Markus 9
9
1Je te ɗɨnga tlɨna ndu, “Mɨna ta bɨlana katsɨ-katsɨ, niwi je yi sɨba tlɨnde tsatsɨr ɗikɨm tlɨmma miya tlɨnu kwapa a nai Gwalfu ta Ghɨnsɨ bɨtla kalpɨ.”
Dzɨgɨfahiyusa Yesu
(Matiyu 17:1-13; Luka 9:28-36)
2Daga ɗɨma sɨno maha, Yesu dɨ kiya Bitrus, a Yakubu ɨna Yuhanna dɨ batlɨne wutai a ghama wi ɗai jɨngɨɗɨngɨɗɨna, ndɨ tlɨna metlɨn jeyi, Yesu dɨ Gwa dzɨgɨfahiyusa bɨɗa tlɨn. 3Kabɨ tusɨ dɨ gwa dzɨgahiyaza pyoya pekyatl da tsa tsau, ma du wima iya bɨsaza wanka ɗe duniyau. 4Ni Anabi Iliya ɨna Annabi Musa dɨ bawa tlɨna tira tlɨn, tlɨnda ta dɨngɨ ɨna Yesu.
5Bitrus je ɗɨnga Yesu wa ndu, “Basɨnakɨ, a mbɨnasu midɨ ɗikɨm, gaya tiya kɨnci kidi wutɨ nafu wutɨ na Musa, wutɨ dɨ na Iliya.” 6Asɨnma hamba tɨ da ta ɗɨngau, A dama Bitrus ɨna bɨrɨn sɨba gyagiyakɨ niwasɨ ka, lakaka yu kwitlɨn kwiyai.
7Je dawaza lɨpɨm dɨ bɨ dzaɓatlɨneyi, je dɨ kaya wuya mai a ɗe lɨpɨm ka ndu, “Nakɨn kɨn lenuwɨn, bamɨne camusɨ dɨ kayiya!”
8Ndɨ wan tsɨɓa ka ti, dɨ ndarnau a nemanan wuye yu, su ndɨ Yesu je wute ɨna tlɨn.
9Tlɨn ndɨ ɗe dawa hiya tlɨna ghama ɗai, Yesu dɨ gɨtlatlɨna ndu, na te bɨla wi hamba hɨne nayau, kwapa vɨrkɨ sɨm tlata ɗe sɨba miya tlɨn. 10Dɨ ara ɗɨngɨ ka nda cantlɨn, tlɨn da ta tsatsiyaya tsafaya tlɨna ndu, “Maji zhamata tlahiya ɗe sɨba miya tlɨna?”
11Dɨ tsɨyusa ndu, “Madɨ zai ji sɨba gyagyi ni Musa dɨ ɗɨnga ndu, “Iliya ji dzakwa buwaka?” Je te ɗɨnga tlɨna ndu,
12“Ndɨ wanka Iliya ji dzakwa buwakɨ. Adama dɨ raya kutatau, a rɨdla ndu ma ji ndɨra vɨrkɨ sɨma, kwapa vɨrkɨsɨn sa kaitɨ tuwahɨ-tuwahɨ dɨ hiyusa?” 13Mɨna ta bɨlana a cagɨsu dɨ busa Iliya sɨbɨ dɨ ɗɨmaya hamba piyatlɨn, wane rɨdla ndɨrusɨ ɗe rɨdlɨka.
Yesu Lai Vɨrkɨ ba Tɨmbɨzɨm.
(Matiyu 17:14-21; Luka 9:37-43)
14Dage tlɨne piyeyin bɨrɨn sɨba gyagiyakɨ niwasɨ, je naya sɨbɨ cassɨ a ndɨwutlɨn seyi, tlɨn da ta takayakɨ fa sɨba sɨna doka na Musa. 15Daga nda naya ka Yesu wa sɨbɨ, dɨ naya-naya ghɨri, je buwa tlɨna tirusa mirai dɨ tɨraiya.
16Dɨ tsɨya farisiyawaka ndu, “Hɨna ta takaya ghama ma ji ɨna sɨba gyagiyakɨ niwana?”
17Wutɨ a ɗe sɨbɨ caseni dɨ gɨsa ndu, “Basɨnakɨ nai mɨn biyafu le nuwun, ba tida timbɨzɨm ba hɨraya ɗɨngai.” 18Ndɨ ka tlatlɨnka dɨ rɨtlusa mɨdzai da ɓaa mapɨra vɨnusɨ da rɨma tinusɨ da ɗɨvɨrusɨ, mɨn ɗɨnga sɨba gyagiyakɨ nifu ta bawai tɨmbɨzɨnkai dɨ nja tlɨnai.”
19Yesu dɨ gɨsa tlɨna ndu, “Hɨn sɨbɨ ni conakɨn, sɨba kwa tsa gasƙewatɨ, mɨnabi iya maka ɨna hɨm ghaja, mɨna bi iya dakuwun ghaja ɨna hɨna? Tuwayiyakɨn!”
20Je tlɨne biyaya leka, dage naya Yesu a tɨmbɨzɨnka, nda dliyadli dɨ gwa mbɨrtlaka laika mɨdzai, tuwa tuwusɨ da dladlɨrau tɨ da ghararusa mɨdzai da ɓa mapɨra vɨnusɨ.
21Yesu dɨ tsi ya ba le ka ndu, “A dzakwaiya ghaja ji wankɨna” Ba laika dɨ gɨsa ya ndu,
“tɨn tɨgan gaɓɨ. 22Asa sa shɨɗa hiyusɨ ɗe ku ɨna abi, adama dɨ ma ghamusai, ama fa tan sa iya ɗɨma wihanka fanaya kwaya luluma fa bɨramakwai.”
23Yesu du, “Fatan sa iya? Ai ndyam kuta ɗɨmatlɨn ɗɨmau atira ba tsa gasƙewatɨ.”
24A hɨɗakɨ ba le dɨ zaka mayusa ndu, “Mɨn tsa gan gasƙewatɨ, ama njima zhɨku, bɨrwan kwai dɨ daɗaza tu.”
25Yesu daga naya sɨbɨ cassa ta buwatlɨna tirusa mirai, dɨ daba tɨmbɨzɨnka ndu. “Fi tɨmbɨzɨm bana hɨra sɨme dɨkayau, mɨn ɗɨngafusu bokwa ɗe wasɨ, fatane piya ɗe wasu.”
26Daga ɓa kwarara tɨmbɨzɨnka, je tusa gashi wasɨ, dɨ dzarusai ɨna ti. Le ka dɨ dzɨgusɨ wan viyyusɨ, har niwi sɨbɨ cas du, “Ai! Amitasai.” 27Ama Yesu dɨ kuya kɨnwasɨ dɨ tlaiyai, dɨ tluse tsatsɨrai.
28Dage zusa kama Yesu, sɨbana gyagiya tirusɨ dɨ tsɨyusa metlɨna ndu, “Madɨ zai dɨ njamaya bawaya hiyusa?”
29Je te ɗɨnga tlɨna ndu, “Vare nikin kutɨ ma bawatlɨnu kwapa tiyaka gil.”
Yesu mɨna Bɨla Varai Miyau ba Tɨde Ɗɨmau.
(Matiyu 17:22,23; Luka 9:43-45)
30Je tlatlɨna ɗɨka dɨ ɓa ɗe mɨdzai ta Galili a camma wi dɨ sɨnau. 31A dama ta-ta gyagiya sɨbana gyagiya tirusɨ, dɨ bɨla tlɨna ndu, “A bɨ tsa vɨrkɨ sɨma kɨn sɨbɨ, dɨ ta viyyusai, a ta muku ta kida dɨ tlusai.”
32Ama tlɨn asɨmma zhamata ɗɨngɨ tusɨ kau tlɨn data laka tsɨya hiyusɨ.
Wa dɨ ra gyar wata?
(Matiyu 18:1-5; Luka 9:46-48)
33Daga ɗama Kafarnahum, Yesu daga zu sa kan dɨ tsiya tlɨn du, “Hɨna ta takaya ghama ma, ja darha?” 34Ama dɨ maka na tlɨn, adama a ta kai ta kaya darhɨ aghama ko wa dɨ ra gyarwata.
35Jete tsɨgusai, dɨ zara nika bahɨn tsɨrenika, dɨ ɗɨnga tlɨna ndu, “Ndɨ ba da lu dɨ dzɨgusɨ garnaka, kwapa ndɨ a dzɨgata na ta ciɓɨ ndyam, galudzɨhɨ na koweneki kuma.”
36Je kiya wi lai gaɓɨna dɨ arusa tsafaya tlɨn. Kiyusa ta pakusɨ dɨ ɗɨnga tlɨna ndu, 37“Ndyam badɨ gɨsa wuta ɗe nikin wutlɨmi gyaɓoni adamuwunka, a gɨsɨwan mɨn jika, ndɨ ba gɨsɨwunka agɨsɨ ba kafuwun.”
Ba tɨma ta gabɨ ɨna miyuka tɨgan nama
(Luka 9:49-50)
38Yohanna dɨ ɗɨngaya ndu, “Basɨnakɨ,” Minai wuya ta bawai tɨmbɨzɨm a ikowa ngɨnafu, mi hɨrusai adama tɨma ɗe mau.”
39Je ɗɨnga tlɨna Yesu du, “Nata hɨrusayu, adama wimoyi bada bi ɗɨma hamba ghɨri ɗe ikowa ngɨnunu, dɨ dzɨgusɨ dɨ zana rɨntu. 40Ndɨ ba tɨma ta gabɨ ɨna miyuka tɨgan nama. 41Mɨna ta bɨlana katsɨ-katsɨ jika, ndyam ba dɨ tsana bii ɗe tlɨrkaya bii ka, a ngɨna hɨn ni Almasihu ka tɨma kwa ngamusu ko gaɓɨ.
Di gyagi ɗɨmaka lyapɨ
(Matiyu 18:6–9; Luka 17:1–2)
42Ndɨ ba dɨ zai wuta ɗe nikin wutlimi sɨba tsa gasƙewatɨ ɗe ngɨnuwum dɨ ɗɨma lyapɨ ka a ƙɨsaya ƙɨsa mbam dɨ ɗɨhɨnaya garama vɨm ma dɨr a wirusɨ dɨ shɨ ɗusɨ ɗe Madzɨ gyarya. 43Kwa ɗɨnga ndu kɨnfu jata zefe ɗɨma lyapɨka, to ɓalya tu. A ƙɨsafu ƙɨsa mbam, fazafu ɗe gwalfu ta dɨna a kɨnfu wutɨ ata fa zafu ɗe ku a kɨnfu tsɨr, aku ma wima iya mbɨshau . 44[Eyika Talmai mana rɨma tlɨn njima miyazau, akuka wima iya mbɨshau.] 45Ka ɗɨnga ndu angara fa ta ze fa ta ɗɨma lyapɨka, fa ɓalazai. A ƙɨsafusau mbam fa za fa ngar wutɨ ata fa zafu ɗe kuwa ngar tsɨr. 46[Eyika Talmai mana rɨma tlɨn njima miyazau, akuka wima iya mbɨshau.] 47Kaɗɨnga du a tiyafa ta zefe ɗɨma lyapɨka, fa kulai. Aƙɨsafu ƙɨsa mbam fa za fu ɗe gwalfu ta dɨna a tii wutɨ ata dɨ shɨɗa fu ɗe ku a tii tsɨr. 48Eyika,
“ ‘talmai mana rɨma tlɨnka nji ma miyazau,
aku ka wima iya mbɨshau.’
49A tsara ko wene ki akaitɨ, wane na da tsara hadaya a wasai.”
50Wasai, kutɨ sɨba mbam, ama wasai kwa pyalaze ka, atlai piyatɨza ma? Na dzɨgana wan wasai, na tsɨgana wacɨ ewutai.
လက်ရှိရွေးချယ်ထားမှု
Markus 9: MKF
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©2023 Seed Company in collaboration with Language Developers and Bible Translators Association