Lucas 15
15
Jịꞌĉocdyes p̂eyacdyeꞌ moñis oveca
(Mat 18:10-14)
1Yirisĉan mạyedyeꞌ daiꞌ atsij muꞌin in tsimꞌtety querec̣ha in judyeyaꞌ yoctyiꞌ juchajtumtyiꞌ muntyiꞌ in, mạꞌjeꞌ seꞌvepte in Jesússiꞌ p̂eyacdyeꞌ muꞌ. 2Mọꞌ muꞌin jịꞌfajqueꞌ in fariseo in judyeyaꞌ muꞌin jịꞌchiyacsity yụꞌtacdyeꞌ in, yi in:
—Uts Jesús tiĉunacsi muꞌin juchajtumtyiꞌ muntyiꞌ in, chat qui säcsi muꞌintum in —yi in.
3Mọꞌdyes muꞌ Jesús jéyacsi jịꞌĉocdyes p̂eyacdyeꞌ, yi muꞌ jéyacsi:
4—Meꞌchutiñeꞌ oveca cien jụijyaꞌ miꞌin, yiris na moñiꞌ jụijyaꞌ, ¿jam buty otejyi miꞌin? ¿Jam adac meꞌ miꞌin farajjeyacsetaqui chum tajñiꞌĉan miꞌin mọꞌin arajtac quiꞌtac arajtac jiyis in? Cavintum quevjajtiñeꞌ mọꞌ moñis oveca miꞌin junꞌ quiꞌ chuc dạĉajtiñeꞌ. 5-6Aty dạĉajtiñeꞌ jụijyaꞌ baquits tubajtiñeꞌ bijbicheꞌ miꞌin, maꞌjodyeꞌtum acaꞌyaꞌ jijijtuyebajtiñeꞌ miꞌin, judyeyaꞌ jiꞌvorvacsi penꞌdyeꞌ miꞌin judyeyaꞌ c̣hẹiꞌyaꞌ bäꞌyity in, jéyacsi miꞌin: "Maꞌjotyebajshaꞌ ĉaĉaij na aty dạĉanꞌ yụ ọij moñis oveca jiquej", meꞌ yi miꞌin. 7Meꞌdye chimeꞌ, muꞌin mạyedyeꞌchety in mujuꞌchaꞌ maꞌjotyete in yirity juchajtumtyiꞌ muntyiꞌ dyijyity juchajcheꞌ jụijyaꞌ chat camanꞌ dyijyebantyiꞌ Jenꞌdyes, uyaꞌyaꞌ maꞌjotacsi in muꞌin rụijtyity ĉútity in, meꞌ tsanꞌ arajtac quiꞌtac arajtac jiyity in, jam jemoñety dyijyity juchajcheꞌ ĉúti in.
Jịꞌĉocdyes p̂eyacdyeꞌ moñity ficha
8Yiris p̂en, muꞌyaꞌ yiriꞌtac ficha mọꞌ, montaquiꞌ na jụijyaꞌ yirity ficha anic cajotyitiꞌ mọꞌ. Cavin jiꞌjäꞌnaquiꞌ mạijyity mọꞌ, jäjämꞌtum coyaquiꞌ acaꞌ mọꞌ, quevaĉanꞌ ficha ĉụiꞌdye dạcaĉan. 9Aty dạcaĉanꞌyaꞌ chat qui jiꞌvorvaquiꞌ penꞌdyeꞌ mọꞌ judyeyaꞌ c̣hẹiꞌyaꞌ bäꞌyity in jéyacsiꞌ: "Maꞌjotyibudyiĉamꞌ ĉaĉaij nash aty dạcaĉanꞌ yụ uts ficha moñity jiquej yụ", jéyacsiꞌ. 10Yụ jéyac meꞌdye chimeꞌ muꞌin Jenꞌtyiꞌ anjer in maꞌjotyete in yirity juchajtumtyiꞌ muntyiꞌ meꞌ dyijyity juchajcheꞌ jụijyaꞌ —jéyacsi Jesús.
Jịꞌĉocdyes p̂eyacdyeꞌ monaquety muntyiꞌ
11Chimeꞌdye yi Jesús jéyacsi:
—Muꞌyaꞌ jiquej yirity muntyiꞌ päräꞌ ạvaꞌ muꞌ. 12Jäquity ạvaꞌ muꞌ cọdyetaqui jenꞌ muꞌ jéyaqui: "Táta, q̂uinꞌdye jäꞌmiij soꞌmitiꞌ räj ọij jedyeꞌ jiꞌchetacdyeꞌ, mọꞌ soꞌmitis raꞌ tsanꞌ mi säñiyaꞌ mi." Jụjyi muꞌ jenꞌ muꞌin soꞌmacsi ạvaꞌ muꞌ jiꞌchetacdyes jedyeꞌ muꞌ.
13Nojnoĉanyaꞌ muꞌ jäquity ạvaꞌ muꞌ jiꞌmincaqui räj jiꞌchetacdyeꞌ jedyeꞌ muꞌ, moch qui jịjcaij, cạqui räj querec̣hamꞌ, yocsiꞌĉan bäꞌyedyeꞌ jịjcaij. Anic ac̣hiꞌ bäꞌyi muꞌĉan, ĉụiꞌ räjjeyaqui querec̣ha shapudyeꞌyaꞌ muꞌ, 14aty räj c̣hiconꞌjeyaqui aty mijam méquiꞌ jiꞌshucdyiyamꞌ. Chat qui ayij dáquis mọꞌĉan jac, jayej säcsedyeꞌ mọꞌĉan, chimeꞌdye muꞌ chiqueꞌ dáquis muꞌĉan. 15P̂eyete muꞌĉantyiꞌ muntyiꞌ, muꞌyaꞌ qui carijtaqui. Muꞌ jayuꞌtyiyiti carijtacdyeꞌ ĉọjcapte cochij muꞌ. 16Muꞌĉan dáquis jịꞌĉojtyeꞌ muꞌ, mạꞌjeꞌ tsanꞌ jebacsebi cochis säcsedyeꞌ mọꞌin, jam tyi soꞌmete säcsedyeꞌ in, där ñịbeꞌ cạveꞌ muꞌĉan.
17Chijämꞌ dyijyeban camanꞌ muꞌ, jämꞌ dyijyedyeꞌtum yuꞌbun, yi ĉojtyiꞌĉan muꞌ: "Tátasyaꞌ acaꞌ yụ mijam jụꞌñisĉan mạyedyeꞌ jayej säcsedyeꞌ, daiꞌ jiꞌshuc mọꞌyaꞌ, chimeꞌdye carijtaquitydyes muꞌin, jam jayej muꞌin. Yụ na úyaꞌ därsiꞌ dáquis jịꞌĉojtyeꞌ yụ. Jambiꞌdyemꞌ säñi yụ, 18damꞌdye jämꞌ caꞌñibun tátasyaꞌ acaꞌ yụ, jéyaĉan raꞌ táta yụ: Táta, anic där juchatute Jenꞌ yụ, judyeyaꞌ mi chimeꞌ juchatuye. 19Q̂uinꞌ aty jam tupuj ạvaꞌ jítim, úñity yaꞌitactyiꞌ qui ramꞌ q̂uinꞌ yuꞌtim, jéyaĉan raꞌ táta yụ." 20Meꞌdye sacbun jenꞌsiꞌyaꞌ acaꞌ jịjcaban.
Mochdyemꞌ tyibun tacaꞌ jajiꞌĉujtuyibun jenꞌ muꞌ, anic ñịbeꞌ jaĉuti. Shuj tyeij jiꞌrébaĉan ạvaꞌ muꞌ c̣hobenꞌ tŝọ́taĉan, pụꞌsaĉan ạvaꞌ muꞌ. 21Yi ạvaꞌ muꞌ jéyaĉan táta muꞌ: "Táta, anic där juchatute Jenꞌ yụ, judyeyaꞌ mi chimeꞌ, q̂uinꞌ aty jam tupuj ạvaꞌ jítim", jéyaqui jenꞌ muꞌ. 22Muꞌ na jenꞌ muꞌ yi jéyacsi úñity muꞌ: "Cavinyejamꞌ, tuyemac jämꞌtyiꞌ quịꞌsiꞌ judyeyaꞌ sontica, judyeyaꞌ yujchedyes muꞌ, jịꞌquibajmac uts ạvaꞌ yụ. 23Chimeꞌdye tuvac cuꞌdyeꞌ chäiꞌsiꞌ, bijojamꞌ paj qui säcsejaꞌ maꞌjobajshaꞌ utsdyes ạvadyes yụ, 24ĉaĉaij na uts ạvaꞌ yụ moñity jiquej aty caꞌñibun tsunyaꞌ quivij, jeñety caꞌ säñi ĉọ́ja, muꞌyaꞌ na jiquej tacaꞌ tsạꞌ", jéyacsi jenꞌ muꞌ. Meꞌdye tiyacchuiꞌ feshtaij in, maꞌjotaĉan ạvaꞌ muꞌ muntyiꞌ.
25Muꞌ na tashchety ạvaꞌ muꞌ itŝij muꞌ, quịjodyeꞌĉan muꞌ. Aty atsijbanyaꞌ quịjodyeꞌĉantyiꞌ acaꞌyaꞌ jijtuban, aty c̣hẹiꞌyaꞌ seꞌvacsebi jimacdyeꞌ muꞌin judyeyaꞌ roꞌyacdyeꞌ muꞌin. 26Muꞌ quịjodyeꞌĉantyiꞌ atsij fayete yirity úñity, jéte: "¿Junꞌtaqui caꞌ muꞌin in?" 27Vorjete muꞌ úñity: "Atyuꞌ u caꞌñibun vojity mi, muꞌ qui jenꞌ mi jutacsi paj qui ijaiꞌ in cuꞌdyeꞌ chäiꞌsiꞌ, ĉaĉaij na jämꞌ atsijban, jam jedyeij muꞌ", jéte muꞌ. 28Muꞌ tashchety vojity muꞌ aty seꞌveꞌ mọꞌ p̂eyacdyeꞌ, fạ́coij tyeij muꞌ, jam mạꞌjeꞌ siti acaꞌĉan. Chat qui muꞌ jenꞌ muꞌ sacyi jéte tsanꞌ paj qui siti muꞌĉan. 29Yi muꞌ ạvaꞌ muꞌ, jéyaqui jenꞌ muꞌ: "Cạvevaꞌ, junꞌtum raꞌ yómodyeꞌ jeñej úñity carijtaqui yụ mídyes, mijam damꞌ farajjebiye p̂eyacdyeꞌ mi. Meꞌ tsanꞌ meꞌ mijam qui namꞌ damꞌ banꞌtyity chivo soꞌmitim paj qui yụ feshtaij penꞌdyeꞌtum yụ. 30Uts na ạvaꞌ mi jiꞌmonbuntyiꞌ querec̣ha mi meꞌtaquistum p̂en in, venchudyeꞌĉandye mọmoꞌ, q̂uinꞌdyemꞌ ijaiꞌ mi mọꞌ chäiꞌsiꞌ cuꞌdyeꞌ, maꞌjotyebajte mi."
31Jenꞌ muꞌ voryi: "Yụ jéye ạvaꞌ, mi nash räjĉan yụ́tum bäꞌyi mi, judyeyaꞌ jedyeꞌ q̂uinꞌ yụ räj mídyes mọꞌ. 32Mọꞌdyes raꞌ tsun feshtayejaꞌ yiriꞌyaꞌ, ĉaĉaij na uts vojity mi moñity jiquej, q̂uinꞌ aty muꞌyaꞌ venchuban, jeñety säñi ĉọ́ja tsun, muꞌyaꞌ na jiquej tacaꞌ tsạꞌ muꞌ", meꞌ yi jenꞌ muꞌ.
လက်ရှိရွေးချယ်ထားမှု
Lucas 15: CAS
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Copyright 2017 Nuevo Testamento en Chimane
Jen'si' P̂eyacdye'