Ioan 6
6
O butimos le manŕăngo.
1Pala kodea, o Isus gălo înteal la mareatar la Galeliatar, kai bušol e marea la Tiberiadei.#Mat. 14.13. Marko 6.35. Luka 9.10, 12.
2Khă bari gloata jealas pala Leste, anda kă dikhălas le sămnuri kai kărălas le maškar le nasfale.
3O Isus ankăsto po baŕobaro, thai bešelas oče Pehkă jenença.
4E Patradi, o prazniko le Iudeiengo, sas paše.#Cap. 2.13; 5.1. Lev. 23.5, 7. Deut. 16.1.
5O Isus vazdea Pehkă iakha, thai dikhlea kă ăkh bari gloata avel karing Leste. Thai phendea le Filipohkă: „Katar avel ame te tinas manŕo kaste xan le manuši kadala?”#Mat. 14.14. Marko 6.35. Luka 9.12.
6Phenelas e buti kadea kaste zumaveles, anda kă jeanelas so sî les ande godi te kărăl.
7O Filip dea Les anglal: „O manŕo, kai daštisaras te tinas les duie šelença franči, či arăsăla ka sogodi anda lende te xan po xançorî.”#Num. 11.21, 22.
8Iekh anda le jene Lehkă, o Andrei, o phral le Simon Petrohko, phendea Lehkă:
9„Sî koče khă rakloro, kai sî les panji manŕă orzohkă thai dui maše; ta so sî kadala anda kaditi?”
10O Isus phendea: „Phenen le manušengă te bešen tele. „Ando than kodoa sas but čear. Le manuši bešline tele, ando dindimos dă paše panji mii.
11O Isus lea le manŕă, naisardea le Devllehkă, xuladea le jenengă, thal jene ulade le kolengă kai bešenas tele; sakadea, dine le i andal maše sode kambline.
12Pala so čeailile, o Isus phendea Pehkă jenengă: „Tiden le prušuka kai ašile, kaste na xasaol khanči.”
13Tidine le, thai pherdine dešudui košuri anda le prušuka kai ašile sas anda le panji manŕă orzohkă, pala so xalesas saoŕă.
14Le manuši kodola, kana dikhline e minunea, kai kărdeasas la o Isus, phenenas: „Le čeačimasa, kadoa sî o prooroko kukoa ajukărdo ande lumea.”#Cap. 1.21; 4.19, 25; 7.40. Gen. 49.10. Deut. 18.15, 18. Mat. 11.3.
15O Isus, anda kă jeanelas so sî le ande godi te aven pala Leste te len Les la zorasa thai te kărăn Les Thagar, gă'lo pale koa baŕobaro, korkoŕo numai O.
O Isus phirăl pe marea.
16Kana meklea pe e reat, le jene Lehkă uliste kai rig la mareati.#Mat. 14.23. Marko 6.47.
17Ankăste ande khă bero, thai nakhănas e marea, kaste jean ando Kapernaum. Tuneričisaolas, thai o Isus sa či avilosas lende.
18Phurdelas khă bravall zurali thai marea sas xoleariko.
19Pala so çîrdine koa bero kam bištaipanji or treanda stadii, dikhline le Isusos phirindoi pe marea thai sar pašolas le berostar. Thai daraile.
20Ta o Isus phendea lengă: „Me sîm, na daran!”
21Kamenas te len Les ando bero. Thai o bero arăslo iekhatar ando than karing jeanas.
O manŕo la čivavako.
22O nordo, kai ašilosas la kolavrea rigatar la mareako, šuteasas sama kă oče nas numai khă bero, thai kă o Isus či ankăstosas ando bero kadoa Pehkă jenença, thai le jene teleardesas korkoŕo lesa.
23O duito des avilesas aver beruri andai Tiberiada, paše le thanestar kai xalesas on o manŕo, pala so o Rai naisardeasas le Devllehkă.
24Kana dikhline le noroade kă či o Isus, či le jene nas oče, ankăste i on ande le beruri kodola, thai găline ando Kapernaum te roden le Isusos.
25Kana arakle Les, înteal e marea, phende Lehkă: „Sîkaitorina, kana avilean koče?”
26Čeačio phendimos, o Isus phendea lengă: „Čeačes, čeačes phenau tumengă, kă roden Ma na kă dikhlean ăl sămnuri, ta anda kă xalean anda le manŕă kodola, thai čeaililean.
27Kărăn buti na andoa xabe kai nakhăl, ta andoa xabe, kai ašel anda e čivava e vešniko, thai savi del tumengă la o Šeau le manušehko; kă o Dadd, ta, orta o Dell, Les štampilisardea Les Pehka pečetasa.”#Vers. 51. Cap. 1.33; 4.14; 5.37; 8.18. Mat. 3.17; 17.5. Marko 1.11; 9.7. Luka 3.22; 9.35. Kărd. 2.22. 2Pet. 1.17.
28On phendine Lehkă: „So te kăras kaste pheras le butea le Devllehkă?.”
29O Isus dea le anglal: „E buti kai mangăla o Dell sî kadea: te patean ande Kukoa, kai tradea les O.”#1Ioan 3.23.
30„Ta so sămno kărăs, Tu”, phende Lehkă on „kaste dikhas les, thai te pateas ande Tute? So butearăs Tu?#Mat. 12.38; 16.1. Marko 8.11. 1Kor. 1.22.
31Amară dadda xaline mana ande pustia, pala sar sî ramome: „Dea le te xan manŕo andoa čeri.”#Exod. 16.15. Num. 11.7. Neem. 9.15. Ps. 78.24, 25. 1Kor. 10.3.
32O Isus phendea lengă: „Čeačes, čeačes, phenau tumengă, kă o Moise či dea tume o manŕo andoa čeri, ta o Dadd Muro del tume o čečio manŕo andoa čeri;
33kă o Manŕo le Devllehko sî kukoa kai ulel andoa čeri, thai del la lumea e čivava.”
34„Raia,” phendine Lehkă on, dea me orkana kadoa manŕo.”#Cap. 4.5.
35O Isus phendea lengă: „Me sîm o Manŕo la čivavako. Kon avel Mande, či bokhauola čiăkhdata; thai kon pateal ande Mande, či trušaola čiăkhdata.#Vers. 48, 58. Cap. 4.14; 7.37.
36Ta phendem tumengă kă i dikhlean Ma, thai sa či patean.#Vers. 26, 64.
37Sa so del Ma o Dadd, arăsăla Mande; thai koles kai avela Mande či našavauales avri:#Vers. 45. Cap. 10.28, 29. Mat. 24.24. 2Tim. 2.19. 1Ioan 2.19.
38kă ulistem andoa čeri kaste kărau na Muŕo kamimos, ta o kamimos Kolehko kai tradea Ma.#Mat. 26.39. Cap. 4.34; 5.30.
39Thai o kamimos Kolehko kai tradea Ma, sî te na xasarau khanči anda so dea Ma O, ta te uštevau les ando des kai avela.#Cap. 10.28; 17.12; 18.9.
40O kamimos Mîŕă Daddehko sî kă orkon dikhăl le Šeaves, thai pateal ande Leste, te aveles čivava vešniko; thai Me ušteavaua les ando des kai avela.”#Vers. 27, 47, 54. Cap. 3.15, 16; 4.14.
41Le Iudeia bandearănas o nakh pe Leste, anda kă phendeasas: „Me sîm o manŕo kai ulisto andoa čeri.”
42Thai phenenas: „Ta nai kadoa o šeau le Iosifohko, savehko dadd thai dei prinjeanas le? Sar ta phenel O: „Me ulistem andoa čeri?”#Mat. 13.55. Marko 6.3. Luka 4.22.
43O Isus dea le anglal: „Na bandearăn andoa nakh maškar tumende.
44Khonikh našti avel Mande, kana či çîrdeles o Dadd, kai tradea Ma; thai me ušteavaua les ando des kai avela.#Vers. 65. Dilab. 1.4.
45Ande le prooročii sî ramome: „Saoŕă avena sîkade le Devllestar.” Kadea kă orkon ašundea le Daddestar, thai primisardea Lehko sîkaimos, avel Mande.#Is. 54.13. Ier. 31.34. Mika 4.2. Evr. 8.10; 10.16.
46Na kă varekon dikhlea le Daddes, avri anda Kukoa kai avel kata o Dell; e, Kodoa dikhlea le Daddes.#Cap. 1.8; 5.37; 7.29; 8.19. Mat. 11.27. Luka 10.22.
47Čeačes, čeačes, phenau tumengă, kă savo pateal ande Mande, sî les e čivava e vešniko.#Vers. 40. Cap. 3.16, 18, 36.
48Me sîm o Manŕo la čivavako.#Vers. 33, 35.
49Tumară dadda xaline mana ande pustia, thai mulline.#Vers. 31.
50O Manŕo, kai ulel andoa čeri, sî kadea kărdo, kon xal anda leste, te na merăll.#Vers. 51, 58.
51Me sîm o Manŕo juvindo, kai ulisto andoa čeri. Te xala varekon andoa manŕo kadoa, traila ando veako; thai o manŕo, kai daua les Me, sî Muŕo stato, kai daua les anda e čivava la lumeati.”#Cap. 3.13. Evr. 10.5, 10.
52Koa ašundimos kadale divanurengo, le Iudeia xanas pe maškar lende, thai phenenas: „Sar daštil o manuši kadoa te del ame Pehko stato te xas les?”#Cap. 3.9; 7.43; 9.16; 10.19.
53O Isus phendea lengă: „Čeačes, čeačes, phenau tumengă, kă, kana či xana o stato le Šeavehko le manušehko, thai či pena o rat Lehko, nai tume čivava ande tumende.#Mat. 26.26, 28.
54Kon xal o stato Muŕo, thai pel o rat Muŕo, ašel ande Mande, thai Me ašeau ande Leste.#Vers. 27, 40, 63. Cap. 4.14.
55Kă o stato Muŕo sî čeačimasa khă xabe, thai o rat Muŕo sî čeačimasa khă pimos.
56Kon xal o stato Muŕo, thai pel o rat Muŕo, ašel ande Mande, thai Me ašeau ande leste.#1Ioan 3.24; 4.15, 16.
57Pala sar o Dadd, kai sî juvindo tradea Ma Man, i Me traiu andoa Dadd, sa kadea, kon xal Ma Man, traila i o anda Mande.
58Kadeadar sî o manŕo, kai ulisto andoa čeri, na sar e mana, kai xalela tumară dadda, thai sa mulline: kon xal o manŕo kadoa, traila ando veako.”#Vers. 49, 50, 51.
59O Isus phendea lengă kadala butea ande khăngări, kana sîkavelas le manušen ando Kapernaum.
Unii jene Mekăn Les. O phendimos le Petrohko.
60But anda le jene Lehkă, pala so ašundine kadala divanuri, phendine: „Kadoa divano sî but zuralo: kon dašti te răbdiles?”#Vers. 60. Mat. 11.6.
61O Isus, kai atearălas sa thai jeanelas kă Lehkă jene bandearănas o nakh andoa divano kadoa, phendea lengă: „Kadoa phendimos anda tumende sî khă doši ambladimasti?
62Ta te dikhăna le Šeaves le manušehko ankăstindoi kai sas mai anglal?…#Cap. 3.13. Marko 16.19. Kărd. 1.9. Efes. 4.8.
63O Duxo sî kukoa kai del čivava, o mas nai klhančesko lašo; le divanuri, kai phendem tumengă le Me, sî duxo thai čivava.#2Kor. 3.6.
64Ta sî unii anda tumende kai či patean.” Kă o Isus jeanelas dă anglal kon sas kukola kai či pateanas, thai kon sas kukoa kai bitinela Les.#Vers. 36. Cap. 2.24, 25; 13.11.
65Thai mai phendea: „Orta anda kodea phendem tumengă kă khonikh našti avel Mande, kana nas lehkă dino Mîŕă Daddestar.#Vers. 44, 45.
66Anda e leaka kodea, but anda le jene Lehkă, găletar parpale, thai či mai phirănas Lesa.#Vers. 60.
67Atunčeara o Isus phendea kolengă le dešdongă: „Tume či kamen te jeantar?”
68„Raia,” phendea Lehkă o Simon Petro,” kaste te jeastar? Tu sîtu le divanuri la čivavakă vešniko.#Kărd. 5.20.
69Thai ame pateaiam, thai arasleam koa prinjeandimos kă Tu san o Kristoso, o Sfînto le Devllehko.”#Cap. 1.49; 11.27. Mat. 16.16. Marko 8.29. Luka 9.20.
70O Isus dea le anglal: „Či alosardem tume Me tumen le dešuduien? Thai sa iekh anda tumende sî khă beng.”#Cap. 13.27. Luka 6.13.
71Delasduma poa Iuda, o šeau le Simonohko Iskarioteano; kă o avela te bitine Les: o, iekh anda kukola le dešudui.
လက်ရှိရွေးချယ်ထားမှု
Ioan 6: KALD2020
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bible translated into Kalderash Romani by Luminita Cioaba 2020, from the Cornilescu version of the Romanian Bible. Rights are held by the British and Foreign Bible Society and the Interconfessional Bible Society of Romania.