Jwon 11
11
Mot i La'azarus
1Maɗufal nin, ima asum ames a La'azarus ma mwatan. Sin ta fo ti ashwa ti Betanii hu shunus murwafi, Uryam hu Umata. 2Yit Uryam tima ai ti wa shwaiti Yeso mbar i cef ta sisai, ɗak ti fyalus si ya ti sya i hai amet ti. A tusus ti La'azarus ma mwatani.
3Sin shunukan murwafi amii si tuk muro wa kyel i Yeso nyai, “A Deembai, yis ima ha ɓweti mati cala kwa.” 4Ti hali andi unai Yeso ni, “Mwatan mai ma wa kolsus ta mot kwa, ma wa fati a DeeƁwe mbaitat ɓurti Al ames u wis mbaitat hwak.”
5Yeso ɓwet Umata, hu tusut Uryam hu La'azarus, 6shak ta andi, tasi mwen i ma hal mwatan i La'azarus, humus masti mukon apil ta kyel ima matai tawe. 7Takfai ti andi ɗak lak fe i ro ames, ni, “Ndakan ka wa ta Judya kong.” 8Fe i ro ames si ni, “A makofiti, a myana a myana mbayai i Ju sin ɓweti ɓwalan sa ti afyai. Mwashi ha ɓweti muhumkyel ta kyeli hwak haa?” 9Yeso matussi ta ni, “I nyai a shitam hure mulang apil a yis a mufi andek ho? Ɓurti andi shak maɗufal ima ma ati taren ma wa bukat kwa, ɓurti ɗing ti kweneng i naya amoti.” 10Maɗufal ima ma ati tafo' ma wa bukat ɓurti kweneng wet ta kyel ames.
11Takfai ti andi lakus ni, “Mwes amukan La'azarus mayus ɗarak, mwashi i wa wa ɓa i ɓushos.” 12Unai fe i ro ames si ni, “A Deembai, na a arak ha'us kyek, mwash luk fit.” 13Yis Yeso ma a nyai La'azarus motus ii mot, sin fe i ro ames sima a nyai ahun Yeso ma nyai La'azarus mayus a ɗarak i lafos kek.
14Unai Yeso lakus hai i findeli ya nyus, “La'azarus motus. 15Yin i kof pipelat ti mulut ɓursu, ɓurti myana yin ta kyeli kwa, ɓurti ɓa hu fa mwawei yes kyel amen. Yehun, kan kawa ka ɗingus.”
16Unai Toma (ima si laiyus ii Njan), lak anggum i shunus fe i roi ni, “Ndakan ka wa, ka mot akul hu Yeso kek.”
17Myan ima Yeso ru ta Betani, hali nyai La'azarus tuu mas mukon ɓaras tasi mwen ima si laiyus ta fiyai. 18Fo ti ashwa ti Betani ti mata nggas ti Yerushalima, maleng amet ɓin mel apil. 19Unai som Ju hyang si yes too' ti Umata hu Uryam ti shaat i nusus. 20Ti hali nyai Yeso ma yes, Umata ti ka' fisel wa shwaisus, Uryam yit ti teet ta wur.
21Unai Umata ti lak Yeso ti ni, “A Deembai, ma myana hana, na nusun u mot kwa. 22Shak ta andi, i shangi DeeƁwe ndok u fa shak aɗeng ima ha lulus.” 23Yeso lakut ni, “Nushush ma wa muluk fit.” 24Umata ti nyus, “I shangi ma wa muluk fit, mwen ima som mumoti si ɓusho ta fiyai yes dala i naya.” 25Yeso lakut ni, “Ayin a muluk fit i som mumoti, ayin a mupwet hwak. Shak maɗufal ima fa mwawei nasi yin hai, ɓwet u mot, ma wa muluk fit u pwet. 26Maɗufal ima ma mushet, ɗak fa mwawei tasi yin ɗi, ma wa mot kwa fweng. Shi fa mwawei andi haa?”
27Unai Umata ti nyus, “Hei, a Deembai, i fa mwawei nyai a ha a Kristi ani, Al i DeeƁwe ima ha yes na naya.” 28Ti mbit laksus ndai, ti wa ti lai tusut Uryam ta ɓwai ti nyut, “Makofitii tu yes, ma lulshush.” 29Uryam ti hali andi, ti luk fit kaang ti wa ta kyel i Yeso. 30Yeso yis yus ɗiri ta kyel ima Umata ti wa ti shwayus ta, ma tu lang ta ashwai kwa.
31Myan ima som Ju ima si yes too' ti shaati si ɗing Uryam ti luk fit hwak ti lang ya, si rang tifai, si nyai ashang tima a wa ta fiyai ɓa ti kawa. 32Uryam ti muru ta kyel ima Yeso mata, ti ɗingus, unai ti fur ta mabel yusti ti nyus, “A Deembai, ma myana hana, na nusun u mot kwa.” 33Yeso ɗingut yit kawa, som Ju ima si kolfai asut ti hwak sin kawa, unai aɗengi nggye' Yeso ta mulut hyang. 34Unai ni, “Hu laiyus a leya?”
Si nyus, “A Deembai, ya ha ɗing kyeli.”
35Unai Yeso kawa.
36Unai som Ju si ni, “Ɗing hun angga' ima ma ɓwetsus ta.”
37Shak ta andi, shini ta saa asus si lak ɗiyai ames si ni, “Ɓu shishat i manzyau ani ya, ɗak ami kin mas ɗama ima u sha La'azarus mot kwa ya?”
Yeso Ɓusho La'azarus ta Fiyai
38Yeso hum tirim ta mulut ti ambas, wa ta fiyaiyi. Fiyaiyi a ton i mafung nin, ima si vo fo i kyeli ti afung nin. 39Yeso lakus ni, “Tuk hun afungi ya.”
Unai Umata, tusus ti maɗufal ima moti ti lak Yeso ti ni, “A Deembai, mwashi mayus wa muɗu, ɓurti a mukon ɓaras mai tasi mwen tima mot.”
40Unai Yeso lakut ni, “I nyai ti i lakush i ni, na shi fa ma mwawei shi wa ɗing ti mbaitat i DeeƁwe ho?”
41Unai si tuk afungi ya. Unai Yeso ha' shit fit ni, “A Dee, i palanga ɓurti ha halsun. 42I shangi ha halsun ngang, i lak ati ɓurti som ima si mangrai mii si fa mwawei nyai, a ha ha rohun.”
43Myan ima pun laki andi, unai lak ti la mbai ni, “La'azarus, langa ya!” 44Unai maɗufal ima moti lang ya, raa hu sisai ames shak si ranggal ya ti rukul i lai, shishat ames hwak si gu' i rukul i lai.
Unai Yeso ni, “Hwet hun yusya u wis.”
Si Mas Shingat Nin Ɓa si For Yeso
45Ju hyang ima si yes too' ti Uryam, si ɗing aɗeng ima Yeso masi, si fa mwawei tasi yis hai. 46Shak ta andi, shini si wa ta kyel i Farisiyawa, si lakus aɗeng ima Yeso masi. 47Ɓurti andi mbayai i kocokak hu Farisiyawa si suɓut mbayai i som tot ti ɓur i mashwa, si lul ta ɗiyai si ni, “Ami ka wa masi ya? Maɗufal mai yis cwai ti wei ti masti ɗamam i shok na fo hyang. 48Na ka tekan gbak yis cwai ti wei ti masti ɗamam mii, ɗufal shak si yus wa fati mwawei tasi yis ɗi. Ta dala som i Rom si wa nggwalan ti Wur i DeeƁwe ya hu ashwa amukan hwak.”
49Unai andek ta saa yusti, ima asum ames a Kayafas ima a yis a kocok mbai tasi wil ani, lakus ni, “Hun hu shang ɗama kwa fweng! 50Hu mas ambe' kwani? Mbwesh maɗufal andek u mot ɓurti ɗufal, ɓa si ni ashwa shak ti mot.”
51Mai findel ima Kayafas lak, a ambe' i mulut asus kwa, ɓurti yis ma mute ii mbai i makocok tasi wil ani, lak findel i som i shit i DeeƁwe nyai, Yeso ma wa mot ɓurti ɗufal i Ju, 52a ɓurti Ju kek kwa, a ɓurti ɓa u suɓut ɗufal i DeeƁwe shak ima si ɓaasus ti kikyalali, si te ii ɗama andek. 53Tasi myani, mbayai i Ju si ɓeti angga' ima si wa for ti Yeso ta.
54Ɓurti andi, Yeso hum ati ta saa ti som Ju wii mal kwa. Foi andi hon kyeli, wis ta ashwa nin tima ti ta nggas ti saa ti ya, langus ta ashwa nin tima asum amet a Ifrayim. Tes ta kyeli hu fe i ro ames.
55Myan ima Got i Pissihai i Ju kat ndyong, ɗufal hyang ta ɓwayai i mashwa si wa ta Yerushalima ɓa si sapa haisus ya ɗak myan i gotti ti ru. 56Unai si ka' far ti Yeso, si te mangrai ta fo i mahom i Wur i DeeƁwe sin luli ta ɗiyai nyai, “Hu ɗingi atini ya, ma wa yes got amai ya?” 57Ai, mbayai i kocokak hu Farisiyawa si kin findel nyai, shak maɗufal ima shang kyel ima Yeso mata, u yes u lak ti ɓa si wa si ka'us.
လက်ရှိရွေးချယ်ထားမှု
Jwon 11: AlisIRonNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Wycliffe Bible Translators, Inc. and © The Nigeria Bible Translation Trust 2018