma Juru Hakimi ihi dailako la yamäke inyata igoungu iwihihowono o Yesus hupaya yakunu o honenge mahukumanga iwihi tapal̄u Unanguku. Mä onanga kamoiö de yamäkeua manyonyata. 56Manga ngöe o hakihi yä ahoko laʼ mangale ihi döaka o hakihi i ëlu-ëluku o Yesusika, mä to önanga manga hakihi ima koko howono.
57Daha o hakihi yamuruono naga ima okoino deʼ ihi döaka o hakihi yoëlu-ëluku nënanga mangale o Yesus, 58#Yoh. 2:19 ”Ngomi mi ihene o nyawa nënanga wotemo, ’Ngohi aha takilianga ma Jou Madutu ai Tau nënanga, o nyawa yadodiai, deʼ o wange hange ipaha, Ngohi aha tohi goko mahomoa, ko o nyawaua yodiai.’ ” 59Mä o nyawa ge onangö ma manga hakihi i ma koko howono.
60De ma imam womomulia woma okoino mata-mata manga himangoka deʼ woleha o Yesusika, ”Okia ho ngona nä baluhua ini kokalaki gënanga?”
61Mä o Yesus woma rirïdi dika. Unanga wohaluhua mata-mata. Daha ma imam womomulia wïleha mamoioli Unangika, ”Boteka Ngona ma Koano Wohi hohalamati, ma Jou Madutu ai Ngohaka Wo Tebi-tebini?”
62 #
Dan. 7:13
”Ngohi nënanga,” o Yesus wohaluhu, ”deʼ ngini mata-mata aha niwi mäke o Nyawa manga Ngohaka wogogeruku ma Jou Madutu woko Kuaha ai nirakoka, deʼ woböa o lobi-lobi ma goronaka o dihanguku!”
63De ma imam womomulia wakä kakihi ai pakeanga deʼ wotemo, ”Iparalu okaua o hakihi! 64#Im. 24:16 Ngini ni ihenoka mahirete Ai demo-demo wihikauku ma Jou Madutu. Oraha nënanga okia nia putuhu?”
Onanga mata-mata yaputuhu o Yesus wahowono deʼ i patutu iwi hukumu iwi hohonenge.
65Daha yamuruono naga yomuläenge iwi obiri o Yesus, deʼ Ai lako yatamunoko deʼ iwigöhara Unanga, daha yotemo, ”Beika nä hetongo, o nagona inigöhara?” Yogoa-goanö ma i mahi moteke iwi poka o Yesus.
O Petrus wihipongono o Yesus
(Mat. 26:69-75; Luk. 22:56-62; Yoh. 18:15-18, 25-27)
66O Petrus naga kao löaokahi, momatëngo molöleleani ma imam womomuliaoka maino genangika. 67Maöraha mïmäke o Petrus womarauku o uku madatekoka, münanga matailako mohi dodiai o Petrus ai biono deʼ motemo, ”Koi goungua ngonaö nima koki nïki de o Yesus o Nazaret manyawa gënanga?”
68Mä o Petrus womahi pongono, ”Ngohi tohiorikua, deʼ tomangaratiua okia ani dungutu,” wotemo molö leleanika gënanga. Daha o Petrus woiki ma imam womomulia aitau mangoranika. [O öraha gënanga o kuru-kuru ihorene.]
69O ngoheka molö leleani gënanga mïmäkeoli o Petrus, deʼ mä temoli manyawa genangokadau, ”Unanga maraioka önanga manga dodiawo!” 70Mä o Petrus womahi pongonoli.
Tedekanua ipahaika, manyawa genangoka yotemoli o Petrusika, ”Nomahi pongono nakunokaua, marai ngona manga dodiawo, hababu ngona o Galileaino!”
71Daha o Petrus womuläenge womahi lolai deʼ wotemo, ”Ngohi tinäkoua manyawa kiaka ngini niadungutu gënanga!”
72O öraha gënanga dika o kuru-kuru ihorene mahinoto. Deʼ o Petrus womä hininga o Yesus wotemoka unangika, ”O kuru-kuru i horenowahi mahinoto, ngona nohi gali mahange nohihi pongono Ngohi.” De o Petrusö woari iwihö howo-howo.
လက်ရှိရွေးချယ်ထားမှု
O MARKUS 14: TLB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ