Uan 5
5
Isus Nafafiya sik Taw yud Malo
1Ay ginanya taw Udyu e fagmafulun sas Erusalem, ay Isus nalo sanya. 2Sis Erusalem e sik falinoan at makbang sis sakbawan fagfasakboan tupa. Taw Ebriyu nafangayan ka fag falinoan te, Betesda. Sanya e limak fagsarirungan si sangaba tigyangan falinoan. 3Ay ngayu at taw ke daylan at matagilid sanya sis fagsarirungan. Tiba wa glag, ay tiba wa malo, ay tiba wa malelegan. [4At ke daylan igfanya at lino nu guwigan. Fakatanyaun, tiba ginan Diyus at tagfabarita kadaga ay gfauwigan ka fag lino. Ay gina ka fag lino glelegan, nus nga sinu at gumuna sasad lino, kanya nfiya wan, nus nga setaw at daylan.] 5Ay sanya sik mangama nu gadaylan 38k banwa wan. 6Ay Isus nalag ka fag ama nu matagilid sanya, ay nasaful te, glugo wan nu katanya. Ay nainto sanya fag ama te, “Go kaumsig o kafiya?” 7Ay at ke daylan nabalus te, “Ku fun, kin satu, ay roro we guba angku sasad lino. Lino nu guwigan wan, gina aw nangakbang, tibak taw naguna wa gugat angku sasad lino.” 8Ay Isus nalong sanya fag ama te, “Alindugi, ay urugi am igyan ay loi wan!” 9Ay rodi tv, ka fag ama infiya wan. Ay naubanan wa fiya at igyan ay nalo wan.
Ay ginanya Fakamatoun fag Menit. 10Taw Udyu at ngay tagmagurang nalong sat kinfiya te, “Katsi Fakamatoun fag Menit way, lag guba am igyan.” 11Ay at kinfiya gbalus te, “At nafafiya angku at nalong angku te, ‘Urugi am igyan ay loi wan.’ ” 12Ay ka fag ngay taw Udyu ginto sat kinfiya te, “Sinu at nasugu emu katanya?” 13Ay at kinfiya wa nasaful te, sinu manga aro fag taw at ngayan, teway Isus infalyu wa sas wa taw ay taba wa inyayu.
14Ay rodi ataw Isus nalag yangay fiya at nafafiya sis Diyus bale, ay nalong anya te, “Katsi nfiya wo, ay lag gdog gasalanan, laman ban di mdasug sa emu at mauri, glabi yay aro am daylan.” 15Ay ka fag ama nalo wan ay nafoyung sa sangay taw Udyu at ngay tagmagurang te, “Isus at nafafiya angku.” 16Ay nu katanya, ka fag ngay taw Udyu kalimata way Isus, anway Isus nu gfafiya sis Fakamatoun fag Menit.
17Ay Isus gbalus sanya fag ngay taw Udyu te, “Ku Mama gfagbulunan tuwa faggugat anggan katsi. Ay anggan aw igfagbulunan kyangay.” 18Isus nalong wayay katanya, inkugat yay ka fag ngay taw Udyu nu gafateun anya. Bunwa fagtvngvd Isus nafamaboan sis Fakamatoun fag Menit, anggan wa sigon at nalongan te, “Diyus ku Mama.” At masuwad te, Isus ay Diyus kata yay at sadi.
Diyus At Baguwama e Fagmadaragangun
19Ay Isus nalong yangay sanya fag ngay taw Udyu at ngay tagmagurang te, “Matuyan iglong aw ayu te, aw, Diyus at Baguwama, kwa mafafagbulun mandi, nu dakway ro naulit ku Mama at fagbulun. Ay nus nga setaw ku Mama at fagbulun, katanya yangay ku fagbulun. 20Ku Mama kesug tuwa angku, at baguwama, nu katanya, gfoyung tuwa angku at fagbulun fagayu. Ay moyung yay ban angku tibak fagbulun glabi yay katsi, laman madulawan tuwam. 21Nus nga setaw ku Mama nu gfaleleg at kinkate, katanya akyangay, at baguwama, mafafaleleg kyangay nus nga sinu ku fakaumsigun gfaleleg. 22Bunwa ku Mama tagfili te, go sinu at fagfauriun ay go sinu at fagfalangfeun. Ku Mama nafili angku, at baguwama, laman tagfili te, go sinu ku fagfauriun ay go sinu ku fagfalangfeun, 23laman fagayu taw sumeg ban angku, at baguwama, kata nu gseg ku Mama. Nus nga sinu fag taw nu dway gseg angku, wa gseg anggan sa ku Mama, at nasugu angku.
24“Matuyan iglong aw ayu te, nus nga sinu at nadungug ku longan ay gafanud sa at nasugu angku, kanya e leleg tuwa ban faggugat. Kanya di ban gfaurianan teway kanya nalangfe tuwa fakateun ay gleleg tuwa ban faggugat. 25Matuyan iglong aw ayu te, umdasug ban sik menit, ay indasug wa ngani katsi, at ngay kinkate dumungug ban Diyus at Baguwama nu gelongan, ay at dumungug anya gleleg tuwa ban. 26Ku Mama e fagmadaragangun nu gfon leleg, ay anggan aw, at baguwama, e fagmadaragangun kyangay gfon leleg, teway ku Mama nafon angku fagmadaragangun. 27Ay ku Mama nafon yangay angku fagmadaragangun nanfili te, go sinu ku fagfauriun ay go sinu at fagfalangfeun, anway aw wan Taw at Baguwama. 28Lag am gadulawan sa ku foyungan, anway umdasug ban sik menit fagayu taw at kinkate dumungug ban nu gelongan aw. 29Ay fagayu ban at kinkate umleleg siginan at fagmateanan. Ay fagayu at masine at fagbulun gdog yangay ban gleleg at yud e fakatabuwan. Ay fagayu mauri at fagbulun, gdog yangay ban gleleg, ay roro e faurianan way ban.”
E Nafatuyan te, Matuyan Isus At Longan
30“Aw, kwa mafafagbulun nu aw way sesadi. Gfaning aktuwa ku Mama at longan angku nu gfili te, go sinu ku fagfauriun ay go sinu ku fagfalangfeun. Ay matuyan nu gfili aw, anway dakdi gfaning ku fakaumsigun mandi, antuwa at nasugu angku at fakaumsigun. 31Nu aw way mandi tagfatuyan ku ugali, we masuwad. 32Ay roro e tagfatuyan tuwa sa ku ugali. Ay nasaful aw te, matuyan tuwa at longan. 33Ay ebi nasugu am ay ngay fanuguwan sas Uan. Ay Uan nafoyung at matuyan sa angku baliwa. 34Bundi sik taw at nafatuyan fiya ku ugali. Nafoyung kway ayu Uan Tagfasurung at longan laman umlangfe ban am. 35Uan Tagfasurung kata sik salung gdamlag, ay dewa yud nalugo ka fag damlag inkumsig tuwam. 36Ay e nafatuyan yay ku ugali glabi yay Uan Tagfasurung nu gfatuyan. Ku Mama nafafagbulun sa angku fag ngay fagbulun, kanya way ku fagbulun, ay kanya wan tagfatuyan te, ku Mama at nasugu angku. 37Ay ku Mama at nasugu angku, kanya tagfatuyan sa baliwa angku. Ay faggugat yam batang gdungug ku Mama nu gelongan. Ay yam batang glag ku Mama at mata. 38Ay yam mangaro gamatangan ku Mama at longan, madyay yam gafanud sa angku, ku Mama at nasugu. 39Ay gadal am fiya fiya Diyus at longan teway gayup am te, umke leleg am at yud katabu faggugat. Kanya wa fag Longan tagfatuyan ku ugali. 40Ay dewa katanya, wam kaumsig kalong gafaningun angku te, laman gleleg tuwam faggugat.
41“Ku fagsarapun bunwa te, laman e sumeg angku. 42Nasaful kwa te, si ay amatanganan wam kesug Diyus. 43Ay ku fagindasugun ste swa daga anway ku Mama nafon angku at fagmadaragangun. Ay dewa katanya, wam gafanud sa angku. Ay nu tibak taw tuwa long taglong siginan at fagagbilugun fag fagmadaragangun, gafanud tuwa long am dawdaw anya. 44Tain ban nu gafanud am sa angku ay fakaumsigun nu anway te, ay iba sumeg ayu? Ay wam gsarap sa baliwa te, laman Diyus guseganan tuwa ayu. 45Lag am gamatangan te, nanfoyung aw ay asalanan sa ku Mama. Yaya! Ay ay fagsegun Muisis tuwa, at nanfoyung ay asalanan. 46Nu gafanud tuwam sas Muisis, anggan sa angku gafanud yangay ro am, anway Muisis naguna wa nafoyung sa baliwa angku. 47Ay nu dway am gafanud Muisis at ngay rirukan, setain ban nu mafanud am ku longan?”
လက်ရှိရွေးချယ်ထားမှု
Uan 5: TAWEAST
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Copyright © 2023 by OMF International, Philippines