Markus 6
6
Sɨbɨni Nazarat hiya Yesu
(Matiyu 13:53-58; Luka 4:16-30)
1Yesu dɨ tlusa ɗɨka dɨ piya vuwagwahi husai, sɨba gyagiyakɨ niwasɨ ma dɨ ɗiyusɨ. 2Dage ɗama Mukwa sawakɨ, dɨ dzakwa gyagiyakɨ a Bali ta tlɨn mana pagham, Sɨbabau cassɨ dɨ dɨkayusɨ dɨ naya-naya ghɨrɨya ɗɨngɨ tusɨ.
Da tsatsiyaya tsafayatlɨna ndu, “Nakɨn sɨnkɨn amar nɨkɨnkutato kɨnayikwa jiwan kɨna? Amar nakɨn nineti kɨn ayikwa? Wa tsaya? Tata ɗima vare waiya ghɨrɨ ji wankɨna? 3Awai dɨma ti ji naka ba tsawaɗɨ ko nda? Dɨma ti ji vɨrkɨ na Maryamu wu nda, yasɨ ni Yakubu ɨna Yahuza ɨna Saminu wuwa? Awai dɨma dawan wasɨ tɨvan ka je wute ɨna mikɨnu nda?” Je mbasa tlɨna ndɨrusɨ.
4Je ɗɨnga tlɨna Yesuwa ndu, “Ai Bacan na Ghɨnsɨ ma kwa gyarwatu kwapa da vuwa gwahi husɨ, ɨna ɗe turusɨ ɨna kawasɨ.” 5Yesu marma dɨ ɗɨma hamba ghɨri yikau. Tamma ndɨ ara ka kɨn wasa ghama sɨba vɨzhɨ ndaɓeni dɨ lai tlɨn kau. 6Yesu dɨ ɗuwaɗuwa ghama kwahiya zahiya canhɨ natlɨn.
Kafaka nika bahɨn tsɨreni a Yesu
(Matiyu 10:5-15; Luka 9:1-6)
Yesu dɨ ndandɨma vuwa gwahiyayo gyaɓoya tɨda gyagiyatlɨn.
7Je zara nikya bahɨn tsɨreni ka ewute dɨ kafa tlɨn tsɨr-tsɨr dɨ tsatlɨn Iko aghama mbasaka riwan.
8Dɨ ɗɨnga tlɨna ndu, “Kiyi ndɨ kwambal etivu nana, ama na tabi kiya pɨkɨtɨm, ko tapu, ko mɨr ɗe bakwal nanau.” 9Zi kakɨr, ama nate kiya wuya kabu. 10Ndyam kam ba na dawana ɗahɨka, makɨ ndyeyi kwapa mukwa tlahɨ tana ɗe taka vuwa gwahika. 11Ndyam vuwa gwahi mana zanaka, ka nja gɨsahinakai, na pɨtla kwatai tata ngarana eyi sɨdɨ jika ghamatlɨn.
12Je bawa tlɨn, da bɨla sɨba ndu ta dzɨga tlɨna ɗe lyapɨ natlɨnai. 13Da bawai tɨmbɨzɨm cass da faka shu sɨba vɨzhɨ, da lai tlɨnai.
Ɓalaka Ghama Yuhanna ba Baptisima
(Matiyu 14:1-12; Luka 9:7-9)
14Je dɨkaya Malvu Hiridus, ndɨra ɓandakɨ ta ngɨna Yesu koyikweki. Niwi data ɗɨnga ndu, Atlai Yohanna ba Baptisima aɗe sɨba miya tlɨn, hamba zai jika tɨ data iko ba ɗɨma nikin ham ba ghɨri.
15Niwi du, “Tiji Iliya.”
Niwi dɨ kwaya ndu, “Tiji Annabi, wan wuta ɗe Annabawa niya shiyi.”
16Dage dɨkaya wanka Hiridus du, “Yohanna, ba mɨn zai dɨ ɓalaya ghamusai, dɨ tlusai!”
17Hiridus dɨ zai dɨ kuya Yuhanna dɨ ɗɨhɨ nusɨ dɨ baiya dɨbi tɨɓusai, Hiridus ɗɨn wankaka dama Hiridiyas, anta vashi wasɨ Filibus ma ti hiridus dɨ kɨnaza. 18Adama Yuhanna sasa ɗɨnga ka Hiridus du, “Doka tsama darhɨ fa kɨna anta vashi fu.” 19Je mbasa Hirudiya a ɗingɨ ta Yuhanna, je nje dona darhɨ ba ma ghamusai amarmau. 20Adama Hiridus kata lakalaka Yuhanna da gusɨ gau dan asɨnsɨna ndu ti bana ɗɨma saɗa, Sɨm ba cartɨ, ta dɨkaya-dɨkaya ɗɨngɨ tusɨ dɨ arusɨ e mbam. Hiridus sasa damahɨyusɨ sosai ndyam wookaci bate dɨkaya ɗɨngɨ taYohanna, ndyam ɨna wanka tɨdɨga lu dɨkayaka ɗɨngɨ tusɨ.
21Je nje mara ɗɨ darhɨ ɗe wara muku ma vɨrka Hiridus, je te paa ghama sɨba Gwalfu a gyaruni sɨba yaki niwasɨ ɨna Gyaruni ni ɗe mɨdzai ta Galɨlɨ. 22Daga buwaza a wunta Hiridia dibi zaba zabɨ, dɨ meɗe Hiridus ɨna sɨbɨ niwasɨ.
Je ɗɨnga wɨnka malvu du, “Tsiwan ndyam hamba mada lu mɨna tsoontsai.” 23Har dɨ tsɨmatla ndu, “Ndyam hamba mace tsiyuwɨn ka mɨna tson, ko tanga pɨra gwalfu tuwun.”
24Je bawaza viyakan dɨ ɗɨnga maza du, “Mɨna rawa ma?” Je gɨsa Mahɨka du,
“Ghama Yohanna bana dɨma Baptisima.”
25Nda dliya-dli dɨ zaza tira malvu a sɨbɨ niwasɨ hɨdakɨ dɨbɨ rawau du, “Mɨna lu fa tsan ghama Yohanna ba Baptisima conakɨn ɗe kiɓɨ.”
26Daga dɨkaya wanka Malvu dɨ ɗuwa-ɗuwa ghama wanka ama adama tsɨmakɨ tusɨ ɨna sɨbɨ niwasɨ tɨma lu dɨ hɨratlayu. 27A ɗika je kafa bacan nusɨ a malvu dɨzai dɨ buwai ghama Yohanna a ee tɨɓusa kurkuku. 28Dɨ buwai ɗɨ ghama Yohanna ɗee kiɓɨ, dɨ tsa wunka njima dɨ baza tsa maza. 29Dage dɨ kaya wanka sɨba gyagiyakɨ ni Yohanna. Je buwa tlɨn dɨbi kiya tuwa-tuwa Yohanna, dɨ pɨsai.
Yesu ɨse sɨbɨ zangu vatlɨ
(Matiyu 14:13-21; Luka 9:10-17; Yuhanna 6:1-14)
30Sɨba gyagiyakɨ ni Yesu daga piya tirusɨ dɨ paghamatlɨna tirusɨ dɨbɨlaya ndyam hamba tlɨne ɗɨmau, ɨna hamba tlɨne gyagiya tlɨn. 31Aɗika Sɨbɨ cassɨ da buwatlɨn da batlɨn har Yesu ɨna sɨbana gyagiya tirusɨ amarma wokaci ba taa hambatau. Je te ɗɨnga tlɨna ndu, “Tiwika mibama ekwa sɨbɨ dama na sawa gaɓɨ.”
32Je zatlɨn ndyan tlɨn ɗe kwatal dɨ batlɨn edu wimoyu ndɨ tlɨn. 33Ama sɨbɨ cassɨ dɨnaya bahi tatlɨn dɨ sɨna ndɨra tlɨnai, sɨbɨka je ɓa mirai dɨ cagatlɨna ɗamaƙe na data batlɨn. 34Daga dawusa Yesu wa ta vɨna madzɨ, dɨ naya sɨbɨ cas, je ta lulu tlɨn, adama tlɨn ndɨ wan tɨmakwi sɨba kwa baki. Dɨ dzakwa gyagiya hiyatlɨn kutato cas.
35Daga ɗɨma rɨdzɨ, sɨba gyayakɨ niwasɨ dɨ buwa tlɨna tirusɨ, du, “Ridzi ɗɨnsai, nai wɨma ɗɨkɨnu. 36Zu sɨbɨ dɨ zatlɨna vuwa gwahɨ gyarya mbatlaiya ɨna gyaɓoya dɨ batlɨn kɨna hambata adama ghama tlɨn dɨ tau.”
37Ama Yesu dɨ gɨsatlɨna ndu, “Hɨnka tsitlɨn hambata ka kwa dɨ tau.”
Je tlɨne ɗɨngaya ndu, “Wato fiyalu mi bama kɨna pɨkɨtɨm ba dinari ɗel tsɨr baibaya pɨnaka bacan ɗo tir furfuɗai adama mi tsatlɨn dɨ taa?”
38Yesu dɨ tsiya tlɨna ndu, “Hɨna pɨkɨtɨm mɨna? Tika naya dza.”
Daga ndarnau dɨ marau du, “Pɨkɨtɨm vatlɨ ɨna ghɨdɨ tsɨr.”
39Je zai tlɨna Yesu dɨ ɗɨnga sɨbɨ ndyam, dɨ tsatsɨgatlɨn a tsɨga-tsɨgɨ ata betlema wasɨ. 40Dɨ tsɨga tlɨn a tsɨga tsɨgɨ, niwi ɗel wutɨ, niwi kuma diɓi vatlɨ-vatlɨ. 41Je kiya pɨkɨtɨm vatlɨ ɨna ghɨdɨ tsɨr ka a Yesu, dɨ tla tiyusɨ dɨna, dɨ godeya Ghɨnsɨ dɨ wakɨsa pɨktɨnka, dɨ tsa sɨba gyagiyaki niwasɨ dɨ tsa a sɨbɨ. Je mɨna Tsaaʻa ghɨdɨ tsɨreyaka a tsafayatlɨn ndyam. 42Ndyam dɨ tau dɨ ɨsa tlɨnai, 43A ɗika sɨbana gyagiya tirusɨ dɨ paa bɨrɨn pɨkɨtɨm ɨna ghɨdɨ ma sɨlau badai dir ɓitin bahɨn tsɨr. 44Ndɨ dzafu sɨba taka baibaya zangu vatlaɨ.
Yesu Tiva Ghama Bi na Madzi Gyarya.
(Matiyu 14:22-27; Yuhanna 6:16-21)
45Nda dliyadli Yesu dɨ ze sɨba gyagiyakɨ niwasɨ dɨ zatlin ɗe kwatal dɨ cagaya ɗamaka pakɨ ta Betsaida, tɨ kwaya tsa darhɨ sɨbɨka dɨ batlɨnai. 46Daga tsa darhɨ sɨbai, je ghɨmusa ghama ɗai e tiya gil.
47Daga shamaza yu, kwatal da tsafa madzɨ gyarya, Yesu da me wasɨ ata vɨna madzɨ. 48Sɨba gyagyiyakɨ niwasɨ data saketɨ e tive kwatal adama garaba ruwun badata kanbɨlletlɨn. Daga ga hacawu dɨ tiva ghama bii dɨ busa tira tlɨn. Dɨ ɗɨma wan sa zira tlɨnai, 49Ama dage tline nayusa ta tiva ghama bii, dɨ tsaka ndu ariwen, dɨ ɓaa kwararai, 50Adama ndyan tlɨn anayya nayau, lakaka yu dɨ kuya tlɨnai.
Ama nda dliyadli Yesu dɨ ɗɨnga tlɨna ɗɨnga ndu, “Nata lɨɓa nau! Gammɨn, nata la ka yuwu.” 51Je zusɨ ɗe kwatalla tira tlɨn, je tsɨrusaya ruwum ka. A ghɨri dɨ kuya tlin ndyamai, 52a dama a sɨmma zhamata ɨsa ya ka sɨbɨ zagu vatlɨ a pɨktɨnkau, adama kwasa-kwasa canhɨ na tlɨn.
Yesu Lai Sɨba Vɨzhɨ a Vugwahɨ Ta Janasarata.
(Matiyu 14:34-36)
53Dage tlɨne pɨla madzɨ, dɨ dawatlɨna pakɨ ta Janasarata, dɨ ɗɨhɨna kwatalla ta vɨna madzɨ. 54Abo tlɨn ndɨ bawa jika ɗe kwatal, dɨ sɨna Yesuwa ya sɨbɨ. 55Dɨ za tlɨna vuwa gwahiya mirayayo, da buwai sɨba vɨzhi ata hamba piyo ni tlɨn da bai tlɨn ndyam adare yin Yesu. 56Ndyam e te busɨka, avuwa gwahi gya ɓoya, ko avuwa gwahi gyaruya, ko a kyar vuwa gwahi, da piye sɨba vɨzhɨ a ta vɨna kasu. Da rawusɨ dɨ tikɨna kwai tan gan vina Kabɨ tusɨ, kuma ndɨ ba tɨkɨnaka dɨ lai.
လက်ရှိရွေးချယ်ထားမှု
Markus 6: MKF
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©2023 Seed Company in collaboration with Language Developers and Bible Translators Association