Genesis 9
9
Omerikutiropamwe wa Ndjambi na Nao
1 #
Gen 1:28
Nu Ndjambi wa sera ondaya ku Noa novazandu ve na tja ku wo: “Kwatasaneye nu takavareye, mu urise indi ehi! 2Ovipuka avihe vyokombanda yehi, ozonḓera azehe zeyuru, noupuka auhe mbu nyangatara pehi, nozohi azehe wina mavi mu tira nokuuruma. Avihe mbi, ami mevitwa kehi youvara weṋu. 3Avihe, mbi nyinganyinga, na imbi mbi nomuinyo mavi rire oviparure vyeṋu; otja tji mbe mu pa ovihape, opunga ame mu pe avihe mbi wina. 4#Lev 7:26, 27; 17:10-14; 19:26; Deu 12:16, 23; 15:23Otjiṋa tji mu hi nokusokurya onyama, ndji nomuinyo, okutja ndji nombinḓu. 5Nungwari ngamwa ngu me mu zepa, ami me mu vere nonḓiro; ami me nyono otjipuka atjihe tji matji mu zepa; nu me vere omundu ngamwa ngu ma zepa omukwao. 6#Eks 20:13; Gen 1:26Ngu ma tirahi ombinḓu yomundu, ombinḓu ye mai tirahiwa i omundu. Orondu omundu wa ungurwa kosaneno ya Ndjambi.
7 #
Gen 1:28
“Nungwari eṋe kwatasaneye nu takavareye, nyangatareye, kombanda yehi, nu mu honapare mu ro.”
8Norukwao Ndjambi wa hungira ku Noa novazandu ve a tja: 9“Tara, ami me tjiti omerikutiropamwe wandje na eṋe nozondekurona zeṋu, 10novinamuinyo avihe, okutja ozonḓera, nozonyanda nozongombe, novipuka vyokuti, na avihe mbya pita motjitendeze. 11Ami me tjiti omerikutiropamwe wandje na eṋe, okutja kamaape ningi otjiutwa atjihe tji matji yandekwa i omupupo rukwao, nu kamaape kara omupupo rukwao mbu mau yandeke ehi.”
12Nu Ndjambi wa tja: “Otjiraisiro tjomerikutiropamwe omakarerere, ngu me twa pokati kandje na eṋe novinamuinyo avihe, otjo hi: 13Me twa po outa wandje wombura movikamba; ihi matji rire otjiraisiro tjomerikutiropamwe wandje nouye. 14Tji me eta ovikamba kombanda yehi, nouta wombura au munika movikamba, 15otji me zemburuka omerikutiropamwe wandje na eṋe novinamuinyo avihe, okutja omupupo kamaau yandeke ngamwa avihe, mbi nomuinyo rukwao. 16Outa wombura tji wa kurama movikamba, nami e u munu, me rizemburuka nomerikutiropamwe waaruhe nga pokati kandje novandu novinamuinyo avihe kombanda yehi.” 17Nu Ndjambi wa tja ku Noa: “Ihi otjo otjiraisiro tjomerikutiropamwe ngu mba tjita pokati kandje na atjihe tji tji nomuinyo kombanda yehi.”
Ovazandu va Noa
18Novazandu va Noa mba pita motjitendeze va ri ooSem na Ham na Jafet. Nu Ham ongwa ri ihe ya Kanaan. 19Nu mu wo omu mwa za ovandu avehe mbe ri kombanda yehi.
20Noa ngwa ri omuungure wehi, ongwa ri omundu omutenga okukuna omuvite. 21Nungwari eye tja nwa omeva womandjembere wa puruka ozondunge, na rara muzu mondanda ye. 22Ham, ihe ya Kanaan, tja muna kutja ihe u ri muzu wa karaera omuangu nerumbi re aveyevari pendje. 23OoSem na Jafet va toora ombanda yokombanda ave i ṱizire koviṱuve vyawo. Nowo va yaruka ovihahambunda nave kutjire ihe, ava tanaura omirungu vyawo kwarwe kutja ave ha munu omuzu wa ihe. 24Nu Noa tja yanḓimuka wa zuva ihi omuzandu we outjavari tja tjiti ku ye. 25Neye wa tja:
“Kanaan nga sengwe!
Nga rire omukarere wovakarere verumbi re novomuangu we!”
26Norukwao wa tja: “Nga tangwe Muhona Ndjambi wa Sem!
Nu Kanaan nga karire omukarere wa Sem!
27Ndjambi nga yandje oruveze oruparanga ku Jafet,
neye nga ture mozondanda za Sem! Nungwari Kanaan nga rire omukarere we!”
28Nu kombunda yomupupo Noa wa hupa ozombura omasere yetatu nomirongo vitano, 29na koka e notjiwondo tjozombura omasere muvyu nomirongo vitano.
လက်ရှိရွေးချယ်ထားမှု
Genesis 9: HRR-UNI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Herero Revision Bible © Bible Society in Namibia, 2021.