മത്തായി 12
12
ഏസ്സ് ഒയിവു നാള്‌ക്ക് ആണ്ടവാന്
1അയി കാലാത്ത്‌ല് ഒന്റു ഒയിവു നാള് ഏസ്സ് ബെ്ള്ളാമെ കാഡ്‌മേലെ പോനാന്. അദുക്കുള അയാള് സൊല്ലുപഡി നഡാക്ക്‌ന്റവാര് പജിക്ക് അന്ന കദ്‌റ്‌ന നുണ്ടി നെരിക്കി മൊക്ക്യ പ്‌ഡിത്താര്. 2പരിസാര് ഇദ്‌ന കണ്ട്: <<ഇദാ നോഡു, മോസെ ബെത്ത സാമി സട്ടപഡി ഒയിവു നാള് ഗേയ പാങ്കില്ലാത്ത കാര്യ നിന്ന് സൊല്ലുപഡി നഡാക്ക്‌ന്റവാര് ഗേന്റാര്>> എന്റ് ഏസ്സ്‌ക്ക് സൊന്നാര്.
3അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<ദാവീദ്‌ക്ക്‌മ് അയാളൊപ്പ ഇന്തവാര്‌ക്ക്‌മ് പജിപ്‌ഡിക്കാട്ടി ദാവീദ് എന്ത് ഗേന്താനെന്റ് നിമ്മ പഡിത്ത് നോഡാലേഗ? 4ദാവീദ് സാമിബീ്ഡ്‌ക്ക് പോയി അയാള്‌മ് അയാളൊപ്പ ഇന്തവാര്‌മ് സട്ടപഡി പൂസാരിഗാള്‌ക്ക് താനെ തിന്ന്യ മുഡിവ മേല്‌സ ബെത്തിന്ത അഡേന തിന്റാര്. 5അദ്‌താനേമല്ല, ഒയിവു നാള് പൂസാരിഗാള് സാമിബീ്ഡ്‌ല് ബെത്ത് ഒയിവു നാള് സട്ടപഡി ഗേഗാദിന്താല്‌മ് അവാര് കുറ്റഗാറാരല്ല എന്റ് മോസെ ബെത്ത സാമി സട്ടാത്ത്‌ല് പഡിത്ത് നോഡാലേഗ? 6ആന സാമിബീ്ഡ്‌ന ബ്‌ഡ ദൊഡ്ഡവാന് ഇദ്‌ല് ഇര്‌ക്ക്‌ന്റാന് എന്റ് നാന് നിമാക്ക് സൊന്റെ. 7<ബേ്ണ്ട്‌ഗാള്‌ന പലി കൊഡുക്കുവാദ്‌ലല്ല, അഡ്‌ത്തവാര്‌ന ഗവപഡുവാദ്‌ല്‌ത്തെ നാന് പിര്യപഡുവാദ്>#ഓസേയ 6:6 എന്റ് സാമി സൊല്ലുസുലാക്കാത്ത്‌ല് സൊല്ലിര്‌ക്കുവാദ്‌ക്കുള്ള അര്‌ത്ത എന്തെന്റ് തെരിന്തിന്തദാന കുറ്റ ഇല്ലത്തവാര്‌ന നിമ്മ കുറ്റഗാറാര് എന്റ് സൊല്ലിര്‌ക്കമാട്ട്‌റ്. 8എന്ത്‌ക്കെന്റ് സൊന്ന ഒയിവു നാള്‌ന ആള്‌ന്റവാന്‌മ് മന്‌സാനായി പ്‌റാന്തവാന്‌ത്തെ.>>
ഒരുത്താന്‌ത്ത് സപ്പെബ്‌ന്ത കയിന ഏസ്സ് തെ്ള്‌സ്‌ന്റാന്
9ഏസ്സ് അദ്‌ലിന്ത് എഗുദാര് പരേസുവ ബീ്ഡ്‌ക്ക് പോനാന്. 10അയി പരേസുവ ബീ്ഡ്‌ല് കയി സപ്പെബ്‌ന്തിന്ത ഒന്റൊരുത്താന് ഇന്തിന്താന്. അദുക്കുള അദ്‌ലിന്ത ലേസ ആള്‌ഗാള് ഏസ്സ്‌ന കുറ്റഗാറാന് മാഡ്യ ഒന്റു കുറ്റ കാണ്യ ബേ്ണ്ടി: <<നമ്മ് സട്ടപഡി ഒയിവു നാള് നോയിഗാറാര്‌ന തെ്ള്‌സുവാദ് സെര്യ?>> എന്റ് ഏസ്സ്‌ന കേ്ട്ടാര്.
11അദുക്കുള ഏസ്സ് അവാര്‌ക്ക്: <<നിമ്മ് കൂട്ടാത്ത്‌ല് ഒന്റാള്‌ക്ക് ഒന്റു കൊറ്യാഡ് ഇര്‌ക്ക്‌ന്റ് എന്റ് നെനേന്. അയി കൊറ്യാഡ് ഒയിവു നാള് കുയിക്ക് ബ്‌ന്തദാന അയാള് അയി കൊറ്യാഡ്‌ന കുയിലിന്ത് ഏ്റ്‌സമാട്ടാന? 12ആന മന്‌സാന് കൊറ്യാഡ്‌ഗാള്‌ന ബ്‌ഡ എത്ത്‌റാഗോ ബെലെ ഉള്ളവാന്. അദ്‌നാലെ നമ്മ് സട്ടപഡി ഒയിവു നാള് നല്ലാദ് ഗേവാദ് സെരിത്തെ>> എന്റ് സൊന്നാന്.
13പ്‌റ ഏസ്സ് അയി നോയിഗാറാന്‌ക്ക്: <<നിന്ന് കയിന നീ്ട്ട്>> എന്റ് സൊന്നാന്. അയാള് കയിന നീ്ട്ട്‌നാന്. അദുക്കുള അയി കയി ഇന്ന്യൊന്റു കയിന പാസെ സൊക്കാനാറ്റ്. 14ആന പരിസാര് ബെ്ളിഗെ പോയി ഏസ്സ്‌ന എത്തെ കൊല്ലുഡൊ എന്നുവാദ്‌ന പറ്റി സട്ട കെ്ട്ട്‌നാര്.
ഏസ്സ്‌ത്തെ സാമി തെരിന്തെ്ഡ്‌ത്ത ഗിലാസഗാറാന്
15അവാര് ഇത്തെ സട്ട കെ്ട്ട്‌നാദ്‌ന ഏസ്സ്‌ക്ക് തെരിഗാട്ടി അയാള് അദ്‌ലിന്ത് പോനാന്. അദുക്കുള എഞ്ചോ ആള്‌ഗാള് ഏസ്സ് പിന്ന്‌മേലെ പോനാര്. അവാര് കൂട്ടാത്ത്‌ല് നോയായിന്തവാര്‌ന ഒട്ടുക്കു അയാള് തെ്ള്‌സ്‌നാന്. 16ആന താന് ആര് എന്നുവാദ്‌ന പറ്റി ആള്‌ഗാള്‌ക്കൊട്ടുക്കു സൊല്ലി പരാത്ത ബേ്ഡ എന്റ് ഏസ്സ് അവാര്‌ക്ക് കല്‌പനെ കൊഡുത്താന്. 17അത്തെ ഏസ്സയ്യ സാമിദാസ്‌ന ബെത്ത് സാമി സൊന്ന കാര്യഗാള് അദേപാസെ നഡാന്ത്‌ദ്. ഏസ്സയ്യാവുന ബെത്ത് സാമി സൊന്നാദ് ഇത്തേത്തെ:
18<<ഇദാ, നാന് തെരിന്തെ്ഡ്‌ത്ത എന്ന് ഗിലാസഗാറാന്,
അയാള് എന്ന് മനേസ്സ്‌ന പിര്യപഡ്‌സ്‌നവാന്‌മ് എനാക്ക് മെച്ച്‌പ്‌ഡിത്തവാന്‌മ്‌ത്തെ.
നാന് എന്ന് നിഗാല്‌ന അയാള്‌ല് ഇര്‌ക്ക്യ സൊല്ലി ബ്‌ഡ്‌വെ.
നാന് നായ ബിദിക്കുവാദ്‌ന പറ്റി അയാള് ജാദിഗാള്‌ക്ക് സൊല്ലുവാന്.
19അയാള് തറ്‌ക്ക്യാഗൊ, അഗാറ്യഗൊ നില്ലമാട്ടാന്.
തെരുവുക്ക്‌റാഗ ആര്‌മ് അയാള് ജദ്ദന കേ്ള്‌ക്കമാട്ടാര്.
20അയാള് സദേന്ത ഓഡെന മുറുത്തു തള്ളമാട്ടാന്,
കത്തി തീന്ത് പൊഗേന്ത് കൊണ്ടു ഇര്‌ക്കുവ തിരിന കെ്ഡ്‌സാമ്‌മാട്ടാന്,
നീദ്യുള്ള കാര്യ ഗേന്ത് ഗെല്‌സ മാട്ട്‌ക്ക് അയാള് ഇത്തെ ഗേന്ത് കൊണ്ട്‌റ്‌ക്കുവാന്.
21അദ്‌നാലെ ജാദിഗാള്‌മ് അയാള് പേര്‌ല് നെഞ്ചഡെ ബെക്കുവാര്.>>#ഏസ്സയ്യാവു 42:1–4
ഏസ്സ്‌മ് ബേല്‌സെവൂലുമു
22അദ്‌ക്ക് പ്‌റ ലേസ ആള്‌ഗാള് കെ്ട്ടജാദി തട്ടി കുറുഡാനായിമ് ഊമേമ്‌ബ്‌ന്തിന്ത ഒന്റൊരുത്താന്‌ന ഏസ്സ് പട്ട്‌ക്ക് എ്ഡ്‌ത്ത് ബന്താര്. ഏസ്സ് അയാള്‌ന തെ്ള്‌സ്‌നാന്. അദുക്കുള അയാള്‌ക്ക് കണ്ണ്‌മ് കാട്ട്‌റ്റ്, നായനൊഡ്യാമ് മുഡിന്ത്‌ദ്. 23ആള്‌കൂട്ട ഒട്ടുക്കു ഇദ്‌ന കണ്ട് അദിസ്യപട്ട്, <<ഇയാള് ദാവീദ് കാല്‌ക്ക് പട്ടവാന്‌ത്തേഗ?>> എന്റ് സൊന്നാര്.
24ഇദ്‌ന കേ്ട്ട് പരിസാര്: <<ഇയാള് കെ്ട്ടജാദിഗാള്‌ക്ക് തലെവാനാന ബേല്‌സെവൂലുന ബെത്ത്‌ത്തെ കെ്ട്ടജാദിഗാള്‌ന തട്ടിസിതള്ളുവാദ്>> എന്റ് സൊന്നാര്.
25അവാര് നെനേക്കുവ നെനേവുന തെരിന്ത് ഏസ്സ് അവാര്‌ക്ക് ഇത്തെ സൊന്നാന്: <<ഒന്റു നാഡ്‌ലവാര് ഒന്റൊന്റു കച്ചിഗാളായി ആങ്കീങ്ക് പോട്ടിക്ക് നിന്റദാന അയി നാഡ് കെ്ട്ട് തള്ള്‌മ്. അദേപാസെ ഒന്റു പട്ടണാത്ത്‌ലവാരൊ ഒന്റു ബീ്ഡ്‌ലവാരൊ ഒന്റൊന്റു കച്ചിഗാളായി ആങ്കീങ്ക് പോട്ടിക്ക് നിന്റദാന അവാര്‌മ് കെ്ട്ട് പോവാര്. 26അദേപാസെത്തെ സെയിത്താന് താനെ സെയിത്താന്‌ന മുഡിക്കി ബ്‌ഡുവദാന അവാര് റാഡാള്‌മ് റാഡായി പ്‌റ്‌ന്താരെന്റ് അര്‌ത്താന്റല്ല. അത്തെ അയാള് ആളുവ നാഡ് ദാസ്‌ത്തി കാല നെലെനില്ലമാട്ട. 27കെ്ട്ടജാദിഗാള് തലെവാന് ബേല്‌സെവൂലുത്തെ എനാക്ക് കെ്ട്ടജാദിഗാള്‌ന തട്ടിസി തള്ളുവാദ്‌ക്കുള്ള സക്‌തി തരുവദാന നിമ്മ് കൂട്ടാത്ത്‌ല ആള്‌ഗാള്‌ക്ക്‌മ് ബേല്‌സെവൂലുത്തെ കെ്ട്ടജാദിന തട്ടിസി തള്ളുവാദ്‌ക്കുള്ള സക്‌തി തരുവാദ് എന്റ് അര്‌ത്ത ബന്റല്ല. അത്തെ നിമ്മ കുറ്റഗാറാരെന്റ് നിമ്മ് കൂട്ടാത്ത്‌ല ആള്‌ഗാള് താനെ കാട്ടി തന്റാര്. 28ആന നാന് സാമിനിഗാല്‌ന ബെത്ത്‌ത്തെ കെ്ട്ടജാദിഗാള്‌ന തട്ടിസി തള്ളുവദാന സാമി ആളുവാദ് നിമ്മ് പട്ട്‌ക്ക് ബന്ത് എജ്ജിര്‌ക്ക്‌ന്റ്.
29മുജുവുഗാറാന്‌ന പ്‌ഡിത്ത് കെ്ട്ടി ബെക്ക്യ മുഡ്യാദെ പോന അയാള് ബീ്ഡ്‌ക്ക് നൊഗേന്ത് അയാള്‌ക്കിര്‌ക്കുവ മുദാല്‌മുമ്പുന എത്തെ പ്‌ഡിങ്കി എ്ഡ്‌ക്ക്യ മുഡിമ്? മുദാല് അയാള്‌ന പ്‌ഡിത്ത് കെ്ട്ടി ബെക്കുഡൊ. എന്റപ്‌റാത്തെ അയാള് മുദാല്‌മുമ്പുന പ്‌ഡിങ്കി എ്ഡ്‌ക്ക്യ മുഡിവു.
30എന്നോഡൊപ്പ ഇര്‌ക്കത്തവാന് എനാക്ക് പോട്ടിഗാറാന്‌ത്തെ. എന്ന് പിന്ന്‌മേലെ നഡാക്ക്‌ന്റവാര്‌ന എന്ന് പട്ട്‌ക്ക് കൂഡുസ്യ കയിതാങ്കാത്തവാന് എന്ന് പിന്ന്‌മേലെ നഡാക്ക്‌ന്റവാര്‌ന ജില്ലമ്പുല്ലാത്ത് മാഡി തള്ള്‌ന്റാന്. 31അദ്‌നാലെ നാന് നിമാക്ക് സൊന്റെ, മന്‌സാന് ഗേവ എല്ലാ പാവാക്ക്‌മ് സൊല്ലുവ എല്ലാ കുറ്റഗാള്‌ക്ക്‌മ് പൊറിമെ കെ്ഡേക്ക്‌മ്. ആന സാമിനിഗാല്‌ന പറ്റി കുറ്റ സൊല്ലുവ പാവാക്ക് പൊറിമെ കെ്ഡേക്കഗേമാട്ട. 32ആരാറ്റ മന്‌സാനായി പ്‌റാന്തവാന്‌ന പറ്റി കുറ്റ സൊന്നദാന അദ്‌ക്ക് പൊറിമെ കെ്ഡേക്ക്‌മ്. ആന സാമിനിഗാല്‌ന പറ്റി കുറ്റ സൊന്നദാന ഈ ഉലഗാത്ത്‌ല്‌മ് ബര്യ പോവ ഉലഗാത്ത്‌ല്‌മ് അവാന്‌ക്ക് പൊറിമെ കെ്ഡേക്കഗേമാട്ട.>>
മരാമ് അയി മര ബ്‌ഡുവ കായിമ്
33<<നല്ല മര ആയിന്തദാന നല്ല കായി ബ്‌ഡ്‌മ്, സായി പ്‌ഡിത്ത മര ആയിന്തദാന കുറുഡു കായി ബ്‌ഡ്‌മ്. കായിന നോഡിത്തെ മര ഏദ് എന്റ് നെപ്പ്‌കെ്ഡേസുവാദ്. 34പാമ്പ്‌ക്ക് പ്‌ള്ളെഗാള് ആയിര്‌ക്ക്‌ന്റവാരെ, നിമ്മാഗേ കെ്ട്ടവാര് ആയിര്‌ക്ക്‌ന്റ്‌റ്. അന്നാപ്പ് നിമാക്ക് എത്തെ നല്ല നായ സൊല്ല്യ മുഡിമ്? നിമ്മ് മനേസ്സ്‌ല് തുമ്പിമഗുവാദ്‌ത്തെ ബായിമ് സൊല്ലുവാദ്. 35നല്ല മന്‌സാന് തന്ന് മനേസ്സ്‌ല് തുമ്പിസി ബെത്ത്‌റ്‌ക്കുവ നല്ല എ്ണ്ണഗാള്‌ലിന്ത് നല്ല കാര്യഗാള് ഗേന്റാന്. കെ്ട്ട മന്‌സാന് തന്ന് മനേസ്സ്‌ല് തുമ്പിസി ബെത്ത്‌റ്‌ക്കുവ കെ്ട്ട എ്ണ്ണഗാള്‌ലിന്ത് കെ്ട്ട കാര്യഗാള്‌ന സൊന്റാന്. 36ആന മന്‌സാന് നെനെക്കദെപ്‌ഡിക്കദെ സൊല്ലുവ നായ ബീസാക്ക് ബിദി സൊല്ലുവ നാള് കണാക്ക് കൊഡുക്കുവാദ്‌ക്കായി ബര്‌മ് എന്റ് നാന് നിമാക്ക് സൊന്റെ. 37നീ സൊല്ലുവ നായഗാള് താനെ നിനാന നേര്‌മെഗാറാന് മാഡ്‌മ്, നീ സൊല്ലുവ നായഗാള് താനെ നിനാന കുറ്റഗാറാന്‌മ് മാഡ്‌മ്.>>
എഗുദാര് അഡ്യാള കേ്ള്‌ക്ക്‌ന്റാര്
38അദുക്കുള ബേദബാത്ത്യനാമ്‌ഗാള്‌ല്‌മ് പരിസാര്‌ഗാള്‌ല്‌മ് ലേസ ആള്‌ഗാള് ഏസ്സ്‌ക്ക്: <<ഗുരുവെ, നീ ഒന്റു അഡ്യാള ഗേവാദ്‌ന കാണ്യ എമ്മ ആസെപഡ്‌ന്റേമ്>> എന്റ് സൊന്നാര്.
39അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<കേ്ഡ്‌ഗെ്ട്ടവാര്‌മ് സാമി സൊല്ലുപഡി നഡാക്കാത്തവാര്‌മ് ആയിര്‌ക്കുവ ഇന്നാല്‌ല തലെകെ്ട്ട്‌ലവാര് അഡ്യാള പരാക്ക്‌ന്റാര്. ഓന സാമിദാസ്‌ക്ക് നഡാന്ത അദിസ്യാത്തെ അവാര്‌ക്ക് അഡ്യാള ആയി ഇര്‌ക്ക്‌മ്. അല്ലാദെ ബേ്റെ അഡ്യാള നിമാക്ക് കെ്ഡേക്കമാട്ട. 40ഓന സാമിദാസ് ദൊഡ്ഡ മീന് ബേ്റ്കുളാക്ക് റാവുപഗാല് മൂറു നാള് ഇന്ത പാസെ മന്‌സാനായി പ്‌റാന്തവാന്‌മ് റാവുപഗാല് മൂറു നാള് മണ്ണ്‌കുളാക്ക് ഇര്‌ക്കുവാന്. 41എഞ്ചോ ബര്‌സ്സാക്ക് മുന്നുക്കു നിനവെ നാഡ്‌ലവാര് ഓന സൊന്ന നായന കേ്ട്ട് സാമിസാരി തിര്‌ഗ്‌നാര്. ഓനന ബ്‌ഡ ദൊഡ്ഡവാന് ഇദ്‌ലിര്‌ന്റാന് എന്റ് നാന് നിമാക്ക് സൊന്റെ. ആന ഇന്നാല്‌ലവാര് അയാള് സൊല്ലുവ നായന കേ്ള്‌ക്കുവാദില്ലെ. അദ്‌നാലെ സാമി നായ ബിദിക്കുവ നാള്‌ല് ഇന്നാല്‌ല ആള്‌ഗാളോഡൊപ്പ നിനവെ നാഡ്‌ലവാര് ഇ്ളാഗി നിന്റ് അവാര്‌ന കുറ്റഗാറാര് എന്റ് ബിദിക്കുവാര്. 42എഞ്ചോ ബര്‌സ്സാക്ക് മുന്നുക്കു തെക്കെത്തെ നാഡ്‌ല റാണി സലോമോനുക്കു ഇര്‌ക്കുവ ബുദ്ദിനായന കേ്ള്‌ക്ക്യ എത്ത്‌റാഗോ ദൂരാത്ത്‌ലിന്ത് ബന്താള്. സലോമോനുന ബ്‌ഡ ദൊഡ്ഡവാന് ഇദ്‌ലിര്‌ന്റാന് എന്റ് നാന് നിമാക്ക് സൊന്റെ. ആന ഇന്നാല്‌ലവാര് അയാള് സൊല്ലുവ നായന കേ്ള്‌ക്കുവാദില്ലെ. അദ്‌നാലെ സാമി നായ ബിദിക്കുവ നാള് ഇന്നാല്‌ല ആള്‌ഗാളോഡൊപ്പ അവാള്‌മ് ഇ്ളാഗി നിന്റ് അവാര്‌ന കുറ്റഗാറാരെന്റ് ബിദിക്കുവാള്.>>
കെ്ട്ടജാദി തിരിഗി ബരുവാദ്
43<<ഒന്റു മന്‌സാന്‌ലിന്ത് കെ്ട്ടജാദി ബ്‌ട്ട് പോയി എ്ളേക്ക്യ എ്ഡെ പരാന്ത് നീരില്ലാത്ത എ്ഡെഗാള്‌മേലെ പോന്റു. ആന ഒന്റെ്ഡേമ് കെ്ഡേക്കുവാദില്ലെ. 44അദുക്കുള അയി കെ്ട്ടജാദി: <നാന് ബ്‌ട്ട് ബന്ത എ്ഡേക്ക് താനെ തിരിഗി പോവെ> എന്റ് സൊല്ലുന്റു. അത്തെ അയി കെ്ട്ടജാദി താനിന്ത മന്‌സാന്‌കുളാക്ക് താനെ തിരിഗി ബര്‌ഗാട്ടി ഒഡുക്കിപഡിക്കി സാമനഗാള്‌ന ഒദുക്കി ബെ്റിക്കി ബെത്ത്‌റ്‌ക്കുവ ഒന്റു ബീ്ഡ്‌ന പാസെ അയാള് ഇര്‌ക്കുവാദ്‌ന കാണ്‌ന്റ്. 45അദുക്കുള അയി കെ്ട്ടജാദി പോയി തനാന ബ്‌ഡ കെ്ട്ടാദ് ഗേവ ബേ്റെ ഏ്ള് കെ്ട്ടജാദിഗാള്‌ന ഗുഡി കൂട്ടി ബന്ത് അവാര് ഒന്റായി അയാള്‌ല് തങ്ക്‌ന്റാര്. അത്തെ അയാള് കഡേസില പെ്ളേപ്പ് മുന്നുക്കുല പെ്ളേപ്പ്‌ന ബ്‌ഡ ഒന്റേപെ്ട്ട് മോസായി തള്ള്‌ന്റ്. ഈ കേ്ഡ്‌ഗെ്ട്ട തലെകെ്ട്ട്‌ക്ക്‌മ് അത്ത്യാമ്.>>
ഏസ്സ് അവ്വേസിമ് അയാള് പ്‌റാന്തപ്‌റാപ്പ്‌ഗാള്‌മ്
46ഏസ്സ് അവാരോഡ നായനൊഡിന്ത് കൊണ്ടു ഇര്‌ക്കാട്ടി ഏസ്സ് അവ്വേസിമ് തമ്പ്യാമ്‌മ് ഏസ്സോഡ നായനൊഡ്യ ആസെപട്ട് ബെ്ളിഗെ നിന്റിന്താര്. 47അദ്‌ലിന്ത ആള്‌ഗാള്‌ല് ഒരുത്താന്: <<നിന്ന് അവ്വേമ് തമ്പ്യാമ്‌മ് നിന്നോഡ നായനൊഡ്യ ആസെപട്ട് ബെ്ളിഗെ നിന്റ്‌റ്‌ന്റാര്>> എന്റ് സൊന്നാന്.#12:47 മുദാല് എ്ള്‌ദ്‌നാദ്‌ന നോഡി എ്ള്‌ദ്‌ന പാദി കായിദാത്ത്‌ല് നാപ്പത്തി ഏ്ളാവാദ് സുലാക്ക ഇല്ലെ.
48അത്തെ സൊന്നവാന്‌ക്ക് ഏസ്സ്: <<എന്ന് അവ്വെ ആര്? എന്ന് തമ്പ്യാമ് ആര്?>> എന്റ് കേ്ട്ടാന്. 49പ്‌റ അയാള് തന്ന് സൊല്ലുപഡി നഡാക്ക്‌ന്റവാര്‌ക്ക് നേരെ കയിന നീ്ട്ടി: <<ഇദാ നോഡുനു, ഇവാര്‌ഗാള്‌ത്തെ എന്ന് അവ്വേമ് തമ്പ്യാമ്‌മ്, 50മേലോഗാത്ത്‌ല് ഇര്‌ക്കുവ എന്ന് അപ്പാന് ആസെപഡുവ പാസെ ഗേന്റവാര്‌ത്തെ എന്ന് തമ്പിമ്, തങ്കേമ്, അവ്വേമ്>> എന്റ് സൊന്നാന്.
လက်ရှိရွေးချယ်ထားမှု
മത്തായി 12: സാമി സേദി
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Life Computer Institute