YOHANE 5
5
I Yesu mampakaʼosa tau pungku ri Betesida
5:1-18
1Ungka lairia reʼe posusa nto Yahudi, painaka ndeku i Yesu ri Yerusale. 2Ri Yerusale mosu ri ‘Baa-baa Bimba’, reʼe sambaʼa limbo, ri basa Ibarani toʼonya Betesida. Njairia njau alima tambale. 3Ri waʼa ntambale setumo poturu-turu waʼa ntau majuʼa; reʼe tau buta, reʼe tau dingge pai reʼe tau pungku. [Tau seʼe pura-pura mampepetaʼa da poleke ue limbo setu. 4Maka reʼe temponya malaʼeka i mPue, menaʼu ri limbo setu malengkosi ue painaka moleke. Pai isema ri oyo ntau majuʼa setu anu uyu-uyunya mosompo ri limbo anu ntongo mpoleke, inceʼe da osa juʼanya.] 5Njau njairia sambaʼa tuama anu togo mpuyu pai uayu ntaʼumo kajuʼanya. 6Pangkita i Yesu tau setu, pai ndaincani kasaemo mpodago kajuʼanya; ndatimosuki nepa ndapeoasi ndatoʼo, “Bara da rayamu da osa?”
7Mesono tau majuʼa setu natoʼo, “Pue, bereʼe tau ireʼi anu da maokotaka yaku nakeni ri ue sindara mpolekenya. Nepa moencu-encu yaku da njoʼu ri limbo, napesindiukamo yunu mosompo ri limbo.”
8Inceʼe pai ndapantoʼo i Yesu ri siʼa, “Pembangu, yuyu alimu pasaʼa pelinja.” 9Ri tempo setu seʼe liu-liu osa tau setu, meoko nayuyu alinya napasaʼa nepa malai siʼa.
Pewalinya setu kono ri eo Umapo. 10#Neh. 13:19, Yer. 17:21 Inceʼe puʼunya painaka waʼa nto Yahudi anu makuasa, mompau ri tau anu nepa osa setu, natoʼo, “Eo seʼi kono eo Umapo, mewali bareʼe maya siko mampasaʼa alimu.”
11Paikanya mesono tau setu, natoʼo, “Tau anu mampakaʼosa yaku ngena inceʼe anu mampokau yaku mampasaʼa aliku pai kupalai.”
12Mesono tau seʼe natoʼo, “Isema taunya anu mampokau siko mampasaʼa alimu pai nupalai setu?”
13Paikanya bareʼe naincani ntau setu tau anu mampakaʼosamo siʼa, maka i Yesu tepesuamo ri oyo waʼa ntau sondo.
14Ripurinya momberata i Yesu pai tau setu ri Banua i mPue, nepa ndatoʼoka siʼa, “Seʼi-seʼi siko osamo. Neʼe nupowia woʼu salaa, da naka bareʼe nupomberataka woʼu anu meruu ngkajaʼanya.”
15Inceʼe painaka malai tau setu natoʼoka waʼa nto Yahudi anu makuasa kaʼi Yesunya anu mampakaʼosa siʼa. 16Inceʼe painaka natepuʼumo ntau seʼe mampepali jaya da mampakasusa i Yesu, maka Sira mampakaʼosa tau ri eo Umapo.
17Paikanya ndatoʼo i Yesu ri tau seʼe, “Papaku motetala mpaliu bereʼe peosa-A rantani wawaseʼi, inceʼe painaka Yaku woʼu motetala.”
18Waʼa mpau-A setu marangani woʼu kajaʼa ndaya waʼa nto Yahudi anu makuasa, painaka napepali ntau seʼe jaya da mampepate Sira. Powia ntau seʼe setu, banya podo ua palewa-A songka agama kono eo Umapo, paikanya ua pantoʼo-A i Pue Ala setu Papa-A; inceʼe posokinya sia mampasiwia koronya pai Pue Ala.
Kuasa Ana mPue Ala
5:19-47
19Ndasono i Yesu waʼa ntau setu ewanceʼi, “Monco Kutoʼoka komi, Ana bareʼe nakoto mawianaka bara nunjaa-njaa pai Kuasanya ngkalionya. Siʼa podo mawianaka nunjaa anu nakita ndawianaka mPapa-Nya. Maka nunjaa anu ndawianaka mPapa, incetu woʼu anu nawianaka Ana. 20Maka Papa mampotowe Ana pai mantujuka Sira pura-pura anu ndawianaka ngkalio-A. Pai Papa woʼu da mangantujuka Sira waʼa mpowia anu meruu ngkabangke, painaka da jingki rayami. 21I Papa setu mampapembangu tau mate, pai mawaika tau seʼe katuwu anu monco pai bereʼe kapusanya; ewanceʼe seʼe i Ana mawai katuwu anu bereʼe kapusanya ri tau anu mampokono nawaika katuwu. 22I Papa bareʼe da mangabotusi huku ntau. Maka pura-pura kuasa mpobotusi roo ndapepombaika ri Ana-A. 23I Papa mampowia ewancetu da naka pura-pura tau mantubunaka i Ana, da ewa pantubunaka ntau seʼe i Papa. Tau anu bareʼe mantubunaka i Ana, bareʼe woʼu mantubunaka i Papa anu mampokau i Ana.
24Monco-monco kojo waʼa mpau-Ku seʼi: Tau anu mampari ndaya waʼa mpau-Ku pai meaya ri Sira anu mampokau Yaku, mampotumpu katuwu anu monco pai bereʼe kapusanya. Siʼa bareʼe da ndahuku; Siʼa lapamo ungka ri kapate pai maratamo katuwu. 25Monco Kutoʼoka komi: Maʼipa temponya da rata – pai lawi ratamo temponya – tau mate da mangadonge oni nganga ana mPue Ala. Pai tau anu mangadonge da tuwu. 26Ewa i Papa ngkalio-A anu puʼu ngkatuwu, Sira mampapewali Anaa puʼu ngkatuwu woʼu. 27Sira mawaimo ri Anaa kuasa mpobotusi, maka Sira i Ana Manusia. 28Neʼe ndipojingki ndaya madonge inceʼi, maka maʼipa temponya da rata pura-pura tau anu matemo da madonge oni nganga-Nya, 29#Dan. 12:2 nepa da mesuwu ungka ri raya dayo. Tau anu madago powianya da membangu mantarima katuwu. Paikanya tau anu majaʼa powianya da membangu da ndapahuku.”
30“Yaku bareʼe Kukoto mawianaka bara nunjaa-njaa malulu pepokono-Ku ngkalio-Ku. Yaku podo mangabotusi silulu pai anu ndasongkaka Yaku mPue Ala. Pai botusi-Ku setu mayoa, maka Yaku bareʼe malulu pepokono-Ku ngkalio-Ku, paikanya pepokono mPapa anu mampokau Yaku.
31Ane rapanya Yaku mangancabi kono koro-Ku ngkalio-Ku, posabi setu bareʼe da ndaaya. 32Paikanya reʼe tau ntaninya anu mangancabi kono Yaku, pai Kuincani posabinya setu monco. 33#Yoh. 1:19-27, 3:27-30 Komi roomo mampokau tau njoʼu ri Yohane, pai siʼa roomo mangancabi ri kamonconya kono Yaku. 34Kakononya Kutoʼo inceʼi, banya ua Yaku mampomata-mata posabi ungka ri tolino, paikanya da naka komi tesorepaka. 35I Yohane setu ewa silo anu mareka pai sindinya merara. Komi podo sambinoroja ndipampokawongko mantarima raranya setu. 36Paikanya posabi-Ku meruu ngkabangke pai posabi i Yohane. Nunjaa anu Kuwianaka seʼi-seʼi inceʼemo tetala anu ndapapakoyoka i mPapa ri Yaku, mampatongawa kamonconya i Papa anu mampokaumo Yaku. 37#Mat. 3:17, Mrk. 1:11, Luk. 3:22 Pai i Papa anu mampokau Yaku woʼu mawai poncabi kakononya Yaku. Komi bareʼepa reʼe ndipadonge oni nganga-A bara mangkita taʼa-A. 38Waʼa Ntuntu-A bareʼe totaʼa ri rayami maka komi bareʼe ndiaya Yaku anu ndapokau. 39Komi mampeguru bangani Ncura Magali, ndisarumaka powiami ewanceʼe, komi da mampotumpu katuwu anu monco pai bareʼe da reʼe kapusanya. Ntanoka Sura Magali setu ngkalionya mangancabi kakononya Yaku. 40Paikanya komi bareʼe ndipokono maʼi ri Yaku da ndiparata katuwu anu bareʼe da reʼe kapusanya.
41Yaku bareʼe mampepali peunde ungka ri tolino. 42Kuincani komi. Kuincani komi ri rayami bareʼe mampotowe Pue Ala. 43Yaku rata pai kuasa mPapa-Ku, mau ewanceʼe komi bareʼe mantarima Yaku. Paikanya ane tau ntaninya rata pai kuasanya ngkalionya, ndipokono mantarima siʼa. 44Ewambeʼi da ndapampoaya monco komi, ane komi mampepali peunde ungka ri kasiyunumi, pai bareʼe mampari-mpari mampepali peunde ungka Pue Ala Anu Sambaʼa-mbaʼa? 45Neʼe ndisarumaka Yaku da mampetisala komi ri suara i mPapa. Ntanoka anu da mampetisala komi inceʼemo i Musa, siʼa anu ndipomata-mata setu. 46Ane rapanya ndiaya kojo i Musa, sangaya-ngaya da ndiaya Yaku, maka kakononya Yaku anu naʼuki. 47Paikanya ane bareʼe ndiaya nunjaa anu naʼuki i Musa, ewambeʼi da ndipangaaya nunjaa anu Kutoʼo?”
လက်ရှိရွေးချယ်ထားမှု
YOHANE 5: LAIPMF
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ