Ipakilya 14
14
1N’arweṉi gw’intyugu s’Amrafèl, y’ôga wi Sinari; Aryok, y’ôga w’Elasar; Kedorlaômèr, y’ôga w’Elam; ni Tidal, y’ôga wi Gôyim, 2wiṉo w’agèndi gô nw’igoṽi ni Bera, y’ôga wi Sôdoma, ni Birsa, y’ôga wi Gômora, ni Sinab, y’ôga w’Adma, ni Semebèr, y’ôga wi Sebôim, n’ôga wi Bela, yô ne Sôar.
3Wiṉo waôdu w’alataṉi gô mbôra mô g’ôdèdè wi Sidim, yô ne mbeṉe yi nyanga. 4W’ayanjiṉagi Kedorlaômèr vo igôm̃i ny’impum̃’imbaṉi, ndô g’ômpum̃a w’igôm̃i n’irarô w’avavi.
5Ndô g’ômpum̃a w’igôm̃i ni nay aṽyeṉi Kedorlaômèr n’aga w’avegagi na yè, n’awôli waô Refayim gô Asterot‐Karnaim, ni Zuzimi gô Am, n’Emimi gô Save‐Kiryataim, 6n’Ôri gô nômbi yaô yi Seir, kwanga gô mbilinga yi Paran, wi re pyèrè n’itôve. 7Avila vovo awinyi waô aṽya gw’En‐Mispat, yô ne Kadès, awôle mongi Amalèk gô ntye yaô yôdu, n’Amori kè w’alwaṉi gw’Asason‐Tamar. 8N’agogw’ôga wi Sodoma, n’ôga wi Gômora, n’ôga w’Adma, n’ôga wi Sebôim, n’ôga wi Bela, yô ne Sôar; n’agenji waô g’ôdèdè wi Sidim. 9Gô nwa ni Kedorlaômèr, y’ôga w’Elam, ni Tidal y’ôga wi Gôyim, n’Amrafèl, y’ôga wi Sinar, n’Aryok, y’ôga w’Elasar; ag’anay gô nwa n’ataṉè.
10Ndô ôdèdè wi Sidim w’avegagi n’amemba am̃enge m’ôwèlo wi tar, n’awangi ôga wi Sôdoma na wi Gômora, n’avôswi waô vovo; na waô w’arigaṉi w’awangi gô nômba. 11N’awongi waô aṉiva môdu mi Sôdoma na mi Gômora n’inyi saô sôdu, agèndaga. 12N’awongi waô Lot, y’ômwaṉ’ôṉôm̃e wa mwô’ngwè w’Abram, y’alwaṉagi gô Sôdoma, n’aṉivi mè; n’agèndagi waô.
13N’ôm’ôm̃ori w’averi aṽyeṉi gô myez’Abram, ya mwô’Ebèr, y’alwaṉagi gw’imbilinga si Mamre, mw’Amori, ya mwô’ngwè ôṉôm̃e w’Eskol, na ya mwô’ngwè ôṉôm̃e w’Anèr, w’avegagi jeka pe njeka n’Abram. 14Ndô gw’ayogyô Abram inè, mwô’ngi yè ôṉôm̃e agôtyô mbwedi, aweyi inyômbi nyè ny’ayanyô gô nagô yè, inkam̃a s’aṉôm̃e wi ṽèmba ntyarô n’igôm̃i ny’aṉôm̃e im̃ori n’aṉôm̃e eṉanay, agombizi yè aga kwanga gô Dan. 15N’ageri yè nkumbi yè, gô nwa na waô ôgwèra, ayè n’inyôngô sè iṉôm̃e; awôli yè waô, agombiza waô, kwanga g’Ôbar, yi re gô nkôṽa y’ôg’ônyantwè wi Damas. 16N’awiṉizi aṉiva môdu, n’awiṉizi kè Lot ya mwô’ngi yè ôṉôm̃e n’aṉivi mè, n’antô kè, n’aṉaga.
17Gw’awinyi Abram ayè keṽa pe Kedorlaômèr n’aga w’avegagi na yè, ôga wi Sôdoma agogwi gô dataṉa na yè g’ôdèdè.
18Ndô Mèlkisedèk, y’ôga wi Salèm, agoguny’inya n’ivè; ayè avegagi miṉisè y’Anyambyè y’Igôṉô. 19N’azavinyè yè awulya inè: Ôzaviṉô gôr’Abram vo Anyambyè y’Igôṉô, ôṉivi w’ôrôṽa ni ntye! 20Ôzaviṉô kè gôr’Anyambyè y’Igôṉô, yi re pa p’ilôvalôvi yo gw’ago mo! N’avenyô yè ne Abram em̃ori gw’igôm̃i avila gô yom̃a yôdu.
21N’awulinyi ôga wi Sôdoma Abram inè: Va myè aṉaga ko wè bong’aṉiva gôre wè. 22N’awiṉizi Abram ôga wi Sôdoma inè: My’are tômbiṉa p’ôgo wam̃ gôre Yeôva Anyambyè y’Igôṉô, ôṉivi w’ôrôṽa ni ntye, inè: 23My’awong’ezom̃’edu gôre wè avila gô ya yi re na wè vangaṉe nyongè, ge ôgoli w’intyôzô s’atanga, awè vende bulya inè: My’are pagiza p’Abram. 24E zel’ezom̃a gôre myè kaô dadyè eza z’ayenyô n’awanjô, ni mbèy y’aṉôm̃e w’agèndi na myè, Anèr, Eskol, ni Mamre; waô wi be bonge mbèy yaô.
လက်ရှိရွေးချယ်ထားမှု
Ipakilya 14: MYE
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society in 1927.