Matyu 4
4
Shatan Mba Yeso
1Unai Rin kol Yeso ta saa ti ya ɓa madangi u mbahus. 2Yeso ka' fo ya tasi cwa i mukonan hure ɓaras fo' ta reni, ta takfai hwem ti hanus. 3Unai ma ambai yes nyus, “Na ha a Al i DeeƁwe, kina afyai mii si te ii folok.”
4Unai Yeso matussi ni, “Si worong nyai, ‘A ti folok je maɗufal ma wa mupwet kwa, a ti shak findel ima lang ya ta fo i DeeƁwe.’ ”#4:4 Ɗing huni hwak: Muh 8:3.
5Unai ta te'i, madangi watus ta ashwa masapai, kinus te mangra ta mbet i Wur i DeeƁwe. 6Ɗak nyus, “Na ha a Al i DeeƁwe jika ya na fisha,” ɓurti si worong nyai, “ ‘Ma wa ro ti som lu' ames ɓursa, si wa fwangsa ti ra ames, ka ha bukat si afung hai.’ ”#4:6 Ɗing huni hwak: Nak 91:11-12.
7Unai Yeso humustikyel nyus, “Mata worong wi hwak, nyai, ‘Ka ha mba Deembai DeeƁwe ama kwa.’ ”#4:7 Ɗing huni hwak: Muh 6:16.
8Madangi hum kolsus ta hai i rem masyai nin, ɗak kofus ti shak kaitat i naya hu ngye ames. 9Unai hum nyai sus, “Shak mii i wa fasa, na ha shu i mafwaran ha cuhun afut.”
10Unai Yeso nyus, “Herana ya nati, ha Shatan! Si worong nyai, ‘A Deembai DeeƁwe ha wa cwaisus afut, a yis je ha wa massus ro.’ ”#4:10 Ɗing huni hwak: Muh 6:13.
11Ta te'i, madangi honus, som lu' i DeeƁwe si yes si mbo'us mulut.
Yeso Ɓo Mba ti Findel i DeeƁwe
12Myan ima Yeso hali si ka' Jwon, si kolus ta wur i shitam, unai humkyel ta ta' ti Galili. 13Ti bya' tong wa Nazaret, ɗak wa Kapanahum ti mute, ashwai mata fo i yiir ta ngga' ta' ti Zabulun hu Naftali. 14Mai hya laki i mashit Ishaya nyai,
15“Shish, ta' ti Zabulun ta ta' ti Naftali,
fisel i wa yiir, ta ngga' i Ɗara i Jodan,
Galili ti Ramam,
16Som ima si ti mute
ta maɓing wi
si ɗing mbai kweneng,
tasi som ima si mute ta ya i manjiling i mot,
kweneng pwak ya.”#4:16 Ɗing huni hwak: Ish 9:1-2.
17Tasi myani, Yeso ɓo mba ti findel i DeeƁwe, yis nyai “Hatat hun, ɓurti kaitat i kyel fit kat anggasi.”
Fe Ro i Bya' ima Yeso Laiyus
18Yeso yis ati ta fo i Yiir i Galili ndai, ɗing som apilal, shunus i ɗiyai, Siman ima si laiyus ii Pita hu nusus Andru. Sin muhwiti takal i gong ti gushe ta yiir wi, sin a som i gong ti gushe. 19Yeso nyus, “Kol hun fai asuni, i wa hatat tu ii som hatat ti ɗufal yes kyel amen.” 20Fo abet si wak takal i gong ti gushei ii ra, si kolfai asussi.
21Cu wei vaat, unai ɗing ɗufal apilal shini, sin hwak a shunus i ɗiyai, Jemis al i Zebedi hu nusus Jwon. Sin ta wii i kwang i ham hu dees Zebedi, sin ɗak ti takalal ames ta. Yeso laiyus, 22fo abet si hon kwang i hami ta hu dees, si kolfai ti Yeso.
Yeso Bum Ɗufal Hyang
23Yeso at ta ta' ti Galili shak, yis kofiti ta mareha ames, yis mba ti Muro Maɗesi i kaitat i DeeƁwe, yis fati som cala ta shak mwatanan akat-akat. 24Findel si Yeso hai, nggar ta' ti Sirya ya, ɗufal si kolus shak som ima si ti cala kwa. Yeso fa cala wa kyel i som ima si ti mwatanan akat-akat, hu ima si kolfai asussi, hu ima rin mafwashi no'us ya, hu ima si masti maɓyar, hu ima si yus ii gundung. Shak asussi fas njeng. 25Suɓut i ɗufal ta ta' ti Galili, hu Dekapolis, hu Yerushalima, hu Judya hu ta fit Ɗara i Jodan si kolfai asussi.
လက်ရှိရွေးချယ်ထားမှု
Matyu 4: AlisIRonNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Wycliffe Bible Translators, Inc. and © The Nigeria Bible Translation Trust 2018