Matiye 25
25
Galaɓay a gun a lɔŋɔ́ri̧ bôo
(Mat 24:42, 44; Luk 12:35-40; 1Te 5:1-11; Apo 3:1-5; 19:6-9)
1Zezú sa ɓá Pû a Gáŋvbôn ɛ́ŋ ɓá báŋa gun a lɔŋɔ́ri̧ bôo, ka mbí lámbe a kuriri ɓay a sé zoko njuku nyá wûny. 2Ndiɓi a bazeŋ a kuriri ɓá dɔ̂ʼɔri, a gárá a ndíɓíkéri ɓá gun a lɔŋɔ́ a rɔ̧́nakéri. 3Gun a lɔŋɔ́ dɔ̂ʼɔri mbí lámbe a kuriri, táŋ mbí kû mára̧ a fékéri gírú. 4Gun a lɔŋɔ́ a rɔ̧́nakéri mbí lámbe a kuriri, a ŋgbá kû mára̧ a fékéri gírú. 5Njuku nyá wûny ɛ̧́ a zi gí ga yá dáy kuriri too kú ta̧, a kɔ̧ nâm. 6«A lawgel a sû̧ŋ, njuku há̧na vbá̧nzáʼa a sa: Njuku nyá wûny ka̧ dá, i tɛ̧́ sé ziŋ nɛ́. 7Dáy gun a lɔŋɔ́kéri uru, a mɔny lámbe a kuriri. 8Gun a lɔŋɔ́ri̧ ka ɓá dɔ̂ʼɔri gɔ́ŋ gun a lɔŋɔ́ a rɔ̧́nakéri ɓá, i hí̧ rú mára̧ tɛ̧́w, a rú ɓá kɔ̧ ɓil lámbe a ɓurú, ɓayhí̧lé lámbe a ɓurú mí húy. 9Dáy gun a lɔŋɔ́ a rɔ̧́nakéri sa: Háy, tí ma rú yá rá ɓay rú hí̧ wǎyri yá, i sé gel a njuku zé sɔ́ʼɔri, a i sé zé a wǎyri. 10Gelka gun a lɔŋɔ́ dɔ̂ʼɔri tɛ̧́, a sé zé mára̧, a goló njuku nyá wûny gí ka̧ dáy a ɗá gun a lɔŋɔ́ a ndíɓíkéri ka e ɗɛ́ŋ ri vûn nyá wûny kuu mɛ̌, a kú tu nzáʼaŋgboro ka̧nrú̧. 11A falké lé, gun a lɔŋɔ́ri̧ ka ɓá dɔ̂ʼɔ regí, a ɗí hɛ̧ a sa: Gáŋmbây, Gáŋmbây, mɔ́ ŋgburu nzáʼaŋgboro hí̧ rú. 12Dáy njuku nyá wûny sa: “Mí sa hí̧ wǎyri gbátɓay, mí zi tu wǎyri yá.” 13Dáy Zezú sa, i kaw ɗɛ́ŋ, ɓayhí̧lé i zi tu nâm rá̧ sɛl a sêe yá.»
Galaɓay a njukupénari̧ sáy
(Luk 19:12-27; Rɔm 14:7-8)
14Zezú sa ɓáy ɓá, Pû a Gáŋvbôn ná ɛ́ŋ báŋa njuku a há̧na, ka zi ɓay a sé gɔ́rɔ́, ka a ɗí njukupéna a mɛ̌ri̧, ka a ɓá hɛ̧zíŋa a mɛ̌ri̧ hí̧ kuriri. 15Ké hí̧ njuku a mbêw lari ísɔ́t ndíɓí, njuku a séreké lari ísɔ́t sére, a njuku a sáyké lari ísɔ́t mbêw, njuku a sí̧ lé too nyá ma ŋgɛ́rɛ a mɛ̌, a uru a kála. 16Njukupéna ka nyá lari ísɔ́t ndíɓí, sé niŋ hɛ̧sɔ́ʼɔ, a rezíŋ lari ísɔ́t ndíɓí a féké kɔ̧ tûlké, 17A njuku ka nyá lari ísɔ́t sére, niŋ nǎŋ kɔ́, a ziŋ lari ísɔ́t sére a féké kɔ̧ tûlké. 18Dáy njuku ka nyá lari ísɔ́t mbêw, sé goro lari a bákáwa a mɛ̌.
19«Ŋgbáŋ a falké, ka bákáwa a kuriri regí, ké gí ɗí kuriri a vbí kuriri hɛ̧ a kú niŋ ka lari a mɛ̌. 20Njukupéna ka nyá lari ísɔ́t ndíɓí, gí a gí tɔ́ʼɔ hí̧ bákáwa a mɛ̌, lari ísɔ́t ndíɓí, a sa: Gáŋnjuku, mɔ́ hí̧ mí lari ísɔ́t ndíɓí dáy mí rezíŋ lari ísɔ́t ndíɓí a féké kɔ̧ tûlké: a ná nyáy. 21Bákáwa a mɛ̌ sa hí̧ nɛ́: “Belbéla, njukupéna law mbêw. Mɔ́ kaw law mbêw ka tûl gun hɛ̧ dáy mǐ, mi e ɓá mɔ́, kaw tûl hɛ̧ri̧ ɓá ŋgɛ̧́náké. Mɔ́ gí rí mûn nɔ́ kuu mǐ.” 22Njukupéna ka nyá lari ísɔ́t sére gí a sa: “Gáŋnjuku, mɔ hí̧ mí lari ísɔ́t sére dáy mi rezíŋ a féké lari ísɔ́t sére kɔ̧ tûlké, a ná nyáy.” 23Bákáwa a mɛ̌ sa hí̧ nɛ́: “Belbéla, njukupéna law mbêw. Mɔ́ kaw law mbêw ka tûl gun hɛ̧ dáy mǐ, mi e ɓá mɔ́ kaw tûl hɛ̧ri̧ ɓá ŋgɛ̧́náké. Mɔ́ gí ri mûn nɔ́ kuu mǐ.” 24A falké lé, njukupéna ka nyá lari ísɔ́t mbêw ta̧m gí a sa: “Gáŋnjuku, mi tu ɓá mɔ sɛ̧ law mambá, mɔ lú hɛ̧pay a gel ka mɔ zi rú hɛ̧ ka rú yá, a lú hɛ̧pay a gel ka mɔ́ zi ma hɛ̧ ka rú yá. 25Nǎŋnɔ́ mí ŋgú wɔ́w, dáy a sé ɓá lari a mɔ̌ mú ɓil lɔ̂ʼɔ, a ná nyáy, mɔ́ nyá lari a mɔ̌.” 26Bákáwa a mɛ̌ sa hí̧ nɛ́: Ɓéké njukupéna zɔɔ! Mɔ́ tu ɓá mi lú hɛ̧pay a gel ka mí zi rú hɛ̧ ka̧nrú̧ nyá, a lú hɛ̧pay a gel ka mí zi ma hɛ̧ ka̧nrú̧ nyáy. 27Dáy, ɓayhí̧rá̧, mɔ́ zi ɓá lari a mǐ ka̧n vûn lari rá̧ mǐ, mí regí, mí gí nyá lari a mí ka hɛ̧ há̧na ka tûlké yáy lé? 28I naʼa lari ísɔ́t mbêw nɔ́, a i hí̧ njuku ka erú ka lari ísɔ́t bôoy. 29Ɓayhí̧lé njuku ka erú ka hɛ̧y, e rezíŋ gé ɓá mbɛl ɓá ŋgɛ̧́náké, a njuku ka zi tí ka hɛ̧ nyáy, kú e naʼa a kpayké nɔ́, a pɔŋ nɛ́ baa. 30Dáy í ŋgá̧ ɓéké njukupéna nɔ́, a i ɓá nɛ́ vbú ɓil tirí̧ma. A goló pé ké e vú ka sɔ̧́ sîlé.»
Gun a njuku e regí ɓay a walɓay a kɔ́rɔ́ké
(Zâŋ 5:22, 23, 26-29; Apo 20:11-15; 2Te 1:6-10; Gal 6:7-10)
31Zezú sa ɓáy ɓá: Sêe ka Gun a njuku e regí, a ɓil hɔ̧́na a mɛ̌ rá̧ aŋnzeri too, ké e gí kaw tûl hɛ̧káwa mbây a mɛ̌. 32Njuku a tísiriri too e mára̧ gí mbɛlɛ́, ké e ɗém njukuri ɓá báŋké ka njuku koro hɛ̧hɔ́la ɗém mbólé rá̧ hwálári. 33Ké e ɓá mbóléri kɔ̧ ŋgboro a lâʼa a mɛ̌, ka ɓá hwálári kɔ̧ ŋgboro a kporo a mɛ̌. 34Nǎŋnɔ́ Gáŋmbây e sa hí̧ njukuri ka kaw ŋgboro a lâʼa a mɛ̌ ɓá: «Í gí, wǎyri ka Bâa a mǐ ɗí béla kɔ̧ tûl a wǎyri, a í gí ri ɓil Pû a Gáŋvbôn, a ké tí mɔny zoko wǎyri tí ka sêe a ké mɔny tísiri. 35Ɓayhí̧lé, nzala í mí, i hí̧ mí lâʼa sɔ̧́na, kpɔʼɔmbii í mí, i hí̧ mí mbii nzóna, mi gí ɓá gɔ́rɔ́, i nyá mí kaw gel a wǎyri, 36mí kaw táŋ gári, i ɓá gári ri mí, mí ná záŋmá, i gí ɛ̧rɛ̧ mí, mi e ka vûn sɛl, i gí kó mí.» 37Dáy njuku a ndárákéri nɔ́, sa hí̧ nɛ́ ɓá: Gáŋmbây, sêe a sí̧ rá̧ rú kó mɔ́ ka nzala rá̧ a hí̧ mɔ́ lâʼa sɔ̧́na, malé kpɔʼɔmbii í mɔ́ rá̧ a hí̧ mɔ́ mbii nzóna lé? 38Sêe a sí̧ rá̧ mɔ́ gí ɓá gɔ́rɔ́ rá̧ rú gí nyá mɔ́, malé kó mɔ́ táŋ gári rá̧ a gí ɓá gári ri mɔ́ lé? 39Sêe a sí̧ rá̧ mɔ e ka záŋmá malé mɔ e ka vûn sɛl rá̧ rú sé kó mɔ́ lé? 40Dáy Gáŋmbây sa hí̧ kuriri: «Katína mí sa hí̧ wǎyri, sêe too ka i niŋ béla ziŋ njukuri ka zi tí ka nɛ́rɛ̧ nyá a bazeŋ a nyîn nírí̧, sa ɓá mǐ, pé i niŋ hí̧ míy.»
41«Falké Gáŋmbây resa hí̧ njukuri ka e ka ŋgboro a kporo a mɛ̌ ɓá: “Í kála ɓá ɗínáké a gbaŋ ní, wǎy ɓéké njukuri! Í sé ɓil hɔrɛ a wɔmké ka tí húna bɔʼɔké mbêw yá. Hɔrɛ nɔ́, a kú mɔny zoko Sata̧n kuu aŋnze a mɛ̌ri̧. 42Ɓayhí̧lé nzala í mí, i zi hí̧ mí lâʼa sɔ̧́na rá̧ mbii nzóna nyá. 43Mi gí ɓá gɔ́rɔ́, i zi nyá mí nyá. Mi kaw táŋ gári, i zi ɓá gári rí mí nyá, mí erú ka záŋmá malé ka vûn sɛl, i zi gí kó mi nyá.” 44Dáy kú rerú hí̧ nɛ́ a sa: Gáŋmbây, sêe a sí̧ rá̧ rú kó mɔ́, mɔ́ ka nzala, malé kpɔʼɔmbii í mɔ́, malé gí ɓá gɔ́rɔ́, malé kaw táŋ gári, malé ka záŋmá malé ka vûn sɛl rá̧ a zi kél mɔ́ nyá lé? 45Dáy Gáŋmbây sa hí̧ kuriri: “Katína mí sa hí̧ wǎyri, sêe too ka i zi niŋ béla ziŋ njukuri ka zi tí ka nɛ́rɛ̧ nyá a bazeŋ a nyîn nírí̧, sa ɓá mǐ, pé i zi niŋ hí̧ míy nyáy.” 46Dáy, kú e sé ri ɓil hɔrɛ ka kɔ́rɔ́ké zi tí nyáy. A njukuri a ndárákéri e ziŋ ndísɛ̌ʼɛ a Gáŋvbôn ka tí ɔ ná nyá wɔm.»
လက်ရှိရွေးချယ်ထားမှု
Matiye 25: pnz
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2023 CABTAL