Matyu 5
5
Taɓak i Disyo'
1Myan ima Yeso ɗing suɓut i ɗufal, unai ɗu tasi ajin i manggash te amun. Fe i ro amesi si yes kyel ames, 2fur kofsus ti nyai,
3“Disyo' si som jyel i rin,
ɓurti kaitat i kyel fit a ames.
4Disyo' si som shaat,
ɓurti si wa wis ti jop ti mulut.
5Disyo' si som i hai muɗyayi,
ɓurti si wa cwai ti kop i naya.
6Disyo' si som hwem hu myaf i mute manderei,
ɓurti si wa talsus myatat.
7Disyo' si som i gu'ti ashur,
ɓurti si wa gu'sus ashur.
8Disyo' si som mulut musapai,
ɓurti si wa ɗing ti DeeƁwe.
9Disyo' si som mute cala hu ɗufal,
ɓurti si wa laisus ii fe i DeeƁwe.
10Disyo' si som ima si fasus shum
ɓurti mute manderei,
ɓurti kaitat i kyel fit a ames.”
11“Disyo' si hun hai myan ima som si se'u, si fu shum, si lefu fyarat hai akat-akat, ɓursun. 12Jakak hun hu pipel na mulut fwet, ɓurti mal amu mii mbai ta fit. Angga' ima si kof som shit ima si tongu na nai.”
Amma hu Kweneng
13“Hun a amma i naya. Na ammai mimya kwa, ami ma wa kinti ammai u hum mimyat ya? Wis gbya' ndai, ɗat ames ashwai ya ɗufal si tindaki.
14“Hun a kweneng i naya. Ashwa ima si ta' si fwere hai fwat kwa. 15Ahun ɗufal si lwa' mukof si vo ya ti mbai kwang waak? I nyai, si kyan tasi kwetleng hai, ɓa kweneng u ka' ta wuri shak hoo? 16Angga' ima hu wa honti kweneng amu u ka' si ɗufal hai, ɓurti ɓa si ɗing roha amu maɗesi, si fa Deemu ima mata fit ngye nai.
Hya i Anggut
17“Ka hu kin mulut nyai i yes a nggul ti Anggut ya, hu kofiti i Som Shit kwa. I yes a ngguli ya kwa, a hyai. 18I ma laksu mwawei, kaciwa' fit hu fisha si mbit, foti worong nin na Anggut ma wa mufot kwa, shak aɗeng ima si lak a kpang hu hya. 19Shak maɗufal ima nggyel anggut andek ya na saa ti mii, hu kofti shini ɗufali si masi andiyi, si wa laisus ii mavaati ta kaitat i kyel fit. Shak maɗufal ima masi hu kofti shini hwak, si wa laisus ii mambai ta kaitat i kyel fit. 20I ma laksu ndai, na ro manderei amu ɓin i Farisiyawa hu i som kofiti si anggut hai kwa, mwawei ndai hu wa mulang ta kaitat i kyel fit kwa fweng.
Kofiti i Yeso Hai i Futut
21“Hu hali si lak ɗufal ima ai i hwer, nyai, ‘Ka ha for maɗufal kwa,#5:21 Ɗing huni hwak: Mul 20:13. shak maɗufal ima for ɗeng, ɓur ti wa cwaisus.’ 22Yin i ma laksu, shak maɗufal ima mas futut ti nusus kyek, ɓur ti wa cwaisus. Shak maɗufal ima lak nusus, ni, ‘Ha a haling!’ Si wa watus ta fo i Kaya. Shak maɗufal ima lak nusus ni, ‘Ha a maɗufal i gbya' kyek!’ Ma wa mulang ta wur i man.
23“Ɓurti andi, na ha fati mal ta wei i DeeƁwe, ɗak ha mbe' nyai nusa ma futut ti ha, 24hona mali ta wei i DeeƁwe tawe, ha wa hu ɗak ti ta hu nusa. Ɗak ha yes ha fa mal amai.
25“Nya mwat ha ɗak ti findel hu maɗufal ima ma kolsa ta fo ɓur ti. Mas huni hun ɗiri ta fisel ma wa' hu ru ta kyel i maɓuri. Na andi kwa, ti muru amu ma wa fati maɓuri ta ra, maɓuri u ti'a ta ra i maro, yis u hwita ta wur i shitam. 26I ma laksu mwawei, hu wa mulangya nanati kaciwa' hu tal shak cef ima si lefui kwa.
Kofiti i Yeso Si Hai i Kolti Mbor ti Ɗeng
27“Hu hali si lak nyai, ‘Ka ha mas arak i zuruk hu mbor ti ɗeng kwa.’#5:27 Ɗing huni hwak: Mul 20:14. 28Yin i ma laksu, shak maɗufal ima ɗing mbor ɗingi i gwel kyek, tuu mas arak i zuruk hu mbori ta mulut ndai. 29Na shit ti ucwa asa ti wa kinsa masti mafwashi, re'a ya ha hwiti ya. Ma wa ɓinsa ɗat ha far andek ta saa ti ɓwai i lo' ama wet, hu ima si hwiti lo' ama shak ta wur i man. 30Na ra i ucwa ama yis wa kinsa masti mafwashi, lefa ya ha hwiti ya. Ma wa ɓinsa ɗat ha far andek ta saa ti ɓwai i lo' ama wet, hu ima si hwiti lo' ama shak ta wur i man.
Kofiti si Matkar i Kunggo
31“Si hum nyai, ‘Shak maɗufal ima wak mbor asus ii ra, u fat kaada i for ti kunggo ya.’#5:31 Ɗing huni hwak: Muh 24:1. 32Yin i ma laksu nyai, shak maɗufal ima for kunggo, ma wa' a ɓurti arak i zuruk kwa, kinut ta fisel ti arak i zuruk ndai. Shak maɗufal ima kunggo mbori, mati mafwashi i arak i zuruk hu yit ndai.
Kofiti si Shiɗat Hai
33“Hu hali si lak ɗufal ima ai i hwer, si ni, ‘Ka ha mas shiɗat i fyarat kwa, hyaha shiɗat ima ha mas Deembai yi.’ 34Yin i ma laksu, ka hu ra'u shiɗat ti fit kwa fweng, ɓurti a kyel i kunggul ti mute ti DeeƁwe. 35Ka hu shiɗat ti fisha kwa, ɓurti a kyel i shwaiti sisai ames. Ka hu shiɗat ti Yerushalima kwa, ɓurti ayit a ndyi ti ashwa ti Makai Mbai. 36Ka ha shiɗat ti hai asa kwa, ɓurti ha shang ngga' ima ha hatat ti sya andek ti hai i anggar ti te i mukyawi kwa. 37Aɗeng ima hu wa laki, u te ‘Hei’ a ‘Hei,’ hu ‘Wayou’ a ‘Wayou.’ Ma lang mai ii hai, yes ii ta kyel i ma Mafwashi.
Kofiti i Yeso Si Weri Hai
38“Hu hali, si ni, ‘Shit fo i shit, anggur fo i anggur.’#5:38 Ɗing huni hwak: Mul 21:24; Koc 24:20; Muh 19:21. 39Yin i ma laksu, ka hu nggyu ti maɗufal ima mas mafwashi kwa. Na ɗeng paha na kapak i ucwa, hatata yus ti mapili hwak. 40Na ɗeng yis ɓweti kolsa ta wur i ɓur ɓa u mata fagin asa ya, hona yus mogo ama hwak. 41Na ɗeng kina a at i mel andek kanggang, ata tus i mel apilal. 42Maɗufal ima fwala, Faha yus. Ma far ti ahof ta kyel ama, ka ha shahus kwa.
Ɓweta Ma Zan ti Wei ti Ha
43“Hu hali, ai si ni, ‘Ɓweta nusa,#5:43 Ɗing huni hwak: Koc 19:18. ha nggwya ti ima nggweta.’ 44Yin i ma laksu, ɓwet hun som ima si nggwetu, hu fwal DeeƁwe ɓurti som ima si fasu shum. 45Ta fisel ti masi andi, hu wa mute ii fe i Deemu i kyel fit. Ayis kyan ɓwe asus ti ka' si som i mafwashi hai, hu som i maɗesi hwak. U shu foon si ɗufal munderei hu ima si ndere kwa. 46Na hu ɓwet som ima si ɓwet su kyek, a mal i mi hu wa wisi ya? I nyai, angga' ima som i mati cef i wufen si massi nai hoo? 47Na hu to' a shunu kyek, ami hu masi ima ɓin i shini ya? I nyai, angga' ima som ima si shang DeeƁwe kwa si masi ta nai hoo? 48A kpak hu hya nggya-nggya, fota ngga' ima Deemu i kyel fit hya ta nggya-nggya.
လက်ရှိရွေးချယ်ထားမှု
Matyu 5: AlisIRonNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Wycliffe Bible Translators, Inc. and © The Nigeria Bible Translation Trust 2018