Jwon 12
12
Sapa i Yeso ya ta Betani
(Mat 26:6-13; Mak 14:3-9)
1Kat mukonan taan ɓa Got i Pissihai u fur, Yeso ru ta Betani ta wur i La'azarus, maɗufal ima Yeso luktus fit ta mot. 2A nanati, si masus cwa i mukon, a Umata ti kar cwai, La'azarus ma andek ta saa ti som ima si cu cwai akul hu Yeso.
3Unai Uryam ti ha' shigira i mbar mafyongi macef ima si masi ti nardi. Ti shu Yeso ta sisai, ɗak ti fyalus ya ti sya i hai amet. Muɗu mafyongi ma mimyat i mbar mai hya shak wuri.
4Judas Iskaryot, andek ta saa ti fe i ro i Yeso (ima ma wa juwil ti Yeso ya ndai) ni, 5“Ami kin si juwil mbar mai ya si hai i cef ima maro ma wa masi i wil andek, ɓa si fa som i jyel cefi kwa ya?” 6Judas lak findel mai a ɓurti ɓweti som i jyel kwa, a ɓurti yis a asher. Ayis mii ma ka'ti takal i cef ames, ma shyarani ta saa hwak.
7Unai Yeso ni, “Hona yut, ti kinta a ɓurti sinzam ti myan ima si wa laisun. 8Ngang hu ma akul hu som i jyel, a ngang hu ma akul hu yin kwa.”
Si Mas La'azarus Gbaf hai
9Myan ima suɓut i Ju hyang si hali ti nyai Yeso mana nati, unai si yes, a ɓurti Yeso ahwesi kwa, a ɓurti si ɗing La'azarus hwak, ima Yeso luktus fit ta mot. 10Unai mbayai i kocok si ɓetti ɓa si for La'azarus hwak. 11A ɓurti La'azarus, Ju hyang sin fati mwawei wa kyel i Yeso.
Yeso Langta Yerushalima
(Mat 21:1-11; Mak 11:1-11; Luk 19:28-40)
12Mwen ti ɓu, suɓut i ɗufal hyang si yes Got i Pissihai, si hali nyai Yeso mata fisel i wa Yerushalima. 13Unai si har ra i yitat i mbar si rangya ɓa si matus, sin ha' ti la fit sin nyai,
“Mbaitat ti matwis wa kyeli DeeƁwe
Disyo' tasi ima ma yes ti
asum i Deembai!#12:13 Ɗing huni hwak: Nak 118:25-26.
Maɗesi matwis wa kyel i
Makai i Isar'ila!”
14Yeso wis al ti njaki nin unai langi, fota angga' ima si worong nyai,
15“Ka hu mwen kwa,
hun som i Yerushalima,
ɗing huni, makai amu mai ma yes,
te amun tasi al ti njaki hai.”#12:15 Ɗing huni hwak: Zak 9:9.
16Tasi bya' fe i ro ames si shang mai kwa, ta takfai tima DeeƁwe ha' Yeso fit, si mbe' nyai si mas worong mai tasi hai ames, ɗak si masus ɗamam mii.
17Suɓut i ɗufal ima sima akul hu yis ta myan ima lai La'azarus lang ya ta fiyai, luktus fit hwak ta mot, si cu wei ti lak ti ɗufal aɗeng ima Yeso masi. 18Ɗufal hyang si wa mat ti Yeso ɓurti si hal ɗama i kofti i shok na fo ima masi. 19Unai Farisiyawa si findel ti ɗiyai si ni, “Ɗing huni, ɗeng ma wa cwai ti wei kwa fweng, u mai shak naya tima tifai asussi!”
Shini i Giris Si Far Yeso
20Ta saa ti ɗufal i ma si yes ɓurti cwai ti afut ta kyel i gotti shini ta Girik si ta. 21Si yes kyel i Filip, maɗufal i Betsaida ta Galili, si nyus, “Deembai, ni ma ɓweti ni ɗing Yeso.” 22Filip wa lak Andru, unai sin apil si wa si lak Yeso.
23Unai Yeso matussi ni, “Myan si ndok ima si wa ha' ti Al i Maɗufal fit. 24I ma laksu mwawei, na si lai al ti alkama ti mot kwa, ti yut wa mute a hweti. Na ti mot, unai ti fa fe hyang. 25Maɗufal ima ɓwet mupwet ames ma wa duni. Maɗufal ima nggwes ti mupwet ames na naya moti, ma a ɗakiti ndai yes mupwet i myan hu myan. 26Shak maɗufal ima mayun ɗagu' ti hai, a kanggang u kolfai asuni. Shak kyel ima i mata, yere amen ma wa mute ta akul hu yin. Deen ma wa ha' ti shak maɗufal ima ma yun ɗagu' ti hai fit.”
Yeso Findel Tasi Mot Ames
27“Mwashi i ma halti kinggat na mulut amen. Ami i wa laki ndai ya? Ahun i ni, ‘A Dee, ha'a na myan i shum amai ya ya?’ Wayou, yin i yes a ɓurti myan mai gbum. 28A Dee, ha'a asum asa fit!”
Unai la ti lang ya ta fit ti ni, “Tii ha' asum asun fit, i wa muhum ha'i fit hwak.” 29Myan ima suɓut i ɗufal ima sima mangra ta kyeli si hal lai, si ni a bara, shini si ni, a malu' findelus.
30Yeso lakus ni, “La moti ti yes a ɓursun kwa, ti yes a ɓursu. 31A mwashi DeeƁwe ma wa tot ti naya moti ɓur, a mwashi hwak ma wa re' ti Shatan, makaitat i naya moti ya. 32Takfai tima si ha'un fit ta fisha, i wa dul ti ɗufal shak yes kyel amen” 33Yeso lak mai a ɓurti kofti musut i mot ima ma wa masi.
34Unai ɗufal si lak Yeso si ni, “Anggut asinin ti lak nin ti ni, Kristi ma wa mupwet myan hu myan. Ou, atini ha ni a kanggang si ha' Al i Maɗufal fit ya? Awe mii Al i Maɗufali ya?”
35Yeso nyus, “Kwenengi ma akul si hun i myan ndyong. At hun myan ima kweneng yis akul si hun, kan maɓing wisu. Ma ati ta saa ti maɓing shang kyel ima ma wata kwa. 36Fahun mwawei nasi kwenengi hai, myan ima huma tikul, ɓurti ɓa hu te i fei kwenengi.” Myan ima pun findel, Yeso wis ta kyel nin ima wa' si shangi.
Som i Ju Si Fa Mwawei Kwa
37Yeso wo yis masti ɗamam i kofti i shok na fo hyang ta wei yusti, shak ta andiyi si fa mwawei wa kyel ames kwa. 38Si mas mai a ɓurti si hya aɗeng ima mashit Ishaya worong nyai.
“A Deembai,
awe fa mwawei nasi findel ama ya,
awe hwak si kofus ti andok i Deembai ya?”#12:38 Ɗing huni hwak: Ish 53:1.
39Ayis kin si shang fati mwawei kwa, fota angga' ima Ishaya worong ta kyel ma hwak nyai,
40“Nzyauwus shishat ya
ɗak forus mulwat ya hwak,
ɓurti kan si ɗingi ti shishat ames,
si shangi ta mulwat ames hwak kwa,
ima si hatat na kyel amen i fas njeng.”#12:40 Ɗing huni hwak: Ish 6:10.
41Ishaya lak andi a ɓurti ɗing mbaitat i Yeso, ɗak lak aɗeng mai ta hai yusti.
42Shak ta andi, ɗufal, ima hyang ta saa ti som i kunggul ames si fa mwawei si yis hai. Ɓur ti myanat i Farisiyawa si nggwes i nyai si fa mwawei, ɓurti kan si ndok si nggas ta marei. 43Ɓurti si ɓin ɓweti ngye ta foi ɗufal hu ngye ta kyel i DeeƁwe.
44Unai Yeso ha' la fit ni, “Shak maɗufal ima ma fati mwawei na kyel amen, a na kyel amen je kwa, a wa kyel i DeeƁwe ima rohun. 45Shak maɗufal ima ma ɗingsun, ma ɗing ti a maɗufal ima rohun ndai. 46I yes fota kweneng na naya ɓurti kan maɗufal ima ma fati mwawei na kyel amen ute ta saa ti maɓing wi.
47“Shak maɗufal ima hal kofiti amen, ɗak nggwes i masi, ayin a ma lefsus ɓur ya kwa. I yes a ɓurti ɓa i lef naya ɓur ya kwa, a ɓurti ɓa i bum naya. 48Maɗufal ima nggwetun, ɗak nggwes i mat ti findel amen, mati ma lefsus ɓur ya. Findel ima i lak, ayit tiwa lefsus ɓur ya mwen ti dala. 49Ɗamam ima i kofiti ii na kyel amen kwa, a Deen ima rohun lakun ti aɗeng ima i lak hu ngga' ima i wa laki ta. 50I shangi hwak mupwet yes myan hu myan matwis ta findel ima Deen fa. Ɓurti andi shak aɗeng ima i lak, i lak a kiga' hu aɗeng ima Deen lakun ɓa i lak.”
လက်ရှိရွေးချယ်ထားမှု
Jwon 12: AlisIRonNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Wycliffe Bible Translators, Inc. and © The Nigeria Bible Translation Trust 2018