Luke 12
12
Pharisee haela ve hehepo hovea kalaivahaelue
1La hoa haela oaria korukaiavahaeape, haela maeakoko, laelave haela ae haela ae ve loa la huharape. Are areve kilea haela aeka maria maeaeape, E Pharisee haela ve la mai kiva leila, ehovea leia ve hehepo mai iele. 2Aka au kokaukape eharu oaria hihika leivahaeakilai — au aiarapape la eharu oaria haela ore leivahaeakilai. 3Laelave — e muru hoa ape la oharo, haela ovava hoa iapakilai: lalava ureve avako haopape la oharo, haela uvi akea ve iroro arilai.
Kilea haela ve hakakaeaki oharo
4Ara ero maeaeaive — haelakaru e, maea haealula la haela a oaoka kalailue — ere va aireaki heaha aeva leivahaea va ka. 5Aka, e oaoka leiki la haela ara ero kileakilai — eve maea haeakilai, aireaki ero Gehena paraeakive ore la haela, e va oaoka arero leiki va heroe. Kaire, ara ero maeaeaive — e va arero oaoka lei va heroe. 6Ori titaeka 5 ve kavale peni haroapo ka ha? Aualari ve oropa ve la ori haroapo havoava va ka. 7Are va eve haro kolo numera overa kaoape. E oaoka kalaivahaelue — eve kavale eapapo, ori titaeka oaria va kavale hekai.
8Ara ero maeaeaive — Haela araro haela oaria ve oropa ve la vavavakilava, la haela haela ve Akore Aualari ve aneru ve oropa ve vavavakilai. 9Araro haela ve oropa ve haure leiki la haela ara arero Aualari ve oropa ve haure leikilai. 10Haela ae haela ve Akore o heaha la aikilava, areve la haeae hapururukakilai — aka haela Ove Veveke v'ila o heaha la aikilava, areve la haeae hapururuka va ka. 11Ere ero synagogue ureve la halakekeapukilava, kai heheavaki haela i amua haela ila oropa ve la halakekeapukilava, e va hukavaki oharo kai kavale oharo horahora kalaivahaelue. 12Ehovea Ove Veveke la hoa havahu o hovea ero kileavahaeakilai.
Eharu oaria ikivere mai: Ikihaveva erohoho haela
13Haela ae arero mari maeape, Haelapo, arave apoheari maeaki are elare haruku hoveahovea hamureakive. 14Are arero maeape, Haelakaru, araro heheavaki aka hamureaki horova ve va leita kimaeape ha? 15Are erero maeaeape, E kiva leila e va e‐lahua haela ve mai hovea leivahaeaki ave — ehovea haela ve erohoho eharu oaria arero lei makuri va ka. 16Are erero parabole oharo kai mari maeaeape, Erohoho haela ae ve kekele eapai eharu oaria lei horeravahaeape; 17are elare iki ureve mari kekelape, Ara leari leikilai ha, ehovea arave eapai maeakoko, aeva korukaiaki uvi karia? 18Are mariape, Ara mari leikilai. Arave eapai korukaiaki uvi oaria ara kopararapai are le kukueakilai — arave eapai i eharu oaria la uvi are aipevahaeakilai. 19Ara elare ove mari maeakilai, Ove e, ava korukaiape la eharu va hitolo oaria hoveahovea leivahaeakilai: ara iki paraeai heraho are kalailue. 20Aka Aualari arero maeape, A va ikihaveva iele, ma oroa ara ave ove le itavakilai. Laelave a va korukaiape la eharu oaria leita la aeakilai ha? 21Elare erohoho korukaia kai Aualari ve la erohoho kekelaki aue la haela are va lari hiki leikilai.
Iki heraho kalaivahaelue
22Are areve kilea haela mari maeaeape, Laelave ara ero maeaeaive: eve ovokake hiki kakelavarue — le eapai larilai: maea kara kakelavarue — e va le pura oreaukilai la. 23Ovokake areva oropa eharu, eapai va aire. Maea va oropa eharu, pura va aire. 24Hapa ikikelavaila — ere va eapai apoporai i ikaeaki horova va haveva — ereve eharu i eapai korukaeaki uvi va karia, aka Aualari erero eapai aiaravila. Eva oropa haela, ori oaria eve aireaki va ka ha? 25Areve maea heaikiapo leikive ikivere la haela elare maea heaikiapo leikilai ha? 26Laelave e va la horova hekai iele haveva la leikilava, eharu aeva ikihorahora kalaivahaelue. 27Kora mere oaria aheaulula la maea ikikelavaki — ere horova leivahaea va ka, pura kara he va ka, aka ara ero maeaeaive — Solomon i maupa veveke oaria ila ma eharu ve maupa hoveahovea au leila. 28Aka Aualari mahau mea ve aeavila kai opoa kemo paraeaki la kora mere maupa veveke la karikikilava, iele havahu iele are ero pura hovea aiara va ka ha? E va ikikekelaki aue haela e. 29E va au larive eapai i ma ila kaharoparue, kai ikihorahora kalailue. 30Ma eharu meahaiapo vila‐ipipi oaria haro?-?parura. Aka eve Oa ore e va ma eharu ikivere leilula. 31Kahara, e va areve basileia la haropaki, aireaki ma eharu e va koarakilai.
32Oaoka kalailue, mamoe hiru hekai e, ehovea eve Oa ero basileia avarakive ikivere leive. 33E va overa aeape eharu ilaea leiki, e va heaha leiki aue la eharu ve aroa veveke harive — kaia ve la erohoho heaha lei va ka: leia korea haela ekeva ka: ihoko kara eharu haea va ka. 34Eve eharu oaria apeaki la ita e va mea oaria iki va kelavalula.
Kiva auhohi leivahaeaki. Horova kiva haela veveke
35Hopa erekai aheke hahaiaki, lamepa ve ovava kiva hiki leiki. 36E va ereve amua la karilula haela hovea leivahaeaki — Are uva laeaki hurae ve kiavaki okiape la kokeaki la hoa, ere va okiape elavelave le hapakilai. 37Amua iki la haela kiva va laila eavakilai, are erero momorapukilai. O iele ara ero maeaeaive — are va elare hopa erekai hahai erero eapai larive avakive maeaeakilai — are havahu elare mai ve eapai erero aiarakilai. 38Are va hailaea hoa aka oroa hoa la ekekilava, kai erero laria la eavakilava are la horova haela momorapukilai. 39Aka ma oharo ore leiki — uvi haela korea haela ve ekeki hoa ore ma laelava, are va kiva auhohi le leikilai kai areve uvi hakurepa va ka, haela la uvi kopararapaki ave. 40E kara kiva auhohi leila — ehovea e va iki kelavaki aue la hoa haela ve Akore ekekilai.
41Peter maeape, Amua, a va ma parabole elaro hiki ra kimaeaila ha, aka haela oaria ve hareho ha? 42Amua erero maeaeape, Mai ehoe i ikiore iele kiva haela leita? Areve amua arero uvi eharu hareho kiva leikive maeakilai, kai uvi haela oaria ve eapai aiarakive maeakilai. 43Amua ve ekeki hoa la haela horova kiva ma laila eavi arero le morapaeakilai. 44O iele ara ero maeaeaive — are la haela areve eharu oaria hareho kiva leikive maeakilai. 45Aka la horova kiva haela elare iki ureve mari la kekelakilava — arave amua va haiapo ekeva ka, kai horova haela i uavila ila haru koakive la ipopeavakilava, kai eapai i ma ila lala ihape mai laleikilava; 46Are kekelaki aue la hoa, kai haveva iele la hoa, horova haela ve Amua iki la haela ve hoa haerapai areve eharu oaria haela ae aiarakilai. 47Aeka, amua ve ikivere kara ore overa leipe la horova haela, kai areve eharu oropa karikiki aue la leikilava, kai areve ikivere horova leiki aue la leikilava, arero haru le harilai. 48Aka ore au leila la haela horova kavale heaha hovea la leikilava areve maea haru haroapo haroapo la koakilai. Eharu oaria aeape la haela ere horova eapapo la maeakilai. Eharu oaria kiva leikive maeape la haela kara ere va aeka eapapo maeakilai.
Aireaki Basileia hoa ve ihova
49Ara ekepe meahaiapo a ve veveroro leikive: haela la a overa la ililakilava, heroe, arava ikivere va la. 50Aka araro bapatiso leiki horova kepea le aeave — ara va iki heraho lei lei ara va la horova iele leikilai. 51Eve ikikekela ara ekepe meahaiapo havila avarakive ha? Ara ero maeaeaive, Ka, aka ehovea hamureakive. 52Ehovea aireaki hoa lalava haela 5 la apeakilava, ere va hiru hiru le leikilai, ukai 3 ukai 2 aka ukai 2 ukai 3. 53Ere va hahari mari arilai, oa areve akore, akore areve oa, lou areve mari, mari areve lou, lou areve evera, evera areve lou.
54Are kai haela oaria maeaeape — Eva avara hoa meuru la pekaila la eavakilava, e elavelave maeaive, lai ihaukilai. Are laria leikilai. 55Mea eau lahara la kivikakilava e mari arula, hare eapapo leikilai. Are laria leikilai. 56E opore haela e, e va meahaiapo i kaia ila ve ihova mureakive ore. Ehovealeve e ma hoa ve ihova mureakive haveva ha?
57Ehovealeve e elarelare mai ehoe heheavakive haveva ha? 58A i iri haela ila hareho heheavaki haela ve leia la aukilava a va arero elavelave okiharo ve havila leikive, are aro heheavaki haela ve ita oropa lai auki ave, kai heheavaki haela aro uvi muru gavana haela avaraki ave, uvi muru haela aro uvi muru havahu paraeaki ave. 59Ara aro maeaive — a va aireaki leia ve kihoau va ka aiai a kavale hareho iele le leikilai.
လက်ရှိရွေးချယ်ထားမှု
Luke 12: ORO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society 1963-1972