LUKAHU 19
19
I Miri Yehu dàngu i Hekeu
1Ba natàka-ka i Yehu la Yeriku, laku pa-ngalangu-nanyaka ba nali la paraingu lai nu. 2Lai nu la paraingu ninya haàtu-na na kapala kei hilu katiku na mawulu. Na tamuna Hekeu-ya. 3Na-rinjungu paita-ya i Yehu, tàka ba lalu danguna na tau tàka nyuna wiki tau kendaru-ya, nda nawàngu papeku-ma paita-ya i Yehu. 4Jia hi napalai mangilu-nya na tau dangu, hàla hi nahei la hareti pingi ai, ka peku ita-nanya i Yehu napa tiangu ba nali lai nu. 5Ba natàka-ka i Yehu lai nu la pingi ai, hi na-tangara-ya hi napanii dànya i Hekeu, “Hekeu, puru pa-renggangu! Nadu ba linggunya la umamu la lodu nàhu,” hi wànanya.
6Ka puru pare - renggangu-nanyaka i Hekeu hi na-hàmburu mbaha etiya i Yehu. 7Mbuu ndàbana na tau na maita-ya nuna hoputu-nanyaka. Dapanii, “Yi! Ka ni hi linanyai pambawa la uma tau nda hàmu!” wàda.
8Tunaka nu la umana, i Hekeu ndolaku-nanyaka hi napanii lai Yehu, “Miri, hawiangu da bandanggu ka kuhunggu-nja la tau mila wànggu; dàngu jiapa ka nggamuya na palapi-nggu handàkangu, napa kuwua belinya papatu wundangu!” wàna.
9Hàla hi napanii i Yehu, “La lodu nàhu nyumu dàngu na kuru umamu mbuu ndàbana pamàna-nanyaka paraïna i Ala dàngu napa wua-nanggauka luri bidi, nadu nyumu ba wàlana i Ambarahàmu-madukaui dumu. 10Na Ana Tau maina pahimbu-ya dàngu pa-pamàna-nya na tau njàrangu,” wàna.
Na pangerangu àmahu rara
(Mat. 25:14-30)
11Ba talànga patingi-nanyaka tau na paniina i Yehu, peka-nanyaka na hau na pangerangu. Nadu, la rehi nu mareni-mana-nyaka la Yeruhali, dàngu ba nakaka-ya tau i Ala napa lu pareta-nanyaka ba Hanganji-ya la pinu tana. 12I Yehu napanii, “Ninya na haàtu na maràmba na malaku la tana mamarau la pa-katua-ya ka na-hanganji, jàka hàlaka hi namangu pabeli. 13Ba ndedi nalaku napaau-nja ba tau hakambulu-ha da atana, hàla hi na-maràngga wuanja hau àmahu rara. ‘Idanggangu wànjawa yiada da àmahu ba talànga nàhuka,’ wànanja. 14Tàka da tau da ma-mandapu-nya nuna na tana nda da-mbuhanya. Jia ba taliu-naka hi dapalewa tau papanii, ‘Nda mambuha-anya duma na tau nuna la pa-hanganji-nggama,’ wàda.
15Ba tuna na maràmba nuna pa-katua-yaka la pa-hanganji, tunaka nu beli-nanyaka la tanana. Hi na-paau parengga-nja da atana pahurungu, ka kupinja jàka pira utu pangala-da, wàna. 16Na ata na mamai mangilu napanii, ‘Miri, na àmahu-mu ba hauna na pawua-mungga, ku-patoma-njaka hakambulu,’ wànanya. 17‘Hàmu,’ wàna na mirina, ‘nyumu ata hàmukau! Nyumu ba pa-monungu-kau la maana hakudu - hakudu-na, napa kutukau ma-kuaha-ha da hakambulu mbua paraingu,’ wànanya. 18Na ata na padua wàda hurungu-nanyaka hi napanii, ‘Miri, na hau na marara na pawua-mungga, ku-patoma-njaka lima,’ wànanya. 19Na hanganji napanii-nya na atana, ‘Nyumuka ma-kuaha-ha da lima mbua paraingu,’ wànanya. 20Na ata na haàtu namai hi napanii, ‘Miri, yiana-yaka na àmahu-mu, ku-pahàmu-maya duku la hapu tanganggu. 21Ku-mangàdatu-nggau Miri, nadu nyumu ba tau mbana etikau. Nyumu mupiti biaha da panda mangumu, nyumu bau muti biaha da panda tondumu,’ wàna. 22Napaya na hanganji, ‘Nyumu ata akatu-kau! Pa-jàngapu-nja da papanii dumu, nyumu napa kuhuku-nggau. Nyumu mupingga ba tau mbana etika ba kupiti-ya na nda mangunggu dàngu ba kumuti-ya na panda tondunggu. 23Jàka tuna nu ka nggikina dumu hi ndau patama-nya nuna na àmahu-nggu la mbàngu, làti jàka kubeli ka kungala-nja da anana?’ wànanya. 24Tunaka nu, nyuna na hanganji hi napanii-nja da tau da ma-ndolaku lai nu, ‘Pitiya nana na àmahu welingu lai nyuna ka wuanya na ata na maningu ma-rarangu hakambulu,’ wànanja. 25Tàka nyuda da tau, ‘Miri, nyuna ba ningu-maduka hakambulu-na,’ wàdanya. 26Nahema na hanganji, ‘Ngàdaya: Na tau na mambàda ningungu, napa ba hili wua pada-manyaipa. Tàka na tau na manda ningu ndokungu ngga - nggàra, jàka nggàra-kiya na mani-kinya lai nyuna, napa ba papiti beli-duyaipa welingu lai nyuna. 27Tàka nàhu ngàndi-hawa nàmu da papanggu da manda mbuhangu pa-hanganji-ngga. Pameti hàlaha la hangganggu!’ wànaka na hanganji,” wàna.
I Miri Yehu ba natama dàngu mangarangu-na la Yeruhali
(Mat. 21:1-11; Mrk. 11:1-11; Yuhn. 12:12-19)
28Ba nahàla i Yehu papeka ndàbaya nuna, mangilu-nanjaka nyuda ba dalaku la Yeruhali. 29Ba datàka-ka la lihina la Mbetupanggi dàngu la Mbetani la Palindi Haitungu, na-paràha-nja da tau madua da makiku-nya pa-mangilu. 30“Iluawa la kotaku ni lua la hangganda,” wànanja paraïna i Yehu, “jàkai tamaka lai nu, napa miita-ya na heu na ana kalandai na pahondu. Na kalandai nuna ndedi ningu handàkangu ma-kaliti-ya. Wàkahu-ya nuna na kalandai kai ngàndiya nàmu. 31Jàka ningu tau ma-paàra-nggai, ‘Nggikina hi mi-wàkahu-ya nana na kalandai?’ jàka wànanggai, ‘Ningu ihi wàngu wàna i Miri,’ ”#i Miri: jàka ndia: na Mamangu-nya. wàminya.
32Nuda da tau da makiku-nya i Yehu lua-danyaka, na-jàngapu hàlama hama tuna ba wànanja. 33Ba talànga wàkahu-danyaka nu na ana kalandai, panii-nanjà paraina mamangunya “Ka ni nyimi hi mi-wàkahu-ya nana na kalandai?” wànanja.
34Dahema nyuda, “Ningu ihi wàngu wàna i Miri,” wàdanya. 35Ka ngàndi-danyaka nuna na ana kalandai lai Yehu. Tunaka nu hi da-wàlahu-ha da kalembi bokulu-da la kajia kalandai dàngu hi ndulaya i Yehu pa-kaliti-ya nuna na kalandai. 36Ba talànga nàhu-nyaka ba na-kaliti kalandai, na tau dangu wàlahu-danjaka da kalembi-da la ànda.
37Ba mareni tàka-ama-naka i Yehu la Yeruhali, la ànda pa-kamburungu la Palindi Haitungu, mbuu ndàbada da makiku-nya da madangu pakiringu-danyaka pa-warangu ba dawotu-nya i Ala dàngu ba da-pamalangu-nya Nyuna, nadu lumuda da pa-hangàtarungu da pambàda hakahii-da. 38Dawara, “Oha-anaka na Hanganji na mamai la tamuna i Miri! Mànjaku-nanyaka la awangu dàngu pa-wotungu-yawa i Ala!” wàda.
39Ba mapira-ha da tau Parihi welingu la honga tau dangu dapanii dànya i Yehu, “Umbu Ngguru, paràha-nja da makiku-nggau ka da-kamàndalu,” wàna.
40Nahema i Yehu, “Iwaiyawa! Jàka da-kamàndalu nyuda, da watuka yiada da mawara,” hi wànanja.
I Miri Yehu ba nahiinya la Yeruhali
41Ba namare - reni-nyaka la Yeruhali dàngu ba naita-yaka na paraingu, hii-nanyaka, 42“Hai-a-ai, nahàmu-kadua-ka làti la lodu nàhu jàka upinya nggàraya na ma-patàka-nggau mapeku! Tàka nàhu nyumu nda peku ita-munya. 43Nyumu napa hunggu-munyaka na hau rehi, na ngia papeku-na na muhumu ba natunggau ma-pahàmbarungu la weli winggiru-mu; napa nyuda da-nggupulu-kau dàngu da-kadohaku-kau lai nu - lai nu. 44Nyuda napa da-palàjaru karia-nggau dàngu mbuu ndàbana na ma-mandapu-nggau; hi lupa nda haumbu watu pamàta-da napa ma-panunggulungu la pangia-da, nadu nyumu ba ndau eti wànya na rehi rapa tàkana i Ala la pa-pamàna-nggau!” wàna.
I Miri Yehu ba natama la Umana i Miri
(Mat. 21:12-17; Mrk. 11:15-19; Yuhn. 2:13-22)
45I Yehu natama la Umana i Miri, hi nawàngga hàlaya na ma-danggangu lai nu. 46“Daa la Huratu Matua,” wàna ba napeka-nja, “ninya na pa-tulihu, ‘Na Umanggu, uma ngia pa-hamayangu-ya!’ wàna i Ala. Tàka nyimi tuminyai hibu tau rambangu!” wànanja.
47Hau lodu - hau lodu i Yehu na-ajaru daa la Umana i Miri. Da ratu kapala, dàngu da ngguru anggama, lupa da ama bokulu Yahundi da-patikingu pa-pameti-ya Nyuna, 48tàka nda dahunggu ànda la palaku-nya nuna, nadu mbuu ndàbana ba pa-nuangu-mananya la pa-patingi-nya paraï tau dangu, ka ba na-pamataru etidu na panii-naka.
လက်ရှိရွေးချယ်ထားမှု
LUKAHU 19: KAM
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@LAI 1995 Indonesian Bible Society (Lembaga Alkitab Indonesia)