മത്തായി 14
14
മുളുഗുസുവ ഓഗന്നാന്‌ന കൊല്ലുന്റാര്
1അയി ഗളിഗേല് ഗലീല നാഡ് തലെവാനായിന്ത എരോദ ഏസ്സ്‌ന പറ്റി സൊല്ലുവ സേദിന കേ്ട്ട്: 2<<അയാള് മുളുഗുസുവ ഓഗന്നാന്‌ത്തെ. അയാള് സത്തവാര് പട്ട്‌ലിന്ത് ഉജുര്‌ളാഗിര്‌ക്ക്‌ന്റാന്. അദ്‌നാലെത്തെ അയാള്‌ക്ക് ഈ അദിസ്യഗാള് ഗേവാദ്‌ക്കുള്ള സക്‌തിഗാള് ഇര്‌ക്കുവാദ്>> എന്റ് തന്ന് ഗിലാസഗാറാര്‌ക്ക് സൊന്നാന്.
3-4ഈ എരോദ രാജാവു തന്ന് അണ്ണാന് പീലിപോസു പെ്ണ്ട് ഏരോദ്യന തന്ന് പെ്ണ്ടച്ച്യായി എ്ഡ്‌ത്തിന്താദ്‌നാലെ <<അവാള് നിനാക്ക് പെ്ണ്ടച്ച്യായിര്‌ക്കുവാദ് സട്ടപഡി തപ്പ്>> എന്റ് ഈ ഓഗന്നാന് എരോദാവുക്കു സൊല്ലിന്താന്. അദ്‌നാലെ ഓഗന്നാന്‌ന പ്‌ഡിത്ത് കെ്ട്ടി ജെയില്‌ക്ക് ഇക്കി ബെത്തിന്താര്. 5ഓഗന്നാന്‌ന കൊല്ലുഡൊ എന്റ് മനേസ്സിന്ത് ഗുഡി ആള്‌ഗാള് അയാള്‌ന സാമിദാസ് എന്റ് സൊല്ലുവാദ്‌നാലെ എരോദാവു ആള്‌ഗാള്‌ക്ക് അഞ്ച്‌നാന്.
6ആന എരോദാവു പ്‌റാന്തനാള് ആഗാട്ടി ഏരോദ്യ മഗാള് ആള്‌കൂട്ട മുന്നുക്കു ആട്ടാഡി എരോദാവുന പിര്യപഡ്‌സ്‌നാള്. 7അദ്‌നാലെ നീ എന്ത്‌ന കേ്ട്ടാല്‌മ് തരുവെ എന്റ് അയാള് അവാള്‌ക്ക് സത്ത്യഗേന്ത് കൊഡുത്താന്. 8അവാള് അവ്വേസി സൊന്ന പാസെ: <<ഓഗന്നാന് തലേന ഒന്റു തട്ട്‌ക്കിക്കി തരുഡൊ>> എന്റ് അവാള് സൊന്നാള്. 9അദുക്കുള എരോദാവു ദുക്കപട്ടാന്. എന്റാല്‌മ് ബിര്‌ന്ത്‌ക്ക് ബന്തവാര് മുന്നുക്കു ബെത്ത് ഗേന്ത സത്ത്യന നെനേത്ത് ഓഗന്നാന് തലേന കൊഡുക്ക്യ സൊന്നാന്. 10അത്തെ ആള് ബ്‌ട്ട് ജെയില്‌ല് ബെത്ത് ഓഗന്നാന് തലേന ബെ്ട്ടി എ്ഡ്‌ത്താര്. 11അവാര് അയാള് തലേന ഒന്റു തട്ട്‌ക്കിക്കി എ്ഡ്‌ത്ത് ബന്ത് അയി പ്‌ള്ളേക്ക് കൊഡുത്താര്. അയി പ്‌ള്ളെ എ്ഡ്‌ത്ത് പോയി അവ്വേസിക്ക് കൊഡുത്താള്. 12ഓഗന്നാന് സൊല്ലുപഡി നഡാക്ക്‌ന്റവാര് സാവുന എ്ഡ്‌ത്ത് പോയി പാത്ത്‌നാര്. പ്‌റ ബന്ത് ഏസ്സ്‌ക്ക് സൊന്നാര്.
അഞ്ചായിര ഗണ്ടാള്‌ഗാള്‌ക്ക് തീനി കൊഡുക്കുന്റാന്
13അയി സേദിന കേ്ട്ട് ഏസ്സ് അദ്‌ലിന്ത് പോയി ഒന്റു തോണിക്ക് ഏ്റി താന്‌താനെ ഒന്റു ആളില്ലാത്ത എ്ഡേക്ക് പോനാന്. ആള്‌ഗാള് അദ്‌ന കേ്ട്ട് പട്ടണഗാള്‌ലിന്ത് നഡാന്ത് കൊണ്ടേ അയാള് പിന്ന്‌മേലെ പോനാര്. 14ഏസ്സ് ബന്ത് ദൊഡ്ഡ ഒന്റു കൂട്ട ആള്‌ഗാള്‌ന കണ്ട് ബേ്റ്‌വെന്ത് അവാര് കൂട്ടാത്ത്‌ലിന്ത നോയിഗാറാര്‌ന തെ്ള്‌സ്‌നാന്.
15മജാക്കെ ആഗാട്ടി സൊല്ലുപഡി നഡാക്ക്‌ന്റവാര് ഏസ്സ് പട്ട്‌ക്ക് ബന്ത്: <<ഇദ് ഒന്റു ആളില്ലാത്ത എ്ഡെ. നേരാമ് ആറ്റ്, ഊരുഗാള്‌ക്ക് പോയി തിന്നുവാദ്‌ക്കുള്ള സാമനഗാള് ബാങ്ക്യ ആള്‌ഗാള്‌ന സൊല്ലി ബ്‌ഡ്‌ഡൊ>> എന്റ് സൊന്നാര്.
16അദുക്കുള ഏസ്സ് അവാര്‌ക്ക്: <<അവാര്‌ന സൊല്ലി ബ്‌ഡുവ തേവില്ലെ. നിമ്മ താനെ അവാര്‌ക്ക് തിന്ന്യ കൊഡുനു>> എന്റ് സൊന്നാന്.
17അദുക്കുള അവാര് അയാള്‌ക്ക്: <<അയിദ് അഡേമ് റാഡ് മീന്‌മ് അല്ലാദെ എമാക്ക് ഇദ്‌ല് ഒന്റുമില്ലെ>> എന്റ് സൊന്നാര്.
18<<അദ്‌ന ഈങ്ക് എ്ഡ്‌ത്ത് ബാന്>> എന്റ് ഏസ്സ് അവാര്‌ക്ക് സൊന്നാന്. 19പ്‌റ ആള്‌ഗാള്‌ന പുല്ലുകുദാക്ക് കുക്കാക്ക്യ സൊന്നാന്. ഏസ്സ് അയി അയിദ് അഡെനാമ് റാഡ് മീന്‌നാമ് എ്ഡ്‌ത്ത് മേലോഗന നോഡി സാമിക്ക് നണ്ണി സൊല്ലി അഡേന മുറുത്താന്. പ്‌റ തന്ന് സൊല്ലുപഡി നഡാക്ക്‌ന്റവാര്‌ക്ക് കൊഡുത്താന്. അവാര് ആള്‌ഗാള്‌ക്ക് കൊഡുത്താര്. 20ആള്‌ഗാള് ഒട്ടുക്കു ബേ്റ്‌തുമ്പ തിന്റാര്. മിച്ച ബന്ത അഡെ നുറുക്കുന സൊല്ലുപഡി നഡാക്ക്‌ന്റവാര് പന്നന്റ് ബട്ടി തുമ്പിസി എ്ഡ്‌ത്താര്. 21തിന്റവാര് പെ്ണ്ണ്‌മക്കാള്‌നാമ് മക്കാള്‌ഗാള്‌നാമ് സേത്താദെ താനെ ഒപ്പതപ്പ അഞ്ചായിര ഗണ്ടാള്‌ഗാള് ഇന്താര്.
ഏസ്സ് കഡാല് കുദ്ദാക്ക് നഡാക്ക്‌ന്റാന്
22അന്നാല് താനെ ഏസ്സ് ആള്‌ഗാള്‌ന സൊല്ലി ബ്‌ട്ടാന്. അയി കൂട്ടാത്ത്‌ല് തന്ന് സൊല്ലുപഡി നഡാക്ക്‌ന്റവാര്‌ന: <<തോണിക്ക് ഏ്റി തനാക്ക് മുദാല് അക്കരെ പോനു>> എന്റ് നത്ത്‌നാന്. 23അവാര്‌ന സൊല്ലി ബ്‌ട്ട പ്‌റ ഏസ്സ് പരേസ്യ തനിഗെ മലേക്ക് ഏ്റി പോനാന്. മജാക്കെ ആഗാട്ടി ഒന്റേ ഒരുത്താന് താനെ അദ്‌ല് ഇന്താന്. 24അദുക്കുളെല്ല തോണി ഏ്ട്ടിലിന്ത് ദൂര പോയിന്ത്‌ദ്. കാറ്റ് തോണിക്ക് നേരെ അഡിക്കുവാദ്‌നാലെ കഡാല് തെരെ അഡിത്ത് തോണി ആങ്കീങ്ക് ആഡി കൊണ്ടിന്ത്‌ദ്.
25കോയിജാമ ആഗാട്ട്യെല്ല ഏസ്സ് കഡാല് കുദ്ദാക്ക് നഡാന്ത് അവാര് പട്ട്‌ക്ക് ബന്താന്. 26ഏസ്സ് കഡാല് കുദ്ദാക്ക് നഡാക്കുവാദ്‌ന കണ്ട് അവാര് അഞ്ച്‌നാര്. <<അദ് ഒന്റു പിജാദ്‌ത്തെ>> എന്റ് സൊല്ലി അഞ്ചിക്കെപട്ട് അവാര് അഗാറ്‌നാര്.
27അന്നാല് താനെ ഏസ്സ് അവാര്‌ക്ക്: <<ദയിരപഡ്‌ന്, ഇദ് നാന്‌ത്തെ, അഞ്ചദേന്>> എന്റ് സൊന്നാന്.
28അദുക്കുള പത്ത്‌റോസു: <<ആണ്ടവാനെ, നീയായിന്തദാന നാന് നീര് കുദ്ദാക്ക് നഡാന്ത് നിന്ന് പട്ട്‌ക്ക് ബര്യ സൊല്ലുഡോമെ>> എന്റ് സൊന്നാന്.
29<<ബാ>> എന്റ് ഏസ്സ് സൊന്നാന്.
അദുക്കുള പത്ത്‌റോസു തോണിലിന്ത് ഇ്റാഗി ഏസ്സ് പട്ട്‌ക്ക് പോയ നീര് കുദ്ദാക്ക് നഡാന്താന്. 30ആന അയാള് കാറ്റ്‌ന കണ്ട് അഞ്ചിക്കെ പ്‌ഡിത്ത് നീര്‌കുളാക്ക് മുളിഗി പോയി കൊണ്ടിന്താദ്‌നാലെ: <<ആണ്ടവാനെ എനാന കാപാറ്റുഡോമെ>> എന്റ് അഗാറ്‌നാന്.
31അദുക്കുള ഏസ്സ് അന്നാല് താനെ കയി നീ്ട്ടി പത്ത്‌റോസുന പ്‌ഡിത്ത്: <<അരെഗൊറ്യ നമ്പ്‌ന്റവാനെ, നീ എന്ത്‌ക്ക് സന്തേഗ പട്ടാദ്?>> എന്റ് സൊന്നാന്.
32അവാര് തോണിക്ക് ഏ്റ്‌നാര്. അദുക്കുള കാറ്റ് അഡാങ്ക്‌റ്റ്. 33അദുക്കുള തോണിലിന്തവാര്: <<നീ നേര്‌മായിമ് സാമിമഗാന്‌ത്തെ>> എന്റ് സൊല്ലി ഏസ്സ്‌ക്ക് സഡങ്ക ബ്‌ന്ത് കുമ്മുഡുനാര്.
ഏസ്സ് ഗന്നേസര നാഡ്‌ക്ക് പോന്റാന്
34അവാര് കഡാല് കഡാന്ത് ഗന്നേസര നാഡ്‌ക്ക് എജ്ജ്‌നാര്. 35ഏസ്സ്‌ത്തെ ബന്ത്‌റ്‌ക്കുവാദ് എന്റ് അദ്‌ല് ഇര്‌ക്കുവ ആള്‌ഗാള്‌ക്ക് തെരിന്ത് അര്‌ഗെ ഇര്‌ക്കുവ ഊരുക്ക്‌റാഗെല്ല ആള് ബ്‌ട്ട് നോയിഗാറാര്‌ന ഒട്ടുക്കു ഏസ്സ് പട്ട്‌ക്ക് എ്ഡ്‌ത്ത് ബന്താര്. 36അവാര്: <<നിന്ന് സീലെ താനെന എന്റാല് അണ്ണ്യ നോയിഗാറാര്‌ന ബ്‌ഡ്‌ഡോമെ>> എന്റ് ഏസ്സ്‌ന ബേ്ണ്ട്‌നാര്. അത്തെ അണ്ണ്‌നവാര് ഒട്ടുക്കു തെ്ളിന്താര്.
လက်ရှိရွေးချယ်ထားမှု
മത്തായി 14: സാമി സേദി
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Life Computer Institute