Mak 14
14
Osep Yuda ina tiwaiki tidue burwa ke Yesus
(Matyu 26.1-5 e Luk 22.1-2 e Jon 11.45-53)
1Alo ari osep Yuda ina tikere rogo ka lana ine la ke alo ka Ida Tapolngon lua isak tisongon omur Isip. Deka tikere inarak bret ka yis dong ine kovok ma gasak tingene. Alo ari osep loulou ina ka omba e osep ka tile itau ke Moses ila sogongon tikrim ekreng ka tiwaiki tiyak Yesus ine ma tikis iye dagar. Kesua tiwaiki tidue burwa ke iye. 2Tiwai pulu langane. “Itodue alo ka rogo kovok lama elio ane sruk osep aitno lisak e ma tipaiavu ite ine.”
Apmang baser wel ka amna itau ke Yesus otuk ine
(Matyu 26.6-13 e Jon 12.1-8)
3Alo ari Yesus dong ke Betani ke gute Saimon ka oglou paiangan lepra due ila ninu. Alo ka iye dong e ngen ina ngangon ke bota gesa ari apmang gesa me sep ke ninu e polou ke iye. Iye paur botol ka bon ke wel ka amna itau ka ina klingen ombatno. Deka iye bong botol tonari deka wel ka dong ine baser duru ke Yesus otuk ine. 4Osep leklou ka tidong ari tivati apmang ila elio deka aitno lisak nevlik amnga ke iye e tiwai etres pulu ke iye langane. “Ina lange apmang ane paiavu wel ka amna itau e basere langane? 5Langka iye due burong ine ma gute gesa klie ke mani ombatno langka mani buno eklu. Deka mani tonari karanga la lua osep ka urok wan isuk boto vala.” Osep tonari tiluk apmang langane ke elio ka iye due.
6Deka Yesus wai ke osep tonari langane. “Ina lange umeiluk apmang ane? Umeiluk iye sakam kesua iye due elio itau ke ngong. 7Langka osep ka urok wan bitna bitna isuk boto vala io ma tidong kap umu aling aling. Deka oklou lange ka umawaiki umodue elio itau ke isak umakaranga umodue. E langka ngong io mase ma ngadong kap umu kovok deka ma umakaranga umodue elio itau ke ngong blang kovok. 8E apmang ane due elio itau ke ngong ka iye karanga due. Iye baser wel ka amna itau ke pampamu lungong ma kere ke alo ka osep tiyas ngong. 9Ngawai ke umu ke pelengon lokono ane. Alo ka osep tinapapra Ida Tapolngon ila omon itau ke omur omur ka dong ke taklak ka pula keniye ma tiwai ke elio ka apmang ane due ke ngong ma osep tile ine.”
Judas wai ke osep loulou ina ma iye lai Yesus ina
(Matyu 26.14-16 e Luk 22.3-6)
10Ari Yesus ila disaipel kene ke ila disaipel songotno orwo ka angaine Judas Iskariot la polou ke osep loulou ina ka omba e wai ke isak ma iye lai Yesus ina. 11Osep loulou ina tonari tiklingen Judas ila pelengon e aitno lisak neser omba ine. Deka tiwai dagar langka iye lai Yesus ina ma tikar iye mani ine. Tiwai ke iye langane deka iye dong krim ekreng ma iye karanga lai Yesus ina.
Yesus kap ila disaipel tingen inarak ngangon
(Matyu 26.17-25 e Luk 22.7-14 e Luk 22.21-23 e Jon 13.21-30)
12Rogo ka lana ine la ke alo ka Ida Tapolngon lua osep Yuda ina tisongon omur Isip ina oklou mgongon ina polou. Deka osep Yuda ina tingen inarak bret ka yis dong ine kovok e timter sipsip titno ka tiwaiki tidue elio opmu ina ke isak. Deka ari Yesus ila disaipel tipmi iye langane. “Ma imala ge ma imekere rogo ka lana ine la ke alo ka Ida Tapolngon lua udo seia tisongon omur Isip ina ngangon ma itangene?” 13Tipmi Yesus langane deka iye pagei ila disaipel orwo ma isak kla tikere wan bitna bitna. E iye wai ke isak langane. “Umorwo umala umesep ke Jerusalem deka ma umososon gute arang gesa ka kalke aki tarna ka bon. Deka umedidi iye. 14Umedidi iye la lama iye la polou ke ninu gesa e sepe. Deka umawai ke ninu tonari ina gute langane. ‘Limem gute parerengen ina wai langane. “Eliang kaulei ina ka ngadong ine e ngagosok lou disaipel imangen ngangon ka lana ine la ke alo ka Ida Tapolngon lua udo seia tisongon omur Isip dong ge?”’ 15Umepmi iye langane deka ma iye nis umu ke ninu tonari ina eliang gesa ka dong egim ka ina bota e kova tidong ine kodong. Deka umekere ida ngangon ke eliang tonari.” 16E disaipel orwo tisongon omur are e isak kla tipolou ke Jerusalem e tisepe. Deka tivati elio bitna bitna eriar langka Yesus wai ke isak ine. Deka tikere rogo ina ngangon.
17Alo ka kirui Yesus gosok ila disaipel isak kla tipolou ke eliang tonari. 18Deka tidong lelei ke bota gesa e tingen inarak ngangon. Deka Yesus wai ke isak langane. “Ngawai ke umu ke pelengon ane ka lokono lokono. Lumu aten gesa ka dong ngen ngangon ane kap ngong ma lai ngau.” 19Yesus ila disaipel tiklingen ila pelengon deka aitno lisak kro ine. Deka isak kensak kensak tiwai ke iye langane. “Ai aitno lugom lange? Ma ngadue elio langane?” 20Deka Yesus koli wai langane. “Gute kene ke umu ka lou disaipel songotno orwo ka imorwo lipmi due bret la sep ke dis ane ma lai ngau. 21Deka ma elio polou ke ngong ka Gute Ka Polou Langka Osep eriar langka oglou osep napaprangan ina tisogo ine. E aitno lungong kro lokono ke gute ka lai ngau. Langka tna divir iye kovok are itau.”
Yesus kar bret e wain ke ila disaipel
(Matyu 26.26-30 e Luk 22.15-20 e 1 Korin 11.23-25)
22Yesus gosok ila disaipel tingen inarak ngangon deka iye due bret gesa e wai tenkyu ke Ida Tapolngon ine. Iye wai yagos deka tuktuke e kare ke ila disaipel. Deka iye wai ke isak langane. “Umodue bret ane kesua iye pampamu lungong.” 23Deka Yesus due kap gesa ka aki wain dong ine e wai tenkyu ke Ida Tapolngon ine. Iye wai yagos deka iye kare ke isak deka tinime. 24Deka iye wai ke isak langane. “Wan ane ngau marau ka didi Ida Tapolngon ila kontrak ka oglou iye wai dagar ine. Ma ngamete deka ma ngau marau baser ma kli osep ka pula keniye urok elio epmes ina. 25Ngawai ke umu ke pelengon lokono ane. Ma ngainim aki wain aling kene silang blang kovok la lama mase ngainim aki wain oku ina ke omur ka Ida Tapolngon plaue.” 26Yesus wai ke isak yagos deka tidue sakul gesa ka kakai Ida Tapolngon angaine. Tidue yagos deka tisongon eliang e isak kla tipolou ke gigri Oliv.
Yesus wai ke ila disaipel ma tisongon iye
(Matyu 26.31-35 e Luk 22.31-34 e Jon 13.36-38)
27Tipolou ke gigri tonari deka Yesus wai ke isak langane. “Umu keniye ma umosongon ngong. Kesua oglou gute napaprangan ina gesa sogo Ida Tapolngon ila pelengon palma ka wai langane. ‘Ma ngamke sipsip inarak plaungan deka ma sipsip keniye tidardar kla.’”
28“Eriar langka gute napapra-ngan ina ila sogongon wai deka umu keniye ma umosongon ngong langane blang. E mase ma ngapoga ngatito ke ngau denga deka ma ngamgo ngapolou ke omur Galili e mase ma umopolou ine blang.” 29Yesus wai ke isak langane deka Pita wai langane. “Langka osep ka pula keniye tisongon wom ma ngadue elio langane kovok.” 30Deka Yesus koli Pita ila pele-ngon e wai langane. “Ngawai ke wom ke pelengon lokono ane. Eknikane ke epmes ma amwai emile ngong kovok aling eklu deka ma kwako bole wai aling orwo ina.” 31E Pita dong wai langane. “Lama osep tidue burwa ke ngong kap wom ma ngabisi ke wom kovok.” Yesus ila disaipel keniye ka tidong ari tiwai langane blang.
Yesus la ke yage Getsemani e wai itau ke Ida Tapolngon
(Matyu 26.36-46 e Luk 22.39-46)
32Yesus gosok ila disaipel isak kla ke omur ka osep tisire yage Getsemani. Tipolou ine deka Yesus wai ke ila disaipel langane. “Umodong ke omur ane ma ngawai itau ke Ida Tapolngon.” 33Deka iye due Pita e Jems e Jon deka isak kla kap iye. Deka aitno soulu e aitno kro lokono. 34Deka iye wai ke osep eklu tonari langane. “Aitno lungong kro lokono langka ngawaiki ma ngamete ine. Umodong ke omur ane e umaplau umu itau.”
35Yesus wai langane deka iye lila la olwo boto e duru munu ke taklak. Deka iye wai itau langka Ida Tapolngon aitno itau ine iye waiki ma agegeng polou ke iye kovok. 36Ari iye wai langane. “Abo Livou. Ngaile elio keniye ka amwaiki omdue amkaranga omdue. Ngawaiki elio soulu lokono ka osep tiwaiki tidue ke ngong ma polou ke ngong kovok. E dau emdidi aitno lungong ine kovok. Aurou. Emdidi aitno lugom ine vala.”
37Yesus wai itau ke Ida Tapolngon langane deka iye tito e bauluk la polou ke osep eklu e vati isak timunu kudung. Deka iye wai ke Pita langane. “Saimon ommunu kudung i? Lange? Amkaranga amplau wom iding ke aua kene kovok? 38Umu keniye umodong umaplau umu e umawai itau ke Ida Tapolngon lama tokngon polou ke umu ka umadar Ida Tapolngon ila pelengon dagar ine. Ke anmu umawaiki umodue elio itau e dau pampamu lumu waiki umodue elio ka itau kovok.”
39Yesus wai langane deka iye songon isak e la deka wai itau ke Ida Tapolngon eriar langka iye wai kodong. 40Deka iye bauluk la ke ila disaipel blang e vati isak timunu kudung dau kesua amtarsak bunga. Deka tile omur ke pelengon lange ka tikoli tiwai ke iye ine kovok.
41Yesus songon isak deka iye la wai itau ke Ida Tapolngon blang aling eklu ina. Deka iye bauluk la ke ila disaipel e wai ke isak langane. “Umu dau umomunu kudung e umomtong ane i? Elio langane yagos. Alo ka gute gesa lai ngong ka Gute Ka Polou Langka Osep ngau ke osep epmes ina ma tikis ngong dagar time kodong. 42Umetito e itala. Umavati. Gute ka lai ngau me kodong.”
Yudas lai Yesus ina
(Matyu 26.47-56 e Luk 22.47-53 e Jon 18.3-12)
43Yesus dau wai ke ila disaipel e lokono Judas ka iye kene ke ila disaipel songotno orwo kap osep leklou ka tikalke urok elil omba e evlei pula time tipolou. Osep leklou tonari isak osep ka osep loulou ina ka omba e osep ka tile itau ke Moses ila sogongon e osep namormor tipagei isak ma tikis Yesus dagar. 44Deka Judas la ngen Yesus banga ma iye lai iye ina. Kesua oglou iye wai ke osep langane. “Gute ka ngangen banga iye tona Yesus. Alo ka ngangen banga umekis iye dagar e umapaur iye la e umaplau iye itau.”
45Osep tonari kla tipolou ke Yesus deka lokono Judas lai Yesus ina e wai ke iye langane. “Ngau Puda ane.” Deka iye ngen Yesus banga. 46Deka lokono osep ka tigosok Judas tikis Yesus dagar. 47Tikis iye dagar deka ila disaipel kene ka vri ari pi ila elil omba e urie deka blou gute gesa ka gute loulou ina ka mgo ila wokboi nating tala. Iye blou tala ma kopuk duru la.
48Deka Yesus pmi osep tonari langane. “Ngong gute panakongon ina deka umakalke elil omba e evlei e umekis ngong? 49Oklou keniye ngadong ke omur ka lelei Ida Tapolngon ila ninu e ngaparere umu deka ari umekis ngong kovok. E elio ane ka umodue ke ngong polou ma Ida Tapolngon ila pelengon ka oglou osep napaprangan ina tisogo ine polou lokono.” 50Yesus wai langane deka ila disaipel keniye tisongon iye e tiulou kla.
51Alo ari gute auram kene ka tnei ila molo vala didi Yesus. Deka osep tikis iye dagar. 52Tikis iye dagar e iye netek la deka ila molo noklok e iye albus iye e pren ke isak e ulou la.
Osep tisin elio vri ke Yesus
(Matyu 26.57-68 e Luk 22.54-55 e Luk 22.63-67 e Jon 18.13-14 e Jon 18.19-24)
53Osep ka tikis Yesus dagar tipaur iye la polou ke gute loulou ina ka mgo ila ninu. Osep loulou ina ka omba keniye e osep ka tile itau ke Moses ila sogongon e osep ngongle blang tiduni pulu ke ninu tonari kodong. 54Alo ka osep ka tikis Yesus dagar tipaur iye polou ke osep tonari amtarsak Pita didi iye mawa boto. Iye didi iye mawa boto la lama iye polou ke ninu tonari deka iye dong ke ina karap. Iye dong ine kap osep ola ina e iye marang ke eiou.
55Deka osep loulou ina ka omba tigosok osep kaunsil ina tisin elio vri ke Yesus. Kesua tiwaiki ila elio gesa vri ke iye ma tidue burwa ke iye ine. Tidong tisin elio vri ke iye e dau tikaranga tipado sinngen elio gesa ka vri ke iye kovok. 56Osep pula tiyakyak e tisin elio vri ke iye e urok sinngen elio la pulu kovok. Kesua urok sinngen elio isak yakngan. 57Osep leklou tivri ke osep tonari amtarsak deka tisin elio vri ke Yesus e tiwai langane. 58“Oglou imeklingen gute ane wai ma iye dar Ida Tapolngon ila ninu ka osep tiurie ke limsak. Iye wai ma iye dare deka mase ke oklou eklu ma iye uri Ida Tapolngon ila ninu oku ina ka osep tiurie ke limsak kovok.” 59Osep tonari ka tisin elio ka langane vri ke iye urok sinngen elio dau la pulu kovok.
60Deka gute loulou ina ka mgo tito vri airavu ke osep ka tisin elio vri ke Yesus deka pmi iye langane. “Omkoli osep ane urok sinngen elio kovok i? Osep ane tisin elio vri ke wom ke elio ka lange?” 61E Yesus dau koli urok pelengon kovok. Iye dong vala. Deka gute loulou ina ka mgo pmi iye langane. “Wom Krais ka Ida Tapolngon ka dong egim Otno Arang wom?” 62Deka Yesus koli wai langane. “Iye ngong tona aneo. Mase ma umavati ngong ka Gute Ka Polou Langka Osep ngadong ke Ida Tapolngon limla odung. Ma umavati ngong ngame ke gaup ka mana ke sirva.”
63Gute loulou ina ka mgo klingen Yesus ila pelengon deka aitno nevlik amnga e iye trum ila molo e wai langane. “Ma iteklingen sinngen elio silang ka la ke iye batne lange? 64Umoklingen ila pelengon soulu lokono ka pes Ida Tapolngon angaine kodong. Aitno lumu lange? Ila elio vri ke iye koke aurou?” Deka osep keniye ka tiklingen Yesus ila pelengon timulu iye e tiwaiki iye mete ine. 65Deka osep leklou titito tiuru omsok ke iye. E osep leklou tikading Yesus bitna ke molo arlak deka timke iye ke limsak e tipmi iye langane. “Yesus. Amwai ke imi sei mluk wom?” Tidue elio langane deka osep ola ina limsak napaupau ke baraine.
Pita wai iye ile Yesus kovok
(Matyu 26.69-75 e Luk 22.56-62 e Jon 18.15-18 e Jon 18.25-27)
66Pita dau dong moli ke ninu ina karap deka gute loulou ina ka mgo ila apmang bokongon ina gesa me polou ke iye. 67Iye vati Pita marang ke eiou deka bitna nekek ke Pita dagar e wai langane. “Wom blang omdong kap Yesus ka Nasaret ina.” 68Deka Pita bisi ine e wai langane. “Ngaile gute ari kovok e ngaile lem pelengon batne kovok.” Deka iye iding polou la ke dogur olwo boto ke ninu ina ekreng bitna. 69E apmang tonari vati iye deka wai ke osep ka tivri ari langane. “Gute are Yesus ila aten gesa.” 70E Pita bisi ine blang. Mase isuk boto vala gute gesa ka vri ari wai ke Pita blang langane. “Ngawai lokono. Wom Yesus ila aten gesa kesua wom gute Galili ina blang.” 71Deka Pita klingen gute tonari ila pelengon e aitno nevlik ine e iye wai soulu lokono langane. “Ai ngaile gute tonari ka umawai ine kovok. Langka aitno lumu mter ngayak umu ma Ida Tapolngon due agegeng ke ngong. Eiou ane.” 72Pita wai langane deka lokono kwako bole wai aling orwo ina. Pita klingen kwako bole wai deka lokono bitna sisir pelengon ka oglou Yesus wai ke iye. Alo ari Yesus wai ke Pita langane. “Eknikane ke epmes ma amwai emile ngong kovok aling eklu deka ma kwako bole wai aling orwo ina.” Deka Pita nogrum kngis omba ine.
လက်ရှိရွေးချယ်ထားမှု
Mak 14: ANT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
copyright 2003 New Tribes Mission, Sanford, FL 32771