Luke 1
1
Hapaki oharo
1Elaviila iki iele kelavalula la eharu oaria haela oaria haeakive ikivere overa leivahaeape; 2Ere ovohae eavavahaeape kai koaravahaeape la oharo ve horova ere elaro kara kileavahaeape; 3Laelave arave ikikekela ara kara, ehovea avare koare leivahaeape la eharu ara ore overa leivahaeape, la eharu oaria ehoe hiki a v'ila haeakive, Theophilus veveke e, 4Ehovea aro overa kileavahaeape la eharu oaria ve iele a ore leikilai.
John Baptist ve aire epaki oharo
5Herod amua, Judea ve hoa, haela ae rare Zacharias, Abijah ve eravo haela i areve uva, rare Elizabeth, Aaron ve eravo mari, ila hareho apearoape. 6Erealila Aualari oropa ve mai ehohoe haela: Erealila mea oaria Areve pupu i ikivere mai oaria ila leivahaeroape. 7Erealila akoremari karia, ehovea Elizabeth uamari korovu, erealila kai haela hoaha le leivahaeape.
8Zacharias, areve oharo haela horova leipe hoa, Aualari oropa ve pekape. 9Are oharo haela ve mai hovea hehe uvi pekai arura haha ve muo veveke muramura aveape. 10Haela oaria la muramura aveape hoa mahokaea ve ekakaopi ivaiva leivahaeape. 11Amua ve aneru areve oropa ve kihoai arura haha ve mai ore ukai ve epavape. 12Zacharias arero eavi ikihorahora lei oaoka eapapo leipe. 13Aka aneru arero mari maeape, Zacharias, a oaoka kalailue: Aualari ave velavela oharo overa iapape. Ave uva Elizabeth ave akore la epakilai — a areve rare John itavakilai.
14Ava ikiveveke eapapo lei
Areve epaki hoa haela oaria kara ikiveveke leivahaeakilai.
15Ehovea are Amua oropa va eapapo leikilai;
Are wine i ma aheke ila hahaure leikilai:
Areve epaki hoa Ove Veveke are i hareho aeakilai.
16Are kai Israel ve akoremari oaria Aualari ve oki ve kari aukilai.
17Are kai Elijah ve Ove i aheke ila Amua ve oropa ve aukilai,
Oalou haela ereve akoremari ikihuru leikive kileavahaeakilai,
Kai oharo iapavahaeaki aue haela mai ehohoe haela ve okiharo aukive kileakilai,
Ehovea ma vilaipi hareho Amua ve okiharo ore leikive.
18Zacharias aneru velavela leipe, Ara ma eharu learia lei ore leikilai ha? Ehovea ara haela eapapo, arave uva kara uamari eapapo. 19Aneru arero kavale maeape, Ara vea Gabriel, Aualari ve oropa ve epavila aneru va: Are kai araro kiparaeape ehovea aro ma ikiveveke leiki eharu kileakive. 20Iapai — ave karave ipi haihaharoa o ari aue leikilai aiai ma eharu horeavaki hare, ehovea a arave oharo au iapakue; ma oharo aireaki iele horeavakilai. 21Haela oaria Zacharias kari hairi hairi ikihorahora eapapo leivahaeape, ehovea are va hehe ita haiapo iele aeaveape. 22Are kihoaupe la hoa are va erero oharo maeaeakive hovea ka; Ere ore leivahaeape are va hehe ita leia eharu lahua la eavape, Ehovea are kai ereve oropa ve mai hiki koelari muruha hiki aeape. 23Aireaki, areve hehe ita ve horova karia leipe la hoa are elare uvi aupe.
24Aireaki hare Elizabeth ero i lei papare five au hiki aeveape. 25Are mari ape, Amua araro ovohae eavi maria leipe ehovea arave haela ve oropa ve maeoka hareavakive.
Iesu ve aireaki epaki oharo
26Areve papare six hoa Aualari aneru Gabriel Galilee karikara rare Nazareth maea popou mari ve lei a paraeape. 27(La mari ve vila rare Joseph, David ve eravo haela.) La mari ve rare Mary. 28Aneru kai areve oropa iki mari maeape, Ava la, ava ikiveveke mari, Aualari a i hareho aeavila. 29Are la oharo iapai iki horahora lei elare iki ureve haropape, la oharo ve iele le. 30Aneru kai arero maeape, Mary, a oaoka kalailue — ehovea Aualari aro ikivere eapapo leive. 31Iapa, A ero i eavi ari lei akore le epakilai. A areve rare Iesu itavaki.
32Are eapapo lei haela arero Akea ve Aualari ve Akore rare arilai.
Amua Aualari areve oa David ve terona arero avarakilai.
33Are Jacob ve eravo haela oaria ve Amua leikilai, aiai kari lei va ka.
Areve basileia kara karia lei va ka.
34Mary aneru mari maeape, Ma maea learia leikilai, ehovea haela araro au koaraila?
35Aneru arero kavale maeape:
Ove Veveke ave akea kihoaukilai,
Kai Akea Iele Aualari ve aheke aro aerakilai:
Laelave a va aireaki epaki la eharu hehe rare arilai,
Aualari ve Akore.
36Iapa, ave lou hera, Elizabeth, are kara areve lauapau hoa akore apakilai; la uamari areve ero eaveape papare six ma. 37Ehovea Aualari ve oharo aheke hiki, mahuka lai va ka. 38Mary mari ape, Eava, Aualari ve horova mari ma: ave oharo laria leikilai, heroe. Aneru arero harepape.
Mary Elizabeth ve leia hoaupe. Morapaeaki hivi
39Mary elavelave urai kela ita Judah ve karikara aeva pekape. 40Are Zacharias ve uvi pekai Elizabeth oharo le maeape. 41Elizabeth areve la oharo iapai areve eharau ureve la akore aura kelape: Ove Veveke Elizabeth ve iki ureve heloekoape. 42Are ara hai maria itavape, A va uavila oaria oropa ve — ave eharau ve la eharu veveke iele. 43Maia ve learia? Arave Amua ve lou arave maia ve leikila iele. 44Arave avako ave la oharo iapai, arave eharau ve la akore ikiveveke lei aurakela le ara. 45Oharo iapai kekelape la uamari kara veveke iele, ehovea Amua arero maeape la eharu oaria iele leikilai. 46Mary kai maria maeape:
Arave iki ureve Amua morapaevila:
47Arave ove kara ikiveveke leivila ehovea araro lei makuripe Aualari.
48Are areve ipi havahu horova mari haure au leila:
Iapai, aireaki vilakao oaria arave rare morapaeakilai.
49Ehovea Akea Iele Aualari arave maea ve horova eapapo leipe:
Areve rare hehe iele.
50Areve oharo iapailula vilakao oaria Are ikiheheroe leivahaevila.
51Areve mai ve aheke are hihika amoeape:
Ikipelaea haela oaria are le kopurapape.
52Akea haela ereve terona ve are la haruapape,
Kai ipi haela ereve ita le pekahavape.
53Eroa haeape haela are eapai veveke aiarape:
Erohoho haela are mai ka haruapape.
54Are areve horova haela Israel koarape,
Ehovea areve ikiheroe mai ikikekelakive.
55(Are elaviilave Aualau haela laria maeaeape,
Abraham i meavohula oaria ila aiai karia lei va ka).
56Mary areve leia papare three aiai aireaki elare uvi aupe.
John Baptist epape hari. Ikiveveke Hivi
57Elizabeth ve akore epaki hoa kihorera are akore le epape. 58Areve karikara haela i apavara ila Aualari arero leipe la ikiheroe mai iapavahaeai are i hareho ikiveveke leivahaeape. 59Iapai, hare 8 kari leivahaeai ere akore hekai peritome mai leikive korukaiape. Ere ikivere arero rare Zacharias, oa ve rare, itavakive. 60Areve lou kavale maeaeape, Arekaea, arero John rare itavaki. 61Ere arero maeape, Ave apavara oaria la rare au itavaila, ere kai oa mai koelaripe ehovea areve ikivere rare ore leikive. 62Ere kai oa mai koelaripe ehovea areve ikivere rare ore leikive. 63Are hohoa harive kora hakaea velavela lei mari hape, Areve rare va John. 64Ere oaria ikihorahora leivahaeape. Areve ape la hoa hapai auri alalaka leipe. Are oharo ai Aualari ve rare morapaeape. 65Ereve apavara oaria oaoka eapapo leivahaeape. Ma oharo oaria Judea ve la kela ita oaria kopurapape. 66La oharo iapavahaeape haela oaria elare iki maria kelavape, Ma akore aireaki leari leikilai? Amua ve mai are i hareho aeaveape.
67Ove Veveke Zacharias ve iki ureve heloekoa are mari maeape:
68Amua Israel ve Aualari morapaeaki,
Ehovea Are maia kihoaupe haela oaria lei makukurikive.
69Are David ve eravo haela oari a ovokake oaria aikiarape.
70Are overa peroveta haela ve ape lari ape,
Meahaiapo avare koare hoa ikiki mahau.
71Are elaro iri haela ve mai ve hareavape:
Elaro aeha leivahaelula haela oaria ve kara.
72Are elave Aualau haela ikiheheroe leivahaeai
Areve okoare veveke iki kekelape.
73Are elave oa Abraham maeape la okoare, maria
74Iri haela ve mai ve Are elaro la hareavakilava,
Ela areve horova leivahaeakilai, oaoka karia.
75Hehe mai ehoe ila mehaemehae leikive.
76Iele havahu, Akore e,
A va Akea Iele Aualari ve peroveta haela rare itavakilai,
Ehovea a Amua ve oropa ai areve okiharo karikikilai.
77Areve haela oaria a ovokake oharo kileavahaeakilai:
Ereve mai hahaeae hapurukavakive oharo kara a kileavahaeakilai.
78Ehovea elave Aualari ve ikiheroe veveke iele,
are v'ila akea ve ovava eapapo elaro aeravahaeakilai;
79Murumuru apearoape kai au apihaeroape ove ve akea avairoape la haela ovava aiarakilai.
Elave loa kara havila okiharo, are kari aukilai.
80Akore ahai iki aheke eapapo leipe. Are huakara hiki aiai are va Israel ve oropa ve hihika horerape la hoa.
လက်ရှိရွေးချယ်ထားမှု
Luke 1: ORO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society 1963-1972